Ruuti Takayaɣ 4

Pahaʋ Bowaazɩ waɖɛ se ɛmʋ hayɩm Nawomii cɔlɔ nɛ ɛhɔ lelu Ruuti yɔ

¹ Aliwaatʋ ńdʋ lɛ, Bowaazɩ ñaawobi ɛcaɣ tɛtʋ nɔnɔɔ taa. Peeye pɔyɔɔdʋʋ tɔm. Pɩkɛdaa lɛ, Eliimelɛɛkɩ liɖe taa tʋ weyi Bowaazɩ keheyi Ruuti se ɛkɩlɩ ñɔtɩnaʋ Eliimelɛɛkɩ yɔ, ɛɖɛɣnɩ peeye. ɛlɛ Bowaazɩ yaa-ɩ se: "Akele! Kɔɔ ŋcaɣ cɩnɛ!" ɛ́lɛ ñowobi ɛcaɣ lɛ, ² Bowaazɩ yaa tɛtʋ taa sɔsaa hiu se paba ewolo pacaɣ pɔ-cɔlɔ. Paba ñacaɣaɣ lɛ, ³ Bowaazɩ heyi Eliimelɛɛkɩ liɖe taa tʋ ɛnʋ se: "Ŋnawa se Nawomii kʋyɩ Mowaabɩ ɛjaɖɛ taa nɛ ɛpɩsɩ ɛkɔɔ. Meheyiɣ-ŋ se ɛñɩnɩɣ se ɛɖʋzɩ ɖa-ñɩnʋ Eliimelɛɛkɩ hayɩm nɔɔyʋ nesi taa. ⁴ Ma manɖʋwa se meheyiɣ-ŋ-tʋ sɔsaa nɛ mba patɩŋa payɩ pɛwɛ cɩnɛ yɔ pɛ-sɩndaa.Ye ñe-liu ɛwɛ-pʋ yɔ, ŋmʋ-pʋ. Ñe-liu ɛfɛyɩ-pʋ yɔ, ŋheyi-m. Toovenim lɛ, ñakɩlɩnɩ wɛnaʋ waɖɛ se paɖʋzɩ-pʋ ñe-nesi taa. Ña-wayɩ lɛ, ma." ɛ́lɛ ñocosi se e-liu wɛɛ se ɛmʋ hayɩm ḿbʋ.

⁵ Peeye Bowaazɩ heyi-i se ye ɛmʋ Nawomii cɔlɔ hayɩm mbʋʋ yɔ, pʋwɛɛ ɖɔɖɔ se ɛhɔ lelu Mowaabɩ tʋ Ruuti. Pʋbʋ, ɛwɛɣnɩ pɩɣa nɛ hayɩm mbʋ pɩkɛ ka-ñɩm nɛ paayanɩ Eliimelɛɛkɩ yɩɖɛ. ⁶ ɛ́lɛ ñocosi se ye mbʋʋ yɔ, ɛɛpɩzɩɣ. Pɩtɛkɛ mbʋ yɔ, pɩpɩzɩɣ pɩpasɩ ɛ-ñɩm. Pʋ-yɔɔ eheyi Bowaazɩ se eyebini-i mʋʋ waɖɛ nɖɩ ɛwɛna yɔ, se ɛnʋ ñaapɩzɩɣ.

⁷ Meheyiɣ-mɩ se ɖooo Izɩrɛɛlɩ ɛjaɖɛ taa lɛ, ye hɔʋ nakʋyʋ taa nɔɔyʋ eyekini kɩ-taa tʋ lɛlʋ hayɩm yɔ, ɛhɔzʋʋ ɛ-naataŋgbaɖɛ lɛɛɖɛ nɛ ɛcɛlɩ-ɩ nɛ pɩwɩlɩ se panɩnɩ ɖama. ⁸ Pʋ-yɔɔ weyi ɛɛkɩlɩ wɛnaʋ waɖɛ se ɛmʋ Eliimelɛɛkɩ hayɩm yɔ, eheyi Bowaazɩ se ɛmʋ hayɩm ḿbʋ lɛ, ɛhɔzɩ ɛ-naataŋgbaɖɛ lɛɛɖɛ nɛ ɛcɛlɩ-ɩ.

⁹ Peeye Bowaazɩ heyi sɔsaa nɛ mba patɩŋa payɩ paawɛ peeye yɔ se sɔnɔ pɛkɛ aseɣɖe tɩnaa se ɛmʋ Nawomii cɔlɔ Eliimelɛɛkɩ nɛ ɛ-pɩyalaa Kiiliyɔɔ nɛ Maalɔɔ pa-ñɩm tɩŋa. ¹⁰ Ɛhɔŋ ɖɔɖɔ lelu Maalɔɔ halʋ Mowaabɩ tʋ Ruuti se ɛwɛnɩ pɩɣa nɛ hayɩm ḿbʋ pɩkɛ ka-ñɩm nɛ pataasɔɔ Eliimelɛɛkɩ yɔɔ. Mbʋʋ payaɣnɩ ɛ-yɩɖɛ ɛ-ɖaɣʋnaa hɛkʋ taa aliwaatʋ ndʋ pɔyɔɔdʋʋ tɔm ɛ-tɛ yɔ. Ɛtɛm yɔɔdʋʋ ḿbʋ lɛ, eheyi-wɛ se, pɛkɛ ɖɔɖɔ pi-aseɣɖe tɩnaa.

