31
Sawʋlɩ sɩm tɔm
1 Filisitii ñɩma kʋyɩ Izirɛɛlɩ ñɩma yɔɔ lɛ, pɔɖɔɔnɩ-wɛ nɛ pakʋ pakʋ pa-taa sakɩyɛ Gilibowaa pʋʋ a taa, 2 nɛ piyele pɛwɛɛ Sawʋlɩ nɛ ɛ-pɩyalaa pa-wayɩ nɛ pɔkɔɔ pakʋ Yoonaataanɩ nɛ Avinaadaavɩ nɛ Malikii Suwa. Mbaa lɛ Sawʋlɩ pɩyalaa. 3 Pɩlabɩ ḿbʋ lɛ, you yuŋ wizini Sawʋlɩ yɔɔ. Ɛ nɛ tɔŋ tɔyaa pana ɖama lɛ, sɔɔndʋ kpa-ɩ siŋŋ. 4 Peeye eheyi weyi ɛsɩɣlɩɣ e-you wondu yɔ se, ɛ́lɛ ɛkpɛɛ ɛ́lɛ sɩɣa nɛ ɛsɔbɩ-ɩ nɛ Filisitii ñɩma mba pɛkɛ kɩtɛpɛlɩŋ yɔ, pataakɔɔ pɔsɔbɩɩ sɩɣa nɛ paɖʋ-ɩ fɛyɛ. Ɛyɔɔdɩ mbʋ lɛ, sɔɔndʋ kpa ɛ́lɛ siŋŋ nɛ ɛ́lɛ kizi. Ɖɩnɛɛ Sawʋlɩ kpaɣ ɛ-maɣmaɣ ɛ-sɩɣa nɛ eyele ɛ-tɩ nɛ ɛtɔlɩ kɔ-yɔɔ. 5 Weyi ɛsɩɣlaɣ-ɩ e-you wondu yɔ, ɛna ɛsɩbɩ mbʋ lɛ, ɛ́lɛ ñeyele ɛ-tɩ ɖɔɖɔ nɛ ɛtɔlɩ ɛ-sɩɣa yɔɔ nɛ ɛsɩ ɖɔɖɔ. 6 Mbʋʋ Sawʋlɩ nɛ ɛ-pɩyalaa naadozo nɛ weyi ɛsɩɣlaɣ-ɩ e-you wondu yɔ nɛ ɛ-wayɩ ñɩma tɩŋa pasɩbɩ pa-tɩŋa kɩyakʋ kʋɖʋmʋʋ.
7 Izirɛɛlɩ ñɩma mba paawɛ kajalaŋa nɛ Yɔɔrɩdaŋ pɔɔ pɔ-hɔɔlʋʋ taa yɔ, pɔkɔm pana se Izirɛɛlɩ ɛyaa sewa nɛ Sawʋlɩ nɛ ɛ-pɩyalaa pasɩ lɛ, peyele pɛ-tɛtʋ ndɩ ndɩ nɛ pese ɖɔɖɔ nɛ piyele Filisitii ñɩma wolo pacaɣ.
8 Kifema lɛ, Filisitii ñɩma cɔʋ sɩɖaa yɔɔ se pakpaɣ mbʋ pe-liu wɛɛ yɔ. Pɔcɔwaɣ ḿbʋ lɛ, pamaɣnɩ Sawʋlɩ nɛ ɛ-pɩyalaa naadozo, pasɩbɩ Gilibowaa pʋʋ taa. 9 Peeye pɛsɛtɩ ɛ-ñʋʋ nɛ pɔhɔzɩ e-you wondu. Pʋwayɩ lɛ, pakpaɣ nɛ pɔcɔnɩ mbaa Filisitii ñɩma pɛ-ɛjaɖɛ tɩŋa nɛ posusuu pa-wabʋ ḿbʋ pʋ-tɔm nɛ pɩkpɛndɩnɩ pa-agɔlɩma kuduyiŋ tɛɛ nɛ samaɣ taa. 10 Palabɩ ḿbʋ lɛ, powoni Sawʋlɩ you wondu ńdʋ nɛ pasɩɩ pa-agɔlɩma Asɩtaarɩtɩwaa kuduyuu tɛɛ nɛ piyele pɔhɔkɩ e-pilimiye nɛ Beyitiseyaanɩ tɛtʋ b koloŋa.
11 Yaavɛɛsɩ tɛtʋ ndʋ tɩwɛ Gaalaadɩ egeetiye taa yɔ, tɩ-taa ñɩma kɔm panɩɩ ɛzɩma mbʋ Filisitii ñɩma labɩ Sawʋlɩ yɔ lɛ, 12 pa-taa sɔdɩŋ tɩŋa kʋyɩ pakpaɣ nʋmɔʋ nɛ pɔɖɔ ɖoó nɛ a-tɛɛ pilim nɛ powolo Beyitiseyaanɩ tɛtʋ koloŋa yɔɔ nɛ pɛyɛɖɩ Sawʋlɩ pilimiye nɛ e-piya ñɩna. Pʋwayɩ lɛ, papɩsɩ Yaavɛɛsɩ peeye nɛ pɔsɔbɩ-yɛ miŋ 13 nɛ piyele pakpaɣ pɔ-mɔɔ nɛ pepi peeye tɩʋ nakʋyʋ tɛɛ nɛ pɔhɔkɩ nɔɔ kɩyakɩŋ lʋbɛ (7).