NƆƆƉƐYAA TƆM
TAKAYAƔ
Tɔm Kiheyitu
Nɔɔɖɛyaa takayaɣ kanɛ ka-taa lɛ, pɛkɛdɩɣ mbʋ pɩlabɩ Izirɛɛlɩ cejewe taa ñɩma Yoozuwee sɩm wayɩ yɔ, pʋ-tɔm. Wiyaʋ nɔɔyʋ taawɛɛ pɛ-ɛjaɖɛ taa, paa weyi ɛlakaɣ mbʋ e-liu wɛɛ yɔ. Ɛlɛ, halaa nɛ abalaa nabɛyɛ Ɛsɔ kaha ɖoŋ se paba ɛcɔnɩ pɔ-yɔɔ alɩwaatʋ kaɖɛ ñɩndʋ taa, nɛ palɩzɩ cejewiye yaa cejewe wena awɛ cɛyɩtʋ taa yɔ, a-taa ñɩma po-koyindinaa nesi taa. Nabʋyʋ taa lɛ, paba hʋʋ pɔ-tɔm. Mbaa payaɣ se, Nɔɔɖɛyaa.
Ɖɩpaŋ naʋ ɖɔɖɔ takayaɣ kanɛ ka-taa se, Izirɛɛlɩ ñɩma ha Kɩpaɣlʋ siɣye nɛ ɛ́lɛ yele nɛ pasʋʋ samaɣ ŋga kɔcɔ-wɛ kpɛɛɛ yɔ, ke-nesi taa nɛ kanasɩ-wɛ. Pamakɩ kubusi nɛ payaa-ɩ se ɛsɩnɩ-wɛ lɛ, etiyiɣni-wɛ nɔɔɖɛyʋ nɔɔyʋ. Nɔɔɖɛyaa tʋmɩyɛ ɖɔɖɔ kpem lɛ se, pala nɛ Ɛsɔ nɛ ɛ-samaɣ Izirɛɛlɩ ñɩma peceɣ.
Hɔɔlɩŋ naadozo wɛnɩ nɔɔɖɛyaa takayaɣ kanɛ ka-taa:
Kajalaɣ ñɩŋgʋ taa lɛ, pɛkɛdɩɣ mbʋ mbʋ pɩlabɩ kpaɣ Izirɛɛlɩ ñɩma wobu pacaɣ Kanaanɩ ɛjaɖɛ taa nɛ pɩkɔɔ pɩsɩnɩ Yoozuuwee sɩm yɔ (1.1-2.10).
Hɔɔlʋʋ naalɛ ñɩŋgʋ taa lɛ, ɖɩnaɣ ɛzɩma mbʋ Ɛsɔ tɩŋɩɣnɩ ɛyaa mba ɛlɩzɩ-wɛ nɛ etiyi-wɛ yɔ, pɔ-yɔɔ nɛ ɛlɩzɩɣ ɛ-samaɣ koyindinaa nesi taa yɔ (2.11-16.31).
Hɔɔlʋʋ tozo ñɩŋgʋ taa lɛ, pɛkɛdɩɣ ñamñam lakasɩ nzɩ sɩlabɩ Izirɛɛlɩ cejewe taa ñɩma hɛkʋ taa, tɔm naalɛ, nɛ pɩcɔ pasɩɣ awiya yɔ (ñʋŋ 17-21).
Nɔɔɖɛyaa takayaɣ kanɛ ka-taa lɛ, mbʋ pɩtalɩɣ Izirɛɛlɩ ñɩma yɔ, pɩlɩɣnɩ wɛtʋ ndʋ tɩwɛ pa nɛ Ɛsɔ pɛ-hɛkʋ taa yɔ, tɩ-cɔlɔ. Ye paha Ɛsɔ siɣye yɔ, pʋbʋ, eyeki nɛ samaɣ ŋga kɔcɔ-wɛ kpɛɛɛ yɔ, kanazɩ-wɛ. Ɛlɛ, ye pekitini Ɛsɔ yɔɔ nɛ pama kubusi se ɛsɩnɩ-wɛ yɔ, ɛ́lɛ lɩzɩ-wɛ.
Pɔpɔzʋʋ-ɖʋ takayaɣ kanɛ ka-taa se, ye ɛyaa ɛwɛɛ nɛ paa weyi ɛlakɩ ḿbʋ e-liu wɛɛ yɔ, ɛzɩma papɩzɩɣ pɛkpɛndɩ nɛ pacaɣ?