SAMƲYƐƐLƖ
TAKAYAƔ KAJALAƔ ÑƖŊGA
1
Hana tenduu KƖPAƔLƲ, Ɛsɔ ɖɩɣa taa Siiloo yɔ
1 Abalʋ nɔɔyʋ wɛnɩ mbʋ, payaɣ-ɩ se Ɛlɩkanaa. Ɛkɛ Cuufi hɔɔlʋʋ taa Raamaa tɛtʋ a taa tʋ. Tɩwɛ Efirayim pʋŋ egeetiye taa. Ɛ-caa lɛ, Yerooham, ɛ́lɛ caa lɛ, Eliihuu, ɛ́lɛ caa lɛ, Tohuu, ɛ́lɛ caa lɛ, Cuufi. 2 Ɛlɩkanaa kɛwɛnɩ halaa naalɛ. Payaɣ lɛlʋ se Hana, nɛ lɛlʋ se Peniinaa. Peniinaa kɛwɛnɩ piya, ɛlɛ, Hana ñataawɛna.
3 Paa pɩnaɣ ŋga lɛ, Ɛlɩkanaa kʋyʋʋnɩ ɛ-tɛ Raamaa nɛ ewoki Ɛsɔ ɖɩɣa taa Siiloo tɛtʋ b taa nɛ eluŋuu KƖPAƔLƲ, Ɛsɔ Ɖoŋ Tɩŋa tʋ tɛɛ nɛ ɛlaɣ-ɩ kɩlaŋ. Elii pɩyalaa, Hofinii nɛ Pinaasɩ, pa-naalɛ, paakɛ KƖPAƔLƲ cɔjɔnaa Siiloo peeye. 4 Elɩkanaa woki nɛ ɛlaa lɛ, ɛha Peniinaa nɛ paa ɛ́lɛ pɩɣa ŋgaa nanʋʋ nanʋʋ. 5 Ɛlɛ, ɛhaɣ Hana nɛ pɩkɩlɩ mbʋ, mbʋ pʋyɔɔ yɔ, paa KƖPAƔLƲ ɛtaha-ɩ piya yɔ, ɛnʋʋ ɛkɩlɩ sɔɔlʋʋ. 6 Hana yɔnɖɔŋ Peniinaa kɛwɛɛ ɛkpazɩɣ ɛ-pana se ɛɖʋ-ɩ fɛyɛ, mbʋ pʋyɔɔ yɔ, KƖPAƔLƲ taha-ɩ pɩɣa. 7 Paa pɩnaɣ ŋga, mbʋ ɖeke. Hana kʋyʋʋ se ewoki KƖPAƔLƲ ɖɩɣa taa lɛ, Peniinaa yɔɔdʋʋ-ɩ tɔm ndʋ tɩwɩzɩɣ-ɩ yɔ.
Pɩnaɣ nakɛyɛ lɛ, Hana wɛɛ wiluu yɔɔ nɛ ekizi tɔɔnaɣ. 8 Peeye ɛ-walʋ Ɛlɩkanaa pɔzɩ-ɩ se, ɛbɛ laba nɛ ewiliɣ nɛ ekizi tɔɔnaɣ? Pɩlabɩ ɛzɩma nɛ ɛ-hɔyɛ pɩsɩ mbʋ? Se, ɛnʋ takɩlɩ-ɩ wazaɣ abalɩbiya hiu (10) naa we?
9 Pɔkɔm pɛtɛ tɔɔʋ nɛ pɔñɔɔ Ɛsɔ ɖɩɣa taa, Siiloo tɛtʋ taa lɛ, Hana kʋyɩ. Cɔjɔ Elii kacaɣ e-kpelaɣ yɔɔ kʋ-nɔnɔɔ taa. 10 Hana hɔyɛ kapɩsaa siŋŋ nɛ ewiliɣ nɛ etendiɣ KƖPAƔLƲ. 11 Eheyaɣ KƖPAƔLƲ, Ɛsɔ Ɖoŋ Tɩŋa Tʋ se, ɛ́lɛ ɛna siziŋ weyi ɛnʋ nɩɣ yɔ. Se ɛtaasɔɔ ɛnʋ yɔɔ, ɛlɛ, ɛna ɛnʋ pʋtɔdɩyɛ nɛ ɛha-ɩ abalɩbɩɣa. Se, ɛnʋ heyiɣ-i se, pʋbʋ ɛkpakɩɣ-kɛ nɛ ɛha-ɩ kpagbaa haʋ nɛ kɛwɛɛ ɛ-tʋmɩyɛ taa tam, paahʋŋ kɔ-ñɔsɩ kaʋ c. 12 Hana tendi KƖPAƔLƲ nɛ pileɖi nɛ Elii wɛɛ ɛcɔŋnɩ-ɩ. 13 Ɛnaɣ e-ndome makɩ, ɛlɛ, ɛɛnɩɣ ndʋ ɛyɔɔdʋʋ yɔ. Nɛ Elii maɣzɩɣ se sʋlʋm kʋʋ-ɩ. 14 Peeye ɛpɔzɩ-ɩ se, ɛtasɩɣ wɛʋ wɛtʋ ndʋ tɩ-taa mbʋ nɛ pileɖi yaa we? Eheyi-i se ɛlɩɩ peeye se ɛkɩlɩ ñɔʋ! 15 Hana heyi-i se, pɩlɩ! Ɛnʋʋ halʋ pɩlabam. Ɛlɛ, ɛnʋ tɔñɔɔ sʋlʋm, sʋlʋm ɛɛkʋʋ ɛnʋ. Se, ɛnʋ wobi peeye se ɛkpaɣ mbʋ pɩcɛyɩɣ-ɩ yɔ, nɛ ɛɖʋzɩ KƖPAƔLƲ nesi taa. 16 Se, ɛ́taakpaɣ ɛnʋ ɛzɩ halʋ weyi ɛɛwazɩɣ pʋyʋ yɔ. Ɛnʋ sɛ Ɛsɔ nɛ pileɖi, mbʋ pʋyɔɔ yɔ, pɩkɩlɩ ɛnʋʋ labʋ nɛ ɛ-hɔyɛ kɩlɩ pɩsʋʋ. 17 Peeye Elii heyi-i se, ye ḿbʋ, ekpemni laŋhɛzɩyɛ. Se, Izirɛɛlɩ Ɛsɔ ɛha-ɩ mbʋ ɛsʋlʋmɩ ɛ́lɛ yɔ! 18 Hana ñeheyi-i se, ɛ́la ɛnʋʋ ɛ-tʋmlaɖʋʋ lootiye tam. Ɛyɔɔdɩ ḿbʋ lɛ, ɛ-ɛza ñɩŋɩyɛ cɛ nɛ ewolo nɛ etisi ɛtɔɔ tɔɔnaɣ.
