12
Samʋyɛɛlɩ yɔɔdɩnaʋ Izirɛɛlɩ ñɩma yɔ
1 Pʋwayɩ lɛ, Samʋyɛɛlɩ heyi Izirɛɛlɩ ñɩma se, tɔɔ! ɛnʋ nɩnɩ-wɛ nɛ ɛlabɩ-wɛ mbʋ pɔpɔzɩ-ɩ yɔ pɩ-tɩŋa. Se, ɛnʋ sɩ-wɛ wiyaʋ. 2 Se, pɩkpaɣnɩ lɛɛlɛɛyɔ nɛ pɩɖɛɣ lɛ, wiyaʋ ɛnʋ ɛcɔŋnɩnɩ pɔ-yɔɔ. Mbʋ pʋyɔɔ yɔ, ɛnʋʋ Samʋyɛɛlɩ ɛkpadɩyaa, ɛ-tɔm tɛma. Se, ɛnʋ pɩyalaa labɩ sɔsaa ɖɔɖɔ ɛzɩ mba yɔ. Se, ɛnʋ cɔnɩ pɔ-yɔɔ ɖooo e-evebitu taa nɛ pʋkɔɔ pɩsɩnɩ kɩyakʋ ŋ́gʋ. 3 Se, pʋ-yɔɔ ɛnʋ sɩŋ pɛ-ɛsɩndaa, KƖPAƔLƲ nɛ wiyaʋ weyi ɛlɛ lɩzaa yɔ pɛ-ɛsɩndaa nɛ eheyi-wɛ se, ye nɔɔyʋ ɛwɛnɩ natʋyʋ ɛ-yɔɔ yɔ, ɛyɔɔdɩ. Ɛpɔzɩ-wɛ se, ɛmɩlɩ nɔɔyʋ nɔ yaa ɛ-kpaŋaɣ na? Se, emuli nɔɔyʋ yaa ɛyʋsɩnɩ nɔɔyʋ yaa we? Se, nɔɔyʋ labɩ ɛnʋʋ kʋjɔʋ nakʋyʋ nɛ ɛnʋ huuzi ɛ-ɛza mbʋ ɛ́lɛ laba yɔ pʋ-yɔɔ yaa we? Se, ye pɩkɛ mbʋʋ yɔ, ɛnʋ pɩsɩɣnɩ mbʋ paaha-ɩ yɔ. 4 Peeye Izirɛɛlɩ ñɩma tɩŋa cosi-i se, etomuli-wɛ yaa ɛtayʋsɩnɩ-wɛ yaa eteyele nɛ nɔɔyʋ labɩ-ɩ kʋjɔʋ nɛ ehuuzi ɛ-ɛza mbʋ ɛ́lɛ laba yɔ pʋ-yɔɔ. 5 Samʋyɛɛlɩ kitini-wɛ se, ye mbʋ, KƖPAƔLƲ nɛ wiyaʋ pɛkɛ aseɣɖe tɩnaa kɩyakʋ ŋ́gʋ se, pɛfɛyɩnɩ natʋyʋ se pahʋʋnɩ ɛnʋ. Pocosi se, mbʋʋ lɛ ɖeyiɖeyi.
