Lukas 27

Ya pagsakay ni Pablo sa barko pasinan adti Roma

¹ Na, pagdateng da na allaw na un da kami sumakay sa barko pasinan adti Italia, pigtumbay da adti kan Julio si Pablo aw ya manga eped na nyakalabusu. Na, si Julio sambuk na manga cénturiyon na miggagad sa manga sundalu na Impirador na nyasakup adti kohort na pigngalanan na Agusto. ² Aw nyagad kanami uman si Aristarko na taga Téssalonika, probinsiya na Macédonya. Ya barko na pigsakayan nami un da lumiku' adti Adramitiyo. Na, yan ya palpa na kapitan sa barko na un māpit adti manga lunsud na probinsiya na Asia na awun pantalan dun ni ligad na dagat.

³ Pagkasalut na allaw, dyumunggu' kami adti Sidon. Aw nyallat si Julio kan Pablo aw pigpapanog nan lekat adti barko na un lumaba' sa manga ubaybay nan dun ni syudad pada makatabang silan kanan sa manga kapelekan nan. ⁴ Pagkatigkas yan, syumakay da uman kami, manang gayed pigsungun na mabandes na samet. Yanagaw pig-aking na kapitan ya barko na kasalibenan na pulu' na Cipré. ⁵ Aw migpaligad ya syakayan nami dun ni manga probinsiya na Ciliciya aw Pampiliya aw dyumunggu' adti lunsud na Mira probinsiya na Liciya. ⁶ Aw dun ni Mira, kyinita' na cénturiyon ya dakula' na barko na lekat adti syudad na Aléksandriya na un da manaw pasinan adti banwa na Italiya. Yanagaw adtu la kami nan alina.

⁷ Na, seled na madég na allaw malumbanat ya pagpalaguy na barko kay gayed syumungsung kanami ya mabandes na samet. Aw wala' kami paka-apit adti lunsud na Cinido asuntu sa samet, yanagaw piglabayan nami. Aw pig-aking na kapitan ya barko adti kawala pada kasalibenan na pulu' na Krita. Aw lyabayan nami ya séngé' na lupa' na pigngalanan na Salmon. ⁸ Aw migkayad kami dun ni ligad na Krita, aw pangkay to-o malug ya pagpanaw nami, manang tabedtabed dyumateng kami adti tagu-anan na malapit adti lunsud na Lasiya. Aw yan ya ngalan na tagu-anan yan: Madyaw na Ebenganan.

⁹ Na, nyasapad da ya madég na allaw, aw dyumateng da ya manga bulan na dili' madyaw agiyan ya tas na dagat. Yanagaw pigbalawbalaw ni Pablo ya kapitan sa barko aw ya manga eped nan, ¹⁰ long nan, “Kay Sir, kun padelegen tadun ya panaw, pagaw awun pa-isabag naten na malat aw beke' olo' na barko aw dala tadun ya masapad manang mabus pa kitadun uman mapnas.”

^11-12 Manang wala' nilan pakanyegi ya piglong ni Pablo, kay adti anenganeng na kapitan aw ka-epedanan nan, ya pigka-eya-an nilan dili' umba' ebengan seled na manga bulan na Nobiyémbri taman ni Pibriro. Yanagaw migboto silan na padelegen ya panaw na un pa galu datengen ya ebenganan na Fénisé dun pa ni pulu' na Krita, kay kun timpo na maniki' yan ya madyaw pa pasalibenan sa samet. Aw yan ya pagbaya' na cénturiyon na dalugun ya pagkaliman na tagtun sa barko aw kapitan.

Ya bagyu'

¹³ Na, pagtambel da na tagbi' na samet lekat adti balabagan apit adti kawala, iman na kapitan aw manga eped nan aw mabatug da ya panaw nilan. Yanagaw pigbeklas nilan ya angkla aw pigkayadan da nilan ya barko migpaligad dun ni pulu' na Krita. ¹⁴ Manang wala' kadugay, to-o tyumambel ya mabandes na samet lekat adti lupa' na apit ni kalintu. ¹⁵ Aw kyasaban ya syakayan nami aw dili' mabatug salumpaken ya samet, yanagaw pigdaladala gayed na samet ya barko. ¹⁶ Aw nyanaliben kami adti tagbi' na pulu' na Ca͡uda. Aw pangkay migkalug kami, manang nyabatug nami pigbeklas ya buti ¹⁷ aw pigtibagsegan nilan pig-engat adti tas pada dili' magkalat. Tigkas yan, pig-eket nilan ya manga mabegat na lubid adti lawas na barko aw pigpaguyud nilan adti dagat pada alinde' ya palaguy na barko. Aw nyallek silan pagaw danggay silan adti manga kapantadan na Sirté na malapit adti ligad na Libya, yanagaw piglulun nilan ya dakula' na kayab aw pig-aking nilan ya barko, aw nyatulud da na samet.

¹⁸ Pagkasalut na allaw, asuntu na to-o la mabandes ya baled, pigpalekat nilan pyan-agbel adti dagat ya eped na manga dala pada pakaganen ya barko. ¹⁹ Aw pagkatlu na allaw, pigpan-agbel nilan ya manga pagkana' na barko. ²⁰ Aw seled na madég na allaw, wala' nami kita-a ya sega aw manga bitun, aw wala' tangke' ya bagyu'. Aw wala' da nami imana na mataw pa kami.

