3
Ɛsɔ yaʋ Samʋyɛɛlɩ se ɛkɛ ɛ-lɔɔyaɣdʋ yɔ
1 Samʋyɛɛlɩ lakaɣ KƖPAƔLƲ tʋmɩyɛ Elii cɔlɔ. Ɛɛkɛ pɩɣa yem. Alɩwaatʋ ndʋ tɩ-taa lɛ, pɩɩwɛ kaɖɛ se KƖPAƔLƲ ɛyɔɔdɩnɩ ɛyaa yaa eyele nɛ pɩlabɩ-wɛ ɛzɩ ɖoziye yɔ. 2 Elii ɛsɛ mʋlʋm sɩkaɣ, ɛtaanaɣ camɩyɛ. Ɖoó naayɛ taa lɛ, ɛhɛnɩ ɖenɖe ɛtɩɩhɩnɩɣ yɔ. 3 Samʋyɛɛlɩ ñaahɛnɩ KƖPAƔLƲ ɖɩɣa taa Nɔɔ Haʋ Aɖakaɣ cɔlɔ a nɛ eɖou. Peteɖizidi ka-taa kanɖʋnaa b, mbʋ pʋyɔɔ yɔ, pɩtañandɩda. 4 Pɩkɛdaa lɛ, KƖPAƔLƲ yaa-ɩ, nɛ ɛheyi-i se ɛnʋʋ yɔ. 5 Peeye ɛkʋyaa ese nɛ ewolo Elii cɔlɔ nɛ eheyi-i se, ɛya ɛnʋ, ɛnʋʋ yɔ! Ɛlɛ, Elii se, ɛnʋ tayaa-ɩ, se ɛ́pɩsɩ nɛ ɛhɛnɩ. Samʋyɛɛlɩ pɩsɩ ɖɔɖɔ nɛ ɛhɛnɩ.
6 Pɩkɛdaa lɛ, KƖPAƔLƲ tasɩ-ɩ yaʋ se, Samʋyɛɛlɩ! Samʋyɛɛlɩ tasɩ kʋyʋʋ nɛ ewolo Elii cɔlɔ nɛ eheyi-i se, ɛya ɛnʋ, ɛnʋʋ yɔ! Ɛlɛ, Elii kitini-i se, ɛnʋ tayaa-ɩ, se, ɛ́pɩsɩ nɛ ɛhɛnɩ. 7 Toovenim lɛ, Samʋyɛɛlɩ tasɩmdɩ KƖPAƔLƲ, mbʋ pʋyɔɔ yɔ, ɛ́lɛ tɔyɔɔdɩnɩ-ɩ wiɖiyi kaʋ nɛ ena.
8 Pɩkɛdaa lɛ, KƖPAƔLƲ tasɩ-ɩ yaʋ tozo ɖeɖe se Samʋyɛɛlɩ! Ɛya-ɩ ḿbʋ lɛ, ɛkʋyɩ nɛ ɛtasɩ wobu Elii cɔlɔ nɛ eheyi-i se ɛya ɛnʋ, ɛnʋʋ yɔ! Peeye Elii nawa se, KƖPAƔLƲ yaɣnɩ pɩɣa. 9 Pʋ-yɔɔ eheyi Samʋyɛɛlɩ se, ɛpɩsɩ nɛ ɛhɛnɩ nɛ ye ɛtasɩ-ɩ yaʋ lɛ, ɛtɔ se, KƖPAƔLƲ, ɛyɔɔdɩ, ɛ-tʋmlaɖʋ welisiɣ! Eheyi Samʋyɛɛlɩ ḿbʋ lɛ, ɛ́lɛ pɩ́sɩ nɛ ɛhɛnɩ e-ɖeɖe.
