11
Sawʋlɩ wabʋ Amoonii ñɩma yɔ
1 Amoonii ñɩma a. wiyaʋ Nahaasɩ kʋyɩ nakʋyʋ wiye nɛ ewolo se, ɛkʋyɩ Gaalaadɩ egeetiye taa Yavɛɛsɩ tɛtʋ b taa ñɩma yɔɔ. Peeye paba heyi-i se, ɛ nɛ wɛ panɩnɩ ɖama nɛ piyele pɛkɛ ɛ-tʋmlaɖaa. 2 Peheyi-i ḿbʋ lɛ, ɛtɔ se, pʋwɛ ɖeu! Ɛlɛ, pɩwɛɛ se, ɛnʋ ɛyɔkɩ paa pa-taa anɩ e-nesi kɩbanzɩ ɛsɩyɛ nɛ ɛɖʋnɩ Izirɛɛlɩ ñɩma tɩŋa fɛyɛ nɛ pɩcɔ nɛ ɛ nɛ wɛ panɩnɩ ɖama. 3 Ɛyɔɔdɩ ḿbʋ lɛ, Yavɛɛsɩ tɛtʋ taa sɔsaa heyi-i se, ɛha-wɛ kɩyakɩŋ lʋbɛ (7), nɛ petiyi ɛyaa Izirɛɛlɩ ɛjaɖɛ tɩŋa taa. Ye nɔɔyʋ etowolo se ɛya pa-ñʋʋ lɛ, pʋbʋ, pakpaɣ pa-tɩ nɛ paɖʋsɩ e-nesi taa.
4 Ɛyaa mba petiyaa yɔ, pɔkɔm patalɩ Sawʋlɩ tɛtʋ Giveyaa c taa lɛ, pɛkɛdɩ tɩ-taa ñɩma ndʋ Amoonii ñɩma wiyaʋ heyi-wɛ yɔ. Paba nɩ ḿbʋ lɛ, pa-tɩŋa papazɩ mabʋ kobusi nɛ pewiliɣ. 5 Alɩwaatʋ ńdʋ lɛ, Sawʋlɩ ñaalɩnɩ tɛyɛ nɛ ekpeŋ. Ɛ nɛ ɛ-naŋ. Ɛtalaa lɛ, ɛpɔzʋʋ se, pɩlabɩ ɛzɩma nɛ ɛyaa tɩŋa wiliɣ mbʋ? Ɛlɛ peheyi-i Yavɛɛsɩ tɛtʋ taa ñɩma tɔm. 6 Sawʋlɩ nɩ ḿbʋ lɛ, Ɛsɔ Kalɩzaɣ tii ɛ-yɔɔ nɛ ɛ-pana kpa siŋŋ. 7 Peeye ɛkpa naŋ naalɛ nɛ ɛkʋ-ɩ nɛ ɛcɛdɛlɩ nɛ ɛkpaɣ nandʋ colimasɩ nɛ ɛcɛlɩ ɛyaa nɛ etiyi-wɛ se, pɔcɔnɩ-sɩ Izirɛɛlɩ ɛjaɖɛ tɩŋa taa nɛ pawɩlɩ Izirɛɛlɩ ñɩma nɛ paka pa-ñʋŋ taa se, weyi ekizaa se ɛɛtɩŋɩɣ Sawʋlɩ nɛ Samʋyɛɛlɩ you taa yɔ, mbʋʋ pɛcɛdɛlɩɣ ɛ-naŋ.
Peheyi Izirɛɛlɩ ñɩma ḿbʋ lɛ, sɔɔndʋ kpa-wɛ siŋŋ nɛ panɩnɩ ɖama nɛ pekpeɣli. 8 Pekpeɣlaa lɛ, pɔɖɔ Bɛzɛɛkɩ tɛtʋ d taa Sawʋlɩ ɛsɩndaa nɛ ɛcɔŋnɩ-wɛ. Ɛyaa mba palɩnɩ hayo kiŋ cejewe taa yɔ, paakpɛndɩ kotokiŋ nasidozo (300.000), nɛ mba paba lɩnɩ Yuuda ñɩnɖɛ taa yɔ, kotokiŋ niidozo (30.000). 9 Piyele péheyi ɛyaa mba petiyi-wɛ nɛ Yavɛɛsɩ tɛtʋ taa yɔ se, papɩsɩ nɛ peheyi peeye ñɩma se, kifeŋ lɛ, payakɩ pa-ñʋʋ wɩsɩ siɣu taa. Powobi peheyi Yavɛɛsɩ ñɩma ḿbʋ lɛ, pa-taa hʋlɩmɩ poyi poyi, 10 nɛ peheyi Amoorii ñɩma se, kifeŋ lɛ, ḿba cɛlɩɣ-wɛ pa-tɩ nɛ pala ḿba ɛzɩ pe-liu wɛʋ yɔ.
11 Tɛʋ fema lɛ, Sawʋlɩ tayɩ e-youlaɖaa tikasi naadozo taa nɛ pasʋʋ po-koyindinaa ɖikpeɣliye taa nɛ pɩcɔ pɩñandɩ. Pasʋ ḿbʋ lɛ, pakʋ Amoonii ñɩma nɛ pɩkɔɔ pɩsɩnɩ wɩsɩ siɣu. Pɩkazɩ ḿba yɔ, pamɩzɩ ɖama, pɩtakazɩ ɛyaa naalɛ ɖoli kʋɖʋm. 12 Peeye Izirɛɛlɩ ñɩma pɔzɩ Samʋyɛɛlɩ se, le mba pɔtɔŋaɣ se, Sawʋlɩ ɛtaakɛ ḿba wiyaʋ yɔ pɛwɛɛ? Se, paɖʋzɩ-wɛ ḿba nesi taa nɛ ḿba kʋ-wɛ! 13 Ɛlɛ, Sawʋlɩ tɔ se, pɩfɛyɩ se, pakʋ nɔɔyʋ pɩtɛ kɩyakʋ ŋgʋ. Mbʋ pʋyɔɔ yɔ, ki-wiye KƖPAƔLƲ yeba nɛ Izirɛɛlɩ ñɩma wa. 14 Pʋwayɩ lɛ, Samʋyɛɛlɩ heyi Izirɛɛlɩ ñɩma se, ḿba ewolo pekpeɣli ɖama Giligaalɩ tɛtʋ e taa nɛ patasɩ wɩlʋʋ se Sawʋlɩ lɛ wiyaʋ. 15 Ɖɩnɛɛ samaɣ tɩŋa wobi Giligaalɩ peeye, KƖPAƔLƲ ɛsɩndaa nɛ kasɩɩ Sawʋlɩ wiyaʋ. Pʋwayɩ lɛ, palaa KƖPAƔLƲ laŋhɛzɩyɛ kɩlaŋ, nɛ piyele Sawʋlɩ nɛ Izirɛɛlɩ ñɩma tɩŋa pɔtɔɔ kazandʋ siŋŋ.