4
1 KƖPAƔLƲ heyiɣ Samʋyɛɛlɩ ɛ-tɔm ḿbʋ lɛ, ɛ́lɛ ñeheyiɣ-tʋ Izirɛɛlɩ samaɣ tɩŋa.
Filisitii ñɩma lɛɣʋ Nɔɔ Haʋ Aɖakaɣ yɔ.
Nakʋyʋ wiye Izirɛɛlɩ ñɩma ñɔɔzɩ pa-tɩ se pakʋyɩ Filisitii ñima yɔɔ. Peeye powoba pekpeɣli ɖama ɖenɖe payaɣ se Ɛvɛɛnɩhayɛzɛɛrɩ a nɛ piyele Filisitii ñɩma ñekpeɣli ɖama Afɛɛkɩ tɛtʋ taa. 2 Filisitii ñɩma kpeɣli ɖama nɛ papa Izirɛɛlɩ ñɩma nɛ ɛza nɛ pakʋyɩ pɔ-yɔɔ, nɛ you kɔɔ kɩsaa miŋ, nɛ Filisitii ñɩma wa Izirɛɛlɩ ñɩma nɛ pakʋ pɛ-ɛyaa ɛzɩ kutokiŋ naanza (4.000) yɔ. 3 Ɛyaa mba pɩkazaa yɔ, pɔkɔm pasʋʋ ɖikpeɣliye taa lɛ, Izirɛɛlɩ ɛjaɖɛ taa sɔsaa pɔzʋʋ pa-tɩ se, pɩlabɩ ɛsɩna nɛ KƖPAƔLƲ yele nɛ Filisitii ñɩma wa mbaa kɩyakʋ ŋgʋʋ mbʋ? Se, mba ewolo Siiloo nɛ pañɩnɩ KƖPAƔLƲ Nɔɔ Haʋ Aɖakaɣ nɛ powoni-kɛ nɛ kɛwɛɛ pɛ-hɛkʋ taa, nɛ kalɩzɩ-wɛ po-koyindinaa nesi taa. 4 Peeye petiyi ɛyaa Siiloo tɛtʋ taa se, powolo pakpaɣ KƖPAƔLƲ Nɔɔ Haʋ Aɖakaɣ nɛ powona. KƖPAƔLƲ Ɛsɔ Ɖoŋ Tɩŋa Tʋ ɛnʋ ɛɛcaɣ e-tiyiyaa mba paɖaŋʋʋ yɔ, pɔ-yɔɔ b. Cɔjɔ Elii pɩyalaa Hofinii nɛ Pinaasɩ pa-naalɛ patɩŋaɣ Aɖakaɣ ŋga ka-wayɩ. 5 Patɩkɔm patanɩ Nɔɔ Haʋ Aɖakaɣ ŋgaa Izirɛɛlɩ ñɩma ɖikpeɣliye taa lɛ, mba pa-tɩŋa payɩ paawɛ peeye yɔ, pakʋyɩ nɛ pewiliti laŋhʋlʋmɩyɛ kewilitasɩ nɛ tɛtʋ ñamsɩ. 6 Filisitii ñɩma nɩ kewilitasɩ nzɩ sɩ-taŋ lɛ, pɔpɔzʋʋ pa-tɩ se, Ebiree ñɩma ɖikpeɣliye taa kewilitasɩ ńzɩ, sɩ-tɔbʋʋ se we? Pɔkɔm pana se, KƖPAƔLƲ Nɔɔ Haʋ Aɖakaɣ talɩ Izirɛɛlɩ ñɩma ɖikpeɣliye taa lɛ, 7 sɔɔndʋ kpa-wɛ nɛ pɔyɔɔdʋʋ pa-taa pe-ɖeke se, toovenim lɛ, Ɛsɔ talɩ pa-ɖikpeɣliye taa, ɛtaawɛɛ, ɛlɛ, lɛɛlɛɛyɔ, ɛwɛɛ. Se, pɩtɔɔ ḿba! 8 Se, pɩtɔɔ ḿba! Se, apɩzɩɣ ɛlɩzɩ mbaa Ɛsɔ Ɖoŋ Tɩŋa Tʋ ɛnʋ e-nesi taa? Ɛnʋ ɖʋnɩ Ejipite ñɩma kʋñɔmɩŋ tɩŋa payɩ lakʋ taa . 9 Se, mbaa Filisitii ñɩma, pɛ́wɛɛ abalɩtʋ! Se, ḿba ɛ́kɛ abalaa! Pɩ́tɛkɛ mbʋʋ yɔ, ḿba pɩsɩɣ Ebiree ñɩma yomaa ɛzɩ paba kɛkɛʋ ḿba ñɩma yɔ. Se, ḿba ɛ́kʋyɩ pɔ-yɔɔ nɛ abalɩtʋ. 10 Peeye Filisitii ñɩma kʋyɩ Izirɛɛlɩ ñɩma yɔɔ, nɛ pa nɛ wɛ poyoo nɛ pawa Izirɛɛlɩ ñɩma nɛ paba se, nɛ papɩsɩ pɛ-tɛ pɛ-tɛ. Paakʋ Izirɛɛlɩ ñɩma taa ɛyaa sakɩyɛ siŋŋ. Paakʋ ɛyaa kutokiŋ niidozo (30.000), 11 nɛ piyele pɛlɛɣ Ɛsɔ Aɖakaɣ , nɛ pakʋ Elii pɩyalaa ḿba pa-naalɛ, Hofinii nɛ Pinaasɩ.
