28
1 Alɩwaatʋ ńdʋ tɩ-taa Filisitii ñɩma kpeɣli po-youlaɖaa tikasi tɩŋa se powoki pakʋyɩ Izirɛɛlɩ ñɩma yɔɔ. Ɛlɛ, Gaatɩ wiyaʋ Akiisi heyi Daaviidi se, pɩwɛɛ se ɛtɩlɩ se ɛ nɛ ɛ-ɛyaa pakaɣ wobu ɛnʋ cɔlɔ nɛ pa nɛ ɩ pɛɖɛɛ you. 2 Daaviidi heyi-i se, pʋwɛ ɖeu! Se, ɛ-maɣmaɣ ɛkaɣ naʋ mbʋ ɛnʋ lakɩ yɔ. Peeye Akiisi tɔm se, ye ḿbʋ, ɛnʋ kpakɩɣ-ɩ nɛ ɛkɛ ɛ-yɔɔ ɖaŋɩyʋ tam yɔɔ.
Sawʋlɩ pɔzʋʋ piye yɔ
3 Samʋyɛɛlɩ sɩba lɛ a, Izirɛɛlɩ ñɩma tɩŋa wii-i nɛ piyele pepim-i ɛ-tɛ Raamaa tɛtʋ taa. Ŋgʋ, Sawʋlɩ kɔɖɔɔnɩ mba pɔyɔɔdʋʋnɩ sɩɖaa nɛ mba peheyiɣ ɛyaa mbʋ pɩkɔŋ labʋ yɔ b.
4 Nakʋyʋ wiye Filisitii ñɩma youlaɖaa kpeɣli ɖama nɛ powolo pacaɣ Suunɛm tɛtʋ taa. Pɩlabɩ mbʋ lɛ, Sawʋlɩ ñekpeɣli Yizireyɛɛlɩ youlaɖaa tɩŋa nɛ paba wolo pekpeɣli Gilibowaa ñɩndʋ taa. 5 Sawʋlɩ na Filisitii ñɩma kpeɣli ɖama ḿbʋ lɛ, sɔɔndʋ kpa-ɩ siŋŋ nɛ eseliɣ yem kpakpa. 6 Peeye ɛyɔɔdɩnɩ KƖPAƔLƲ se ɛna. Ɛlɛ, ɛ́lɛ tocosi-i natʋyʋ kaʋ. Etocosi-i nɛ ɖoziye naɖɩyɛ taa yaa cɔjɔ nɔɔyʋ miika ŋga payaɣ se Uurim yɔ kaɖʋʋ taa yaa ɛtatɩŋnɩ lɔɔyɩsɩtɩnaa nabɛyɛ yɔɔ nɛ ecosi-i. 7 Pɩlabɩ ḿbʋ lɛ, Sawʋlɩ heyi ɛ-tʋmlaɖaa se, pañɩnɩ-ɩ halʋ nɔɔyʋ weyi ɛyɔɔdʋʋnɩ sɩɖaa yɔ nɛ ɛnʋ wolo ɛyɔɔdɩnɩ-ɩ nɛ ɛna. Paba ñeheyi-i se, nɔɔyʋ wɛ Eyinidɔɔrɩ tɛtʋ c taa. 8 Peeye Sawʋlɩ pɩsɩ ɛ-tɩ ɛyʋ yem nɛ ɛ nɛ ɛ-taabalaa naalɛ pakʋyɩ nɛ powolo Eyinidɔɔrɩ. Patalɩ halʋ ɛnʋ ɛ-tɛ lɛ, ɖoó yuwa. Ɛlɛ, Sawʋlɩ heyi-i se, ɛnʋ liu wɛɛ se ɛ́yaa ɛnʋʋ sɩɖʋ nɔɔyʋ nɛ eheyi ɛnʋʋ mbʋ pɩkɔŋ labʋ yɔ. Se, ɛyaa ɛnʋʋ weyi ɛnʋ heyiɣ-i yɔ. 9 Ɛyɔɔdɩ ḿbʋ lɛ, halʋ ɛnʋ eheyi-i se, ɛ́na ɖeu se, Sawʋlɩ kizaa se ɛtaana mba pɔyɔɔdʋʋnɩ sɩɖaa nɛ mba peheyiɣ ɛyaa mbʋ pɩkɔŋ labʋ yɔ ɛjaɖɛ taa. Se, pɩtɛkɛ kpaca ɛñɩkɩ ɛnʋ se ɛkʋ ɛnʋ yaa we? 10 Peeye Sawʋlɩ ɖuuni KƖPAƔLƲ. Ɛyɔɔdaa se, ɛnʋ ɖuuni KƖPAƔLƲ se, toovenim lɛ, tɔm ńdʋ tɩ-taa ɛzaɣtʋ natʋyʋ ɛɛcakɩ ɛ-ñʋʋ taa. 11 Ɖɩnɛɛ halʋ ɛnʋ ɛpɔzɩ-ɩ se, anɩ ɛcaɣ se ɛnʋ ɛyaa-ɩ-ɩ yɔ? Ecosi se, Samʋyɛɛlɩ.
12 Halʋ ɛnʋ, ɛya Samʋyɛɛlɩ nɛ ɛ́lɛ wolo lɛ, ɛma kubuka leɣleɣ nɛ ɛpɔzɩ Sawʋlɩ se, pɩlabɩ ɛzɩma nɛ ɛcɛtɩ-ɩ? Se, ɛnʋʋ lɛ Sawʋlɩ. 13 Ɛlɛ, wiyaʋ Sawʋlɩ heyi-i se, sɔɔndʋ ɛtaakpa-ɩ. Se, eheyi-i mbʋ ɛnawa yɔ. Halʋ ɛnʋ ecosi-i se, ɛnaɣ hadɛ tʋ nɔɔyʋ, ɛlɩnɩ tɛtɛɛ nɛ ɛkpaɣ. 14 Sawʋlɩ pɔzɩ-ɩ se, ɛwɛ ɛzɩma? Ecosi-i se, ɛkɛ akpadɩyʋ, esu toko sɔsɔʋ nakʋyʋ.
