2
Hana sɛɣʋ Ɛsɔ yɔ
1 Pʋ-wayɩ lɛ, Hana sɛɛ Ɛsɔ se,
KƖPAƔLƲ yɔɔ lɛ, ɛnʋ taa hʋlumɩ poyi poyi.
KƖPAƔLƲ yɔɔ lɛ, ɛnʋ ɛɛkaŋ ñʋʋ,
Ɛpɩzɩɣ ewoŋ e-koyindinaa.
Ɛsɔ yabɩ ɛ-ñʋʋ, ɛ-taa hʋlɩmaa!
2 KƖPAƔLƲ fɛyɩ ɖaɣʋ,
Ɖɛ-Ɛsɔ ɖeke koŋ lɛ ɛwaɣ,
Ɛsɔ nɔɔyʋ fɛyɩ nɛ pɩtasɩnɩ-ɩ.
3 Ɩtaakɩlɩ yɔɔdʋʋ tɩkpazʋʋ tɔm!
Tɛtɛ pɛɛŋɩyɛ tɔm ɛtaatasɩ lɩʋ mɩ-nɔsɩ taa!
KƖPAƔLƲ lɛ Ɛsɔ weyi ɛsɩm pɩ-tɩŋa payɩ yɔ.
Ɛnʋ hʋʋnɩnɩ ɛyaa mbʋ palaba yɔ pʋ-yɔɔ.
4 Sɔdɩŋ tɔŋ pɛlaa,
ajamaa ñakpa ɖoŋ.
5 Mba pataatɛɖɩɣ pʋyʋ yɔ, pañɩnɩɣ se pala pʋyʋ nɛ pehiɣ pɔtɔɔ.
Mba ñɔɔsɩ ñawɩɣaɣ-wɛ yɔ, pɩtacazɩ pɔzʋʋ se paba ɛla tʋmɩyɛ.
Kaalʋlaɣ lʋlʋʋ piya lʋbɛ (7),
weyi ɛlʋlɩ piya sakɩyɛ yɔ, ɛ́lɛ ñapɩsɩ kaalʋlaɣ.
6 KƖPAƔLƲ kʋʋna, ɛnʋ haɣnɩ wezuu ɖɔɖɔ,
ɛnʋ tisiɣni ɛyaa hadɛtɩyɛ taa, ɛnʋ kpazɩɣ-wɛ.
7 KƖPAƔLƲ pɩsɩɣnɩ ɛyaa kʋñɔndɩnaa, ɛnʋ pɩsɩɣnɩ-wɛ ñɩm tɩnaa.
Ɛnʋ tisiɣni ɛyaa, ɛlɛ, ɛnʋ kpasɩɣnɩ-wɛ ɖɔɖɔ.
8 Ɛkʋsʋʋ ɛjam mʋzʋʋ taa,
nɛ ɛlɩsɩ pɩlabam asulima taa,
nɛ ɛha-wɛ ɖɩcaɣyɛ kɩbanɖɛ kɩbanɖɛ
ɛyaa sɔsaa cɔlɔ.
KƖPAƔLƲ tɩnɩ tɛtʋ tilima,
a-yɔɔ ɛsɩ kedeŋa.
9 Ɛcɔŋnɩ mba pañaŋ-ɩ yɔ pɔ-yɔɔ pa-nʋmɔʋ taa.
Mba paañaŋ-ɩ yɔ, paba ñasɩkɩ cɩkpɛndʋʋ taa.
Toovenim lɛ, ɛyʋ ɛɛwakɩnɩ ɛ-maɣmaɣ e-ɖoŋ.
10 KƖPAƔLƲ yeki nɛ tɛʋ tili ɛsɔdaa
Eyeki nɛ kɩnazɩ e-koyindinaa.
KƖPAƔLƲ kɔŋnɩ hʋnaʋ tɛtʋ kpeekpe yɔɔ ɛyaa.
Ɛhaɣ ɛ-samaɣ wiyaʋ ɖoŋ.
Wiyaʋ weyi ɛnʋʋ KƖPAƔLƲ ɛlɩzɩ-ɩ yɔ,
eyeki se ɛ́lɛ ɛtɛzɩ kpaʋ ɖoŋ.
