9
Sawʋlɩ ñɩ́nʋʋʋ ɛ-caa kpaŋasɩ yɔ
1 Abalʋ ñɩmdʋ nɔɔyʋ kɛwɛ Bineyaamiini ɛjaɖɛ taa. Payaɣ-ɩ se, Kiisi. Ɛkɛ abalʋ weyi payaɣ se Aviyɛɛlɩ yɔ ɛ-pɩyalʋ, nɛ weyi payaɣ se Seerɔɔrɩ yɔ ɛ-sɛyɩ. Seerɔɔrɩ ñɛkɛ abalʋ weyi payaɣ se Bekoraatɩ yɔ ɛ-pɩyalʋ, nɛ weyi payaɣ ɛ́lɛ se Afɩya yɔ ɛ-sɛyɩ. Kiisi ɛnʋ ɛkɛ Bineyaamiini cejewiye taa tʋ. 2 Ɛɛwɛnɩ pɩyalʋ nɔɔyʋ, payaɣ-ɩ se, Sawʋlɩ, eɖewa kamaɣ fɛyɩ. Ɛkɛ evebu. Ɛkɩlɩ ɖaɣlʋʋ Izirɛɛlɩ ñɩma tɩŋa payɩ.
3 Nakʋyʋ wiye lɛ, Sawʋlɩ caa Kiisi kpaŋasɩ halɩñɩnzɩ le. Peeye eheyi ɛ-pɩyalʋ Sawʋlɩ se, ɛkpaɣ tʋmlaɖaa taa nɔɔyʋ nɛ ɛ nɛ ɩ powolo nɛ pañɩnɩ-sɩ. 4 Sawʋlɩ nɛ tʋmlaɖʋ pakʋyaa lɛ, pacalɩnɩ wobu Efiraayim pʋŋ egeetiye taa, nɛ pɔcɔɔ patana-sɩ. Pʋ-wayɩ lɛ, powolo Saliisa ɛjaɖɛ taa, patana-sɩ ɖɔɖɔ. Pʋbʋ wayɩ lɛ, powolo Saalim ñɩnɖɛ taa, patana pʋyʋ ɖɔɖɔ. Pɔcɔ ɖɔɖɔ Bineyaamiini ñɩnɖɛ taa, patana pʋyʋ. 5 Pɔkɔm patalɩ Cuufi hɔɔlʋʋ taa lɛ, Sawʋlɩ heyi tʋmlaɖʋ ɛnʋ se, papɩsɩ. Se, sɔɔndʋ kpaɣ ɛnʋ se, ɛ-caa ɛtaakɔɔ eyele kpaŋasɩ yɔɔ maɣzʋʋ nɛ ɛnɩɣzɩɣ ḿba tɔm. 6 Tʋmlaɖʋ ɛnʋ, eheyi-i se, ɛnʋ nawa se, Ɛsɔ lɔɔyaɣdʋ nɔɔyʋ wɛ tɛtʋ ndʋ tɩ-taa peeye! Ɛ-yɩɖɛ sɛwa. Ye ɛyɔɔdɩ natʋyʋ yɔ, paa pɩɩla ɛsɩna, tɩlakɩ. Ye mbʋ, powolo pana-ɩ nɛ pʋtɔma yɔ, eeheyi-wɛ hɔɔlʋʋ ŋgʋ paañɩnɩnɩ-sɩ yɔ. 7 Ɛlɛ, Sawʋlɩ heyi-i se, ye powoki lɔɔyaɣdʋ ɛnʋ ɛ-cɔlɔ, ɛbɛ powokina nɛ paha-ɩ? Se, tɔɔnaɣ tɛm po-huyiŋ taa, pɛfɛyɩnɩ pʋyʋ se, paalabɩ-ɩ kʋjɔʋ, nabʋyʋ fɛyɩ se paaha-ɩ. 8 Tʋmlaɖʋ ɛnʋ eheyi Sawʋlɩ se, ɛnʋ wɛnɩ liidiye ñɩɣyʋʋ nakʋyʋ ñɩɩɩ. Se, powoba lɛ, pɛcɛlɩ-kʋ lɔɔyaɣdʋ ɛnʋ, nɛ ɛ́lɛ ñeheyi-wɛ nʋmɔʋ ŋgʋ paatɩŋ yɔ. 9-11 Peeye Sawʋlɩ tɔm se, pɩwɛ ɖeu! Se, powolo!
Ɖɩnɛɛ pakʋyaa se powoki tɛtʋ ndʋ tɩ-taa lɔɔyaɣdʋ ɛnʋ ɛwɛɛ yɔ. Pɛɖɛɣaɣ lɛ, pakatɩ pɛlaa nabɛyɛ, palɩnɩ tɛtʋ taa nɛ powoki lɩm luu. Pakatɩ-wɛ mbʋ lɛ, pɔpɔzɩ-wɛ se, peeye nayʋ wɛɛ yaa we?