¹¹ Peeye sɔsaa nɛ mba patɩŋa payɩ paawɛ peeye yɔ, petisaa se pɛkɛ pi-aseɣɖe tɩnaa. Ɛlɛ pɔtɔ se: "Kɩpaɣlʋ ɛwazɩ halʋ weyi ŋkpaɣaɣ yɔ ɛ-yɔɔ ɛzɩ ɛɛwazʋʋ Raacɛɛlɩ nɛ Leyaa mba palʋlɩ Izɩrɛɛlɩ ñɩma yɔ! Eyele nɛ ŋkɛ Efraataa liɖe taa ñɩm tʋ nɛ ña-yɩɖɛ sɛɛ Bɛtɩlɛhɛm tɛtʋ taa! ¹² Kɩpaɣlʋ eyele nɛ asɛyʋ ɛnʋ ɛlʋlɩ-ŋ piya sakɩyɛ nɛ ɛla nɛ ñɔ-hɔʋ taa ñɩma huu ɛzɩ Yuuda nɛ Taamaarɩ pa-pɩyalʋ Pɛɛrɛɛzɩ ñɩŋgʋ taa ñɩma yɔ!"

Ruuti lʋlʋʋ abalɩbɩɣa nɛ Nawomii tatasɩ wɛʋ ŋtaakpasɩ yɔ

¹³ Pʋwayɩ lɛ, Bowaazɩ kpaɣ Ruuti nɛ ɛlɛ kɛ ɛ-halʋ. Ɛ nɛ ɩ pɔkɔm pacaɣ lɛ, Kɩpaɣlʋ yele nɛ Ruuti haɣ hoa nɛ ɛlʋlɩ abalɩbɩɣa.

¹⁴ Ruuti lʋlɩ pɩɣa ḿbʋ lɛ, Bɛtɩlɛhɛm halaa heyi Nawomii se: "Ɖɩsa Kɩpaɣlʋ! Mbʋ pʋyɔɔ yɔ, eyeba nɛ sɔnɔ palʋlɩ weyi ɛkaɣ ñɔ-yɔɔ cɔnaʋ yɔ! Ña-sayɩ yɩɖɛ ɛsɛɛ Izɩrɛɛlɩ ɛjaɖɛ taa! ¹⁵ Pɩɣa ŋga, keyeki nɛ ŋpɩsɩ ɛzɩ ŋŋwɛʋ yɔ, nɛ kohuuzi ñɔ-yɔɔ ña-akpadɩyɩtʋ taa. Mbʋ pʋyɔɔ yɔ, ño-wolu lʋlɩnɩ-ŋ-kɛ, e-liu wɛ-ŋ, ɛwɛ-ŋ weewee nɛ pɩkɩlɩ abalɩbiya lʋbɛ."

¹⁶ Peeye Nawomii mʋ pɩɣa ŋga nɛ ekpiikini ɛ-laŋɩyɛ nɛ ɛɖʋ se ɛɖɔkʋʋ-kɛ. ¹⁷ Pʋ-yɔɔ halaa mba pɛwɛ ɛ-hɔɔlʋʋ taa yɔ pɔtɔm se lɛɛlɛɛyɔ, Nawomii wɛnɩ sayɩ! Payaa ɛ-sayɩ ɛnʋ se Obɛɛdɩ. Obɛɛdɩ ñɔkɔɔ ɛlʋlɩ Yeesee nɛ ɛlɛ ñalʋlɩ wuyaʋ sɔsɔ Daaviidi.

¹⁸ Pɩkpaɣʋnɩ Pɛɛrɛɛzɩ yɔ, Daaviidi cɔzɔnaa hɩla yɔ: Pɛɛrɛɛzɩ lʋlɩ Hɛsɩrɔɔnɩ. ¹⁹ Hɛsɩrɔɔnɩ ñalʋlɩ Raam. Raam ñalʋlɩ Amɩnaadaabɩ. ²⁰ Amɩnaadaabɩ ñalʋlɩ Naacɔɔ. Naacɔɔ ñalʋlɩ Salɩmaanɩ. ²¹ Salɩmaanɩ ñalʋlɩ Bowaazɩ. Bowaazɩ ñalʋlɩ Obɛɛdɩ. ²² Obɛɛdɩ ñalʋlɩ Yeesee nɛ Yeesee ñalʋlɩ Daaviidi.