10 Ɛhɛnaa lɛ, KƖPAƔLƲ wolo ɛsɩŋ ɛ-cɔlɔ nɛ ɛyaa-ɩ ɛzɩ lɛɛbʋ taa yɔ, se, Samʋyɛɛlɩ! Samʋyɛɛlɩ! Samʋyɛɛlɩ cosi-i se, ɛyɔɔdɩ, ɛ-tʋmlaɖʋ welisiɣ! 11 Peeye KƖPAƔLƲ heyi Samʋyɛɛlɩ se, ɛnʋ yeki nɛ Izirɛɛlɩ ñɩma sʋʋ asɛyʋʋ sɔsɔʋ nakʋyʋ taa, nɛ mba panɩɣ kɩ-tɔm yɔ, sɔɔndʋ kpa-wɛ c. 12 Se, kɩyakʋ ŋ́gʋ, ɛnʋ yeki nɛ ndʋ tɩtɩŋa payɩ ɛyɔɔdɩ Elii nɛ ɛ-hɔʋ taa ñɩma pɔ-yɔɔ yɔ, tɩla, pɩɩkazɩɣ pʋyʋ. 13 Se, ɛnʋ heyi-i se, ɛnʋ hʋʋnɩ ɛ-hɔʋ taa ñɩma kpaagbaa hʋnaʋ, mbʋ pʋyɔɔ yɔ, ɛ-pɩyalaa yʋsɩnɩ ɛnʋ, pɛpɛɛŋaɣ ɛnʋʋ tɛtɛ nɛ ɛna, ɛlɛ, ɛtakalɩ-wɛ. 14 Se, pʋ-yɔɔ ɛnʋ ɖuwaa se, paa kɩlaʋ yaa haɖɛ pɩ-taa nabʋyʋ ɛɛpɩzɩɣ piyele nɛ ɛnʋ sɔɔ Elii hɔʋ taa ñɩma kɩdɛkɛdɩm ḿbʋ pʋ-yɔɔ kaʋ.
15 KƖPAƔLƲ yɔɔdɩnɩ Samʋyɛɛlɩ ḿbʋ lɛ, ɛhɩnɩ nɛ tɛʋ kɔɔ kife. Pʋwayɩ lɛ, ɛkʋyɩ nɛ ewolo ɛtʋlɩ Ɛsɔ ɖɩɣa nɔnɔsɩ. Sɔɔndʋ kpaɣaɣ-ɩ se eheyi Elii ndʋ KƖPAƔLƲ heyi-i yɔ. 16 Ɛlɛ, Elii yaa-ɩ se, ɛnʋ pɩyalʋ Samʋyɛɛlɩ! Ɛ́lɛ sɛɛ se, ɛnʋ Caa! 17 Ɖɩnɛɛ Elii pɔzɩ-ɩ se, se we KƖPAƔLƲ heyi-i? Se, ɛnʋ tendi-i se ɛtaamɛsɩ ɛnʋʋ natʋyʋ! Se, ye ɛmɛsɩ ɛnʋʋ ndʋ KƖPAƔLƲ heyi-i yɔ tɩ-taa natʋyʋ yɔ, ɛ́lɛ ɛhɔ ɛ-nɩŋgbaaŋ nɛ kɩcɛkɩ, kɩcɛ. 18 Peeye Samʋyɛɛlɩ kɛdɩ-ɩ pɩ-tɩŋa payɩ, ɛtɛmɛsɩ-ɩ pʋyʋ. Ɛkɛdɩ-ɩ ḿbʋ lɛ, Elii kaɖɩ se, ɛnʋʋ lɛ KƖPAƔLƲ! Ɛla mbʋ pɩwɛ-ɩ ɖeu yɔ!
19 Samʋyɛɛlɩ paɣlaɣ. KƖPAƔLƲ kɛwɛ ɛ-cɔlɔ nɛ halɩ ndʋ tɩ-tɩŋa payɩ ɛyɔɔdʋʋnɩ ɛ́lɛ nɔɔ yɔ, ɛ́lɛ yeki nɛ tɩlakɩ. 20 Ḿbʋ yebina nɛ Izirɛɛlɩ ñɩma tɩŋa, kpaɣ Daanɩ tɛtʋ nɛ hayo kiŋ hɔɔlʋʋ taa nɛ puwolo pɩsɩnɩ Bɛɛrɩseva ñɩndʋ, hadɛ kiŋ ñɩŋgʋ taa, pana pa-tɩŋa se, Samʋyɛɛlɩ kɛ KƖPAƔLƲ lɔɔyaɣdʋ maɣmaɣ siŋŋ. 21 KƖPAƔLƲ kɛwɛɛ nɛ ɛlɩzɩɣ ɛ-tɩ nɛ panaɣ-ɩ Siiloo. Mbʋ pʋyɔɔ yɔ, Siiloo peeye ɛtɩŋnɩ ɛ-tɔm yɔɔ nɛ ɛlɩzaɣ ɛ-tɩ nɛ ɛwɩlɩ Samʋyɛɛlɩ.