7
1 Powobi peheyi Kiiriyaatɩyeyaarim tɛtʋ taa ñɩma mbʋ lɛ, powolo pakpaɣ KƖPAƔLƲ Aɖakaɣ ŋ́ga nɛ powoni abalʋ weyi payaɣ se, Aviinaadaavɩ yɔ ɛ-ɖɩɣa taa, piyaɣ nakɛyɛ yɔɔ a. Pʋ-wayɩ lɛ, palɩzɩ Aminaadaavɩ pɩyalʋ Eliyaazaarɩ se, ɛkɛ kɔ-yɔɔ ɖaŋɩyʋ.
Samʋyɛɛlɩ kɛʋ Izirɛɛlɩ ñɩma nɔɔɖɛyʋ yɔ
2 Pɔkɔm powoni KƖPAƔLƲ Aɖakaɣ nɛ pasɩɩ Kiiriyaatɩyeyaarim lɛ, alɩwaatʋ sakɩyɛ ɖɛɛ, pɩɩtalɩ ɛzɩ pɩnzɩ nɩɩlɛ (20) yɔ. Alɩwaatʋ ndʋ tɩ-taa, Izirɛɛlɩ ñɩma ñɩnaɣ se pɔñɔtɩnɩ KƖPAƔLƲ. 3 Peeye Samʋyɛɛlɩ heyi-wɛ se, ye papɩsɩɣ KƖPAƔLƲ cɔlɔ nɛ pa-laŋɩyɛ tɩŋa yɔ, pʋbʋ, peyele luŋuu ɛgɔlɩmɩyɛ Asɩtaarɩtɩ nɛ agɔlɩma lɛɛna pa-sɩʋ kpelisi tɛɛ nɛ piyele pɔñɔkɔyɩnɩ KƖPAƔLƲ nɛ pala e-ɖeke koŋ ɛ-tʋmɩyɛ. Mbʋ yekina nɛ ɛlɩsɩ-wɛ Filisitii ñɩma nesi taa. 4 Pʋ-yɔɔ Izirɛɛlɩ ñɩma lɔ ɛgɔlɩmɩyɛ Baalɩ sɩʋ kpelisi nɛ ɛgɔlɩmɩyɛ halɩñɩnɖɛ Asɩtaarɩtɩ ñɩnzɩ nɛ piyele poluŋuu KƖPAƔLƲ ɖeke koŋ tɛɛ. 5 Pʋ-wayɩ lɛ, Samʋyɛɛlɩ ha nɔɔ se, samaɣ tɩŋa payɩ ekpeɣli ɖama Micipaa tɛtʋ b taa nɛ ɛnʋ sɛɛ KƖPAƔLƲ kɔ-yɔɔ. 6 Izirɛɛlɩ ñɩma kpeɣli ɖama peeye lɛ, polu lɩm nɛ pamɩzɩ tataa KƖPAƔLƲ ɛsɩndaa nɛ pɔhɔkɩ nɔɔ kɩyakʋ ŋgʋ, nɛ pɔtɔ se, payʋsɩnɩ KƖPAƔLƲ. Micipaa tɛtʋ taa peeye Samʋyɛɛlɩ kɛ Izirɛɛlɩ ñɩma nɔɔɖɛyʋ.
7 Filisitii ñɩma nɩwa se, Izirɛɛlɩ ñɩma kpeɣli ɖama Micipaa ḿbʋ lɛ, pa-awiya ɖʋ se, powoki pakʋyɩ pɔ-yɔɔ. Izirɛɛlɩ ñɩma ñanɩ ḿbʋ lɛ, sɔɔndʋ kpa-wɛ, 8 nɛ peheyi Samʋyɛɛlɩ se, ɛtaalɔ-wɛ! Ɛtaasuli ɛ-nɔɔ! Se, etendi pa-KƖPAƔLƲ Ɛsɔ nɛ ɛlɩzɩ-wɛ Filisitii ñɩma nesi taa. 9 Peeye Samʋyɛɛlɩ kpa heɣa nakɛyɛ nɛ ɛlaa KƖPAƔLƲ nɛ ɛhɔbɩ-kɛ nɛ kañaɣ lusa. Pʋwayɩ lɛ, etendi KƖPAƔLƲ Izirɛɛlɩ ñɩma yɔɔ nɛ ɛ́lɛ nɩnɩ-ɩ. 10 Samʋyɛɛlɩ laɣaɣ heɣa mbʋ lɛ, Filisitii ñɩma wolo se, pakʋyʋʋ Izirɛɛlɩ ñɩma yɔɔ. Ɛlɛ, KƖPAƔLƲ yele nɛ tɛʋ nazɩ kɩyakʋ ŋgʋ, nɛ piliɣti Filisitii ñɩma youlaɖaa nɛ piyele Izirɛɛlɩ ñɩma wabɩ-wɛ. 11 Pu-wiye ńɖɩ lɛ, Izirɛɛlɩ ñɩma youlaɖaa lɩnɩ Micipaa tɛtʋ taa nɛ pɔɖɔɔnɩ Filisitii ñɩma nɛ pɔkɔɔ patalɩ Beyitikaarɩ tɛtʋ nɛ hadɛ kiŋ nɛ pawabɩ-wɛ kpaagbaa kpem. 12 Ɖɩnɛɛ Samʋyɛɛlɩ kpaɣ pɩyɛ sɔsɔɖɛ naɖɩyɛ nɛ esiɣ-ɖɩ Micipaa tɛtʋ nɛ Sɛɛnɩ ñɩndʋ pɛ-hɛkʋ taa, nɛ ɛyaa-ɖɩ se, Ɛvɛɛnɩhayɛzɛɛrɩ pʋ-tɔbʋʋ se, Sɩnaʋ pɩyɛ, mbʋ pʋyɔɔ yɔ, ɖooo peeye KƖPAƔLƲ sɩnɩ-wɛ.
13 Wabʋ mbʋʋ paɖʋnɩ Filisitii ñɩma fɛyɛ nɛ patatasɩ wobu Izirɛɛlɩ ñɩma wayɩ se pakʋyɩ pɔ-yɔɔ. KƖPAƔLƲ kanazɩ-wɛ alɩwaatʋ ndʋ Samʋyɛɛlɩ wɛ wezuu yɔ, tɩ-tɩŋa payɩ. 14 Filisitii ñɩma kamʋ Izirɛɛlɩ ñɩma tɛtʋ ndʋ tɩwɛ kpaɣ Ɛkɩrɔɔnɩ tɛtʋ nɛ puwolo pɩsɩnɩ Gaatɩ ñɩndʋ yɔ. Izirɛɛlɩ ñɩma wabɩ-wɛ mbʋ lɛ, pamʋ-tʋ pe-nesi taa nɛ pɩkpɛndɩnɩ tɩ-tɛtʋ cikpetu cikpetu. Laŋhɛzɩyɛ kapɩsɩ ɖɔɖɔ Izirɛɛlɩ ñɩma nɛ Amɔɔrɩ ñɩma pɛ-hɛkʋ taa.