Mbʋʋ Sawʋlɩ nanaa se Samʋyɛɛlɩ. Peeye Sawʋlɩ luŋ ɛ-tɛɛ nɛ ɛpa ɛ-ɛza nɛ tɛtʋ. 15 Ɛlɛ, Samʋyɛɛlɩ pɔzɩ-ɩ se, pɩlabɩ ɛzɩma nɛ eliɣtiɣ ɛnʋ nɛ yaʋ mbʋ? Sawʋlɩ cosi se, ɛnʋ wɛ kʋñɔŋ sɔsɔʋ nakʋyʋ taa. Se, Filisitii ñɩma kʋyɩ ɛnʋ yɔɔ nɛ ɛ nɛ wɛ poyou nɛ Ɛsɔ ha ɛnʋʋ siɣye. Se, ɛtatɩɩtɩŋnaʋ lɔɔyaɣdʋ nɔɔyʋ yɔɔ yaa ɖoziye naɖɩyɛ taa nɛ ecosi ɛnʋ. Se, pʋ-yɔɔ ɛnʋ ya-ɩ se ɛwɩlɩ ɛnʋʋ mbʋ pɩwɛɛ se ɛnʋ ɛla yɔ. 16 Ɛyɔɔdɩ ḿbʋ lɛ, Samʋyɛɛlɩ pɔzɩ-ɩ se, KƖPAƔLƲ ha-i siɣye nɛ ɛpɩsɩ e-koyindu lɛ, pɩla ɛzɩma nɛ ɛpɔzʋʋ ɛnʋʋ tɔm yɔ? 17 Se, KƖPAƔLƲ lakɩ ɛzɩ ɛɛtɩŋnaʋ ɛnʋ yɔɔ nɛ ɛnʋ heyi-i yɔ. Se, ɛlɛɣ e-nesi taa kewiyaɣ nɛ ɛcɛlɩ-kɛ nɔɔyʋ, ɛnʋʋ lɛ Daaviidi. 18 Se, ɛtaña tɔm ndʋ KƖPAƔLƲ heyi-i yɔ paa ñɩɩɩ, se, ekizaa se ɛɛkʋʋ Amalɛɛkɩ ñɩma tɩŋa payɩd. Se, pʋ-yɔɔ KƖPAƔLƲ labɩ-ɩ mbʋʋ kɩyakʋ ŋ́gʋ. 19 Se, halɩ KƖPAƔLƲ ɖʋzʋʋ ɛ nɛ Izirɛɛlɩ ñɩma Filisitii ñɩma nesi taa. Se, kifeŋ yɔ, ɛ nɛ e-pɩyalaa powoki ɛnʋ cɔlɔ hadɛtɩyɛ taa nɛ pa nɛ ɛnʋ pɛwɛɛ, nɛ piyele KƖPAƔLƲ ɖʋzɩ e-youlaɖaa Filisitii ñɩma nesi taa. 20 Sawʋlɩ tɩnɩ ḿbʋ lɛ, sɔɔndʋ kpa-ɩ nɛ ɛlɩɩ ɛfalɩ tataa kpʋʋʋ. Ɖɔɖɔ lɛ, ɛtatasɩ wɛʋ ɖoŋ. Mbʋ pʋyɔɔ yɔ, ɛtaatɔɔ pʋyʋ wɩsɩ nɛ ɖoó. 21 Peeye halʋ ɛnʋ ewobi Sawʋlɩ cɔlɔ. Ɛnawa se sɔɔndʋ kpa-ɩ pɩŋŋ lɛ, eheyi-i se, ɛna ɛ-tʋmlaɖʋ halɩñɩnʋ nɩʋ ɛ-tɔm. Se, ɛnʋ coɖi sɩm nɛ ɛla ndʋ eheyi ɛnʋ yɔ. 22 Se, lɛɛlɛɛyɔ, pɩtalaa se, ɛnɩɩ ɛnʋ ñɩndʋ. Se, eyele nɛ ɛnʋ woni-i tɔɔnaɣ pazɩ nɛ ɛtɔɔ nɛ ehiɣ ɖoŋ nɛ pɩcɔ ɛkpaɣ nʋmɔʋ. 23 Ɛlɛ, Sawʋlɩ kizi se ɛɛtɔkɩ. Ɛlɛ, ɛ-tʋmlaɖaa nɛ halʋ ɛnʋ, pɛcɛyɩ-ɩ nɛ ɛkɔɔ etisi. Peeye ɛkʋyɩ tataa nɛ ɛcaɣ kaɖʋ yɔɔ. 24 Halʋ ɛnʋ, ɛɛwɛnɩ neɣye nɖɩ ɖɩwɛ num camɩyɛ yɔ ɛ-tɛ. Pɩlabɩ ḿbʋ lɛ, ekpedesi nɛ ɛkʋ-ɖɩ nɛ ɛkpaɣ mʋlʋm ehuudi nɛ ɛla sɔsɔɔna fɛyɩ tindine. 25 Ɛtɛma lɛ, ɛɖʋ Sawʋlɩ nɛ ɛ-tʋmlaɖaa nɛ pɔtɔɔ. Pʋwayɩ lɛ, pakʋyɩ ɖoó ana a-taa nɛ pakpaɣ nʋmɔʋ.