11 Pʋ-wayɩ lɛ, Ɛlɩkanaa kiti ɛ-tɛ Raamaa tɛtʋ taa nɛ piyele Samʋyɛɛlɩ ñacaɣ Siiloo ñɩndʋ taa nɛ cɔjɔ Elii cɔŋnɩ ɛ-yɔɔ nɛ ɛlakɩ KƖPAƔLƲ tʋmɩyɛ.
Elii pɩyalaa tɔm
12 Elii pɩyalaa kɛ tɔɔyemwaa, pa-paafɛyɩnɩ KƖPAƔLƲ. 13 Pɛkɛ cɔjɔnaa, paa mbʋʋ yɔ, ɩ́na mbʋ palakaɣ yɔ. Nɔɔyʋ ewoba nɛ ɛlaa yɔ, pɔkɔŋ se patɩzɩɣ nandʋ lɛ, weyi ɛsɩŋnɩ cɔjɔnaa yɔ, etiwobu tɩ-cɔlɔ, ɛɖɔkɩ kela lɔɔyaɣ, kɛwɛnɩ kela naadozo. 14 Ɛtalɩɣ lɛ, ɛsɔbɩ-kɛ mbʋ pɩ-taa patɩsɩɣ nandʋ yɔ. Pɩpɩzaa pɩkɛ ɖeɣa yaa ñanaɣ yaa celeɣ taa, nɛ ɛ-maɣmaɣ ɛkpaɣ mbʋ lɔɔyaɣ lɩzɩɣ yɔ, se cɔjɔ ɖeɖe lɛ. Mbʋʋ Elii pɩyalaa lakaɣ Izirɛɛlɩ ñɩma mba powokaɣ Siiloo peeye yɔ, patɩŋa payɩ. 15 Halɩ nabʋyʋ taa, pʋcɔ pɔhɔ kpɩnɛ nɖɩ palawa yɔ ɖi-num a lɛ, cɔjɔ sɩnɩyʋ woki weyi ewobi laʋ yɔ, ɛ-cɔlɔ, nɛ eheyi-i se, ɛ́lɛ ɛcɛlɩ ɛnʋʋ cɔjɔ nandʋ nɛ ɛnʋ hɔ nɛ ewoni-i. Se ye nandʋ kɩtɩzɩtʋ yɔ, cɔjɔ ɛɛmʋʋ. Ye lɛŋ ñɩndʋ yɔ, kalɩ piɖeke. 16 Ye ɛ́lɛ eheyi cɔjɔ sɩnɩyʋ ɛnʋ se pɔhɔ num nɛ pʋcɔ ɛkpaɣ mbʋ e-liu wɛɛ yɔ́ɔ yɔ, ekitiɣni ɛ́lɛ se, aayɩ, pʋwɛɛ se ɛcɛlɩ ɛnʋʋ lɛɛlɛɛyɔ. Pɩtɛkɛ mbʋʋ yɔ, ɛnʋ lɩzɩɣ-tʋ nɛ e-ɖoŋ. 17 Mbʋʋ Elii pɩyalaa yʋsaɣnɩ KƖPAƔLƲ kpem, pataañaŋ kɩlaŋ weyi palaɣaɣ-ɩ yɔ.
18 Piyele Samʋyɛɛlɩ lɛ, ɛ́lɛ ñalakaɣ ɛ-tʋmɩyɛ, KƖPAƔLƲ ɛsɩndaa. Epuwaɣ liidiye pɩsaʋ, ɛɛkɛ pɩɣa yem.
Samʋyɛɛlɩ pɩjatʋ tɔm
19 Paa pɩnaɣ ŋga lɛ, Samʋyɛɛlɩ ɖoo ñɛyaɣ-ɩ toko cikpeluu nakʋyʋ. Ɛ nɛ ɛ-walʋ pɔkɔŋ se powoki Siiloo se palaa pɩnaɣ taa kɩlaʋ lɛ, ɛkpɛndɩnɩ-kʋ nɛ ɛcɛlɩ-ɩ. 20 Powoki ḿbʋ lɛ, Elii wazɩɣ Ɛlɩkanaa nɛ ɛ-halʋ pɔ-yɔɔ, nɛ eheyiɣ Ɛlɩkanaa se, KƖPAƔLƲ eyele nɛ halʋ ɛnʋ ɛtasɩ-ɩ lʋlʋʋ piya lɛɛsɩ, nɛ sɩlɛɣzɩ ŋga paha ɛnʋʋ KƖPAƔLƲ yɔ, ko-lone taa. Pʋwayɩ lɛ, Ɛlɩkanaa nɛ Hana pekpe pɛ-tɛ. 21 Pɩlabɩ ḿbʋ lɛ, KƖPAƔLƲ la Hana ɖeu. Ɛtasɩ lʋlʋʋ abalɩbiya naadozo nɛ halɩbiya naalɛ.
