2
Dyawat si Pablo na manga muna Apostolés
1 Paglabay da na sampulu' tag upat ya umay lekat adti pagpangintu-u ku, lyumiku' kami si Bérnabi adti syudad na Jérusalim, aw nyagad uman kanami si Tito. 2 Ya du-an nan na nyadtu kami ni Jérusalim kay migpa-ede' kanak ya Tyumanem na madtu aku. Pagdateng nami, migkatipun kami olo' ya manga utaw na magdadumala͡ay sa manga nyampangintu-u. Pigtubag ku ya madég na usip nilan kanak. Aw nyabus ku pigdandan adti asdangan nilan na si Kristu ya pigpalna-u ku adti manga utaw na beke' na Judiyu. Kay yan ya kaliman ku na dili' nilan pagmalaten ya pagpalna-u ku. 3 Aw ya syampetan nan, kyatutukan silan sa pig-imo' ku. Aw wala' silan gelgel na tuli-en galu si Tito, kay beke' sakanan na Judiyu * aw tyumande' silan na wala' ya labet nan sa katanem na Judiyu aw yanagaw wala' sakanan tuli-a. 4 Manang awun manga Judiyu na nyangintu-u la kunu kan Kristu aw adti anenganeng ku olo' silan migtallalingu. Ya tud nilan manilib adti katipun nami * aw ya kaliman nilan allangen na kanilan uldin * ya kadég tadun na nyangintu-u, pangkay pigpaluwa' da kitadun ni Kristu Jisus lekat adti pagdumala na uldin na manga Judiyu. Aw piggelgel nilan na magpatuli' ya manga beke' na Judiyu, 5 manang wala' nami ka͡agadi ya pigpalna-u nilan pangkay sambuk. Kay yan ya kaliman nami na wala' ya makadali' na galu' adti pagpalna-u nami aw yanagaw dili' magkalat ya pagpangintu-u mayu.
6 Manang dun ni katipun adti Jérusalim, ya kadég na magdadumala͡ay sa manga nyampangintu-u, tyande' nilan ya piglong ku aw wala' ya pigdugang nilan adti ubat-ubat ku kan Kristu. Aw pangkay silan ya gayed ni Kristu pigpalna-uwan idtu muna aw silan da ya magdadumala͡ay sa manga nyampangintu-u dun ni Jérusalim, manang wala' ya kamulamula ku adti asdangan nilan kay wala' ya pigkibang na Tyumanem. 7 Kya-ede-an da nilan na aku ya pigtaliguwan na Tyumanem na un magpalna-u sa madyaw na ubat-ubat kan Kristu adti manga utaw na beke' na Judiyu, liwan uman ni Pédro na pigtaliguwan nan sa pagpalna-u adti manga utaw na Judiyu. 8 Kay ya Tyumanem na migsugu' kan Pédro adti manga Judiyu, yan uman ya migsugu' kanak adti manga utaw na beke' na Judiyu. 9 Aw adti katipun yan, dun si Santiago, * aw si Pédro, aw si Juan, na alag silan magdadumala͡ay sa manga utaw na nyangintu-u. Pagdengeg nilan sa piglong ku, kya-ede-an nilan na pigpakadyaw na Tyumanem ya imo-unun ku, aw pig-alimanu kami nilan si Bérnabi kay yan ya pangilala na migsambuk da ya kanami anenganeng. Aw pigdawat kami nilan dala ya palna-u nami. Yanagaw tyumande' silan na magpadeleg kami magpalna-u sa manga beke' na Judiyu, aw silan ya magpadeleg magpalna-u sa manga Judiyu. 10 Sambuk olo' ya pigsekat nilan kanami, na tabangan nami ya manga utaw na to-o migkapelek. * Aw yan ya to-o ku kaliman ya pagtabang kanilan.