6 Samʋyɛɛlɩ tasɩ-wɛ heyuu se, KƖPAƔLƲ weyi ɛtɩŋnɩ Mooyiizi nɛ Aarɔɔnɩ pɔ-yɔɔ nɛ ɛlɩzɩ mɩ-cɔzɔnaa Ejipiti ɛjaɖɛ taa yɔ, ɛkɛ pɩ-aseɣɖe tʋ a. 7 Se, ye mbʋ, lɛɛlɛɛyɔ, pa nɛ ɩ palɩɩ KƖPAƔLƲ ɛsɩndaa nɛ ɛhʋnɩ ḿba. Se, pácalɩ tɔzʋʋ camɩyɛ lakasɩ nzɩ ɛ́lɛ labɩ pa nɛ pɔ-cɔzɔnaa yɔ sɩ-tɩŋa sɩ-yɔɔ. 8 Se, pɔ-cɔzɔnaa, Yaakɔɔbʋ nɛ ɛ-ñɩma powobi Ejipiti lɛ, panazɩɣ-wɛ nɛ pama kobusi nɛ payaa KƖPAƔLƲ se ɛsɩnɩ-wɛ, nɛ ɛ́lɛ tiyi Mooyiizi nɛ Aarɔɔnɩ se powolo palɩzɩ-wɛ nɛ powoni-wɛ nɛ pɛwɛɛ ɛjaɖɛ nɖɩ ɖɩ-taa pɛwɛ mbʋ yɔ. 9 Ɛlɛ, pɔ-cɔzɔnaa ḿba, pɔsɔɔ pa-KƖPAƔLƲ Ɛsɔ yɔɔ. Peeye ɛ́lɛ yeba nɛ Hacɔɔrɩ tɛtʋ b taa youlaɖaa ñʋʋdʋ Siseraa c nɛ Filisitii ñɩma d nɛ Mowaabɩ ñɩma wiyaʋ e pakʋyɩ pɔ-yɔɔ nɛ pa nɛ wɛ poyoo nɛ paba wabɩ-wɛ. 10 Pɩlabɩ mbʋ lɛ, mɩ-cɔzɔnaa ḿba, patasɩ yaʋ KƖPAƔLƲ se, ɛsɩnɩ-wɛ. Peheyi-i se, pɔ-tɔm sɩba, mbʋ pʋyɔɔ yɔ, peyebi-i nɛ poluŋuu agɔlɩma Baalɩwaa nɛ Asɩtaarɩtɩwaa pa-sɩʋkpelisi tɛɛ. Ɛlɛ, se, lɛɛlɛɛyɔ, ɛ́lɩzɩ mbaa po-koyindinaa nesi taa, nɛ papɩsɩ ɛ-tʋmlaɖaa. 11 Pɔyɔɔdɩ mbʋ lɛ, KƖPAƔLƲ ñetiyi Jedeyɔɔ f nɛ Bedaanɩ nɛ Yifitaa g nɛ ɛnʋʋ Samʋyɛɛlɩ se, palɩsɩ-wɛ po-koyindinaa mba pɔcɔ-wɛ nɛ pata yɔ, pe-nesi taa. Mbʋ yebina nɛ ḿba pɩzɩ pɛwɛɛ ɛjaɖɛ taa laŋhɛzɩyɛ taa. 12 Ɛlɛ, pɔkɔm pana se, Amoonii ñɩma wiyaʋ Nahaasɩ h woki pa-wayɩ lɛ, peheyi ɛnʋ se, pe-liu wɛɛ se pasɩɩ-wɛ wiyaʋ i! Nɛ pikiti pɩwɛɛ ɛzɩ KƖPAƔLƲ taakɛ pe-wiyaʋ yɔ. 13 Tɔɔ! Wiyaʋ weyi palɩzaa yɔ, ɛnʋʋ lɛ! Se, ḿba pɔsɩna nɛ KƖPAƔLƲ sɩɩ-wɛ-ɩ. 14 Se, pɩkpaɣʋnɩ alɩwaatʋ ndʋ yɔ, ye pa nɛ pe-wiyaʋ pañaŋ pa-KƖPAƔLƲ Ɛsɔ nɛ palakɩ-ɩ tʋmɩyɛ nɛ panɩɣnɩ-ɩ nɛ pɔɖɔŋ ɛ-paɣtʋ yɔɔ nɛ patɩŋɩɣ ɛ-wayɩ yɔ, pʋbʋ, pa nɛ pe-wiyaʋ pɩwɛɣ leleŋ pɩ-tɩŋa pɩ-taa. 15 Ɛlɛ, ye paañaŋ KƖPAƔLƲ nɛ paaɖɔŋ ɛ-paɣtʋ yɔ́ɔ yɔ, pʋbʋ, ɛhɔŋ pa nɛ pɔ-cɔzɔnaa pa-nɩŋgbaaŋ. 16 Se, lɛɛlɛɛyɔ, pásɩŋ peeye ḿbʋ nɛ pana hamalakasɩ nzɩ KƖPAƔLƲ lakɩ pɛ-ɛsɩndaa yɔ. 17 Ɛpɔzɩ-wɛ se, pɩkɛ tɔɔnaɣ ŋga payaɣ se bilee yɔ, ka-kʋm alɩwaatʋ taa j, yaa pɩtɛkɛ mbʋ? Se, ɛnʋ sɛɣ KƖPAƔLƲ nɛ ɛ́lɛ yele nɛ tɛʋ tili nɛ kɩnɩɩ, nɛ piyele pana ɖeu se, peheyuu KƖPAƔLƲ se, ɛsɩɩ-wɛ wiyaʋ yɔ, payʋsɩ pɩtɩɩfɛyɩ.
