Samuyɛɛlɩ takayaɣ naalɛ ñɩŋga
Daaviidi nɩʋ se Sawʋlɩ nɛ Yoonaataanɩ pasɩba yɔ.
1
1 Sawʋlɩ sɩbaa nɛ pʋcɔ Daaviidi kiti nɛ ɛwɛɛ Cikilaakɩ tɛtʋ taa. Ɛ́tɛm wabʋ, Amaalɛɛkɩ ñɩma yɔ́ɔ ekiti peeye. 2 Ekiti peeye nɛ kɩyakʋ naadozo ñɩŋgʋ wiye lɛ, abalʋ nɔɔyʋ lɩnɩ Sawʋlɩ ñɩma ɖikpeɣliye taa nɛ ɛtalɩ. E-wondu kaciyaa nɛ tɛtʋ wɛɛ ɛ-ñʋʋ taa nɛ pɩwɩlɣ se kʋñɔŋ labɩ-ɩ. Ɛkɔm ɛtalɩ Daaviidi cɔlɔ lɛ, eluŋ tataa ɛ-tɛɛ.
3 Daaviidi pɔzɩ-ɩ se, le ɛlɩnaa? Ecosi se Izirɛɛlɩ ñɩma ɖikpeliye taa ɛnʋ lɩnaa nɛ ese nɛ ɛtalɩ peeye. 4 Peeye Daaviidi pɔzɩ-ɩ se, ɛbɛ laba? Se eheyi ɛnʋ nɛ ɛnɩɩ. Ecosi Daaviidi se, Sɔɔjanaa se you taa, se, pakʋ pa-taa sakɩyɛ nɛ halɩ pɩkpɛndɩnɩ Sawʋlɩ nɛ ɛ-pɩyalʋ Yoonaataanɩ. 5 Daaviidi tasɩ evebu ɛnʋʋ pɔpɔzʋʋ se, ɛzɩma ɛlaba nɛ ɛna se Sawʋlɩ nɛ ɛ-pɩyalʋ Yoonaataanɩ pasɩba? 6 Ɛ́lɛ cosi se, ɛnʋ kakpa Gilibowaa pʋʋb taa kɩkpaʋ yem. Se, pɩkɛdaa lɛ, ɛnʋ naɣ Sawʋlɩ, ɛñɩɣ ɛ-kɩkpɛzɛŋ yɔɔ, koyindinaa youlɔɔɖa nɛ pa-kpaŋnaŋ caɣyaa paañɔtɩnɩ-ɩ kpam. 7 Se, Sawʋlɩ kisi ɛ-wayɩ nɛ ɛna ɛnʋ lɛ, ɛyaa ɛnʋ nɛ ɛnʋ sɛɛ, 8 nɛ ɛpɔzɩ ɛnʋ se, ɛnʋ kɛ le tʋ? Ɛnʋ cosi-i se ɛnʋ kɛ Amaalɛɛkɩdʋc 9 Ɖɩnɛɛ eheyi ɛnʋ se, ewolo nɛ ɛtɛsɩ ɛnʋʋ kʋʋ. Mbʋ pʋyɔɔ yɔ, ɛkpɛnda ɛwɛna ɛ-ɛsɛ, ɛlɛ, ɛwɛɛ nɛ ɛnɩɣ siziŋ nɩɩyɩ. 10 Se, peeye ɛnʋ woba nɛ ɛtɛzɩ-ɩ kʋʋ ɖɔɖɔ. Mbʋ pʋyɔɔ yɔ, ɛnʋ nawa se, pawabʋ-ɩ yɔ, ɛɛpɩzɩɣ ɛtasɩ wɛʋ wezuu. Se, pʋwayɩ lɛ, ɛnʋ kuli ɛ́lɛ ñʋʋdaa hulaɣ nɛ ɛnʋ hɔsɩ ɛ́lɛ nesidaa kpayaɣ nɛ ɛnʋ wona peeye se ɛcɛlɩ ɛnʋʋ Daaviidi.
11 Daaviidi nɩ mbʋ lɛ, ɛcɩyɩ ɛ-maɣmaɣ ɛ-yɔɔ wondu, nɛ mba paawɛ ɛcɔlɔ yɔ, pacɩyɩ pa-ñɩndʋ ɖɔɖɔ. 12 Pacaɣ leɣa: Pɔhɔkɩ nɔɔ nɛ pewii ɖanaɣ nɛ ka-ɖanʋʋ Sawʋlɩ nɛ ɛ-pɩyalʋ Yoonaataanɩ nɛ Izirɛɛlɩ ñɩma ḿba pasɩbɩ you taa yɔ, pɔ-yɔɔ. Pa-tɩŋa pɛkɛ KƖPAƔLƲ ñɩma. 13 Pʋwayɩ lɛ, Daaviidi tasɩ pɔzʋʋ evebu weyi ewoba nɛ eheyi-i tɔm yɔ se, ɛkɛ le tʋ yee? Ɛ́lɛ cosi se, ɛnʋ kɛ Amaalɛɛkɩdʋ nɔɔyʋ pɩyalʋ. Se, ɛ́lɛ woba nɛ ɛcaɣ pɛ-tɛ. 14 Ɛyɔɔdɩ ḿbʋ lɛ, Daaviidi pɔzɩ-ɩ se, pɩlabɩ ɛzɩma nɛ sɔɔndʋ takpa-ɩ nɛ wiyaʋ weyi KƖPAƔLƲ lɩzaa yɔ ɛ-kʋʋ? 15 Peeye ɛya ɛ-sɔɔjanaa taa evebu nɔɔyʋ nɛ eheyi-i se, éwolo nɛ ɛkʋ evebu ɛnʋ! Sɔɔja ɛnʋ ewolo ɖɔɖɔ nɛ ɛkʋ Amaalɛɛkɩdʋ ɛnʋ ɖɔɖɔ. 16 Pakʋwaɣ-ɩ lɛ, Daaviidi heyi-i se, ɛnʋ kʋnɩ ɛ-tɩ. Se ɛyɔɔdaa se ɛkʋ wiyaʋ weyi KƖPAƔLƲ lɩzaa yɔ, nɛ ɛkʋnɩ ɛ-maɣmaɣ ɛ-tɔm.
