30
Amalɛɛkɩ ñɩma yɔkʋʋ Cikɩlaagɩ tɛtʋ yɔ
1 Kɩyakʋ tozo ñɩŋgʋ wiye lɛ, Daaviidi nɛ ɛ-ɛyaa patalɩ Cikɩlaagɩ tɛtʋ a taa. Ŋgʋ, Amalɛɛkɩ ñɩma kakʋyɩ mba pɛwɛ Yuuda hɔɔlʋʋ taa nɛ hadɛ kiŋ yɔ, nɛ Cikɩlaagɩ tɛtʋ taa ñɩma pɔ-yɔɔ nɛ pɔyɔkɩ-tʋ nɛ pɔsɔbɩ-tʋ miŋ. 2 Paakpa tɩ-taa halaa nɛ tɩ-aa ñɩma lɛlaa tɩŋa, sɔsaa nɛ piya nɛ papɩsɩ-wɛ yomaa. Ɛlɛ, patakʋ pa-taa nɔɔyʋ. Paakpaɣ-wɛ nɛ pɛkpɛndɩnɩ-wɛ nɛ pɛɖɛɛ pa-nʋmɔʋ. 3 Daaviidi nɛ ɛ-ɛyaa pɔkɔm patalɩ tɛtʋ ńdʋ tɩ-taa lɛ, pamaɣnɩ pɔsɔbɩ-tʋ miŋ nɛ piyele pakpaɣ tɩ-taa ñɩma halaa nɛ pa-pɩyalaa nɛ pɛ-pɛlaa nɛ pɛɖɛna. 4 Peeye, Daaviidi nɛ ɛ-ɛyaa ḿba, patʋlɩ nɔɔ nɛ pewili wooo nɛ halɩ pɩɖɛɛ-wɛ, pɩfɛyɩ wiluu ɖɔɖɔ. 5 Halɩ paakpɛndɩnɩ Daadiidi halaa ḿba pa-naalɛ, Yizireyɛɛlɩ tɛtʋ taa tʋ Ahiinowam, nɛ Kaarɩmɛɛlɩ ñɩndʋ taa tʋ, Naavaalɩ lelu, Aviigayiili. 6 Daaviidi kɛwɛ laŋpɩsɩyɛ taa kpem, mbʋ pʋyɔɔ yɔ, ɛ-ɛgbaadɩnaa tɔŋaɣ se, páyaɣ-ɩ pɛ nɛ ɛsɩ. Paa pa-taa anɩ ɛmaɣzaɣ ɛ-pɩyalaa nɛ ɛ-pɛlaa pɔ-yɔɔ nɛ ɛ-taa wɩɣ. Paa mbʋʋ yɔ, pɩɩtɩŋnɩ Daaviidi KƖPAƔLƲ Ɛsɔ yɔɔ, nɛ ɛkpa ɖoŋ.
7 Peeye, Daaviidi heyi cɔjɔ, Abiyaataarɩ se, ɛnʋ tendi-i se ewoni ɛnʋʋ kɔdaɣ taa wondu ndʋ patɩŋɩɣnɩ tʋ-yɔɔ nɛ pɔyɔɔdʋʋnɩ KƖPAƔLƲ yɔ. Abiyaataarɩ ɛnʋ, ɛkɛ Ahiimɛlɛɛkɩ pɩyalʋ. Daaviidi heyi Abiyaataarɩ ḿbʋ lɛ, ɛ́lɛ woni-i-tʋ ɖɔɖɔ. 8 Pɛcɛlɩ Daaviidi wondu ńdʋ lɛ, ɛpɔzɩ KƖPAƔLƲ se, ye ɛnʋ ɛɖʋ mɩlaa ḿba pa-wayɩ, ɛnʋ pɩzɩɣ ehiɣ-wɛ yaa we? Ɛ́lɛ ñocosi-i se, ɛ́ɖʋ pa-wayɩ. Se, ɛkpaɣ-wɛ nɛ eholi ɛ-ñɩma.
