26
Daaviidi tasʋʋ kizuu se, ɛɛkʋʋ Sawʋlɩ yɔ
1 Nakʋyʋ wiye Ziifu tɛtʋ taa ñɩma nabɛyɛ tasɩ wobu Sawʋlɩ cɔlɔ Giveyaa tɛtʋ a taa nɛ pɔpɔzɩ-ɩ se, ɛtana se Daaviidi mɛlɩ kɛdɛɛŋa ŋga paahayɩɣ yɔ kɔ-cɔlɔ Hakiilaa piyasɩ taa yaa we? b. 2 Peheyi Sawʋlɩ ḿbʋ lɛ, ɛkʋyɩ nɛ ɛkpaɣ Ziifu lakʋ taa nʋmɔʋ se, ewoki nɛ ɛñɩnɩ Daaviidi. Ɛɖɛɣaɣ lɛ, ɛkpɛndɩnɩ Izirɛɛlɩ ñɩma youlaɖaa sɔsaa, pɛwɛ kotokiŋ naadozo (3.000). 3 Powoba lɛ, pekpeɣli ɖama Hakiilaa piyisi taa, habɩyɛ nɔɔ. Daaviidi ñaawɛ lakʋ taa nɛ ɛnɩɩ se, Sawʋlɩ woki se ɛɖɔɔnɩ-ɩ. 4 Ɛ́lɛ nɩ ḿbʋ lɛ, ɛkʋsɩ nabɛyɛ se powolo nɛ pefeŋ nɛ pana. Paba ñowoba lɛ, pana se toovenim Sawʋlɩ wobi peeye ɛzɩ pɔyɔɔdʋʋ yɔ. 5 Peeye Daaviidi kʋyaa nɛ ewolo Sawʋlɩ nɛ e-youlaɖaa pa-ɖɩkpeɣliye cɔlɔ se ɛna ɖenɖe Sawʋlɩ nɛ youlaɖaa ñʋʋdʋ Nɛɛrɩ pɩyalʋ Abɩnɛɛrɩ pahɩnaa yɔ. Ewoba lɛ, ɛna se, Sawʋlɩ hɩnɩ ɖikpeɣliye hɛkʋ taa nɛ e-youlaɖaa tɩŋa cɔɔ-ɩ nɛ pata.
6 Ɖɩnɛɛ Daaviidi ya Hɛɛtɩ liɖe taa tʋ Ahiimɛlɛɛkɩ nɛ Yowaabɩ ñɩnʋ, Ceruuyaa pɩyalʋ Aviisayi nɛ ɛpɔzɩ-wɛ se, a-liu wɛɛ se ɛ nɛ ɩ petii Sawʋlɩ cɔlɔ, ɛ́lɛ nɛ e-youlaɖaa pa-ɖikpeɣliye taa? Aviisayi cosi se, ɛnʋ nɛ ɩ petikina.
7 Ɖoó yuwa lɛ, Daaviidi nɛ Aviisayi petii youlaɖaa ɖikpeɣliye taa. Patalaa lɛ, pamaɣnɩ Sawʋlɩ hɛnɩ ɖikpeɣliye hɛkʋ taa nɛ eɖou, esiɣ ɛ-kɩkpɛzɛŋ ɛ-ñʋʋ kiɖe. Piyele Avinɛɛrɩ nɛ youlaɖaa pɛhɩnɩ nɛ pɔcɔɔ-ɩ nɛ pata. 8 Peeye Aviisayi heyi Daaviidi se, Ɛsɔ ɖʋzɩ ḿba koyindinaa ḿba nesi taa, ɖoó ana a-taa. Se, ɛ́ha ɛnʋʋ waɖɛ nɛ ɛsɔbɩ-ɩ kɩkpɛzɛŋ tɔm kʋɖʋm taa nɛ ɛkamnɩ-ɩ tɛtʋ kpaagbaa. Pʋbʋ pɩtazɩɣ pɔzʋʋ se ɛnʋ ɛtasɩ-ɩ sɔbʋ naalɛ ɖeɖe. 9 Ɛlɛ, Daaviidi kizi se, Aviisayi ɛtaakʋ-ɩ! Ɛpɔzɩ Aviisayi se, ɛmaɣzɩɣ se ye ɛyʋ ɛkʋ weyi KƖPAƔLƲ lɩzaa nɛ ɛkɛ wiyaʋ yɔ, paahɔŋ ɛ-nɩŋgbaŋ naa we? 10 Se, ɛnʋ ɖuuni KƖPAƔLƲ se, KƖPAƔLƲ maɣmaɣ kʋʋ pʋdʋ. Eyeki nɛ pʋdʋ sɩ yem yaa pakʋ-ɩ you nakʋyʋ taa. 11 Se, KƖPAƔLƲ ɛtaayele nɛ ɛnʋ kʋ wiyaʋ weyi ɛlɩzɩ ɛ-tɩ yɔ. Se, mba ɛkpaɣ kɩkpɛzɛŋ ŋgʋ kɩwɛ ɛ-ñʋʋ kiɖe yɔ nɛ lɩm tokuu nɛ mba ɖɛɛ.