Cɔjɔ Elii nɛ e-wolu pasɩbʋ yɔ
12 Kɩyakʋ kʋɖʋmʋʋ ŋ́gʋ ɖɔɖɔ Bineyaamiini liɖe taa abalʋ nɔɔyʋ lɩnɩ you taa nɛ ese nɛ ɛtʋlɩ nɛ ɛkɔɔ ɛtalɩ Siiloo. Ɛɛcɩyɩ e-wondu nɛ ɛɖʋ ɛ-ñʋʋ taa tɛtʋ nɛ pɩwɩlɩ se ɛwɛ laŋpɩsɩyɛ taa. 13 Ɛkɔm ɛtalɩ lɛ, Elii kacaɣ e-kpelaɣ yɔɔ habɩyɛ nɔɔ nɛ ɛɖaŋ kpam. Mbʋ pʋyɔɔ yɔ, ɛnɩɣzaɣ Ɛsɔ Nɔɔ Haʋ ɖakaɣ yɔɔ. Ɛsʋ tɛtʋ taa lɛ, eheyi tɩ-taa ñɩma mbʋ pɩlaba yɔ, nɛ pamakɩ kobusi pa-tɩŋa nɛ patɩmɩɣ. 14 Elii nɩ kobusi nzɩɩ ḿbʋ lɛ, ɛpɔzʋʋ ɛ-tɩ se, kobusi nzɩ pamakɩ mbʋ yɔ, sɩ-tɔbʋʋ se we? Peeye abalʋ ɛnʋ ewobi ɛ-cɔlɔ nɛ fezi kakaŋ nɛ ɛkɛdɩ-ɩ mbʋ pɩlaba yɔ. 15 Alɩwaatʋ ndʋ lɛ, Elii kɛwɛnɩ pɩnzɩ nɩɩnʋwa nɛ nɩɩnaza nɛ lutozo (98), ɖɔɖɔ lɛ, ɛɛyʋlɩmɩ kpaagbaa kpem. 16 Abalʋ ɛnʋ, éheyi-i se, lɛɛlɛɛyɔ́ɔ ɛnʋ lɩnɩ you taa nɛ ɛnʋ talɩ. Se, kɩyakʋ ŋgʋʋ ɛnʋ se peeye. Elii yaa-ɩ se ɛ-pɩyalʋ nɛ ɛpɔzɩ-ɩ se, ɛbɛ laba? 17 Abalʋ ɛnʋ, ecosi-i se, Filisitii ñɩma lɩwa lɛ, Izirɛɛlɩ ñɩma se nɛ paakʋ Izirɛɛlɩ ñɩma taa ɛyaa sakɩyɛ siŋŋ. Halɩ ɛ-pɩyalaa, Hofinii nɛ Pinaasɩ pa-naalɛ pasɩba, nɛ Filisitii ñɩma lɛɣ Ɛsɔ Nɔɔ haʋ Aɖakaɣ nɛ pɛɖɛna! 18 Ɛtɩyɔɔdɩ Ɛsɔ Nɔɔ haʋ Aɖakaɣ tɔm ḿbʋ lɛ, Elii lɩnɩ e-kpelaɣ yɔɔ nɛ ɛtɔlɩ ŋtaayaɖɩyɛ e-limaɣ yɔɔ Ɛsɔ ɖɩɣa nɔnɔɔ cɔlɔ nɛ ɛ-ñʋʋ yɔkɩ nɛ ɛsɩ. Mbʋ pʋyɔɔ yɔ, ɛɛkpadɩyaa, nɛ ɛtɛ ɛwɛɛ yuŋ. Ɛɛcɔnɩ Izirɛɛlɩ ñɩma yɔɔ pɩnzɩ nɩɩnaza (40).
19 Ŋgʋ, e-wolu, Pinaasɩ halʋ kahaɣ hoa nɛ ɛwɩzɩ lʋlʋʋ. Ɛnɩwa se, pɛlɛɣ Ɛsɔ Nɔɔ haʋ Aɖakaɣ nɛ ɛ-panja nɛ ɛ-walʋ pasɩba lɛ, ɛpazɩ wɩzasɩ nɩʋ nɛ esobi nɛ ɛlʋlɩ. 20 Se, ɛcaɣaɣ sɩbʋ lɛ, halaa mba paawɛ ɛ-cɔlɔ yɔ, peheyi-i se, sɔɔndʋ ɛtaakpa-ɩ se, abalɩbɩɣa ɛlʋlaa! Ɛlɛ, etocosi natʋyʋ, halɩ ɛtatɩɩcɔnaʋ se ɛna. 21 Pʋwayɩ lɛ, ɛtɔ se, ɖenɖe Ɛsɔ koboyaɣ kʋyɩ Izirɛɛlɩ ɛjaɖɛ taa yɔ, ɛnʋ yaɣ ɛ-pɩɣa ŋga se, Ikavoodi. Pʋ-tɔbʋʋ se, koboyaɣ tatasɩ wɛʋ. Pɛlɛɣʋ Ɛsɔ Nɔɔ haʋ Aɖakaɣ yɔ, nɛ ɛ-panja nɛ ɛ-walʋ pa-sɩm pɔ-yɔɔ ɛmazaa nɛ ɛyaa-kɛ mbʋ. 22 Mbʋʋ ɛkaɖɩ kpayɩ se, KƖPAƔLƲ koboyaɣ kʋyɩ Izirɛɛlɩ ɛjaɖɛ taa, mbʋ pʋyɔɔ yɔ, koyindinaa lɛɣ KƖPAƔLƲ Nɔɔ haʋ Aɖakaɣ nɛ pɛɖɛna.