27
Daadiidi mɛlʋʋ Filisitii ñɩma tɛ yɔ
1 Pɩlabɩ ḿbʋ lɛ, Daaviidi maɣzɩ ɛ-taa se, paa mbʋʋ yɔ, wiɖiyi Sawʋlɩ tɛŋnɩ-ɩ kʋʋ. Se, pʋ-yɔɔ lɛ, mbʋ ɛnʋ pɩzɩɣ ɛla nɛ pɩkɩlɩ ɖeu yɔ lɛ se, ɛnʋ seɣ nɛ ewolo ɛmɛlɩ Filisitii ñɩma ɛjaɖɛ taa. Pʋbʋ, Sawʋlɩ yeki ɛnʋʋ ɖɔɔnʋʋ Izirɛɛlɩ ɛjaɖɛ tɩŋa taa nɛ ɛnʋ tʋlɩ-ɩ. 2 Peeye Daaviidi nɛ ɛ-ɛgbaadɩnaa taŋga nɛ mɩnʋʋ (600) pakpaɣ nʋmɔʋ nɛ powolo Gaatɩ wiyaʋ, Mawɔɔkɩ pɩyalʋ Akiisi tɛ. 3 Powoba lɛ, pa-tɩŋa pɛwɛɛ Gaatɩ ɛjaɖɛ taa, paa anɩ nɛ ɛ-hɔʋ taa ñɩma. Daaviidi nɛ ɛ-halaa naalɛ paawɛna. Yizireyɛɛlɩ tʋ Ahiinowama nɛ Kaarɩmɛɛlɩ tʋ Naavaalɩ lelu Aviigayiili b. 4 Sawʋlɩ kɔm ɛnɩɩ se Daaviidi woba Gaatɩ tɛtʋ taa nɛ ɛmɛlɩ lɛ, eyele-i ɖɔɔnʋʋ.
5 Nakʋyʋ wiye Daaviidi heyi Akiisi se, ye ɛnʋʋ wiyaʋ ɛkpaɣ-ɩ se ɛnʋ mʋnaa se ɛtaa ɛnʋʋ liu yɔ, pʋbʋ, ɛha ɛnʋʋ waɖɛ nɛ ewolo ɛcaɣ tɛyɛ yɔɔ tɛtʋ cikpetu natʋyʋ taa. Se, ɛbɛ yɔɔ pɩwɛɛ se ɛnʋ nɛ ɩ pɛwɛɛ kewiyaɣ tɛtʋ taa ḿbʋ? 6 Kpaagbaa ḿbʋ lɛ, Akiisi ha-ɩ Cikɩlaagɩ tɛtʋ c. Pʋ-yɔɔ tɛtʋ ndʋ tɩkɛ Yuuda ñɩma awiya ñɩndʋ halɩ nɛ sɔnɔ.
7 Daaviidi caɣ Filisitii ñɩma egeetiye taa pɩnaɣ nɛ fenasɩ naanza. 8 Daaviidi nɛ ɛ-ɛyaa pakʋyaɣ Cikɩlaagɩ nɛ powoki pakʋyʋʋ Gesuuri tɛtʋ taa ñɩma nɛ Girizii haɖaa taa ñɩma nɛ Amalɛɛkɩ liɖe taa ñɩma pɔ-yɔɔ. Pʋ-tɔbʋʋ se, ɛyaa ḿba paawɛ kpaɣ Telem tɛtʋ nɛ pɩɖɛɛ Suuri ñɩndʋ nɛ piwolo pɩsɩnɩ Ejipiti ɛjaɖɛ kamaɣ yɔ. 9 Daaviidi nɛ ɛ-ɛyaa pakʋwaɣ ɛjaɖɛ nɖɩ ɖɩ-taa ñɩma, patakasɩɣ paa halʋ yaa abalʋ. Pakpakaɣaɣ heŋ nɛ naŋ nɛ kpaŋasɩ nɛ kʋyʋndʋʋ kpaŋnaŋ nɛ pɩkpɛndɩnɩ wondu ndʋ posuu yɔ nɛ papɩsɩɣ wiyaʋ Akiisi cɔlɔ. 10 Ɛpɩsɩɣ lɛ, ɛ́lɛ pɔsʋʋ-ɩ se, a-yɔɔ pakʋyɩ kɩyakʋ ŋ́gʋ? Daaviidi cosuu-i se, Yuuda cejewiye taa ñɩma hɔɔlʋʋ hadɛ ñɩŋgʋ taa ñɩma yɔɔ ɛkʋyaa, yaa Yeraamelii ñɩma hɔɔlʋʋ hadɛ ñɩŋgʋ taa ñɩma yɔɔ ɛkʋyaa, yaa Kenii ñɩma hɔɔlʋʋ hadɛ ñɩŋgʋ taa ñɩma yɔɔ ɛkʋyaa. 11 Daaviidi tetisi se papɩsɩnɩ nɔɔyʋ, paa halʋ yaa abalʋ Gaatɩ tɛtʋ taa nɛ ɛ-ɛsɛ. Ɛmaɣzaɣ se, pataayɔɔdɩ nɛ pikuli pa-wayɩ. Mbʋʋ Daaviidi laba alɩwaatʋ ndʋ ɛwɛ Filisitii ñɩma ɛjaɖɛ taa yɔ tɩ-tɩŋa payɩ. 12 Pʋ-yɔɔ Akiisi kata-ɩ liu siŋŋ, mbʋ pʋyɔɔ yɔ, ɛmaɣzaɣ se Daaviidi kɩlɩ ɛ-samaɣ Izirɛɛlɩ ñɩma labʋ ɛzaɣtʋ kpem. Se ɛkɛɣ ɛnʋ tʋmlaɖʋ tam yɔɔ.