Meheyiɣ-mɩ se, ɖooo Izirɛɛlɩ ñɩma tɛ lɛ, ye nɔɔyʋ ɛcaɣ se, ɛyɔɔdɩnɩ Ɛsɔ yɔ, ɛtɔŋ se, powolo nɛ pana nayʋ. Toovenim lɛ, weyi payaɣ sɔnɔ se lɔɔyaɣdʋ yɔ, ɛnʋʋ payaɣaɣ se, nayʋ.
12 Pɔpɔzɩ pɛlaa mbaa ḿbʋ lɛ, pocosi-wɛ se, ɛɛɛ! Se, ɛɖɔŋ sʋʋ naɣ yɔ. Se, ewobi pɛ-tɛtʋ taa kɩyakʋ ŋgʋ, mbʋ pʋyɔɔ yɔ, ki-wiye tɩ-taa ñɩma kpɛyʋʋ pɔ-kɔdaɣ taa. Se, pɔ́ɖɔ lɛɛlɛɛ. 13 Pʋbʋ, patɩsʋʋ tɛtʋ taa lɛ, pana-ɩ nɛ pʋcɔ ewolo kɔdaɣ taa ŋtɛɣyɛ ɖeɖe. Pɩfɛyɩ se, nɔɔyʋ ɛtɔɔ nɛ pɩcɔ lɔɔyaɣdʋ ɛnʋ ɛtala. Mbʋ pʋyɔɔ yɔ, pɩwɛɛ se, ewolo nɛ ɛwazɩ mbʋ palawa yɔ pʋ-yɔɔ nɛ pʋ-wayɩ lɛ, agɔma tɔɔ ŋtɛɣyɛ. Se, powolo lɛɛlɛɛyɔ, pamakɩnɩ-ɩ.
Sawʋlɩ katʋʋ Samʋyɛɛlɩ yɔ
14 Sawʋlɩ nɛ tʋmlaɖʋ ɛnʋ pakpaɣ nʋmɔʋ nɛ pɔkɔɔ se pasʋʋ tɛtʋ taa lɛ, pakatɩ Samʋyɛɛlɩ. Ɛ́lɛ ñalɩɣaɣ se, ewolo kɔdaɣ taa.
15 Ŋgʋ, KƖPAƔLƲ keheyi Samʋyɛɛlɩ se Sawʋlɩ woki nɛ pɩla kɩyakʋ nɛ kɩ-tɛɛ nɛ pʋcɔ ɛ́lɛ ñowoki. Eeheyi-i se, 16 cee ñɩɣyʋʋ ŋgʋ ɛyɔɔdaɣnɩ-ɩ yɔ kʋ-yɔɔ lɛ, ɛnʋ yeki nɛ Bineyaamiini liɖe taa tʋ nɔɔyʋ wolo ɛ-cɔlɔ. Se, ɛ́lɛ ewoba lɛ, ɛkpaɣ num nɛ ɛlabɩ-ɩ nɛ ɛkɛ ɛnʋ samaɣ Izirɛɛlɩ ñɩma wiyaʋ, nɛ ɛlɩzɩ-wɛ Filisitii ñɩma nesi taa. Se, toovenim lɛ, ɛnʋ samaɣ mabɩ kobusi nɛ payaa-ɩ se, ɛsɩnɩ-wɛ. Se, ɛnʋ na wɛtʋ ndʋ tɩ-taa pɛwɛɛ yɔ. 17 Samʋyɛɛlɩ tɩna Sawʋlɩ lɛ, KƖPAƔLƲ heyi-i se, abalʋ weyi ɛnʋ yɔɔdaɣ yɔ, ɛnʋʋ lɛ. Se, ɛnʋ kaɣnɩ cɔnaʋ ɛnʋ samaɣ yɔɔ.
