28
Si Pablo adti pulu' na Malta
1 Pagdateng da nami adti ligad, dyengeg nami na ya pulu' na dyatengan nami pigngalanan na Malta. 2 Aw to-o kami kyallatan na manga utaw na nyeya' dun. Migduluk silan sa atulun aw pigsanggila' kami nilan kay kyaniki-an kami asuntu na migpalekat da uman ya ulan.
3 Aw tyumabang uman si Pablo kanilan aw pig-imun nan ya sampisan ya kawuy na sasugung. Manang pagbetang nan dun ni atulun, awun lyumuwa' na ulud aw tigkan nan banga-a ya kamaw ni Pablo. 4 Aw ya manga utaw na nyeya' dun, pagkita' nilan sa ulud na nyatati' adti kamaw ni Pablo, migsigumudgumud silan, long nilan, “Ya utaw iyan nyakabunu' sa kanan eped. Aw pangkay nyakaluwa' adti dagat, manang kanan palad wala' da tumbayan na mataw pa.”
5 Manang pyamilipili ni Pablo ya ulud aw nyaka-agbel adti atulun, aw wala' si Pablo ka-unu. 6 Aw pyakatanawan nilan si Pablo kay iman nilan aw mabaga' ya kamaw nan, aw kun dili' yan, malukad aw matay da. Manang madugay ya pagtagad nilan aw wala' ya nya-imo' kanan na malat, yanagaw nya-uman ya kanilan anenganeng aw long nilan baling, “Sambuk sakanan na tyumanem!”
7 Na, ya baklayan yan pigtangkilan na lupa' ni Publiyo na yan ya malangkaw dun ni pulu'. Aw seled na tulungallaw, pigsanggila' kami nilan adti balay nan. 8 Na, kyedelan ya ama ni Publiyo. Aw yan ya magkedel nan, na gayed magkapasu' aw mag-intalun sa dugu'. Yanagaw pigkadtuwan ni Pablo adti tambi' nan aw pigbetang nan ya kanan palad adti tas na ulu ni Publiyo aw pyanawagtawagan nan adti Tyumanem. Aw dayaw sakanan kyaguli-an.
9 Aw yanagaw kyadtuwan kami na madég na utaw na pyangkedelan dun ni pulu'. Aw nyabus silan uman kyaguli-an. 10 Aw pyan-atagan kami nilan na madég na dala͡enen. Aw pagdateng na allaw na un da kami sumakay sa barko, dayaw kami nilan pyadala͡an na kanami kapelekan.
Ya pagpasinan nan Pablo adti Roma
11 Seled na tulumbulan ya pag-eya' nami adti Malta, aw tigkas yan, syumakay da kami uman sa sambuk na barko na migpasaliben dun ni suluk na pulu' seled na manga bulan na maniki' ya banwa. * Na, ya barko yeiy, lekat adti Aléksandriya aw pyangilala͡an dun ni dulung nan na duwa ya inutaw na pingin. 12 Aw pagsakay da nami lekat adti Malta, dyumunggu' kami adti syudad na Siracusa, aw nyapit kami seled na tulungallaw. 13 Lekat dun, syumakay uman kami aw dyumateng adti pantalan na Régiyo, banwa na Italiya. Aw pagkasalut na allaw tyumambel ya samet lekat adti Aprika, aw nyabatug ya pagpadeleg nami, aw ya kadwa na allaw nyakadateng kami adti dunggu-anan na syudad na Putéyoli aw dun da kami panog. 14 Adti Putéyoli awun bagu nami pigkilala na mangintu-uway aw nyanginayu' silan kanami na meya' pa kami adti kanilan seled na pitungallaw, aw tigkas yan, nyindeg kami pasinan adti dakula' na syudad na Roma.
15 Pagdengeg na manga mangintu-uway dun ni Roma na syuminan da kami adti kanilan, awun syumungun kanami adti palingki dun ni dalan na Apiyo, aw eped kanilan syumungun kanami adti banwa na pigngalanan na Tulu ya Bantukanan. Pagkita' ni Pablo kanilan, pigpasalamatan nan ya Tyumanem aw migkabagseg da ya ginawa nan.
Si Pablo adti Roma
16 Na, pagdateng da nami adti syudad na Roma, pigtumbay kan Pablo ya pangkay ayin sakanan pag-eya' manang awun sundalu na gayed migtunggu' kanan.
