6
Filisitii ñɩma pɩsɩnaʋ Nɔɔ haʋ Aɖakaɣ Izirɛɛlɩ ɛjaɖɛ taa yɔ
1 KƖPAƔLƲ Nɔɔ haʋ Aɖakaɣ kacaɣ Filisitii ñɩma tɛ fenasɩ lʋbɛ (7). 2 Ɛlɛ, pɩkɔm pɩtɛmɩna se, powobi pɔpɔzɩ pɔ-cɔjɔnaa nɛ pa-tɩyaa se, ɛzɩma palakɩ KƖPAƔLƲ Aɖakaɣ ŋ́ga? Se, paba eheyi-wɛ ɛsɩna mbʋ pɩwɛɛ se, papɩsɩnɩ-kɛ kɛ-tɛ yɔ. 3 Peeye paba ñocosi-wɛ se, ye pacaɣ se, papɩsɩnɩ Izirɛɛlɩ Ɛsɔ Aɖakaɣ yɔ, pataapɩsɩnɩ-kɛ ŋtaakpasɩ. Ɛlɛ, paha Izirɛɛlɩ Ɛsɔ nabʋyʋ nɛ pɛhɛyɩnɩ kɩmɩyɛ. Pʋbʋ, pɔ-yɔɔ cɛkɩ nɛ pana mbʋ pʋ-yɔɔ Ɛsɔ ɛnʋ ɛɛwɛɛ nɛ ɛnazɩɣ-wɛ yɔ. 4 Peheyi Filisitii ñɩma ḿbʋ lɛ, pɔpɔzɩ-wɛ se, Ɛbɛ ḿba pɩzɩɣ paha Ɛsɔ ɛnʋ nɛ pɛhɛyɩnɩ kɩmɩyɛ? Pocosi-wɛ se, pamaɣzɩnɩ Filisitii ñɩma awiya ñʋʋ. Se, paha-ɩ ñɩɣlɩm wondu kagbaanzɩ, yaɣyaa lone taa nɛ ñɩɣlɩm holaa kagbaanzɩ. Toovenim lɛ, kʋdɔŋ kʋɖʋmʋʋ kakpanɩ pa nɛ pa-awiya pa-tɩŋa. 5 Se, ye ḿbʋ, palɩzɩ pa-yaɣyaa nɛ holaa ḿba paɖʋzʋʋ-wɛ pɛ-ɛjaɖɛ taa yɔ pa-anjaʋnaa nɛ piyele pasa Izirɛɛlɩ Ɛsɔ, nɛ pɩtɔma yɔ, eyele nazʋʋ pa nɛ pa-agɔlɩma nɛ pɛ-ɛjaɖɛ taa ñɩma nɛ pɩlabɩ-wɛ weewee. 6 Se, pataala hɔ ɖoŋ ɛzɩ Ejipiti ñɩma nɛ Faaraawɔɔ paalabʋ yɔ. Se, pɔtɔzɩ ɛzɩma mbʋ ɛlabɩ-wɛ nɛ pʋkɔɔ pɩsɩnɩ alɩwaatʋ ndʋ peyebi Izirɛɛlɩ ñɩma nɛ pɛɖɛɛ yɔ, pʋ-yɔɔ. 7 Se, ye mbʋ, pala youlɔɔɖɩyɛ naɖɩyɛ nɛ pakpaɣ naŋ halɩñɩŋ naalɛ weyi e-newe ɖɔŋnɩ-ɩ mʋzʋʋ, nɛ patasʋʋ-ɩ sʋʋtʋ natʋyʋ wiɖiyi kaʋ yɔ. Se, paɖɩnɩ-ɩ lɔɔɖɩyɛ ńɖɩ nɛ piyele papɩsɩnɩ e-newe kalakʋ taa. 8 Se, palabɩ ḿbʋ lɛ, pakpaɣ KƖPAƔLƲ Aɖakaɣ ŋ́ga nɛ patɩnɩ lɔɔɖɩyɛ ńɖɩ ɖɩ-yɔɔ nɛ piyele pakpaɣ ñɩɣlɩm wondu ndʋ pahaɣ-ɩ se pɛhɛyɩnɩ pa-kɩmɩyɛ yɔ, nɛ paɖʋ Aɖakaɣ cikpelaɣ nakayɛ taa nɛ powoni pasɩɩ KƖPAƔLƲ ñɩŋga cɔlɔ peeye, nɛ peyele nɛ naŋ hɔ lɔɔɖɩyɛ ńɖɩ nɛ ɩɖɛna. 