9 Peeye Daaviidi nɛ ɛ-ɛyaa taŋga nɛ mɩnʋʋ (600) pakʋyaa nɛ pakpaɣ nʋmɔʋ. Pɔkɔm patalɩ Besɔɔrɩ pɔɔ b nɔɔ lɛ, pa-taa nabɛyɛ caɣ peeye. 10 Mba paacaɣ peeye yɔ, paakpɛndɩ nasɩlɛ (200). Pɩɩɖɛ-wɛ, pataapɩzɩɣ se pɛtɛsɩ pɔɔ ŋ́ga. Piyele Daaviidi nɛ ɛyaa nasɩnaza (400) mba pɩkazaa yɔ, pɛwɛɛ pa-wayɩ ḿbʋ. 11 Pɩkɛdaa lɛ, pakatɩ Ejipiti tʋ nɔɔyʋ tɛyɛ yɔɔ, nɛ pakpa-ɩ nɛ powoni Daaviidi cɔlɔ. Powoni-i lɛ, paha-ɩ tindine nɛ ɛtɔɔ, nɛ paha-ɩ lɩm nɛ ɛñɔɔ. 12 Paha-ɩ ɖɔɖɔ hiiwe tindine nɛ tɩŋ weyi popuu i-pe sʋlʋm yɔ, a-tikiŋ weyi ɩwɩlaa yɔ́ɔ naalɛ. Ɛ́lɛ tɛm-wɛ tɔɔʋ lɛ, ɛkpa ɖoŋ. Mbʋ pʋyɔɔ yɔ, pɩlabɩ kɩyakɩŋ naadozo, ɛtaatɔɔ, ɛtaañɔɔ. 13 Ɛkpa ɖoŋ ḿbʋ lɛ, Daaviidi pɔzɩ-ɩ se, ɛkɛ a-ñɩnʋ? Le ɛlɩnaa? Ecosi se, ɛnʋ kɛ Ejipiti tʋ, Amalɛɛkɩ tʋ nɔɔyʋ yom. Se, pɩlabɩ kɩyakɩŋ, naadozo yɔ, ɛnʋ caa ɖɛʋ nɛ eyebi-i yɔ, mbʋ pʋyɔɔ yɔ, pɩwɩɣaɣ ɛnʋ. 14 Se, ḿba wobina nɛ pakʋyɩ Kɩrɛɛtɩ ñɩma nɛ Yuuda ñɩma nɛ Kaalɛɛbɩ ñɩma pɔ-hɔɔlɩŋ taa hadɛ kɩŋ ñɩma yɔɔ, nɛ pɔsɔ Cikɩlaagɩ tɛtʋ miŋ. 15 Daaviidi pɔzɩ-ɩ se, ɛpɩzɩɣ ewoni-i mɩlaa ḿba pɔ-cɔlɔ yaa we? Ɛnʋ ñeheyi Daaviidi se, ye éɖuuni Ɛsɔ se ɛɛkʋʋ ɛnʋ yaa ɛɛkpakɩɣ-ɩ nɛ ɛɖʋzɩ ɛ-caa nesi taa yɔ, pʋbʋ, ɛnʋ wokini-i ɖooo pɔ-cɔlɔ.
Daaviidi kʋʋ Amalɛɛkɩ ñɩma yɔ
16 Mbʋʋ pɩlaba nɛ Ejipiti tʋ ɛnʋ, ewoni Daaviidi Amalɛɛkɩ ñɩma cɔlɔ. Paamɩzɩ ɖama nɛ egeetiye nɖɩ ɖɩ-taa paawɛɛ yɔ, ɖɩ-tɩŋa. Pɔtɔkaɣ nɛ pɔñɔʋ nɛ palakɩ kazandʋ nɛ ñɩm sakɩyɛ mbʋ paakpaɣ Filisitii ñɩma nɛ Yuuda ñɩma pa-ajɛɛ taa yɔ. 17 Peeye Daaviidi kʋyɩ pɔ-yɔɔ nɛ ɛkʋ-wɛ kpaɣ tanaŋ nɛ tɛʋ kɔɔ kife nɛ ɖanaɣ ɖanɩ. Pa-taa nɔɔyʋ tatʋlɩ nɛ pɩtasɩnɩ evebiya nasɩnaza (400) mba pacaɣ kʋyʋndʋʋ kpaŋnaŋ nɛ papɩzɩ pese yɔ. 18 Daaviidi pɩzaa ɛmʋ mbʋ Amalɛɛkɩ ñɩma kpaɣaɣ yɔ, pɩ-tɩŋa nɛ piyele eholi kɔzɩkɔzɩ ɛ-halaa ḿba pa-naalɛ. 19 Ɛmʋ Amalɛɛkɩ ñɩma cɔlɔ mbʋ mbʋ paakpaɣaɣ yɔ, pɩ-tɩŋa payɩ. Pɩtakazɩ nɔɔyʋ, sɔsaa nɛ piya yaa abalɩbiya yaa halɩbiya pa-taa yaa ñɩm nabʋyʋ. 20 Daaviidi mʋ ɖɔɖɔ Amalɛɛkɩ ñɩma heŋ nɛ naŋ pa-kalakɩŋ. Mba patɩŋaɣ wondu ndʋ yɔ, pɔyɔɔdaɣ se, wondu ndʋ Daaviidi mʋwa yɔ́ɔ lɛ!