12 Peeye Daaviidi kpaɣ kɩkpɛzɛŋ nɛ lɩm tokuu Sawʋlɩ ñʋʋ kiɖe nɛ pakpaɣ nʋmɔʋ nɛ pɛɖɛɛ. Nɔɔyʋ tefe, nɔɔyʋ tana, nɔɔyʋ tatɩlɩ natʋyʋ. Ɛyaa tɩŋa ɖowaɣ. Mbʋ pʋyɔɔ yɔ, KƖPAƔLƲ yeba nɛ poɖoó nɛ pelimsi siŋŋ. 13 Daaviidi ɖɛwa lɛ, ewolo ɛtɛzɩ kajalaŋa nɛ epozini Sawʋlɩ ɖeu nɛ ɛkpa piyaɣ nakɛyɛ yɔɔ nɛ ɛsɩŋ. 14 Ɖɩnɛɛ Daaviidi tɔ youlaɖaa nɛ Nɛɛrɩ pɩyalʋ Avinɛɛrɩ uuu nɛ ɛpɔzɩ Avɩnɛɛrɩ se, eecosuu yaa we? Ɛlɛ, Avinɛɛrɩ pɔzɩ-ɩ se, ɛnʋʋ lɛ anɩ, nɛ ɛɖɩkɩ wiyaʋ ŋgbaaŋ nɛ uuu waa tɔʋ mbʋ? 15 Daaviidi tasɩ Avɩnɛɛrɩ pɔzʋʋ se, ɛkɛ ɛyʋ, yaa pɩtɛkɛ mbʋ? Se, youlaɖʋ nɔɔyʋ takɩlɩ-ɩ Izirɛɛlɩ ɛjaɖɛ taa. Se, nɛ pɩla ɛzɩma ɛtapɩzɩ ɛkandɩ ɛ-ñʋʋdʋ, wiyaʋ yɔɔ camɩyɛ yɔ? Se, nɔɔyʋ woba se ɛkʋʋ-ɩ. 16 Se, mbʋ ɛlaba ḿbʋ yɔ, pɩfɛyɩ ɖeu. Se, ɛnʋ ɖuuni KƖPAƔLƲ se, ɛmʋnaa se pakʋ-ɩ, mbʋ pʋyɔɔ yɔ, ɛtakandayɩ ɛ-caa, wiyaʋ weyi KƖPAƔLƲ sɩ-wɛ yɔ, ɛ-yɔɔ camɩyɛ! Se, ye mbʋ, ɛ́cɔnɩ wiyaʋ ñʋʋ kiɖe nɛ ɛna se le ɛ-kɩkpɛzɛŋ nɛ ɛ-lɩm tokuu pɛwɛɛ?
