Ya Sulat ni Apostol Pablo
adti Manga Taga Galacia
1
Kay manga inulug na nyangintu-u kan Jisus Kristu:
1 Aku si Pablo ya migsulat adti kamayu. Sambuk aku na manga apostolés ni Kristu. Beke' na utaw ya nyamalli' kanak aw beke' uman na utaw ya migsugu' kanak adti manga eped na banwa. Yan baling ya nyamalli' kanak si Jisus Kristu aw ya Ama nan na Tyumanem na migmataw kan Kristu lekat adti pagkamatay nan. Aw silan ya migsugu' kanak adti manga eped na banwa. 2 Migsambuk ya anenganeng nami ya kadég na mangintu-uway na ini sayid ku aw pigpadala nami ya sulat ini aw pakalintapunun nami na un basa͡en adti kadég mayu na nyangintu-u kan Kristu dun ni probinsiya na Galacia.
3 Nyanawagtawag aku adti Tyumanem ya kanaten Ama aw si Jisus Kristu ya kanaten matas na pangulu na to-o nan kamu galu pagkallatan aw wala' ya kakallekan adti ginawa mayu. 4 Si Kristu yan ya mig-atag sa pagka-utawun nan na nya-imo' dugsu' aw nyatay sakanan asuntu sa manga sala' tadun, pada paluwa-en kitadun nan lekat adti pagdumala na malatay asini tas na lupa' adun na manga allaw yeiy, * kay yan ya dadan pigpalpa na Tyumanem ya Ama tadun. 5 Aw deyen na kadég na utaw ya Tyumanem na wala' ya katigkasan. Yan saba ya ma-imo'.
Wala' ya eped na madyaw na ubat-ubat, olo' da kan Kristu
6 To-o migkalat ya ginawa ku kay nyaksay da mayu pigtalikudan ya Tyumanem na yan ya nyamalli' kamayu na un meya' adti tampid nan na wala' ya katigkasan asuntu sa kallat ni Kristu. Aw yan baling ya dyalug mayu ya sangkamulu' na palna-u. 7 Wala' saba ya eped na palna-u na matinaw, olo' da kan Kristu, manang awun manga utaw adti kamayu na pigdali-an nilan na galu' ya ubat-ubat kan Kristu, kay kaliman nilan belengbelengen ya pagpangintu-u mayu. 8 Manang pangkay singalan ya mag-ubat-ubat sa galu', pangkay kun aku aw pangkay kun sugu-anen lekat adti tas na langit, aw kun sangkamulu' ya piglong nan aw beke' na siling na pigpalna-u nami kamayu idtu muna, ya utaw yan madyaw baling agbel sakanan na Tyumanem adti atulun na impirno na wala' ya katigkasan! 9 Yan ya piglong ku kamayu idtu muna aw salutun ku uman: Dyawat da mayu ya madyaw na ubat-ubat kan Kristu. Yanagaw kun awun utaw na magpalna-u sa sangkamulu' aw beke' na siling na pig-ubat-ubat nami, madyaw baling agbel na Tyumanem ya utaw yan adti atulun na impirno na wala' ya katigkasan!
10 Na, asuntu sa piglong ku yeiy, pagaw iman na manga utaw aw kaliman ku na saya' aku nilan, manang beke' nan saba ya tud ku ya saya' aku na utaw, kay ya Tyumanem yan ya magsaya' kanak. Kun ya tud ku ya saya' na manga utaw, beke' da aku kadi' na allang ni Kristu.
Lekat adti kan Kristu ya palna-u ni Pablo
11 Kay manga inulug ku na nyangintu-u, yan ya kaliman ku na ka-ede-an mayu na wala' lekat adti manga utaw ya madyaw na ubat-ubat kan Kristu na piglong ku kamayu idtu muna. 12 Wala' ku dengga adti utaw, aw beke' na utaw ya migpalna-u kanak. Si Jisus Kristu olo' ya migpa-ede' dun ni pagpakita' nan kanak. *
13 Dyengeg da mayu ya dadan pagka-utaw ku idtu muna sa pagdalug pa ku sa palna-u na manga utaw na Judiyu. * Pigpamulayaman ku to-o ya manga utaw na nyangintu-u kan Kristu aw wala' ku kallati, kay kaliman ku na mapnas silan pada wala' da ya maglong sa tingeg ni Kristu. 14 Yan ya pigbetang ku sa ginawa ku idtu muna, ya dumalug sa katanem aw palna-u na manga Judiyu. Sa kadég na manga pa-unawa ku na Judiyu, aku ya sambuk na nyakalambaw kanilan sa katadeng.
15-16 Manang dyumateng ya allaw na pigpakita' na Tyumanem kanak ya ise' nan na si Jisus na un ku paglongun ya madyaw na ubat-ubat kanan adti manga utaw na beke' na Judiyu. Aw asuntu sa dakula' na kallat na Tyumanem kanak, pigtani aku nan sa wala' pa aku ka͡utaw aw pigpamalli' aku nan na un ma-imo' sugu-anen nan. Pagkatigkas na pagpakita' nan kanak, wala' aku paninaw sa utaw na un magpalna-u kanak. 17 Aw wala' aku uman panaw adti Jérusalim na un magsekat sa palna-u na manga muna apostolés ni Jisus. Manang nyanaw aku baling adti probinsiya * na Arabiya, aw dun da aku pag-eya' taman sa allaw na lyumiku' aku adti lunsud na Damasko. 18 Lyumabay da ya tulungka͡umay lekat na allaw na pagpangintu-u ku, aw nyanaw aku adti syudad na Jérusalim, kay kaliman ku na magkakilala͡ay kami si Pédro*. Aw nyeya' aku adti sayid nan seled na sampulu' tag lima ya allaw. 19 Talana ku dun, wala' ya eped na apostolés na pigkita' ku olo' si Santiago na mangud ni Jisus Kristu.
20 Ya Tyumanem nyaka-ede' na beke' na galu' ya pigsulat ku kamayu.
21 Pagkatigkas yan, nyanaw aku adti probinsiya na Sirya aw probinsiya na Cilicia. * 22 Na, idtu na manga allaw yan, wala' pa aku kita͡a na manga utaw na migkatipun nyanimba kan Kristu adti probinsiya na Judiya. 23 Yan olo' ya gayed nilan dyengeg adti eped na manga utaw, na nya-uman da ya bet ku, law na manga utaw, “Yan saba ya utaw na nyandakep sa eped tadun idtu na muna asuntu sa pagpangintu-u tadun kan Kristu. Pangkay pigpakalat kitadun nan idtu na muna, manang adun, si Kristu la ya gayed nan pig-ubat-ubat.” 24 Yanagaw pigdeyen nilan ya Tyumanem asuntu na nyangintu-u la aku kan Kristu.