Piyele Samʋyɛɛlɩ lɛ, ɛ́lɛ paɣaɣlaɣ KƖPAƔLƲ ɛsɩndaa.
Elii kalʋʋʋ ɛ-pɩyalaa yɔ
22 Elii kɔm ɛkpadɩyɩ pɩdɩɩfɛyɩ. Nakʋyʋ wiye lɛ, ɛnɩɩ ɛsɩna mbʋ ɛ-pɩyalaa lakaɣ Izirɛɛlɩ ñɩma, nɛ halɩ pacaɣ halaa mba palakɩ tʋmɩyɛ kɩɖanɖʋʋ ŋgʋ pakatɩɣ kɩ-tɛɛ yɔ kʋ-nɔnɔɔ taa yɔ. 23 Peeye ɛpɔzɩ-wɛ se, sewe ɛnʋ nɩɣ ye? Se, ɛzaɣtʋ ndʋ ɛyaa tɩŋa yɔɔdʋʋ se palaba yɔ, pɩlabɩ ɛsɩna nɛ palakɩ mbʋ? 24 Éheyi ɛ-pɩyalaa se peyele pa-lakasɩ. Se tɔm ndʋ pɔyɔɔdʋʋ pɔ-yɔɔ KƖPAƔLƲ samaɣ taa nɛ ɛnʋ nɩɣ yɔ, tɩɖɛlɩsɩ niye b. 25 Ɛyɔɔdaa ɖɔɖɔ se, ye nɔɔyʋ ɛyʋsɩnɩ lɛlʋ yɔ, Ɛsɔ pɩzɩɣ ɛfaɣsɩ-wɛ tɔm. Ɛlɛ, ye ɛyʋ ɛyʋsɩnɩ KƖPAƔLƲ, anɩ ñapɩzɩɣ ɛfaɣsɩ-wɛ yɔ? Paa mbʋʋ yɔ, Elii pɩyalaa takpaɣ pa-caa tɔm nɛ payaa pʋyʋ. Toovenim lɛ, KƖPAƔLƲ ɖʋwa se, pʋwɛɛ se pasɩ.
26 Piyele Samʋyɛɛlɩ lɛ, ɛ́lɛ kɛwɛɛ nɛ ɛpaɣlɩɣ nɛ eyeki se ɛ-tɔm ɛkɛdɩnɩ KƖPAƔLƲ nɛ tɩtɛ tɩkɛdɩnɩ ɛyaa.
Nɩŋgbaŋ hɔm mbʋ peheyi Elii nɛ ɛ-hɔʋ taa ñɩma yɔ
27 Nakʋyʋ wiye Ɛsɔ lɔɔyaɣdʋ nɔɔyʋ wobi Elii cɔlɔ nɛ eheyi-i se, KƖPAƔLƲ tɔm se, ɛnʋʋ Elii ɛ-cɔzɔnaa kɛkɛ Ejipiti wiyaʋ sɔsɔ yomaa lɛ, ɛnʋ wɩlɩ-wɛ ɛ-tɩ nɛ pasɩm-ɩ. 28 Se, Izirɛɛlɩ ñɩma cejewe taa ñɩma tɩŋa taa lɛ, ɛ-cɔzɔ Aarɔɔnɩ ɛnʋ lɩzaa se ɛkɛnɩ ɛ-cɔjɔ nɛ ɛlaɣ kɩlaŋ ɛnʋ kɩlaŋ ɖɩlayɛ, nɛ ɛhɔkɩ tɩlaaɖɩ nɛ ɛpɔzɩ ɛnʋ se ɛnʋ ɛtasɩ-ɩ tɔm. Halɩ ɛnʋ ha ɛ nɛ e-piya nɛ ɛ-sayɩnaa mbʋ mbʋ Izirɛɛlɩ ñɩma laɣ-ɩ yɔ, pɩ-hɔɔlʋʋ nakʋyʋ c. 29 Se, nɛ pɩla ɛsɩna nɛ paañaŋ kɩlaŋ nɛ haɖɛ ndɩ ndɩ mba ɛnʋ ɖʋwa se palaa-ɩ nɛ paha-ɩ alɩwaatʋ kpeekpe yɔ? Se, pɩlabɩ ɛsɩna nɛ pakpakɩɣ mbʋ ɛ-samaɣ Izirɛɛlɩ ñɩma laɣ-ɩ yɔ, pɩ-nandʋ ceɣlesi nzɩ sɩkɩlɩ ɖeu yɔ nɛ pɔtɔkɩ pa-taa? Se, pɩlabɩ ɛsɩna nɛ ɛɖʋʋ ɛ-pɩyalaa hɩɖɛ nɛ pɩkɩlɩɣ ɛnʋ maɣmaɣ? 