10
1 Sawʋlɩ sɩŋaa lɛ, Samʋyɛɛlɩ kpaɣ num fiɣa nakɛyɛ taa nɛ ɛpɩyɩ ɛ-ñʋʋ taa nɛ ekpibi-i nɛ ekpiikini-i nɛ ɛtɔ se, KƖPAƔLƲ maɣmaɣ labɩnɩ-ɩ sɔnzɩ se, ɛkɛ ɛnʋʋ KƖPAƔLƲ ɛ-samaɣ wiyaʋ. 2 Se, ɛkʋyʋʋ ɛ-cɔlɔ pu-wiye nɖɩ nɛ ekpe. Se, ɛkɔŋ ɛtalɩ Bineyaamiini ɛjaɖɛ taa Celicaa tɛtʋ taa, Raacɛɛlɩ pɩlaʋ cɔlɔ lɛ, ɛkatɩɣ abalaa nabɛyɛ naalɛ. Peheyiɣ-i se, pana kpaŋasɩ nzɩ ɛñɩnɩɣ yɔ. Se, pa-caa ɛɛtasɩɣ maɣzʋʋ sɩ-yɔɔ, ɛlɛ, ɛwɛɛ nɛ ɛnɩɣzɩɣ pɔ-yɔɔ nɛ ɛpɔzʋʋ ɛ-tɩ se, ɛsɩna ɛlakɩ nɛ ɛna ɛ-pɩyalʋ? 3 Se, ɛkʋyʋʋ peeye nɛ ɛɖɛnɩ ɛsɩndaa lɛ, ɛkɔɔ ɛtalɩ Taabɔɔrɩ kɔtaɣ taa tɩʋ tɛɛ. Se, ɛkatɩɣ abalaa nabɛyɛ naadozo peeye, powoki Beetɛɛlɩ se poluŋ Ɛsɔ tɛɛ. Pa-taa lɛlʋ sɩɣlɩ pimbisi naadozo, nɛ lɛlʋ tindine naadozo, nɛ tozo ñɩnʋ ñasɩɣlɩ sʋlʋmbɛʋ. 4 Se, ɛkatɩɣ-wɛ lɛ, pɛsɛɣ-ɩ, nɛ paha-ɩ tindine naalɛ wena pɩɩwɛɛ se, paha Ɛsɔ yɔ. Se, paha-ɩ lɛ, ɛmʋ. 5 Se, pʋ-wayɩ lɛ, ɛtalɩɣ ɖenɖe payaɣ se Giveyaa eloohim a yɔ. Peeye Filisitii ñɩma awiya wɛɛ. Se, ɛtalɩɣ se ɛsʋʋ tɛtʋ ńdʋ tɩ-taa lɛ, ɛnaɣ lɔɔyɩsɩ tɩnaa tikaɣ nakɛyɛ, palɩnɩ kɔdaɣ taa nɛ petiki. Cɩmɩndɩnaa nɛ sodɩnaa nɛ yɩsɩdɩnaa nɛ catasɩdɩnaa pɔɖɔŋ pɛ-ɛsɩndaa, nɛ piyele ḿba lɔɔyɩsɩ kʋyɩnɩ-wɛ. 6 Se, pʋbʋ, KƖPAƔLƲ Kalɩzaɣ tiki ɛ-yɔɔ nɛ pʋkʋyɩnɩ-ɩ ɖɔɖɔ ɛzɩ ḿba yɔ, nɛ pɩpɩsɩ-ɩ ɛyʋ kɩfalʋ. 7 Se, ye pɩtɛ lakasɩ nzɩ sɩkɔm nɛ sɩla sɩ-tɩŋa lɛ, pʋbʋ, ɛ́la mbʋ pɩwɛɛ se ɛla yɔ, mbʋ pʋyɔɔ yɔ, Ɛsɔ wɛ ɛ-cɔlɔ. 8 Se, pɩwɛɛ se ɛɖɛɛ-ɩ nɔɔ nɛ ɛtasɩ tibu Giligaalɩ tɛtʋ b taa. Se, pʋ-wayɩ lɛ, ɛnʋʋ Samʋyɛɛlɩ ewoki ɛ-cɔlɔ nɛ ɛnʋ laa kɩlaŋ weyi pɔhɔkɩ nɛ pɩñaɣ yɔ nɛ laŋhɛzɩyɛ ñɩŋ. Se, ɛ́ɖaŋ ɛnʋʋ peeye kɩyakɩŋ lʋbɛ (7). Se, ɛnʋ talɩɣ lɛ, ɛnʋ heyi-i mbʋ pʋwɛɛ se ɛla yɔ.
