29
Filisitii ñɩma ɖɔɔnʋʋ Daaviidi yɔ
1 Nakʋyʋ wiye Filisitii ñɩma kpeɣli po-youlaɖaa tɩŋa tɛtʋ ndʋ payaɣ se Afɛɛkɩ a yɔ tɩ-taa, nɛ piyele Izirɛɛlɩ ñɩma ñekpeɣli ɖama hiɖe nɖɩ ɖɩñɔtɩnɩ Yizireyɛɛlɩ tɛtʋb yɔ ɖɩ-cɔlɔ. 2 Filisitii ñɩma awiya kɛɖɛ po-youlaɖaa tikasi cikpesi nɛ sɔsɔsɩ nɔɔ nɛ pɔɖɔŋ. Piyele pɩɖɩɣnɩ Daaviidi nɛ ɛ-ɛyaa nɛ wiyaʋ Akiisi weyi patɩŋaɣ yɔ. 3 Filisitii ñɩma youlaɖaa ñʋndɩnaa pɔzɩ se, ɛyaa mba, pɩtɛkɛ Ebiree ñɩma na? Akiisi pɔzɩ-wɛ se, patatɩlɩ Daaviidi weyi ɛɛkɛ Izirɛɛlɩ wiyaʋ, Sawʋlɩ tʋmlaɖʋ yɔ yaa we? Se, pɩlabɩ pɩnaɣ yaa pɩnzɩ naalɛ lɛ ɛnʋ nɛ ɩ pɛwɛʋ yɔ. Se, ɖooo ɛzɩ ewobu ɛnʋ cɔlɔ nɛ ɛnʋ nɛ ɩ pɛwɛɛ nɛ pɩsɩnɩ kɩyakʋ ŋ́gʋ yɔ, ɛnʋ tana ɛ-yɔɔ kawanaɣ nakɛyɛ.
4 Peeye Filisitii ñɩma ñʋndɩnaa ḿba pa-pana kpanɩ Akiisi, nɛ peheyi-i se, ɛɖɔɔnɩ abalʋ ɛnʋ nɛ ɛpɩsɩ ɖenɖe ɛha-ɩ se ɛcaɣ yɔ. Se, ḿba nɛ ɩ pataawolo youdaa, pɩtɛkɛ ḿbʋ, ɛpɩzɩɣ ɛkʋyɩ pɔ-yɔɔ tuliŋa youdaa. Se, toovenim lɛ, pʋyʋ kʋɖʋm koŋ ɛpɩzaɣ se ɛla nɛ ɛ-tɔm ɖaɣnɩ kɛdɩnaʋ ɛ-caa. Mbʋʋ lɛ se, ɛ́kpa ḿba ɛyaa nɛ ɛɖʋzɩ ɛ́lɛ nesi taa. 5 Se, ḿba ɛtaasɔɔ se, Daaviidi ɛnʋʋ ɛyaa teɣaɣnɩ wondu se,
Sawʋlɩ kʋ koyindinaa kutoku (1.000) nɛ pɩɖɛɛ pʋ-yɔɔ,
Daaviidi ñakʋ kutokiŋ hiu (10.000) c nɛ pɩɖɛɛ pʋ-yɔɔ nɛ papaɣ.
6 Pɔyɔɔdɩ ḿbʋ lɛ, Akiisi yaa Daaviidi nɛ eheyi-i se, ɛnʋ heyiɣ-i nɛ KƖPAƔLƲ weyi ɛwɛ wezuu yɔ, ɛ-nɔɔ se, ɛkɛ ɛyʋ kʋtʋʋzʋ. Se, ɛnʋ liu kɛwɛɛ se, ɛkpɛndɩ ɛnʋ youlaɖaa yɔɔ nɛ ɛ nɛ wɛ pɛɖɛɛ you. Mbʋ pʋyɔɔ yɔ, ɖooo ɛzɩ ewobu ɛnʋ cɔlɔ nɛ pɩsɩnɩ kɩyakʋ ŋ́gʋ yɔ, ɛtɛwɛɛkɩ pʋyʋ. Ɛlɛ, ɛ-tɔm tɛkɛdɩnɩ awiya lɛɛna. 7 Se, pʋ-yɔɔ lɛ, ɛpɩsɩnɩ laŋhɛzɩyɛ nɛ pɩtaakɔɔ pɩcɛyɩ awiya ana. 8 Peeye, Daaviidi pɔzɩ-ɩ se, ɛlɛ, ɖooo ɛzɩ ɛnʋ sʋʋ ɛ-tʋmɩyɛ taa nɛ pʋkɔɔ pɩsɩnɩ kɩyakʋ ŋ́gʋ yɔ, ɛbɛ ɛnʋ wɛɛkaa kpem nɛ pɩwɛɛ se ɛnʋ ɛtaawolo nɛ ɛkʋyɩ e-koyindinaa yɔɔ? 9 Akiisi cosi-i se, ɛnʋ nawa se ɛtɛwɛɛkɩ pʋyʋ. Se, ɛ-tɔm kɛdɩnɩ ɛnʋ ɛzɩ ɛsɔtiyiyu nɔɔyʋ yɔ. Ɛlɛ, Filisitii ñɩma youlaɖaa ñʋndɩnaa kizini ɛnʋ se mba nɛ ɩ pataawolo youdaa. 10 Se, ye ḿbʋ, ɛ nɛ ɛ-wayɩ ñɩma pakʋyɩ tanaŋ cu nɛ powolo ɖenɖe ɛnʋ ha-wɛ waɖɛ se pacaɣ yɔ. Se, ɛ-taa ɛtaahaɣnɩ ɛnʋ, mbʋ pʋyɔɔ yɔ, ɛ-tɔm kɛdɩnɩ ɛnʋ d. Se, pákʋyɩ tanaŋ cu nɛ pɛɖɛɛ.
11 Kifem tanaŋ tɛɛ lɛ, Daaviidi nɛ ɛ-wayɩ ñɩma palɩɩ cu nɛ papɩsɩ Filisitii ñɩma ɛjaɖɛ taa. Nɛ piyele Filisitii ñɩma ñowolo Yizireyɛɛlɩ tɛtʋ taa.