21 Pɩlabɩ ḿbʋ lɛ, Daaviidi pɩsɩ mba pɩɩɖɛ-wɛ nɛ eyebi-wɛ Besɔɔrɩ pɔɔ nɔɔ yɔ pɔ-cɔlɔ. Ɛkɔm ɛtalɩ lɛ, paba ñalɩɩ nɛ pakatɩ ɛ nɛ samaɣ ŋga katɩŋaɣ ɛ-wayɩ yɔ. Peeye, Daaviidi nɛ ɛ-samaɣ powoba pɛsɛɛ-wɛ. 22 Ɖɩnɛɛ, ḿba paatɩŋ Daaviidi yɔ, pa-taa kañadɩnaa nɛ ḿba paawazɩɣ pʋyʋ yɔ, papazɩ yɔɔdʋʋ pa-tɩŋa se, ɖenɖe pɩtɛkɛ ḿba nɛ wɛ powobina yɔ, paahaɣ-wɛ mbʋ pamʋwa yɔ, ɛlɛ, pɛcɛlɩɣ paa pa-taa weyi ɛ-halʋ nɛ e-piya pe-ɖeke. Se, pákpaɣ-wɛ nɛ pɛɖɛɛ! 23 Ɛlɛ, Daaviidi yaa-wɛ se, ɛ-taabalaa! Nɛ eheyi-wɛ se, pataala mbʋ KƖPAƔLƲ ha-wɛ yɔ́ɔ ḿbʋ. Se, ehuuzi ḿba yɔɔ, nɛ halɩ ɛkpa mɩlaa mba paakʋyɩ Cikɩlaagɩ tɛtʋ taa ñɩma yɔɔ yɔ. 24 Se, nɔɔyʋ ɛɛpɩzɩɣ etisi pɔ-tɔm. Se, toovenim lɛ,
patayɩɣnɩ paa anɩ ñɩm mbʋ pamʋ koyindinaa cɔlɔ you taa yɔ.
Weyi ewobi you taa yɔ,
Nɛ weyi ɛ́lɛ ɖaŋ wondu ɖikpeɣliye taa yɔ,
Patayɩɣ ɖama.
25 Kɩyakʋ ŋgʋʋ Daaviidi yeba nɛ tɔm ndʋ tɩpɩsɩ Izirɛɛlɩ ñɩma paɣtʋ, nɛ tɩwɛɛ mbʋʋ halɩ nɛ sɔnɔ.
26 Daaviidi kɔm ɛpɩsɩ Cikɩlaagɩ tɛtʋ taa lɛ, ɛtayɩ ñɩm mbʋ pamʋ Amalɛɛkɩ ñɩma cɔlɔ yɔ, nɛ ɛha Yuuda hɔɔlʋʋ taa sɔsaa mba pɛkɛ ɛ-taabalaa yɔ, nɛ eheyi-wɛ se, pána mbʋ palɩzɩ mbʋ pamʋ KƖPAƔLƲ koyindinaa cɔlɔ yɔ pɩ-taa nɛ palabɩ-wɛ kʋjɔʋ yɔ. 27 Eetiyini ɖɔɖɔ kʋjɔŋ Beyitɛɛlɩ nɛ Neegɛɛvɩ hɔɔlʋʋ taa, Raamɔɔtɩ tɛtʋ nɛ Yatiiri ñɩndʋ pa-taa sɔsaa. 28 Etiyini ɖɔɖɔ Arohɛɛrɩ nɛ Sifemɔɔtɩ nɛ Ɛsɩtɩmowaa 29 nɛ Raakaalɩ nɛ Yeraamɛɛlɩ ñɩma nɛ Kenii ñɩma, pɛ-tɛtʋ taa sɔsaa, 30 nɛ Harɩmaa nɛ Bɔraasaanɩ nɛ Ataakɩ 31 nɛ Hɛbɩrɔɔnɩ pɛ-tɛtʋ taa sɔsaa, nɛ hɔɔlɩŋ lɛɛŋ weyi ɛ-taa Daaviidi nɛ ɛ-ɛyaa paawoba yɔ, ɛ-tɩŋa ɛ-taa sɔsaa.