8
Izirɛɛlɩ ñɩma pɔzʋʋ se pasɩɩ-wɛ wiyaʋ yɔ
1 Samʋyɛɛlɩ kɔm ɛkpadɩyɩ lɛ, ɛsɩɩ ɛ-pɩyalaa se, pɔcɔŋnɩ Izirɛɛlɩ ñɩma yɔɔ. 2 Payaɣ ɛ-pɩyalʋ sɔsɔ se, Yowɛɛlɩ nɛ ɛ́lɛ wayɩ ñɩnʋ se, Aviya. Paawɛ Bɛɛrɩseva tɛtʋ a taa nɛ pahʋʋ ɛyaa tɔm. 3 Ɛlɛ, paalakɩ ɛzɩ pa-caa yɔ. Paawɛ liidiye laɣzaɣ nɛ petisiɣ nɛ pamʋʋ kʋjɔŋ weyi ɛyaa lakɩ-wɛ yɔ, nɛ paatasɩɣ tɔm hʋʋ tɩ-nasɩ taa. 4 Pʋ-yɔɔ Izirɛɛlɩ ñɩma sɔsaa kpeɣli ɖama nɛ powolo Samʋyɛɛlɩ tɛ Raamaa tɛtʋ b taa. 5 Powoba lɛ, peheyi-i se, lɛɛlɛɛyɔ, ɛkpadɩyaa nɛ ɛ-pɩyalaa ɛɛlakɩ ɛzɩ ɛnʋ yɔ. Pʋ-yɔɔ lɛ, ɛsɩɩ mbaa wiyaʋ nɛ ɛ́lɛ cɔŋnɩ pɔ-yɔɔ ɛzɩ palakʋʋ ajɛɛ lɛɛna taa yɔ c. 6 Peheyi Samʋyɛɛlɩ se ɛsɩɩ-wɛ wiyaʋ ḿbʋ lɛ, ɛ-hɔyɛ pɩsɩ siŋŋ nɛ ɛpazɩ tenduu KƖPAƔLƲ. 7 Peeye ɛ́lɛ heyi-i se, ɛnɩnɩ-wɛ nɛ ɛlabɩ-wɛ mbʋ pɔpɔzɩ-ɩ yɔ. Se, toovenim lɛ, pɩtɛkɛ ɛnʋʋ Samʋyɛɛlɩ pɔlɔwa, ɛlɛ, ɛnʋʋ KƖPAƔLƲ maɣmaɣ pɔlɔwa, pɔtɔsɔɔlɩ se, ɛnʋ ɛtasɩ kɛʋ pe-wiyaʋ. 8 Se, kpaɣ kɩyakʋ ŋgʋ ɛnʋ lɩzɩ-wɛ Ejipiti ɛjaɖɛ taa yɔ nɛ sɔnɔ, pɛwɛɛ pahaɣ ɛnʋʋ siɣye nɛ piyele poluŋuu agɔlɩma tɛɛ. Se, mbʋ palabɩ ɛnʋ yɔ, mbʋ ɖɔɖɔ palakɩ-ɩ lɛɛlɛɛyɔ. 9 Se, pʋ-yɔɔ lɛ, ɛnɩnɩ-wɛ. Ɛlɛ, pɩwɛɛ se, ɛka pa-ñʋŋ taa samaɣ tɩŋa taa, nɛ eheyi-wɛ waɖɛ nɖɩ nɖɩ wiyaʋ weyi ɛkaɣ cɔnaʋ pɔ-yɔɔ yɔ, ɛwɛɣna yɔ.