Daaviidi teu kʋñɔŋ hendu Sawʋlɩ nɛ Yoonaataanɩ pɔ-yɔɔ yɔ
17 Pɩlabɩ ḿbʋ lɛ, Daaviidi lu kʋñɔŋ yondu natʋyʋ, Sawʋlɩ nɛ ɛ-pɩyalʋ Yoonaataanɩ pa-sɩm yɔɔ, 18 nɛ ɛha nɔɔ se pɛkpɛlɩkɩ-tʋ Yuuda hɔɔlʋʋ taa ñɩma. Se, tɩkɛ "tɔʋ kʋñɔŋ yondu", pama-tʋ "Kʋtʋʋzʋ Takayaɣ"d taa. Ndʋʋ lɛ se,
19 Izirɛɛlɩ! pɩlabɩ ɛzɩma nɛ ñɔ-sɔdɩŋ sɩ,
Ño-youlaɖaa sɔsaa hɛnɩ piyisi yɔɔ, kʋyʋʋ fɛyɩ?
20 Itaasusi tɔm ndʋʋ Gaatɩ tɛtʋ taa!
Ɩtaayele nɔɔyʋ nɩɩ-tʋ Asikalooni tɛtʋ taa habɛ yɔɔ!e.
Filisitii ñɩma halaa taa ɛtaakɔɔ pʋhʋlʋmɩnɩ-tʋ!
Maañaŋ Ɛsɔ waa ḿba pa-halaa ɛtaakɔɔ pamayɩ amaya!
21 Gilibowaa pʋŋ mɩ!
Ɩɩnaɣ ñɔɔlɩm yaa tɛʋ mɩ-yɔɔ!
Hyɩm mʋzʋŋ ñɩmbʋ nabʋyʋ ɛtaatasɩ wɛʋ mɩ-yɔɔ!
Peeye paɖʋ youlaɖaa kpayɩŋ fɛyɛ,
Sawʋlɩ kpayʋʋ ŋgʋ paatasɩɣ pɩyʋʋ num kʋ-yɔɔ kaʋ yɔ.
22 Yoonaataanɩ kʋ ɛyaa nɛ tɔʋ koyindinaa ɛsɩndaa,
Koyindinaa ḿba pɛwɛ kpekpeka yɔ pɛ-ɛsindaa,
Ɛtaakitiɣni-wayɩ kaʋ
nɛ Sawʋlɩ sɩɣa ñalakɩ ka-tʋmɩyɛ tam.
23 Sawʋlɩ nɛ Yonaataanɩ paasɔɔlɩ ɖama siŋŋ pe-wezuu caɣʋ taa,
Halɩ pa-sɩm taa maɣmaɣ, patayasɩ ɖama,
ḿba lɛ, paawɛ lɛlɛʋ nɛ pɩkɩlɩ kpeliŋ,
Pɔ-hɔ kɔɖɔkaa nɛ pɩkɩlɩ tɔɔyɩŋ!
24 Izirɛɛlɩ halaa mɩ! Iwii Sawʋlɩ!
Pɛñɛyaɣ-mɩ wondu kɩbandʋ nɛ isuu,
pacanaɣ mi-tokonaa kɩɖaɣlaa nɛ sika nɩŋgbacaɣlanaa.
25 Pɩlabɩ ɛzɩma nɛ sɔdɩŋ ɛnʋ ɛsɩ?
Pɩlabɩ ɛzɩma nɛ Yoonaataanɩ hɛnɩ piyisi yɔɔ, pɩfɛyɩ kʋyʋʋ?
26 Ñaa Yoonaataanɩ ñɔ-yɔɔ lɛ, mɔ-hɔyɛ pɩsaa,
mɛ-ɛgbaadʋ, man-taabalʋ sɔsɔ!
Ɖa-taabalɩyɛ taawɛnɩ ɖaɣʋ,
halɩ pɩɩkɩlɩ halaa sɔɔlɩm.
27 Pɩlabɩ ɛzɩma nɛ ñɔ-sɔdɩŋ ɛnʋ ɛsɩ?
Pɩlabɩ ɛzɩma nɛ sɔɔjanaa sɔsaa ḿba pasɩ?