Nawomii tiyuu Ruuti tɔɔnaɣ kadaɣ taa se Bowaazi ɛsɩnɩ-wɛ yɔ.
3
1 Nakʋyʋ wiye Ruuti waŋ Nawomii ya-ɩ nɛ eheyi-i se: "Pʋwɛɛ se mañɩnɩ-ŋ weyi ŋŋcaɣ ɛ-cɔlɔ ŋhɛzɩ nɛ ŋhɩɣ ña-tɩ yɔ. 2 Ɛzɩ ŋtɛm sɩm yɔ, Bowaazi weyi ɛha-ŋ waɖɛ nɛ ña nɛ ɛ-tʋmlaɖaa halaa ñɩma ɩla tʋmɩyɛ yɔ, ɛkɛ ɖe-liɖe taa tʋ. Ewoki mabʋ tɔɔnaɣ ŋga payaɣ se ɔrɩjɩ yɔ ɛ-hayɩm kadaɣ taa ɖanaɣ kanɛ. 3 Pʋ-yɔɔ lɛ, sɔ lɩm nɛ ŋɖʋ tɩlaaɖɩ nɛ ŋsuu ño-wondu ndʋ tɩkɩlɩ ɖeu yɔ nɛ ŋwolo peeye. Ŋtalaa lɛ, ŋyebi-i nɛ ɛtɔɔ nɛ ɛñɔɔ nɛ pʋcɔ ɛna-ŋ. 4 Ɛkɔm se ɛhɛnɩɣ lɛ, ŋcɔnɩ ɖenɖe ɛhɛnaa yɔ camɩyɛ. Pʋwayɩ lɛ, ŋwolo ŋwɛsɩ ɛ-pɩsaʋ pazɩ nɛ ŋhɛnɩ ɛ-nɩŋgbanzɩ tɛɛ. Pʋbʋ, eheyiɣ-ŋ mbʋ pʋwɛɛ se ŋla yɔ."
5 Ɛyɔɔdɩ ḿbʋ lɛ, Ruuti heyi-i se ɛlakɩ mbʋ eheyi-i yɔ pɩtɩŋa payɩ. 6 Peeye ewobi Bowaazɩ kadaɣ taa nɛ ɛla ɛzɩ ɛ-waŋ heyuu-i yɔ ɖeyiɖeyi.
7 Bowaazɩ kɔm ɛtɔɔ nɛ ɛñɔɔ lɛ, ɛ-laŋɩyɛ hʋlʋmɩ nɛ ewolo ɛhɛnɩ ɛ-tɔɔnaɣ huuye cɔlɔ. Pɩkɛdaa lɛ, Ruuti wolo ɖaa nɛ ɛwɛsɩ ɛ-pɩsaʋ nɛ ɛhɛnɩ ɛ-nɩŋgbanzɩ tɛɛ. 8 Pɩkɛdɩ ɖoó hɛkʋ lɛ, Bowaazɩ ña nɛ ɛkʋyɩ. Ɛcɔŋna lɛ, ɛnaɣ halʋ nɔɔyʋ ɛ-nɩŋgbanzɩ tɛɛ nɛ pɩɖɩɣzɩ-ɩ ɖɩɣ. 9 ɛ́lɛ ɛtɔ se: "Hɛɛ! Anɩ peeye yɔ?" Halʋ ɛnʋ, ecosi-i se: "Ma ña-tʋmlaɖʋ Ruuti. Hɔm-m, mbʋ pʋyɔɔ yɔ, ñaɣ lɛ ma-walʋ liɖe taa tʋ weyi pʋwɛɛ se ɛcɔnɩ mɔ-yɔɔ yɔ."