18 Sawʋlɩ kɔm ɛñɔtɩnɩ Samʋyɛɛlɩ tɛtʋ nɔnɔɔ taa lɛ, eheyi-i se, ɛnʋ tendi-i se, ɛwɩlɩ-ɩ ɖenɖe nayʋ sʋʋ yɔ. 19 Samʋyɛɛlɩ heyi Sawʋlɩ se, ɛnʋ maɣmaɣ lɛ nayʋ. Se, ɛɖɛɛ-nɔɔ nɛ ɛ nɛ ɩ pakpa kɔdaɣ taa. Se, kɩyakʋ ŋgʋ lɛ, ɛ nɛ ɩ pɔtɔkɩna, kifeŋ tanaŋ tɛɛ lɛ, ɛnʋ cosi tɔm ndʋ ɛpɔzʋʋ ɛ-tɩ yɔ tɩ-tɩŋa payɩ lɛ, ɛnʋ yebi-i nɛ ekpe. 20 Se, piyele ɛ-kpaŋasɩ nzɩ pɩlabɩ kɩyakɩŋ naadozo yɔ ɛzɩ silebu yɔ, ɛtaatasɩ maɣzʋʋ sɩ-tɔm, se, pana-sɩ. Ɛlɛ, pɩwɛɛ se, lɛɛlɛɛyɔ, ɛtɩlɩ weyi Izirɛɛlɩ ñɩma cɔŋna yɔ. Se, ɛ nɛ ɛ-ɖɩɣa taa ñɩma pɔcɔŋna a! 21 Ɛyɔɔdɩ ḿbʋ lɛ, Sawʋlɩ pɔzɩ-ɩ se, ɛsɩna pɩpɩzɩɣ pɩla mbʋ? Se, ɛnʋ kɛ Bineyaamiini liɖe taa tʋ yem, se, cejewe wena akɩlɩ kɔzʋʋ Izirɛɛlɩ cejewe taa yɔ, a-taa lɛɛɖɛ taa tʋ ɛnʋ kɛnaa. Se, ɛnʋ liɖe taa ñɩma tatalɩnɩ pʋyʋ Bineyaamiini cejewiye taa.
22 Peeye Samʋyɛɛlɩ kpaɣ Sawʋlɩ nɛ ɛ-tʋmlaɖʋ nɛ ewoni-wɛ ŋtɛɣyɛ kuduyuu tɛɛ nɛ ɛcaɣsɩ-wɛ lone kɩbanɖɛ taa agɔma nɔɔ yɔɔ. Paba ñaawɛ ɛzɩ ɛyaa niidozo (30) yɔ. 23 Ɛcaɣzɩ-wɛ mbʋ lɛ, eheyi tɔɔnaɣ laɖʋ se, ewolo nɛ ɛkɔna nandʋ ndʋ ɛnʋ kɛcɩlɩ-ɩ se ɛsɩnɩ hɔɔlʋʋ yɔ. 24 Peeye ɛ́lɛ woba nɛ ɛlɩsɩ yuye nɛ suwa nɛ ewona ɛsɩɩ Sawʋlɩ ɛsɩndaa. Nɛ Samʋyɛɛlɩ heyi Sawʋlɩ se, nandʋ ndʋ ɛnʋ sɩ-ɩ sɔnzɩ nzɩ sɩ-taa yɔ, ndʋʋ lɛ. Se, ɛ nɛ mba ɛnʋ yawa yɔ, pɛ́kpɛndɩ pɔtɔɔ. Mbʋʋ Sawʋlɩ nɛ Samʋyɛɛlɩ pɔtɔɔ tɔɔnaɣ kɩyakʋ ŋ́gʋ. 25 Pʋ-wayɩ lɛ, pakʋyɩ kɔdaɣ taa nɛ petii tɛtʋ taa nɛ pacaɣ kuduyuu ñʋʋdaa, nɛ pɔyɔɔdʋʋ.
Samʋyɛɛlɩ labʋ Sawʋlɩ sɔnzɩ se ɛkɛ wiyaʋ yɔ
26 Kifem tanaŋ cu lɛ, Sawʋlɩ nɛ ɛ-tʋmlaɖʋ pakʋyɩ. Pɩkɔma se wɩsɩ kpaɣ lɛ, Samʋyɛɛlɩ yáa Sawʋlɩ kuduyuu ñʋʋda peeye nɛ eheyi-i se, ɛkʋyɩ pɛɖɛɛ! Se, ɛnʋ lɩzɩɣ-ɩ nʋmɔʋ. Peeye Sawʋlɩ nɛ Samʋyɛɛlɩ palɩwa nɛ pɛɖɛɣ. 27 Pɔkɔm patalɩ tɛtʋ kamaɣ yɔɔ lɛ, Samʋyɛɛlɩ heyi Sawʋlɩ se, eheyi ɛ-tʋmlaɖʋ se, ɛɖɛɛ-wɛ nɔɔ. Eheyi ɛ́lɛ nɛ ɛ́lɛ ɖɛɛ lɛ, Samʋyɛɛlɩ heyi-i se, piyele ɛnʋ lɛ, ɛ́sɩŋ peeye lɛɛlɛɛyɔ nɛ ɛnʋ heyi-i ndʋ Ɛsɔ yɔɔdaa yɔ.