30 Se, pʋ-yɔɔ lɛ, ɛnʋʋ KƖPAƔLƲ, Izirɛɛlɩ Ɛsɔ eheyiɣ-i se, ɛnʋ kaɖʋwa se, ɛ-hɔʋ taa ñɩma, halɩ e-liɖe taa ñɩma maɣmaɣ kɛɣ ɛnʋ cɔjɔnaa tam yɔɔ. Ɛlɛ, lɛɛlɛɛyɔ ɛnʋ kaɖɩɣ kpayɩ se pɩtatasɩ kɛʋ mbʋ. Toovenim lɛ, mba paɖʋʋ-ɩ hɩɖɛ yɔ, mbaa ɛnʋ ɖʋʋ hɩɖɛ. Piyele mba paba takpaɣ-ɩ nɛ payaa pʋyʋ yɔ, paakpakɩɣ-wɛ nɛ payaa pʋyʋ ɖɔɖɔ. 31 Se, pɩkazɩ pazɩ, ɛnʋ lɩzɩɣ ɛ-hɔʋ nɛ e-liɖe pa-taa mba pɛwɛ ɖoŋ yɔ patɩŋa payɩ, nɛ sɔsaa ɛtaatasɩ wɛʋ. 32 Se, ɛwɛɣ ɛsɩñɩŋɩyɛ taa tam d. Pɩkaɣ Izirɛɛlɩ samaɣ ɖenaʋ, piyele ɛnʋ hɔʋ taa lɛ, ɛyaa ɛɛtasɩɣ kpadɩyʋʋ kaʋ. 33 Paa mbʋʋ yɔ, ɛnʋ kazɩɣ e-liɖe taa tʋ nɔɔyʋ nɛ ɛwɛɛ ɛnʋ kɩlaŋ ɖɩlayɛ cɔlɔ nɛ ɛnaɣ-ɩ nɛ pɩcɛyɩ-ɩ nɛ ɛlɔ liu. Piyele lɛlaa lɛ, pasɩkɩ patɩŋa.
34 Se, mbʋ pɩkaɣ-ɩ wɩlʋʋ se ndʋ ɛnʋ yɔɔdaa yɔ, tɩkɛ toovenim yɔ́ɔ lɛ se, ɛ-pɩyalaa, Hofinii nɛ Pinaasɩ, pa-naalɛ pakaɣ sɩbʋ kɩyakʋ kʋɖʋmʋʋ. 35 Se, pʋwayɩ lɛ, ɛnʋ lɩzɩɣ cɔjɔ weyi ɛlakɩ mbʋ ɛnʋ ɖʋwa yɔ nɛ mbʋ ɛnʋ liu wɛɛ yɔ e. Se, ɛnʋ haɣ ɛ́lɛ sayɩnaa nɛ pɛkɛ cɔjɔnaa tam yɔɔ wiyaʋ weyɩ ɛnʋ kaɣ lɩzʋʋ yɔ, ɛ-cɔlɔ. 36 Se, pɩkaɣ sɩbʋ ɛ-hɔʋ taa nɛ pɩkazɩ weyi yɔ, ɛkaɣ wobu cɔjɔ cɔlɔ nɛ eluŋ ɛ́lɛ tɛɛ nɛ ɛsʋlʋmɩ-ɩ liidiye pɔɔyaɣ yaa tɔɔnaɣ. Se, ewoki lɛ, eheyiɣ ɛ́lɛ se, etendi-i se ɛɖʋ-ɩ paa tʋmɩyɛ nɖɩ cɔjɔnaa cɔlɔ nɛ ɛpɩsɩ ehiɣ nɛ ɛtɔɔ.