9 Sawʋlɩ tɩkʋyɩ Samʋyɛɛlɩ cɔlɔ se ɛ́pɩsɩɣ lɛ, Ɛsɔ lɛɣzɩ ɛ-lɩmaɣza kpaagbaa kpem, nɛ ndʋ tɩ-tɩŋa payɩ Samʋyɛɛlɩ keheyi-i yɔ, tɩla kɩyakʋ ŋgʋ. 10 Ḿbʋ ɖɔɖɔ pɩlaba, Sawʋlɩ nɛ ɛ-tʋmlaɖʋ pɔkɔm patalɩ Giveyaa tɛtʋ taa lɛ, pakatɩ lɔɔyɩsɩ tɩnaa tikaɣ nakɛyɛ, nɛ Ɛsɔ Kalɩzaɣ tii Sawʋlɩ yɔɔ nɛ ewolo pɔ-cɔlɔ nɛ pʋkʋyɩnɩ-ɩ ɖɔɖɔ ɛzɩ lɔɔyɩsɩdɩnaa ḿba yɔ. 11 Se, mba paasɩm-ɩ ɖooo lɔŋ yɔ, pana pʋkʋyɩnɩ-ɩ mbʋʋ lɔyɩsɩdɩnaa taa lɛ, pɔpɔzʋʋ ɖama se, ɛzɩ ɛbɛ lakɩ Kiisi pɩyalʋ Sawʋlɩ? Ɛzɩ ɛ́lɛ ñapɩsɩ ɖɔɖɔ lɔɔyaɣdʋ na c 12 Pa-taa lɛlʋ tasɩ pɔzʋʋ se, nɛ lɛlaa yɔ, paba caa lɛ anɩ?d Mbʋ yebina nɛ potuu eduuye se, pɩkpɛndɩnɩ Sawʋlɩ nɛ ɛ́lɛ ɖɔɖɔ ñɛwɛɛ lɔɔyɩsɩdɩnaa taa?
13 Sawʋlɩ yɔɔ kɔm pɩhɛɛ lɛ, ɛkpaɣ kɔdaɣ taa. 14 Ewoba peeye lɛ, ɛ-caa neu pɔzɩ-ɩ se, le ɛ nɛ ɛ-tʋmlaɖʋ paawoba? Sawʋlɩ cosi se, ḿba kowoba kpaŋasɩ ñɩnʋʋ. Se, ɛlɛ, ḿba tana-sɩ nɛ powolo se, pɔpɔzʋʋ Samʋyɛɛlɩ nɛ pana. 15 Ɛ-caa neu ɛnʋ, eheyi-i se, ɛkɛdɩ ɛnʋʋ ndʋ Samʋyɛɛlɩ heyi-wɛ yɔ. 16 Sawʋlɩ heyi ɛ-caa neu se, Samʋyɛɛlɩ heyi mbaa yem se, pana kpaŋasɩ ńzɩ. Ɛlɛ, eteheyi ɛ-caa neu ɛnʋʋ kewiyaɣ tɔm ndʋ Samʋyɛɛlɩ heyi-i yɔ.