Ya pagsagda ni Pablo kan Pédro
11 Na, lyumabay da ya manga allaw aw si Pédro nyadi tampid nami na mangintu-uway asini syudad na Antiyokiya. Manang talana nan asini, awun piglong ku kanan, kay dili' madyaw ya pig-imo' nan: 12 Kay pagdateng nan, madyaw ya bet nan adti manga utaw na beke' na Judiyu pangkay wala' silan tuli-a, aw gayed sakanan syumambuk kanilan kyuman. Manang pagdateng da na manga Judiyu na nyangintu-u lekat adti Jérusalim, kya-ede-an ni Pédro na pigsugu' silan ni Santiago aw yanagaw kyuman da sakanan baling adti sayid na manga Judiyu. Wala' da sakanan kan adti sayid na manga beke' na Judiyu, kay nyallek si Pédro pagaw kalaten ya dengeg nan adti manga Judiyu, * kay adti anenganeng na eped kanilan, beke' na tengteng mangintu-uway kan Kristu ya manga utaw na wala' pagdalug sa katanem na Judiyu sa pagpatuli'. 13 Aw wala' kadugay migsiling uman kan Pédro ya madég na Judiyu na nyangintu-u, aw wala' da silan pagsambuk kyuman adti tampid na manga beke' na Judiyu. Pangkay si Bérnabi nyagagad sa pig-imo' nilan. 14 Aw pagka-ede' da ku na wala' da nilan daluga ya tengteng palna-u dun ni madyaw na ubat-ubat kan Kristu, piglongan ku si Pédro adti asdangan na kadég nilan, law ku, “Kay Pédro na inulug ku, asuntu na nyangintu-u la kaw kan Kristu, pig-ayawan da mu ya katanem ta na Judiyu, aw liwan da kaw adun na utaw na beke' na Judiyu. Yanagaw, kun dili' da kaw makasambuk sa manga beke' na Judiyu asuntu na wala' nilan daluga ya uldin ta, na, siling da na pigleges mu silan dumalug sa uldin na manga Judiyu. 15 Kay Pédro, Judiyu kita aw ya mangkatikadeng ta alag Judiyu, aw silan ya migpalna-u kanate' sa Uldin tadun. Wala' pag-unawa ya katanem tadun aw ya manga utaw na beke' na Judiyu kay wala' atagan kanilan ya Uldin. 16 Manang pangkay Judiyu kita, kya-ede-an da ta na beke' na pagdalug ta sa Uldin ya du-an na pigdawat kita na Tyumanem siling na wala' ya sala'. Kay pigdawat nan ya manga utaw asuntu sa pagsalig nilan sa pig-imo' ni Jisus Kristu. Yanagaw, kay Pédro, pigdawat kita na Tyumanem magi sa pagpangintu-u ta kan Kristu, aw beke' na asuntu sa pagdalug ta sa Uldin. Kay kya-ede-an da ta na dili' na utaw mabatug tumanen ya kadakula' na Uldin pada dawaten sakanan na Tyumanem.” Yan ya piglong ku kan Pédro dun ni Antiyokiya.
17 Na, iman na eped na manga Judiyu kun nyakasala' kitadun kay pig-ayawan da tadun ya Uldin aw ya katanem na manga Judiyu aw yan da ya syaligan tadun ya pig-imo' ni Kristu pada dawaten kitadun na Tyumanem. Aw pagaw musip kanak ya eped na Judiyu, long nilan, “Asuntu na pig-ayawan da mayu ya Uldin aw dyumalug da kan Kristu, unu, liwan na si Kristu ya migdegdeg kamayu mag-imo' sa sala'?” Ya tubag ku kanilan, long ku, “Beke' nan!” 18 Kun lumiku' aku adti pagsalig sa katanem na manga Judiyu aw adti Uldin nilan na pig-ayawan da ku, na, dun da kabangal na aku nyakasala'. Manang dili' da ku liku-an.
19 Idtu muna, nyatibulluk aku dyumalug sa Uldin, manang adun da, kyalabetan da ku na dili' ku mabatug tumanen ya kadakula' na Uldin pada dawaten na Tyumanem, aw yan ya du-an nan na pig-ayawan da ku ya pagdalug sa Uldin. Aw adun da pigbetang ku adti ginawa ku na dalugun ku ya pagkaliman na Tyumanem. Yanagaw siling na utaw na nyatay da, maynan uman nyatay da ya kalim ku tumanen ya kadakula' na Uldin na manga Judiyu. Kay dun ni pagkamatay ni Kristu adti krus nyaka-agad da aku kanan, 20 aw pangkay utaw pa aku, manang kya-ede-an da ku na si Kristu yan ya nyeya' asini pagka-utawun ku. Kay dili' da ku agadan ya pagkaliman ku manang pigdalug da ku baling ya pagkaliman ni Kristu. Yanagaw, sa kadugay ku nyeya' asini tas na lupa', pigsaligan ku gayed ya Ise' na Tyumanem na si Jisus. Kay dakula' ya ginawa nan kanak aw pig-atag nan ya kanan pagka-utawun pada matay kalyu kanak. 21 Yanagaw dili' ku kataka͡an ya kallat na Tyumanem, kay kun dawaten nan ya manga utaw asuntu sa pagdalug nilan sa Uldin, syapadan da ya pagkamatay ni Kristu!