9 Se, ɩɖɛɣ lɛ, pɔcɔna nɛ pana se, ɩkpakɩɣ kɛ-ɛjaɖɛ, Izirɛɛlɩ nʋmɔʋ se iwokini Beyitisɛmɛɛsɩ tɛtʋ a yɔɔ yaa we. Ye pɩlabɩ mbʋʋ yɔ, pɩwɩlɩɣ toovenim se, Izirɛɛlɩ ñɩma Ɛsɔ labɩnɩ-wɛ ɛzaɣtʋ ńdʋ tɩ-tɩŋa. Ye itowobini hɔɔlʋʋ ŋgʋ kʋ-yɔɔ lɛ, pʋbʋ, pɩtɛkɛ ɛnʋ yebina nɛ pasʋʋ asayʋʋ sʋsɔʋ ŋ́gʋ kɩ-taa. Ɛlɛ, kɩkɔm kɩkɔm yem. 10 Peeye Filisitii ñɩma laba ɛzɩ peheyuu-wɛ yɔ. Pakpaɣ naŋ halɩñɩŋ weyi e-newe ɖɔŋnɩ-ɩ mʋzʋʋ yɔ, nɛ paɖɩnɩ-ɩ youlɔɔɖɩyɛ nɛ piyele paɖɩɣ i-newe kalakʋ taa. 11 Pʋ-wayɩ lɛ, pakpaɣ KƖPAƔLƲ Nɔɔ Haʋ Aɖakaɣ nɛ patɩnɩ lɔɔɖɩyɛ ńɖɩ ɖɩ-yɔɔ nɛ pɩkpɛndɩnɩ Aɖakaɣ cikpelaɣ ŋga paɖʋ ka-taa ñɩɣlɩm yaɣyaa nɛ ñɩɣlɩm holaa pa-anjaʋnaa yɔ.
12 Naŋ ɩnʋ ɩkʋyaa lɛ, ɩkpaɣ Beyitisɛmɛɛsɩ nʋmɔʋ ɖeyi ɖeyi, nɛ ɩwɛɛ wiluu yɔɔ nɛ ɩɖɛɣ. Ɩtɛkɛzɩnɩ nɩmɩyɛ yɔɔ yaa nɩwaŋ yɔɔ. Ɩɖɛɣaɣ lɛ, Filisitii ñɩma awiya tɩŋ ɩ-wayɩ nɛ pɔkɔɔ patalɩ Beyitisɛmɛɛsɩ tɛtʋ. 13 Patalaa lɛ, tɛtʋ ndʋ tɩ-taa ñɩma ñaawɛ kɛdɛɛŋa taa nɛ pakʋŋ tɔɔnaɣ ŋga payaɣ se bilee yɔ. Paba kʋsɩ pɛ-ɛza nɛ polosi KƖPAƔLƲ Aɖakaɣ lɛ, pa-taa hʋlʋmɩ poyi poyi. 14 Naŋ ɩnʋ, ɩkɔm ɩtalɩnɩ ɛ-lɔɔɖɩyɛ Beyitisɛmɛɛsɩ abalʋ weyi payaɣ se, Yoozuuwee yɔ, ɛ-hayɩm taa lɛ, ɩsɩŋ peeye, pɩyɛ sɔsɔɖɛ naɖɩyɛ cɔlɔ. Ɖɩnɛɛ palɩzɩ lɔɔɖɩyɛ ńɖɩ ɖɩ-ɖasɩ nɛ pafaɣ nɛ pakpaɣ naŋ ɩnʋ nɛ palaa-ɩ KƖPAƔLƲ nɛ pɔhɔ nɛ pɩñaɣ. 15 Pʋcɔ nɛ pɩla ḿbʋ lɛ, Leevii liɖe taa ñɩma tisi KƖPAƔLƲ Aɖakaɣ nɛ Aɖakaɣ cikpelaɣ ŋga paaɖʋ ka-taa ñɩɣlɩm wondu nɛ kɛwɛɛ kɔ-cɔlɔ yɔ, nɛ pasɩɩ pɩyɛ ńɖɩ ɖɩ-yɔɔ, nɛ piyele Beyitisɛmɛɛsɩ ñɩma laa KƖPAƔLƲ kɩlaŋ weyi pɔhɔkɩ nɛ pɩñaɣ yɔ nɛ laŋhɛzɩyɛ ñɩŋ. 16 Pɩlabɩ mbʋ nɛ Filisitii ñɩma awiya kagbaanzɩ na lɛ, papɩsɩ Ɛkɩrɔɔnɩ tɛtʋ taa kɩyakʋ ŋ́gʋ kpaagbaa.