Waɖɛ nɖɩ wiyaʋ wɛɣna yɔ
10 KƖPAƔLƲ heyi Samʋyɛɛlɩ ḿbʋ lɛ, ɛ́lɛ ñowolo eheyi mba pɔpɔzaa se pasɩɩ-wɛ wiyaʋ yɔ. 11 Eheyi-wɛ se, patɩlɩ waɖɛ nɖɩ nɖɩ wiyaʋ weyi ɛkaɣ cɔnaʋ pɔ-yɔɔ yɔ ɛwɛɣna yɔ. Nɖɩɩ lɛ se, ɛlɩzɩɣ pa-pɩyalaa taa nabɛyɛ nɛ pɛkɛ sɔɔjanaa nɛ pasaɣ e-youlɔɔɖɛ, nɛ pacaɣ ɛ-kpaŋnaŋ nɛ peseɣ ɛ-maɣmaɣ e-you lɔɔɖɩyɛ ɛsɩndaa. 12 Pa-taa nabɛyɛ kaɣ cɔnaʋ ɛyaa kutoku (1.000) yɔɔ, nɛ lɛlaa nɩɩnʋwa (50) yɔɔ. Ɛlɩzɩɣ pa-taa lɛlaa pahayɩɣ-ɩ nɛ pakʋŋ-ɩ tɔɔnaɣ, yaa poluki-i malɩfanaa nɛ youlɔɔɖɛ wondu. 13 Se, ɛlɩzɩɣ ɖɔɖɔ pɛ-pɛlaa taa nabɛyɛ nɛ pamɩzɩɣ tɩlaaɖɩnaa, yaa patɩsɩɣ tɔɔnaɣ yaa pɛkɛ kpɔnɔlaɖaa. 14 Se, ɛmʋʋ ɖɔɖɔ pa-hayɩm mbʋ pɩkɩlɩ ɖeu yɔ, nɛ pa-tɩŋ weyi payaɣ se Viiñi yɔ, nɛ weyi payaɣ se Ooliiviye yɔ pa-ñɩmbʋ mbʋ pɩkɩlɩ ɖeu yɔ nɛ ɛcɛlɩ ɛ-sɔɔjanaa sɔsaa. 15 Ɛtayɩɣ tɔɔnasɩ nzɩ pakʋŋ pa-hayɩm taa yɔ, nɛ pa-tɩŋ weyi payaɣ se viiñi yɔ tɔm hiu hiu nɛ ɛkpaɣ pɩ-hɔɔlʋʋ kʋɖʋmʋʋ nɛ ɛcɛlɩ ɛ-kaɖɩsɩ nɛ ɛ-sɔɔjanaa sɔsaa. Kaɖɩsɩ ńzɩ sɩkɛ aleɣna. 16 Se, ɛyaɣ pa-tʋmlaɖaa halɩñɩma, nɛ abalɩñɩma nɛ pe-evebiya nɛ pɛlaa mba pakɩlɩ ɖoŋ yɔ, nɛ powolo palakɩ-ɩ tʋmɩyɛ, nɛ halɩ pɩkpɛndɩnɩ pa-kpaŋasɩ. 17 Se, pe-heŋ nɛ pa-pʋŋ pa-kalakɩŋ yɔɔ lɛ, ɛlɩzɩɣ kpɩnɛ kʋɖʋmɖɩyɛ kpɩna hiu (10) yɔɔ. Tobi taa se, pɛkɛɣ e-yomaa. 18 Se, pʋkɔŋ nɛ pɩlakɩ ḿbʋ lɛ, pamakɩ kobusi nɛ payaɣ KƖPAƔLƲ wiyaʋ weyi pa-maɣmaɣ pasɩ pa-tɩ yɔ ɛ-yɔɔ. Ɛlɛ, eecosuu-wɛ.
19 Samʋyɛɛlɩ heyi Izirɛɛlɩ ñɩma ḿbʋ lɛ, patakpaɣ ɛ-tɔm payaa pʋyʋ nɛ peheyi-i se, paa mbʋ, pɩtana ḿba nɛ pʋyʋ! Se, wiyaʋ ḿba liu wɛɛ. 20 Pʋbʋ, mba ɖɔɖɔ wɛɣ ɛzɩ ajɛɛ lɛɛna taa ñɩma yɔ. Se, pe-liu wɛ wiyaʋ se, ɛhʋʋ pɔ-tɔm pɛ-tɛ, nɛ piyele ɛkɛ po-youlaɖaa mba palʋkɩ pɔ-yɔɔ yɔ pa-ñʋʋdʋ. 21 Samʋyɛɛlɩ nɩ ndʋ Izirɛɛlɩ ñɩma tɩŋa payɩ yɔɔdaa yɔ lɛ, eheyi-tʋ KƖPAƔLƲ. 22 Ɛ́lɛ ñeheyi-i se, ɛlabɩ-wɛ mbʋ pɔpɔzɩ-ɩ yɔ. Se, ɛsɩɩ-wɛ wiyaʋ. Pʋwayɩ lɛ, Samʋyɛɛlɩ heyi Izirɛɛlɩ ñɩma se papɩsɩ pɛ-tɛ.