17 Paglabay da na tulungallaw, pigpatawag ni Pablo ya manga mangkatas na manga Judiyu na awun ni Roma. Pagkatipun da nilan adti kanan, migpalekat si Pablo migdandanen kanilan, long nan, “Kay manga kadégan ku na Judiyu, yeiy ya kanak kya-agiyan adti Jérusalim: Pangkay wala' ya nya-imo' ku na sala' adti kanaten eped na manga Judiyu aw adti manga katanem na kanaten tyugbulan, manang pigpadakep aku adti Jérusalim aw pigtumbay aku adti gubirno na taga Roma. 18 Aw pagkatigkas aku bastigalen na manga taga Roma, kaliman nilan paluwa-en aku kay wala' ya puliba na umba' aku ukuman patayen. 19 Manang wala' dawata na manga Judiyu ya pagbaya' nilan. Yanagaw nyaleges aku syumekat na usayan baling ni César ya limanda kanak, pangkay wala' ya limanda ku sa kanak adti manga Judiyu. 20 Pigpatawag ta kamu adun na un aku magpakilala kamayu aw paglongun ta kamu na yan ya du-an nan na pigpusasan aku na sangkali' yeiy, asuntu olo' sa kanak pyangintu-uwan na yan ya pig-iman na Isra-él.”
21 Manang miglong silan kan Pablo, “Wala' ya nyadawat nami na sulat lekat adti banwa na Judiya na pigbetangan na kanmu ngalan, aw wala' ya malatay na piglong kanmu na manga inulug tadun na Judiyu na dyumateng asini Roma. 22 Manang kaliman nami denggen ya kanmu tingeg pada ka-ede-an nami ya kanmu anenganeng. Kay kya-ede-an nami na pangkay ayin kunu na banwa, madég ya miglong sa malat adti partido na pig-akupan mu.”
23 Yanagaw migpakang si Pablo aw ya mangkatas na manga Judiyu kun unu allawa ya pagkatipun. Aw pagdateng na allaw yan, migkatipun da ya to-o madég na utaw dun ni pig-eya-an ni Pablo, aw migpalna-u sakanan kanilan lekat na maselem menda' sa gabi. Pig-ubat-ubat nan kanilan ya Paghari' na Tyumanem, aw kun singalan si Jisus, dun ni sulat ni Moysis aw manga propita, pada mangintu-u silan kan Jisus. 24 Aw awun eped kanilan na nyangintu-u sa piglong nan, manang ya eped wala'. 25 Aw asuntu na wala' pag-unawa ya anenganeng nilan sa palna-u ni Pablo, yanagaw awun pa piglong ni Pablo kanilan sa wala' pa silan uli', law nan, “Matinaw agaw ya piglong na Ispiritu na Tyumanem adti kanaten tyugbulan asini muna, kay pigpasulat nan kan Isayas na propita, law nan,
26 ‘Kadtuwi ya manga utaw yeiy aw paglonga silan:
“Pangkay gayed mayu pyakanyegan,
manang wala' mayu kalabeti,
aw pangkay gayed mayu pyaninaw,
manang dili' mayu kita-en.
27 “Mangkategel da ya anenganeng na manga utaw yeiy.
Pigsengseng da nilan ya kanilan talinga
pada dili' makadengeg,
aw pigpileng da nilan ya kanilan mata
pagaw ka-ede-an nilan ya matinaw
aw pagaw magselsel silan
aw lanasen ya manga sala' nilan.” ’*
28 “Yanagaw pada ka-ede-an mayu, pigsugu' na Tyumanem na ubat-ubatan da ya manga Héntil pada mabatug silan paluwa-en lekat adti pagpa-emel-emel nan aw matagtun da nilan ya ginawa na wala' ya tyamanan. Kay silan saba ya magpakanyeg.” 29 [Pagkatigkas da ni Pablo miglong, nyan-uli' ya manga Judiyu aw to-o silan mig-ayil sa piglong nan.]
30 Seled na duwangka͡umay, nyeya' si Pablo adti balay na pagbayadan nan. Aw pangkay singan ya mawun ni kanan, pagpapaniken nan 31 aw pig-ubat-ubat nan kanilan ya Paghari' na Tyumanem aw pigpalna-u nan si Jisus Kristu na yan ya pangulu. Wala' ya kakallekan ni Pablo mag-ubat-ubat kanilan, aw wala' ya nyaka-ampang sa pag-ubat-ubat nan.