SAMƲYƐƐLƖ
TAKAYAƔ KAJALAƔ ÑƖŊGA
Tɔm kiheyitu
Ɖooo lɛ, Samʋyɛɛlɩ takayaɣ kajalaɣ ñɩŋga nɛ naalɛ ñɩŋga paakɛ takayaɣ kʋɖʋmaɣ. Ɛlɛ, kaaɖaɣlaa pɩtɩɩfɛyɩ. Pʋ-yɔɔ tɔm mayaa tayɩ-kɛ tɔm naalɛ.
Lɔɔyaɣdʋ Samʋyɛɛlɩ weyi paya ɛ-hɩɖɛ takayaɣ kajalaɣ ñɩŋga kanɛ nɛ naalɛ ñɩŋga yɔ, ɛnʋʋ lɛ Izirɛɛlɩ nɔɔɖɛyaa taa kɛtɛzaɣ ñɩnʋ. Ɛsɔ tiyaɣni-wɛ nɛ payakɩ ɛ-samaɣ ñʋʋ alɩwaatʋ kaɖɛ ñɩndʋ taa. Takayaɣ kajalaɣ ñɩŋga kanɛ ka-taa lɛ, ɖɩnaɣ se Ɛsɔ yanɩ Samʋyɛɛlɩ se ɛkɛ Izirɛɛlɩ cejewe tɩŋa taa ñɩma nɔɔɖɛyʋ nɛ ɛtɛ ɛkɛ pɔ-cɔjɔ nɛ pɔ-lɔɔyaɣdʋ lɛɣzʋʋ alɩwaatʋ taa. Ɛsɔ yɔɔdʋʋnɩ-ɩ nɛ piyele ɛnʋ ñeheyiɣ samaɣ ndʋ Ɛsɔ heyi-i yɔ. Pɩtaakɛnɩ mbʋʋ nɔɔɖɛyaa mba paalɛyɩ-ɩ kɔm yɔ. Pʋ-yɔɔ ɛyaa pɔzaɣ pa-tɩ se, ɛ-wayɩ lɛ, apɩzɩɣ nɛ ɛsɩɣlɩ sʋʋtʋ ndʋ? Ɛzɩ pamaʋ nɔɔɖɛyaa lɛlaa tɔm Nɔɔɖɛyaa takayaɣ taa yɔ, ɛlɩzɩɣ samaɣ ko-koyindinaa nesi taa nɛ ɛñɔɔzɩ ka nɛ Ɛsɔ pɛ-hɛkʋ taa nɛ ɛhʋʋ ɛyaa tɔm.
Nabʋyʋ taa, Samʋyɛɛlɩ labɩ ɖɔɖɔ cɔjɔtʋ tʋmɩyɛ, ɛlaa Ɛsɔ kɩlaŋ.
Samʋyɛɛlɩ kɔm ɛwɩsɩ sɩbʋ lɛ, Izirɛɛlɩ ñɩma pɔzɩ Ɛsɔ se ɛsɩɩ-wɛ wiyaʋ ɛzɩ pɩwɛʋ ajɛɛ lɛɛna taa yɔ. Peeye ɛ́lɛ tɩŋnɩ Samʋyɛɛlɩ yɔɔ nɛ ɛsɩɩ Sawʋlɩ , nɛ ɛ́lɛ wayɩ, Daaviidi . Samʋyɛɛlɩ takayaɣ kajalaɣ ñɩŋga kanɛ ka-taa lɛ, pɛkɛdɩɣ-ɖʋ Samʋyɛɛlɩ wezuu nɛ ɛ-tʋmɩyɛ pɔ-tɔm, pʋwayɩ lɛ, pawɩlɩ kaɖɛ ndɩ ndɩ ɖɩɩwɛ Samʋyɛɛlɩ nɛ Sawʋlɩ pɛ-hɛkʋ taa, nɛ Sawʋlɩ nɛ Daaviidi pɛ-hɛkʋ taa yɔ.
Ɖɩnaɣ
(.) Samʋyɛɛlɩ tɔm 1 Samʋyɛɛlɩ 1-7 taa.
(.) Samʋyɛɛlɩ nɛ Sawʋlɩ pa-ñɩndʋ 1 Samʋyɛɛlɩ 8-15 taa.
(.) Samʋyɛɛlɩ nɛ Sawʋlɩ nɛ Daaviidi pɔ-tɔm 1 Samʋyɛɛlɩ 16-2 Samʋyɛɛlɩ 1 taa.
Takayaɣ kajalaɣ ñɩŋga kanɛ ka-taa lɛ, lɩmaɣza naalɛ wɛnɩ kewiyaɣ tɔm taa.
Kajalaɣ ñɩnɖɛ lɛ se, pɩɩwɛɛ se wiyaʋ ɛkɛ Ɛsɔ nɛ samaɣ pa-tʋmlaɖʋ. Toovenim lɛ, Ɛsɔ maɣmaɣ lɩzɩnɩ-ɩ. Patɩŋɩɣnɩ num mbʋ papɩyɩɣ ɛ-ñʋʋ taa yɔ pʋ-yɔɔ nɛ palabɩ-ɩ lɩzʋʋ ḿbʋ pɩ-yʋsaɣ. Pɩwɛɛ se eyele nɛ laŋhɛzɩyɛ wɛɛ ɛjaɖɛ taa Ɛsɔ hɩɖɛ taa, nɛ ɛhʋʋ ɛyaa tɔm ɛzɩ pɩmʋnaʋ ɖɩ-taa ɖɔɖɔ yɔ (Ɩcɔnɩ 9; 10.1-16 nɛ 11).
Naalɛ ñɩnɖɛ lɛ, mbʋ pɩpɩzaɣ se pɩfɛyɩ ɖeu kewiyaɣ tɔm taa yɔ. Mbʋ yebina nɛ Izirɛɛlɩ ñɩma lɔ KƖPAƔLƲ Izirɛɛlɩ Ɛsɔ, weyi ɛkɛ pe-wiyaʋ maɣmaɣ kpem yɔ (8.6-8), alɩwaatʋ ndʋ pɔpɔzaa se pasɩɩ-wɛ wiyaʋ yɔ. Ɖɔɖɔ lɛ, awiya ɛɛlaɣzɩɣ tɩŋnaʋ kewiyaɣ yɔɔ nɛ pañɩnɩɣ pa-maɣmaɣ pɛ-kɛzɛsɩ, paañɩnɩɣ samaɣ ñɩŋga (Ɩcɔnɩ ñʋŋ 8 nɛ 10.17-25 nɛ 12).