5
Ɛsɔ Nɔɔ haʋ Aɖakaɣ wɛʋ Filisitii ñɩma tɛ yɔ
1 Filisitii ñɩma lɛɣ Ɛsɔ Nɔɔ haʋ Aɖakaɣ ḿbʋ lɛ, pakpaɣ-kɛ nɛ Ɛvɛɛnɩhayɛzɛɛrɩ nɛ powoni Asidoodi tɛtʋ taa. 2 Powoni-kɛ lɛ, pasʋnɩ-kɛ pɛ-ɛgɔlɩmɩyɛ Daagɔɔnɩ naŋ tɛɛ nɛ pasɩɩ ɖɩ-sɩʋkpeɣleɣ cɔlɔ. 3 Tɛʋ fema nɛ Asidoodi tɛtʋ taa ñɩma lɩɩ lɛ, pamaɣnɩ Daagɔɔnɩ sɩʋkpeɣleɣ pam kɛ-ɛza yɔɔ KƖPAƔLƲ Aɖakaɣ ɛsɩndaa nɛ kahɩnɩ peeye. Peeye pakʋsɩ-kɛ nɛ papɩsɩnɩ-kɛ ko-lone taa. 4 Kɩtasɩ fem nɛ papɩsɩ lɛ, patasɩ maɣnaʋ sɩʋkpeɣleɣ ŋgaa tataa, KƖPAƔLƲ Aɖakaɣ ɛsɩndaa. Ke-pilimiye ɖeke pɩkazaa. Mbʋ pʋyɔɔ yɔ, ka-ñʋʋ nɛ ke-nesi pɛpɛlaa nɛ pɛmɛyɩɣ tataa ka-naŋ nɔnɔɔ taa. 5 Mbʋ yebina nɛ halɩ nɛ sɔnɔ, Daagɔɔnɩ cɔjɔnaa nɛ mba pa-tɩŋa payɩ pasʋʋ Daagɔɔnɩ naŋ tɛɛ Asidoodi tɛtʋ taa yɔ, paafɛyɩɣ kʋ-nɔnɔɔ taa.
6 Ɖɔɖɔ lɛ, KƖPAƔLƲ kɛtɛzɩ Asidoodi ñɩma nazʋʋ kpem. Ɛɛñamsɩ-wɛ nɛ eyele nɛ yaɣyaa a yaɣ pa nɛ egeetiye ńɖɩ ɖɩ-taa ñɩma. 7 Asidoodi ñɩma kɔm pana mbʋ pɩlakɩ-wɛ yɔ lɛ, pɔtɔ se, ḿba tatasɩ sɔɔlʋʋ se, Izirɛɛlɩ ñɩma Ɛsɔ Nɔɔ haʋ Aɖakaɣ ɛtasɩ caɣʋ ḿba tɛ. Se, Ɛsɔ ɛnʋ, ɛkɩlɩ nazʋʋ ḿba nɛ pɛ-ɛgɔlɩmɩyɛ Daagɔɔnɩ.
8 Peeye paya Filisitii ñɩma awiya tɩŋa pɛ-tɛ nɛ pɔpɔzɩ-wɛ se, ḿba ɛla Izirɛɛlɩ ñɩma Ɛsɔ Aɖakaɣ ɛzɩma? Paba cosi-wɛ se, pakpaɣ-kɛ nɛ powoni Gaatɩ tɛtʋ b taa. Pocosi-wɛ mbʋ lɛ, pakpaɣ Aɖakaɣ ŋ́ga nɛ powoni Gaatɩ peeye. 9 Ɛlɛ, pɔkɔm patanɩ-kɛ lɛ, KƖPAƔLƲ nazɩ tɛtʋ ndʋ tɩ-taa ñɩma. Sɔɔndʋ sɔsɔtʋ natʋyʋ kpa tɩ-taa ñɩma tɩŋa, kpaɣ piya nɛ piwolo pɩsɩnɩ sɔsaa, eyeba nɛ yaɣyaa yaɣ-wɛ. 10 Kpaagbaa ḿbʋ lɛ, pakpaɣ Aɖakaɣ ŋ́ga nɛ powona Ɛkɩrɔɔnɩ tɛtʋ c, taa. Patɩtanɩ-kɛ lɛ, Ɛkɩrɔɔnɩ ñɩma ma kubusi ɖoŋ se, pákpaɣ Izirɛɛlɩ Ɛsɔ Aɖakaɣ nɛ powoni ḿba tɛ se, pakʋ ḿba tɩŋa!
11 Pɩlabɩ mbʋ lɛ, paba ɖɔɖɔ ñayaa Filisitii ñɩma awiya tɩŋa nɛ peheyi-wɛ se, pɩwɛɛ se, paba ɛkpaɣ Izirɛɛlɩ Ɛsɔ Aɖakaɣ nɛ papɩsɩnɩ-kɛ kɛ-tɛ, pɩtɛkɛ mbʋ, ḿba sɩkɩ pa-tɩŋa. Toovenim lɛ, sɔɔndʋ kakpa tɛtʋ ńdʋ tɩ-taa ñɩma siŋŋ. Mbʋ pʋyɔɔ yɔ, KƖPAƔLƲ keyeba nɛ pana ɖɔɖɔ e-ɖoŋ siŋŋ. 12 Ɛyaa mba pataasɩ yɔ, yaɣyaa yakaɣ-wɛ nɛ pamakɩ kubusi nɛ patɩmɩɣ nɛ pɩkɔɔ pɩtalɩ ɛsɔdaa.