10 Bowaazɩ kaɖɩ-ɩ se: "Ruuti! Kɩpaɣlʋ ɛwazɩ ñɔ-yɔɔ! Ŋtasɩ ña-waŋ tɛ ñɩma wɩlʋʋ nɛ pɩkɩlɩ kajalaɣ ñɩmbʋ se ŋlakɩ ḿbʋ ŋɖʋwa yɔ. Toovenim lɛ, pʋtɔhɔm-ŋ se ŋsɔɔlɩ evebiya mba pɛkɛ ñɩmdɩnaa yaa kʋñɔndɩnaa yɔ. 11 Pʋ-yɔɔ lɛ, sɔɔndʋ ɛtaakpa-ŋ! Malakɩ-ŋ mbʋ ŋpɔzaa yɔ pɩtɩŋa payɩ. Mbʋ pʋyɔɔ yɔ, ɛyaa tɩŋa nawa se ŋkɛ halʋ weyi ɛwɛ wazaɣ yɔ. 12 Pɩkɛ ḿbʋ toovenim se mɛnkɛ hɔʋ taa tʋ weyi pʋwɛɛ se ɛcɔnɩ ñɔ-yɔɔ yɔ. Ɛlɛ, nɔɔyʋ ñɛwɛɛ, ɛlɛ ñɔñɔtɩnɩ-mɩ nɛ pɩkɩlɩ-m. 13 Tɛzɩ hɛnʋʋ cɩnɛ nɛ tɛʋ fe. Cee tanaŋ lɛ, ɖɩɩna se etisiɣ nɛ ɛcɔnɩ ñɔ-yɔɔ yaa eetisiɣ? Ye etisaa lɛ, pʋbʋ ɛcɔnɩ ñɔ-yɔɔ. Pɩtɛkɛ mbʋʋ yɔ, monɖuuni Kɩpaɣlʋ wezuu tʋ se mɔncɔŋnɩ ñɔ-yɔɔ! Tɛzɩ hɛnʋʋ tɛʋ nɛ kifem."
14 Pʋ-yɔɔ Ruuti ɖaɣnɩ hɛnʋʋ Bowaazɩ nɩŋgbanzɩ tɛɛ, ɛkʋyɩ lɔŋ, alɩwaatʋ ndʋ ŋna ɛyʋ ŋŋsɩŋ-ɩ yɔ. Toovenim lɛ, Bowaazɩ taasɔlɩ se ɛyaa ɛna se Ruuti wobi ɛ-kadaɣ taa. 15 Ruuti kɔm ɛkʋyɩ lɛ, Bowaazɩ heyi-i se ɛhɔzɩ e-toko sɔsɔʋ nɛ ɛɖɔkɩ-kʋ camɩyɛ. Peeye ɛlɛ hɔzɩ-kʋ nɛ eposi nɛ Bowaazɩ ɖʋ-ɩ tɔɔnaɣ ŋga payaɣ se ɔrɩjɩ yɔ ɛzɩ lɩm ñanzɩ naalɛ yɔ kɩ-taa nɛ ɛsʋʋ-ɩ. Pʋwayɩ lɛ, ɛpɩsɩ tɛtʋ taa.
16 Ruuti ñapɩsɩ ɛ-waŋ cɔlɔ lɛ, ɛlɛ ñɔpɔzɩ-ɩ se: "Mɛm-pɛlɛ! Ŋwobi Bowaazɩ cɔlɔ lɛ, pɩlɩ se we?" Peeye ɛkɛdɩ-ɩ mbʋ Bowaazɩ ɛnʋ ɛlabɩ-ɩ yɔ. 17 Eheyi-i ɖɔɖɔ se ɛna tɔɔnaɣ lɩm ñanzɩ naalɛ ŋga Bowaazɩ ɛnʋ ɛha-ɩ nɛ eheyi-i se pʋfɛyɩ se ekiti ɛnʋ Nawomii ɛ-cɔlɔ ŋtaakpasɩ. 18 Peeye Nawomii heyi-i se: "Mɛm-pɛlɛ! Caɣ ɖiɣɖiɣ nɛ ŋna ḿbʋ tɔm tʋnɛ tɩkaɣ tɛmnaʋ yɔ. Ye Bowaazɩ ɛtɔkɔ tʋ-ñʋʋ sɔnɔ maɣmaɣ yɔ, pɩɩhɛɣnɩ-ɩ."