17 Peeye Sawʋlɩ sɩm Daaviidi nɔɔ nɛ ɛyaa-ɩ se ɛnʋ pɩyalʋ Daaviidi nɛ ɛpɔzɩ-ɩ se, ɛnʋ yɔɔdʋʋnɩnɩ-ɩ toovenim naa we? Daaviidi yaa-ɩ se Ɖajaa! Nɛ ecosi-i se, ɛnʋ maɣmaɣ ɛyɔɔdʋʋnɩnɩ-ɩ. 18 Pʋwayɩ lɛ, ɛpɔzɩ-ɩ se, pɩlabɩ ɛzɩma nɛ ɛnʋʋ ɛ-caa ɛwɛɛ ɛnʋ wayɩ mbʋ? Ɛnʋ labɩ-ɩ we? Ɛzaɣtʋ ndʋʋ ɛnʋ laba? 19 Se, ɛnʋʋ wiyaʋ etisi nɛ ewelisi ndʋ ɛnʋ heyiɣ-i yɔ ɖeu. Se, ye KƖPAƔLƲ eseɣtiɣni-i se ɛla ɛnʋʋ mbʋʋ yɔ, pʋbʋ, ɛlaa ɛlɛɛ kɩlaʋ nɛ ɛ́lɛ laŋɩyɛ hɛɛ. Ɛlɛ, ye ɛyaa eseɣtiɣni-i yɔ, KƖPAƔLƲ ɛwɩlɩ-wɛ kpalʋʋ. Mbʋ pʋyɔɔ yɔ, pɔɖɔɔnʋʋ ɛnʋʋ nɛ paɖaŋ ɛnʋ se ɛtaacaɣ ɛjaɖɛ nɖɩ ɖɩ-taa yɔ, pʋwɛɛ ɛzɩ peheyiɣ ɛnʋ se, ewolo eluŋ agɔlɩma tɛɛ yɔ. Ŋgʋ KƖPAƔLƲ hanɩ-wɛ-ɖɩ. 20 Se, ɛlɛ, ɛnʋ liu fɛyɩ se eposini KƖPAƔLƲ nɛ ɛsɩ. Se, pɩlaba ɛsɩna nɛ ɛnʋʋ wiyaʋ ɛkʋyɩ ɛnʋ weyi ɛkɛ asiɣye yem yɔ ɛ-yɔɔ nɛ ɛɖɔɔnʋʋ ɛnʋ ɛzɩ pɔɖɔɔnʋʋ leɣa pʋŋ taa yɔ? 21 Peeye Sawʋlɩ cosaa se, ɛnʋ yʋsaa. Se, ɛnʋʋ ɛnʋ pɩyalʋ Daaviidi ɛ́pɩsɩ, se, ɛnʋ ɛɛtasɩɣ-ɩ labʋ ɛzaɣtʋ, mbʋ pʋyɔɔ yɔ, ɛñam ɛnʋʋ ɖoó ana nɛ ɛtakʋ ɛnʋ. Se, ɛnʋ labɩ kɩmɛlɛndʋ, se, piyiɣdi ɛnʋ kpem. 22 ɛyɔɔdɩ ḿbʋ lɛ, Daaviidi yaa-ɩ se ɛnʋ wiyaʋ nɛ eheyi-i se, ɛ-kɩkpɛzɛŋ wɛ ɛnʋ cɔlɔ, se etiyi ɛ-tʋmlaɖaa taa nɔɔyʋ nɛ ewolo ɛmʋ-kʋ. 23 Se, KƖPAƔLƲ ɛwazɩ paa mba taa ɛnɩ ɛ-yɔɔ ɛ-ñamtʋ nɛ ɛ-tʋʋzʋʋ pɔ-yɔɔ. Se, KƖPAƔLƲ ɖʋzɩnɩ-ɩ ɛnʋ nesi taa kɩyakʋ ŋ́gʋ, ɛlɛ, ɛnʋ kisi se ɛɛkʋʋ-ɩ, mbʋ pʋyɔɔ yɔ, KƖPAƔLƲ lɩsɩnɩ-ɩ nɛ ɛkɛ wiyaʋ. 24 Se, ye kɩyakʋ ŋ́gʋ, ɛnʋ ɛtakʋ-ɩ se ɛwɛ ɛnʋʋ wazaɣ siŋŋ yɔ, ɛnʋ ɖɔɖɔ ɛwɛɛ KƖPAƔLƲ wazaɣ siŋŋ nɛ ɛlɩzɩ ɛnʋʋ paa asayʋʋ ŋgʋ kɩ-taa. 25 Peeye Sawʋlɩ kaɖɩ-ɩ se, KƖPAƔLƲ ɛwazɩ ɛnʋʋ ɛ-pɩyalʋ Daaviidi ɛ-yɔɔ! Se ɛkaɣ labʋ mbʋ mbʋ pɩpaɣlaa yɔ, se, paa pɩɩla ɛsɩna, piɖeɣni-i. Ɛyɔɔdɩ ḿbʋ lɛ, Daaviidi kpaɣ ɛ-nʋmɔʋ nɛ piyele ɛnʋʋ Sawʋlɩ ɛpɩsɩ ɛ-tɛ.