²¹ Na, madugay da wala' na manga utaw kabatug ya kuman. Yanagaw dyumulud si Pablo adti kapitan aw manga eped nan aw miglong, “Kay Sir, kun migpakanyeg pa kamu galu kanak idtu na wala' pa kitadun indeg adti Krita, dili' tadun galu kagamakan ya maynini na kalugan aw dili' galu malagak ya dala tadun. ²² Manang sekaten ku adun na pakabagsega ya ginawa mayu, kay wala' ya sambuk na un matay kamayu. Yan olo' ya magkalat ya barko. ²³ Kya-ede-an da ku yeiy kay kumanggabi awun nyadi tampid ku na anghil na pigsugu' na Tyumanem na tagtun kanak na pigsimba ku. ²⁴ Aw piglongan aku nan, ‘Kay Pablo, dili' kaw magkallek. Asuntu sa kallat na Tyumanem kamayu, mataw ya kadég mayu na asini seled na barko. Aw usayan pa kaw adti asdangan ni César.’ ²⁵ Yan ya pigpa-ede' kanak na Tyumanem. Yanagaw, pakabagsega ya ginawa mayu, kay dakula' ya pagsalig ku sa Tyumanem na tumanen nan ya kanan piglong kanak! ²⁶ Manang danggay kitadun seiy adti sambuk na pulu'.”

Ya pagkalat na barko

²⁷ Na, pagdateng da na sampulu' tag-upat ya gabi, nyakatulud na samet ya barko aw nyakatalipag sa Dagat na Adra. Pagkatenga' da na gabi, kyapalumati-an da na manga magtalabahuway dun ni barko na malapit da silan makadanggay adti ligad. ²⁸ Yanagaw pigtanda' nilan ya kalalem na dagat, aw manga kaluwa͡anen depa ya kalalem na kyabetangan nami. Wala' kadugay, uman da nilan pigtanda' aw dakman sampulu' tag lima ka depa. ²⁹ Aw nyallek silan pagaw makaladgad ya aba na barko dun ni manga dakula' na batu. Yanagaw pig-ulug nilan ya upat ya angkla lekat adti ulin na barko, aw pigtagadan da nilan na maksay galu mallaw. ³⁰ Manang ya manga magtalabahuway, kaliman nilan ayawan da ya barko aw pabaya-an ya eped na manga utaw, yanagaw pigtonton nilan ya buti adti dagat sallong kunu mig-ulug silan sa manga angkla lekat adti dulung na barko. ³¹ Pagkita' ni Pablo sa pig-imo' nilan, piglongan nan ya cénturiyon aw ya manga sundalu, law nan, “Ya manga utaw yan, kun dili' silan mepes asini barko, wala' kalaw ya un kamayu mataw!” ³² Yanagaw pig-utud na manga sundalu ya manga lubid na pig-eket sa buti aw pigpabaya-an da nilan na manud.

³³ Paka͡allawunun da, nyanginayu' si Pablo sa kadég na manga utaw na kuman da galu silan, long nan, “Wala' kamu kan seled na sampulu' pa tag upat ya gabi kay gayed kamu migtagad kun kinunu teneng ya bagyu' ini. ³⁴ Na, kan da kamu adun, pada magkabagseg ya lawas mayu. Kay mataw pa kamu saba, aw piglongan ta kamu na pangkay sambulus ya lugay mayu dili' makamang.”

³⁵ Pagkatigkas ni Pablo maglong seiy, kyumamang sakanan sa pan, aw migpasalamat adti Tyumanem dun ni asdangan na kadég. Tigkas yan, pigtenga-tenga' nan ya pan aw kyuman sakanan. ³⁶ Pagkita' da nilan kan Pablo na kyuman, migkagan da ya ginawa na kadég nilan aw kyuman silan uman. ³⁷ Na, ya kadég nami na dun ni barko, duwang gatus aw kapituwan tag enem. ³⁸ Aw sa nyangkabiyag da silan, pyan-ulug da nilan ya dala na trigu adti dagat pada pakaganen pa ya barko.

³⁹ Na, pagkalalamdag da, wala' nilan ka-ede-i kun unu lupa-a ya dyatengan nilan, manang awun kyinita' nilan na sulluk na awun baklayan. Aw kaliman nilan na makadanggay ya barko dun ni baklayan. ⁴⁰ Yanagaw pyan-utud nilan ya manga lubid na pig-eket sa manga angkla. Aw pig-ubad nilan uman ya manga pig-eket sa duwa ya bugsay na palangad pag-aking-aking sa barko, aw pig-ulad nilan ya tagbi' na kayab dun ni dulung. Aw syuminan da ya barko adti baklayan. ⁴¹ Manang nyakagalgal ya aba na barko dun ni kababawan aw wala' da esen. Aw asuntu na pigdaplakan na baled, nyaleped ya lawas na barko aw nya-agba' ya ulin.

⁴² Na, un da galu pamatayen na manga sundalu ya manga utaw na nyakalabusu pagaw awun mangkapay kanilan aw makapalaguy. ⁴³ Manang pigbalabagan silan na cénturiyon kay kaliman nan tamengan si Pablo. Aw pigsugu' na cénturiyon ya kadég na matadeng magkapay, law nan, “Kawas da kamu adti dagat aw kapay kamu taman adti ligad.” ⁴⁴ Aw piglongan nan ya nyasama', “Dalug kamu kanilan aw pan-awid kamu sa tabla na nyangka-agba' di barko.” Aw yanagaw ya kadég nami nyakadateng adti ligad na wala' ya nya-unu.