19 Kifem tanaŋ cu lɛ, Ɛlɩkanaa nɛ ɛ-hɔʋ taa ñɩma powolo poluŋ KƖPAƔLƲ tɛɛ nɛ pakʋyɩ papɩsɩ pɛ-tɛ, Raamaa tɛtʋ taa.
Samʋyɛɛlɩ lʋlʋʋ nɛ ɛ-pɩcatʋ pɔ-tɔm
Pɔkɔma papɩsɩ lɛ, Ɛlɩkanaa nɛ ɛ-halʋ Hana pacaɣ, nɛ KƖPAɣLƲ la Hana mbʋ ɛpɔzɩ-ɩ e-tenduu taa yɔ. 20 Hana haɣ hoa, nɛ ɛlʋlɩ abalɩbɩɣa, nɛ ɛyaa-kɛ se Samʋyɛɛlɩ d. Mbʋ pʋyɔɔ yɔ, KƖPAƔLƲ cɔlɔ ɛsʋlʋm-ɩ.
21 Pʋ-wayɩ lɛ , Ɛlɩkanaa nɛ ɛ-hɔʋ taa ñɩma tɩŋa payɩ patasɩ pɩsʋʋ Siiloo tɛtʋ taa se ɛlaa KƖPAƔLƲ pɩnaɣ taa kɩlaʋ, nɛ kɩlaʋ lɛɛkʋ ŋgʋ ɛɛɖʋwa se ɛlaɣ-ɩ yɔ. 22 Ɛlɛ, Hana tatɩŋ ɛ-walʋ. Eheyi-i se ɛnʋ ɖaŋɩɣ nɛ ɛcɛ pɩɣa hɩɖɛ nɛ pʋcɔ ewoni-kɛ Siiloo nɛ ɛlɩsɩ-kɛ nɛ ɛwɩlɩ KƖPAƔLƲ, nɛ kacaɣ peeye tam yɔɔ. 23 Ɛ-walʋ Ɛlɩkanaa heyi-i se, ɛla mbʋ pɩwɛ-ɩ ɖeu yɔ. Se, ɛcaɣ nɛ pɩkɔɔ pɩsɩnɩ alɩwaatʋ ndʋ ɛcɛbɩ-kɛ hɩɖɛ yɔ. KƖPAƔLƲ ɛñɩtɩ ɛla mbʋ ɛɖʋwa yɔ. Pʋ-yɔɔ Hana caɣ Raamaa nɛ ɛhaɣ ɛ-pɩyalʋ hɩɖɛ. 24 Ɛkɔm ɛcɛbɩ-ɩ hɩɖɛ lɛ, ɛkpaɣ-ɩ nɛ ewoni KƖPAƔLƲ ɖɩɣa taa Siiloo tɛtʋ taa, ŋgʋ, ɛkɛ pɩɣa yem. Ɛɖɛɣaɣ mbʋ lɛ, ɛkpɛndɩnɩ nɔ abalɩñɩnʋ weyi ɛwɛnɩ pɩnzɩ naadozo e yɔ, nɛ mʋlʋm kutoku, nɛ sʋlʋm pɛʋ. 25 Powoba lɛ, palaa nɔ ɛnʋ, nɛ piyele powoni pɩɣa Elii cɔlɔ. 26 Peeye Hana ya Elii se, Ɖajaa! Ne ɛpɔzɩ-ɩ se, ɛtɔzʋʋ halʋ weyi ɛɛsɩŋ ɛ-cɔlɔ peeye nakʋyʋ wiye nɛ etendiɣ KƖPAƔLƲ yɔ ɛ-yɔɔ yaa we? Se eɖuwaa se toovenim lɛ, ɛnʋʋ lɛ halʋ ɛnʋ. 27 Eheyi-i se, tɔɔ! Ɛcɔnɩ pɩɣa ŋ́ga nɛ ɛna! Ŋgaa ɛnʋ ñɩnaɣ nɛ etendiɣ Ɛsɔ. KƖPAƔLƲ ha ɛnʋʋ kɛ. 28 Piyele ɛnʋʋ lɛ, ɛcaɣ se ɛha-kɛ KƖPAƔLƲ nɛ kɛkɛ ɛ-ñɩŋga ke-wezuu caɣʋ tɩŋa. Pʋ-wayɩ lɛ, Ɛlɩkanaa nɛ ɛ-hɔʋ taa ñɩma poluŋ pɔ-nʋmbɛla yɔɔ KƖPAƔLƲ tɛɛ.