13
Pakʋyʋʋ Filisitii ñɩma yɔɔ yɔ, nɛ Sawʋlɩ yʋsʋʋ pɔ-tɔm
1 a. 2 Sawʋlɩ lɩzɩ Izirɛɛlɩ ñɩma taa youlaɖaa kutokiŋ naadozo (3.000). Pa-taa ɛyaa kutokiŋ naalɛ (2.000) wɛɛ ɛ-cɔlɔ Mikimaasɩ tɛtʋ b taa, Beyitɛɛlɩ pʋŋ egeetiye taa. Nɛ kutoku (1.000) ñɛwɛɛ ɛ-pɩyalʋ Yoonaataanɩ cɔlɔ Gɛvaa tɛtʋ taa, Bineyaamiini hɔɔlʋʋ taa. Piyele eheyi Izirɛɛlɩ ñɩma lɛlaa se, paa anɩ ekpe ɛ-tɛ.
3 Nakʋyʋ wiye Yoonaataanɩ kʋ Filisitii ñɩma ñʋʋdʋ weyi pasɩ Gɛvaa tɛtʋ c taa yɔ, nɛ Filisitii ñɩma nɩɩ. Pɩlabɩ ḿbʋ lɛ, Sawʋlɩ yele nɛ pahʋlɩ ŋgandɩyɛ tɛtʋ tɩŋa taa. Mbʋ pʋyɔɔ yɔ, ɛmaɣzaɣ se, pʋwɛɛ se, Ebire ñɩma tɩŋa ɛnɩɩ tɔm ńdʋ. 4 Mbʋʋ Izirɛɛlɩ ñɩma nɩwa se, Sawʋlɩ kʋ Filisitii ñɩma ñʋʋdʋ nɛ Filisitii ñɩma pana kpanɩ-wɛ. Peeye youlaɖaa tɩŋa wobi pekpeɣli Sawʋlɩ cɔlɔ Giligaalɩ tɛtʋd taa. 5 Piyele Filisitii ñɩma ɖɔɖɔ ñekpeɣli ɖama se pakʋyɩ Izirɛɛlɩ ñɩma yɔɔ. Paawɛnɩ youlɔɔɖa kutokiŋ niidozo (30.000), nɛ kpaŋnaŋ caɣyaa kutokiŋ loɖo (6.000) nɛ youlaɖaa sakɩyɛ ɛzɩ pɔɔ nɔɔ kañɩŋa yɔ. Paawoba pekpeɣli ɖama Mikimaasɩ tɛtʋ taa, Beyitawɛɛnɩ wɩsɩ ɖɩlɩyɛ hɔɔlʋʋ taa. 6 Izirɛɛlɩ ñɩma kɔm pana se pɛwɛ pa-wayɩ nɛ paapaa titiɖe lɛ, pa-taa nabɛyɛ wolo pɛmɛlɩ ɛwasɩ pɔŋ nɛ pɔŋ lɛɛŋ pa-taa nɛ ɛwasɩ nɛ tɛtʋ pɛ-tɛɛ, nɛ lɔkɔnaa taa. 7 Pa-taa lɛlaa ñɛɖɛzɩ Yɔɔrɩdaanɩ pɔɔ nɛ pɛmɛlɩ Gaadɩ nɛ Galaadɩ pɔ-hɔɔlɩŋ taa.
Alɩwaatʋ ndʋ lɛ, Sawʋlɩ ñaawɛ Giligaalɩ tɛtʋ taa nɛ piyele sɔɔndʋ ñakpa e-youlaɖaa tɩŋa nɛ peseliɣ. 8 Sawʋlɩ kaɖaŋ Samʋyɛɛlɩ kɩyakɩŋ lʋbɛ (7), ɛzɩ ɛ́lɛ keheyuu Sawʋlɩ yɔ e. Ɛlɛ, Samʋyɛɛlɩ towolo Giligaalɩ . Peeye Sawʋlɩ youlaɖaa pazɩ ɖama mɩzʋʋ nɛ pɛɖɛɣ. 9 Ḿbʋ yebina nɛ Sawʋlɩ tɔ se, powoni-i kpɩna wena palaɣ nɛ pɔhɔ nɛ pɩñaɣ yɔ, nɛ wena palaɣ nɛ pɩwɩlɩ se laŋhɛzɩyɛ wɛɛ yɔ. Powoni-i-yɛ lɛ, ɛ-maɣmaɣ ɛlaa wena palaɣ nɛ pɔhɔ nɛ pɩñaɣ yɔ. 10 Ɛtɩtɛzaɣ sɔnzɩ nzɩɩ labʋ lɛ, Samʋyɛɛlɩ talaa lɛ. Ɛtalɩ ḿbʋ lɛ, Sawʋlɩ katɩ-ɩ nɛ ɛsɛɛ-ɩ. 11 Samʋyɛɛlɩ pɔzɩ-ɩ se, ɛbɛ ɛlabɩ ḿbʋ? Sawʋlɩ cosi-i se, ɛnʋ nawa se youlaɖaa kʋyaɣaɣ ɛ-cɔlɔ nɛ pamɩzɩɣ ɖama, nɛ ɛnʋʋ Samʋyɛɛlɩ etowolo ɛzɩ ɛɛɖʋʋ yɔ. Ɖɔɖɔ lɛ, ɛnʋ nawa se, Filisitii ñɩma kpeɣli ɖama Mikimaasɩ tɛtʋ taa. 12 Pʋ-yɔɔ ɛnʋ maɣzaa se, lɛɛlɛɛyɔ, Filisitii ñɩma tiki Giligaalɩ tɛtʋ taa se pakʋyɩ ɛnʋ yɔɔ, nɛ ɛnʋ ɛɛlakɩ nabʋyʋ se KƖPAƔLƲ ɛnɩnɩ-ɩ yaa we? Ḿbʋ yebina nɛ pɩkɛnɩ ɛnʋʋ kɩcɛyʋʋ se ɛ-maɣmaɣ ɛlaa-ɩ kɩlaŋ weyi pɔhɔkɩ nɛ pɩñaɣ yɔ. 13 Samʋyɛɛlɩ heyi Sawʋlɩ se, ɛlabɩ kɩmɛlɛndʋ! Se, ɛtɔɖɔ paɣtʋ ndʋ ɛ-KƖPAƔLƲ Ɛsɔ ɖʋ-ɩ yɔ tɩ-yɔɔ. Se, ye ɛɛɖɔm tɩ-yɔ́ɔ yɔ, pʋbʋ, ɛ́lɛ keyeba se, e-liɖe taa ñɩma ɛtɔkɩnɩ kewiyaɣ tam Izirɛɛlɩ ɛjaɖɛ taa. 14 Se, ɛlɛ, lɛɛlɛɛyɔ, e-kewiyaɣ ɛɛtasɩɣ leɖuu. Se, KƖPAƔLƲ lɩzɩ abalʋ weyi ɛ́lɛ tɔm kɛdɩnɩ-ɩ yɔ, nɛ ɛsɩɩ-ɩ se ɛkɛ ɛ-ñɩma wiyaʋ f, mbʋ pʋyɔɔ yɔ, ɛnʋʋ Sawʋlɩ ɛtɔɖɔ paɣtʋ ndʋ KƖPAƔLƲ ɖʋ-ɩ yɔ tɩ-yɔɔ.
15 Pɩlabɩ ḿbʋ lɛ, Samʋyɛɛlɩ kʋyɩ Giligaalɩ nɛ ewolo Giveyaa Bineyaamiini hɔɔlʋʋ taa. Piyele youlaɖaa mba pɩkazaa yɔ, paba ɖɔŋ Sawʋlɩ ɛsɩndaa nɛ ɛcɔŋnɩ-wɛ. Paatalɩ ɛzɩ taŋga nɛ mɩnʋʋ (600) yɔ. 16 Sawʋlɩ nɛ ɛ-pɩyalʋ Yoonaataanɩ nɛ youlaɖaa mba pɩɩkazɩ ɛ-cɔlɔ yɔ, powolo pɛwɛɛ Gɛɛvaa tɛtʋ taa, Bineyaamiini hɔɔlʋʋ taa nɛ piyele Filisitii ñɩma ñɛwɛɛ Mikimaasɩ tɛtʋ taa. 17 Nakʋyʋ wiye lɛ, youlaɖaa sɔsaa tikaɣ nakɛyɛ lɩnɩ Filisitii ñɩma ɖikpeɣliye taa nɛ patayɩ ɖama hɔɔlɩŋ naadozo taa. Kajalaɣ ñɩŋgʋ ɖɛnɩ Ɔɔfɩraa hɔɔlʋʋ g taa, Suwaalɩ egeetiye taa. 18 Naalɛ ñɩŋgʋ ñɛɖɛnɩ Bɛtɩhɔrɔɔnɩ hɔɔlʋʋ taa, nɛ tozo ñɩŋgʋ ñɛɖɛnɩ tɛtʋ kamaɣ ŋga katɩŋɩɣnɩ Yɔɔyɩsɩ Kajalaŋa taa nɛ kowoki lakʋ taa yɔ, kɩ-hɔɔlʋʋ taa.
19 Alɩwaatʋ ndʋ tɩ-taa lɛ, kolu nɔɔyʋ taawɛɛ Izirɛɛlɩ ɛjaɖɛ tɩŋa taa. Mbʋ pʋyɔɔ yɔ, Filisitii ñɩma taacaɣ se, Ebiree ñɩma elu pa-tɩ you sɛsɩ yaa kɩkpɛzɛmɩŋ. 20 Pʋ-yɔɔ pʋwɛɛ se paa Izirɛɛlɩdʋ weyi, ewolo Filisitii ñɩma kolaa taa nɔɔyʋ tɛ se pasayɩ-ɩ ɛ-hakuŋ weyi naŋ hayɩɣna yɔ, nɛ weyi esekiɣni tɛtʋ yɔ, nɛ ɛ-laɖɩyɛ yaa ɛ-ñɩmɩyɛ. 21 Ye pasayɩɣ pɩtɛ wondu ńdʋ yaa pesiɣziɣ ñɩpɩ nakʋyʋ yɔ, pɛhɛyɩɣ mbʋ yɔ, ye patayɩ liidiye pɔɔyaɣ tɔm naadozo yɔ, ɛzɩ hɔɔlɩŋ naalɛ (2/3) yɔ. 22 Ye ḿbʋ, Sawʋlɩ nɛ Yoonaataanɩ po-youlaɖaa taawɛnɩ sɛsɩ yaa kɩkpɛzɛmɩŋ you wiye. Pa-naalɛ pe-ɖeke koŋ paawɛnɩna.
23 Filisitii ñɩma youlaɖaa tikaɣ nakɛyɛ kowoba kaɖaŋ ɖenɖe patɩŋɩɣ nɛ powoki Mikimaasɩ tɛtʋ taa ɖenɖe pɛwɛɛ yɔ.