17
Miikaa nɛ ɛ-ɛgɔlɩmɩyɛ tɛɛ ɖi-luŋiye, pɔ-tɔm
1 Abalʋ nɔɔyʋ kɛwɛ Efirayim pʋŋ egeetiye taa, payaɣ-ɩ se Miikaa. 2 Nakʋyʋ wiye, ɛpɔzɩ e-ɖoo se, ɛtɔzʋʋ se kɩyakʋ ŋgʋ paamɩlɩ ɛ́lɛ liidiye ñɩɣtʋ kutoku nɛ mɩnʋʋ (1.100) yɔ, ɛɛwɩlɩ mɩlʋ kpalʋʋ ɛnʋ ɛsɩndaa yaa we? Se, tɔ́ɔ! Ɛnʋ tendi-i se, liidiye nɖɩɩ yɔ, ɛnʋ kakpaɣnɩ-ɖɩ. Peeye, e-ɖoo tɔm se, KƖPAƔLƲ ɛwazɩ ɛnʋʋ ɛnʋ pɩyalʋ, ɛ-yɔɔ. 3 Ɛyɔɔdɩ ḿbʋ lɛ, Miikaa kpaɣ liidiye ñɩɣtʋ kutoku nɛ mɩnʋʋ (1.100) ńdʋ nɛ ɛpɩsɩnɩ ɛcɛlɩ-ɩ. Ɛlɛ, ɛ́lɛ heyi-i se, ɛnʋ kpakɩɣ liidiye ńɖɩ nɛ ɛha KƖPAƔLƲ ɛnʋʋ ɛnʋ pɩyalʋ, ɛ-yɔɔ. Se, pakpakɩɣ-ɖɩ nɛ palabɩnɩ sɩʋkpeleɣ ŋga pohuuzi kɔ-yɔɔ ñɩɣyʋʋ ŋgʋ poyolisaa yɔ. Se, ye mbʋ, ɛnʋ cɛlɩɣ-ɩ-ɖɩ lɛɛlɛɛyɔ. 4 Miikaa ɖoo cɛlɩ-ɩ liidiye ḿbʋ lɛ, ɛɖaɣnɩ-ɖɩ pɩsɩnaʋ nɛ ɛcɛlɩ e-ɖoo. Ɛ́lɛ kɔyɩ ɖɩ-yɔɔ ñɩɣtʋ nasɩlɛ (200) nɛ ɛcɛlɩ ñɩɣtʋ yolisiyu. Ɛ́lɛ ñala sɩʋkpeleɣ ŋga pohuuzi kɔ-yɔɔ ñɩɣyʋʋ ŋgʋ poyolisaa yɔ nɛ powoni pasɩɩ Miikaa ɖɩɣa taa.
5 Ŋgʋ, Miikaa ɛnʋ, ɛɛwɛnɩ lone naɖɩyɛ ɛ-tɛ nɛ eluŋuu agɔlɩma tɛɛ ɖɩ-taa. Pʋ-yɔɔ eyeba nɛ palabɩ-ɩ sɩʋkpeleɣ nakɛyɛ nɛ kɔdaɣ sɩʋkpelisi cikpesi. Pʋwayɩ lɛ, ɛkpa ɛ-pɩyalaa taa lɛlʋ nɛ ɛ́lɛ kɛ ɛ-cɔjɔ. 6 Wiyaʋ nɔɔyʋ taawɛɛ Izirɛɛlɩ ɛjaɖɛ taa alɩwaatʋ ndʋ tɩ-taa, paa weyi ɛlakaɣ mbʋ e-liu wɛɛ yɔ.
7 Ŋgʋ, Leevii liɖe taa evebu nɔɔyʋ kɛwɛ Bɛtɩlɛhɛm tɛtʋ taa Yuuda hɔɔlʋʋ taa. Ɛkɛ ɛgɔm Yuuda cejewiye taa. 8 Pɩkɛdaa lɛ, ɛkʋyɩ Bɛtɩlɛhɛm peeye se ɛlɛɣzɩ ɖɩcaɣyɛ kɩfaɖɛ. Ɛɖɛwaɣ lɛ, ɛtalɩ Miikaa ɖɩɣa taa, Efirayim pʋŋ egeetiye taa. 9 Ɛtalɩ peeye lɛ, Miikaa pɔzɩ-ɩ se, le ɛlɩnaa? Ecosi-i se, ɛnʋ kɛ Leevii liɖe taa tʋ nɛ ɛnʋ wɛɛ Bɛtɩlɛhɛm tɛtʋ taa, Yuuda hɔɔlʋʋ taa. Se, ɛnʋ ñɩnɩɣ ɖoli se ɛcaɣ. 10 Ɛyɔɔdɩ ḿbʋ lɛ, Miikaa heyi-i se, ye mbʋ, ɛcaɣ ɛnʋ tɛ nɛ ɛkɛ ɛnʋ caa nɛ ɛnʋ cɔjɔ. Se, ɛnʋ hɛyɩɣ-ɩ liidiye ñɩɣtʋ hiu (10), pɩnaɣ taa. Se, ɛnʋ cɛlɩɣ-ɩ ɖɔɖɔ tɔɔnaɣ nɛ wondu mba pɩpɔzʋʋ-ɩ yɔ. Peeye, Leevii liɖe taa tʋ ɛnʋ ɛsʋwa, 11 nɛ etisi se ɛcakɩ Miikaa tɛ, nɛ ɛ́lɛ kpaɣ-ɩ ɛzɩ ɛ-pɩyalʋ nɔɔyʋ yɔ. 12 Pɩlabɩ ḿbʋ lɛ, Miikaa mʋ-ɩ nɛ ɛwɛɛ ɛ-tɛ nɛ ɛkɛ ɛ-cɔjɔ. 13 Peeye Miikaa maɣzɩ ɛ-taa se, lɛɛlɛɛyɔ paa pɩɩla ɛzɩma, KƖPAƔLƲ lakɩ ɛnʋʋ ɖeu, mbʋ pʋyɔɔ yɔ, Leevii liɖe taa tʋ kɛnɩ ɛnʋ cɔjɔ.