17 Ñɩɣlɩm yaɣyaa mba Filisitii ñɩma ha KƖPAƔLƲ se, pɛhɛyɩnɩ pa-kɩmɩyɛ yɔ, mbaa yɔ: Asidoodi tɛtʋ taa ñɩma kʋɖʋm, Gaazaa tɛtʋ taa ñɩma kʋɖʋm, Asikilooni tɛtʋ taa ñɩma kʋɖʋm, Gaatɩ tɛtʋ taa ñɩma kʋɖʋm, nɛ Ɛkɩrɔɔnɩ tɛtʋ taa ñɩma kʋɖʋm. 18 Piyele ñɩɣlɩm holaa lɛ, paba ñɛkpɛndɩ ɛzɩ tɛtʋ sɔsɔtʋ nɛ cikpetu ndʋ tɩwɛ hɔɔlʋʋ ŋgʋ Filisitii ñɩma awiya kagbaanzɩ cɔŋnɩ kʋ-yɔɔ yɔ, kɩ-taa yɔ, tɩ-ñʋʋ yɔ. Pɔ-hɔɔlʋʋ ŋgʋ, kuwobi kɩsɩnɩ Yoozuuwee hayɩm taa pɩyɛ sɔsɔɖɛ nɖɩ paasɩ ɖɩ-yɔɔ KƖPAƔLƲ Aɖakaɣ, Beyitisɛmɛɛsɩ tɛtʋ taa yɔ.
19 KƖPAƔLƲ kɔhɔm Beyitisɛmɛɛsɩ ñɩma ḿba pa-nɩŋgbaaŋ, mbʋ pʋyɔɔ yɔ, paacɔnɩ KƖPAƔLƲ Nɔɔ haʋ Aɖakaɣ taa. Eyeba nɛ abalaa nɩɩnʋwa nɛ nɩɩlɛ (70) sɩ abalaa kutokiŋ nɩɩnʋwa (50.000) taa. Piyele samaɣ ŋga pɩkazaa yɔ, kacaɣ leɣa. Mbʋ pʋyɔɔ yɔ, KƖPAƔLƲ kɔhɔm pa-nɩŋgbaaŋ siŋŋ. 20 Peeye pɔpɔzɩ pa-tɩ se, ye ḿbʋ, apɩzɩɣ ɛsɩŋ ɛnʋʋ KƖPAƔLƲ Ɛsɔ weyi ɛwɛ cɩɖɩ cɩɖɩ yɔ, ɛsɩndaa? Se, pakpakɩɣ ɛ-Aɖakaɣ ŋ́ga nɛ powoni le nɛ koposini pɛ-tɛ yɔ? 21 Ɖɩnɛɛ, petiyi nabɛyɛ se, powolo peheyi Kiiriyaatɩyeyaarim tɛtʋ b taa ñɩma se, Filisitii ñɩma pɩsɩnɩ KƖPAƔLƲ Aɖakaɣ, se, petii pakpaɣ-kɛ nɛ pekpeni pɛ-tɛ.