Samuyɛɛlɩ takayaɣ naalɛ ñɩŋga
Tɔm kiheytu
Ɖooo lɛ, takayaɣ kanɛ nɛ kajalaɣ ñɩŋga paakɛ takayaɣ kʋɖʋmaɣ. Payaɣaɣ-kɛ kajalaɣ ɛyʋ wazaɣ tʋ weyi pacalɩ maʋ ɛ-yɩɖɛ ka-taa yɔ ɛ-yɩɖɛ. Ɛnʋʋ lɛ \wglɔɔyaɣdʋ Samuyɛɛlɩ. Samuyɛɛlɩ takayaɣ naalɛ ñɩŋga kanɛ ka-taa lɛ, wiyaʋ Daaviidi tɔm pɛkɛdaa kpem . (.) 2 Samuyɛɛlɩ 1-5 taa ɛsna mbʋ Daaviidi tɔɔ kewiyaɣ yɔ. Tɔm ndʋ, 1Samuyɛɛlɩ 16 taa papazɩ-tʋ kɛdʋʋ. (.) 2 Samuyɛɛlɩ 6-8 Pɛkɛdɩɣ Daaviidi tɔm se, ɛnʋʋ lɛ weyi ɛ-yɔɔ Ɛsɔ tɩŋnaa nɛ e-kewiyaɣ wɛɛ Izirɛɛlɩ siŋŋ yɔ. (.) 2 Samuyɛɛlɩ 9-20 taa pɛkɛdɩɣ ɛsɩna mbʋ Daaviidi pɩyalaa nabɛyɛ nɛ ɛ-sɔɔjanaa nabɛyɛ pakʋyʋʋ ɖama yɔɔ se pamʋ kewiyaɣ yɔ. (.) 2 Samuyɛɛlɩ 21-24 taa lɛ, patasɩ kɛdʋʋ Daaviidi tɔm natʋyʋ natʋyʋ. Pɛkɛdɩ ɛ-tɔm nɛ halɩ pɩkɔɔ pɩtalɩ awiya takayaɣ kajalaɣ ñɩŋga ñʋʋ naalɛ ñɩŋgʋ taa. Pɛkɛdɩ Daaviidi tɔm se ɛnʋʋ lɛ wiyaʋ weyi Ɛsɔ sɔɔlɩ-ɩ nɛ piɖɛɣni-i yɔ. Kajalaɣ lɛ, ɛɛkɛ hadɛ kiŋ cejewe taa ñɩma wiyaʋ (ñʋʋ 2 ñɩŋgʋ), ɛpɩsɩ ɖɔɖɔ hayi kiŋ ñɩna wiyaʋ (5.1-5). Mbʋʋ ɛkpɛndɩ ɛjaɖɛ nɛ ɖɩkɛ kʋɖʋmɖɩyɛ. Eyeba nɛ Yeruusalɛm tɛtʋ kɛ ɛjaɖɛ nɖɩ ɖɩ-taa tɛtʋ sɔsɔtʋ, nɛ pɔkɔɔ payaa-tʋ se "Daaviidi tɛtʋ". Ɛwoni Ɛsɔ nɔɔ haʋ aɖakaɣ nɛ ɛsɩɩ tɩ-taa, ka-taa pɛ kpatanaa mba pɔ-yɔɔ pama paɣtʋ yɔ, pɛwɛɛ, Ɛsɔ cɛlɩnɩ kpatanaa mba. Mbʋ yebina nɛ Ɛsɔ wɛɛ Yeruusalɛm (ɩcɔnɩ 5.6-6.23). Daaviidi kɛ awiya wena atɔɔ kewiyaɣ nɛ akazɩ a-piya yɔ a-taa lɛlʋ (ñʋʋ 7 ñɩŋgʋ). Pʋbʋ wayɩ lɛ, pɩwɛɛ se ɩtɩlɩ se Daaviidi kɛ wiyaʋ weyi ɛlabɩ kɩwɛɛkɩm siŋŋ yɔ. Ɛkpaɣ ɛ-sɔɔjanaa taa lɛlʋ halʋ nɛ eyele pakʋ ɛ́lɛ́ (ñʋʋ 11 ñɩŋgʋ taa). Daaviidi nɩ ndʋ \wg lɔɔyaɣdʋ Naataɣ(Naataanɩ) heyi-i pʋ-tɔm taa yɔ, nɛ piyele Ɛsɔ kpeɣ-i. (ñʋʋ 12 ñɩŋgʋ taa). Pekpeɣ wiyaʋ Daaviidi lɛ, ɛnʋ ɖɔɖɔ ñekpeɣ ɛ-pɩyalʋ Abisalom (ñʋʋ 14 ñɩŋgʋ taa). Ɛlɛ, kɩwɛɛkɩm wɛnɩ kazʋwa (12-10-14). Lɛɛlɛɛyɔ, ɛyaa kʋʋ sʋ Daaviidi hɔʋ taa ɛzɩ pamaʋ 2Samʋyɛɛlɩ 9-1Rois 2 taa yɔ. Pɛkɛdɩ you ŋgʋ kɩwɛ Daaviidi pɩyalaa hɛkʋ taa yɔ, nɛ ŋgʋ kɩwɛ ɛ-sɔɔjanaa sɔsaa Yowaabɩ nɛ Abɩnɛɛrɩ pɛ-hɛkʋ taa yɔ, kʋ-tɔm siŋŋ. Pawɩlɩɣ-ɖʋ tɔm nɖʋ tɩ-taa ɛsna mbʋ pɩwɛ hɔʋ kʋɖʋmʋʋ yaa ɛjaɖɛ kʋɖʋmɖɩyɛ taa ñɩma kaɖɛ se pɛkpɛndɩ nɛ pacaɣ wezuu yɔ. Lɔɔyɩsɩdɩnaa Naataɣ nɛ Gaadɩ patasɩnɩ wiyaʋ Daaviidi tɔm. Ɖɔɖɔ lɛ, mba heyaɣnɩ-ɩ mbʋ Ɛsɔ ɖʋwa se ɛlakɩ yɔ, nɛ pakalɩɣ-ɩ nɛ Ɛsɔ nɔɔ. Daaviidi kɔm ɛcaɣ e-kewiyaɣ kpelaɣ yɔɔ camɩyɛ Izirɛɛlɩ ɛjaɖɛ tɩŋa yɔɔ lɛ, ɛyaa pɔzʋʋ se, ɛsɩna Kɩpaɣlʋ Ɛsɔ wɛɣ ɛ-samaɣ hɛkʋ taa? Daaviidi ɖʋwa se ɛmaɣ-ɩ ɖɩɣa ŋga kɛwɛ ɖɔŋ yɔ. Ɛlɛ, lɔɔyaɣdʋ Naataɣ wolo nɛ eheyi-i se, Ɛsɔ maɣnɩ ɛnʋʋ wiyaʋ Daaviidi ɖɩɣa. Pʋ-tɔbʋʋ se, hɔʋ ŋgʋ kɩ-taa kewiyaɣ weɣ tam yɔ. Pɔyɔɔdɩ pʋ-tɔm ñʋʋ 7 ñɩŋgʋ taa. Tɔm tʋnɛ, tɩwɛ wazaɣ pɩtɩɩfɛyɩ. Ɛsɔ haɣnɩ ɛyʋ wezuu, ɛnʋ lakɩnɩ ɖɔɖɔ mbʋ ɛkaɣ kɛʋ yɔ, paa pɩɩtɩɩkɛ wiyaʋ.