Paɖʋʋ miika nɛ palɩzɩ Sawʋlɩ se ɛkɛ wiyaʋ yɔ
17 Nakʋyʋ wiye Samʋyɛɛlɩ ya Izrɛɛlɩ ñɩma, KƖPAƔLƲ ɛsɩndaa, Micipaa tɛtʋ e taa. 18 Powoba lɛ, eheyi-wɛ se, KƖPAƔLƲ, Izirɛɛlɩ ñɩma Ɛsɔ yɔɔdaa se, ɛnʋ lɩzɩnɩ mbaa Izirɛɛlɩ ñɩma Ejipiti ñɩma nɛ kewiisi lɛɛsɩ nzɩ si-taa ñɩma nazaɣ-wɛ yɔ, pe-nesi taa. 19 Ɛlɛ, lɛɛlɛɛyɔ, pɔlɔ pɛ-Ɛsɔ f ɛnʋ, ŋgʋ, ɛnʋ yabɩnɩ pa-ñʋʋ kʋñɔŋ nɛ laŋpɩzɩyɛ pa-taa, nɛ peheyi-i se, ɛsɩɩ-wɛ wiyaʋ! Se, ye mbʋ, palɩɩ KƖPAƔLƲ ɛsɩndaa cejewiye cejewiye nɛ liɖe liɖe nɛ pala mbʋ ɖɔɖɔ.
20 Palabɩ ḿbʋ lɛ, Samʋyɛɛlɩ yaa-wɛ nɛ powoki ɛ-cɔlɔ, cejewiye cejewiye, ɛlɛ, ɛɖʋ miika nɛ KƖPAƔLƲ lɩzɩ Bineeyaamiini cejewiye. 21 Peeye ɛya Bineeyaamiini cejewiye taa ñɩma liɖe liɖe nɛ palɩzɩ Maatiri ñɩnɖɛ taa ñɩma, nɛ pɩtɛmna se, palɩzɩ Kiisi pɩyalʋ Sawʋlɩ, liɖe nɖɩ ɖɩ-taa. Palɩzɩ-ɩ mbʋ lɛ, pañɩnɩ-ɩ, ɛlɛ, patana-ɩ. 22 Ɖɩnɛɛ paɖaɣnɩ KƖPAƔLƲ pɔzʋʋ se, abalʋ ɛnʋ ewobi peeye naa we? KƖPAƔLƲ heyi-wɛ se, powolo wondu hɛkʋ taa nɛ pana, se, ewoba nɛ ɛmɛlɩ peeye. 23 Eheyi-wɛ ḿbʋ lɛ, pese nɛ powolo payaa-ɩ nɛ ewolo ɛlɩzɩ ɛ-tɩ nɛ ɛwɩlɩ samaɣ. Ɛ-ñʋʋ kɩlɩ pa-tɩŋa payɩ kʋyʋʋ!
24 Ɛwɩlɩ ɛ-tɩ samaɣ ḿbʋ lɛ, Samʋyɛɛlɩ heyi-kɛ se, kɔcɔna nɛ kana weyi KƖPAƔLƲ lɩzaa yɔ. Ɛfɛyɩ ɖaɣʋ nɔɔyʋ samaɣ tɩŋa taa. Peeye ka-taa ñɩma kpalɩ nesi taa nɛ pokou se, wiyaʋ ɛwɛɛ wezuu! 25 Pʋ-wayɩ lɛ, Samʋyɛɛlɩ kɛdɩ-wɛ waɖɛ nɖɩ nɖɩ wiyaʋ wɛna yɔ, nɛ mbʋ mbʋ pɩwɛɛ se ɛla yɔ g nɛ pama pʋ-tɔm takayaɣ taa nɛ pasɩɩ KƖPAƔLƲ ɖɩɣa taa. Pʋwayɩ lɛ, eheyi samaɣ se paa ka-taa anɩ ekpe. 26 Piyele Sawʋlɩ ñekpe ɛ-tɛ Giveyaa. Ɛ nɛ sɔdɩŋ weyi Ɛsɔ labɩ ɩ-taa tʋmɩyɛ yɔ, pekpemna. 27 Ɛlɛ, tɔɔ yemwaa nabɛyɛ ñaawɛɛ nɛ pɔtɔŋ se, ɛsɩna ɛyʋ ɛnʋ ɛpɩzɩɣ nɛ ɛya pa-ñʋʋ? Pɛpɛɛŋɩ-ɩ tɛtɛ nɛ patalabɩ-ɩ kʋjɔʋ nakʋyʋ. Ɛlɛ, Sawʋlɩ ñatakpaɣ-pʋ nɛ ɛyaa pʋyʋ h.