18 Peeye Samʋyɛɛlɩ sɛ KƖPAƔLƲ, nɛ ɛ́lɛ yele nɛ tɛʋ tili, nɛ kɩnɩɩ kɩyakʋ ŋgʋ. Pɩlabɩ mbʋ lɛ, sɔɔndʋ kpa samaɣ taa ñɩma tɩŋa payɩ pɩtɩɩfɛyɩ nɛ KƖPAƔLƲ nɛ Samʋyɛɛlɩ, 19 nɛ peheyiɣ Samʋyɛɛlɩ se, etendi ɛ-KƖPAƔLƲ Ɛsɔ pɔ-yɔɔ nɛ pataasɩ. Mbʋ pʋyɔɔ yɔ, pɔsɔzɩ pa-kɩwɛɛkɩm tɩŋa yɔɔ lɛɛbʋ. Mbʋʋ lɛ se, pɔpɔzaa se, pasɩɩ-wɛ wiyaʋ. 20 Samʋyɛɛlɩ heyi-wɛ se, sɔɔndʋ ɛtaakpa-wɛ. Se, toovenim lɛ, palabɩ ɛzaɣtʋ siŋŋ, ɛlɛ, pataatasɩ KƖPAƔLƲ haʋ siɣye, palabɩ-ɩ tʋmɩyɛ nɛ pa-laŋɩyɛ tɩŋa. 21 Se, ye paha-ɩ siɣye yɔ, pʋbʋ, sɩʋkpelisi nzɩ sɩɩpɩzɩɣ sɩsɩnɩ nɔɔyʋ yaa sɩya ɛ-ñʋʋ yɔ, sɩ-tɛɛ poluŋuu, ŋgʋ sɩsɩ tɛkɛ pʋyʋ. 22 Se, KƖPAƔLƲ ɛɛlɔʋ-wɛ, mbʋ pʋyɔɔ yɔ, ɛ-maɣmaɣ e-liu wɛna nɛ ɛpɩsɩ-wɛ ɛ-samaɣ. Ɖɔɖɔ lɛ, ɛcaɣ se, ɛ-yɩɖɛ ɛsɛɛ tam. 23 Se, ɛnʋ lɛ, eeyeki pɔ-yɔɔ sɛʋ KƖPAƔLƲ nɛ ɛkɔɔ ɛyʋsɩnɩ-ɩ. Se, ɛnʋ wɛɣ nɛ ɛwɩlɩɣ-wɛ nʋmɔʋ kɩbaŋgʋ ŋgʋ kʋtʋʋzaa yɔ. 24 Se, piyele ḿba lɛ, patɩlɩ KƖPAƔLƲ ɖoŋ nɛ pɛtɛ pa-taa nɛ palabɩ-ɩ tʋmɩyɛ nɛ pa-laŋɩyɛ tɩŋa nɛ pakpaɣ hamalakasɩ nzɩ ɛlaba se piɖeni-wɛ yɔ, nɛ payaa pʋyʋ! 25 Se, ɛlɛ, ye palabɩ ɛzaɣtʋ yɔ, pa nɛ pe-wiyaʋ pɛtɛŋɛlɩɣ.