18
Daanɩ liɖe taa ñɩma lɛɣzʋʋ tɛtʋ yɔ
1 Alɩwaatʋ ndʋ tɩ-taa lɛ, wiyaʋ nɔɔyʋ taawɛɛ Izirɛɛlɩ ɛjaɖɛ taa. Ŋgʋ, Daanɩ liɖe taa ñɩma ñɩnaɣ ɖɩ-taa, ɖoli se pacaɣ. Mbʋ pʋyɔɔ yɔ, petehiɣdi ɖoli ɛzɩ Izirɛɛlɩ cejewe lɛɛna taa ñɩma hiɣu yɔ, se paacaɣ a. 2 Pʋ-yɔɔ Daanɩ liɖe taa ñɩma lɩzɩ pa-taa ɛyaa ḿba pɛwɛ abalɩtʋ yɔ kagbaanzɩ (5). Palɩzɩ-wɛ Coraa b nɛ Ɛsɩtaawooli c pɛ-tɛtʋ taa. Paɖʋ-wɛ paɣtʋ se, powolo pɔcɔɔ ɛjaɖɛ ńɖɩ ɖɩ-taa nɛ pana mbʋ pʋwɛɛ yɔ. Ɛyaa ḿba, pɔkɔm patalɩ Efirayim pʋŋ egeetiye taa d lɛ, powolo Miikaa tɛ nɛ pasʋʋ peeye. 3 Pɛwɛ peeye ḿbʋ lɛ, panɩɩ evebu ɛnʋ ɛ-nɔɔ nɛ pasɩm-ɩ nɛ ɛ-yɔɔdaɣ se ɛkɛ Leevii liɖe taa tʋ. Ɖɩnɛɛ, pɔñɔtɩnɩ-ɩ nɛ pɔpɔzɩ-ɩ se, aheyi-i se ewolo peeye? Ɛbɛ ɛlakɩ peeye? Ɛbɛ kpa-ɩ nɛ pɩsɩ peeye? 4 Ecosi-wɛ se, Miikaa mʋnɩ ɛnʋʋ tʋmɩyɛ. Se, ɛmʋ ɛnʋ nɛ ɛnʋ kɛ ɛ-cɔjɔ. 5 Peeye, peheyi-i se, ɛ́pɔzɩ Ɛsɔ nɛ ɛna se, pɩkaɣ-wɛ ɖenaʋ pa-nʋmɔʋ taa yaa we? 6 Cɔjɔ ɛnʋ, ɛkaɖɩ-wɛ kpayɩ se, sɔɔndʋ ɛtaakpa-wɛ. Se, KƖPAƔLƲ wɛɣ pɔ-cɔlɔ pa-nʋmɔʋ ŋgʋ kɩ-taa.
7 Pʋwayɩ lɛ, ɛyaa kagbaanzɩ ḿba, pɛɖɛɛ nɛ pɔkɔɔ patalɩ ɖooo Layiisi tɛtʋ e taa. Patalaa lɛ, pamaɣnɩ tɩ-taa ñɩma wɛ niikaɣ nɛ laŋhɛzɩyɛ pa-taa kaalɛyɩtʋ ɛzɩ Sidɔɔ ñɩma f yɔ. Nɔɔyʋ taawɛnɩ kawanaɣ nakɛyɛ egeetiye nɖɩ ɖɩ-yɔɔ cɔnɩyʋ yɔɔ. Ɛyaa ḿba, paaposini Sidɔɔ ñɩma, patáawɛɛ nɔɔyʋ nesi taa. 8 Pʋwayɩ lɛ, papɩsɩ pa-ñɩma cɔlɔ, Coraa nɛ Ɛsɩtaawooli pɛ-tɛtʋ taa nɛ paba pɔzɩ-wɛ se, powoba lɛ, ɛbɛ panawa? 9 Peeye, pocosi-wɛ se, pa nɛ wɛ powolo pakʋyɩ Layiisi tɛtʋ taa ñɩma yɔɔ. Se, ḿba nawa se, tɛtʋ ndʋ tɩwɛ ɖeu pɩtɩɩfɛyɩ. Se, pataaɖʋ pe-nesi po-yo taa nɛ pacaɣ yem. Se, pakʋyɩ lɔŋ nɛ powolo pamʋ tɛtʋ ndʋ! 10 Se, patalɩɣ lɛ, panaɣ ɛyaa mba, pɛwɛ yem kaalɛyɩtʋ nɛ ɛjaɖɛ nɖɩ pɛwɛ ɖɩ-taa yɔ, ɖɩwɛ yem lemmm. Se, Ɛsɔ ɖʋzʋʋ ɛjaɖɛ nɖɩɩ pe-nesi taa. Se, mbʋ ɛyʋ pɩzɩɣ ɛwɛnɩ tɛtʋ yɔɔ yɔ, pɩɩtɛɖɩɣ peeye.
11 Peeye, Daanɩ liɖe taa ɛyaa taŋga nɛ mɩnʋʋ (600) pakʋyɩ Coraa nɛ Ɛsɩtawooli pɛ-tɛtʋ taa, pa nɛ po-you wondʋ nɛ pɛɖɛɛ. 12 Patalɩ Kiriyatɩ Yeyarim tɛtʋ g taa Yuuda ɛjaɖɛ taa lɛ, powolo pekpeɣli tɛtʋ ńdʋ, tɩ-wɩsɩ ɖɩɖʋyɛ hɔɔlʋʋ taa. Pʋ-yɔɔ paya lone ńɖɩ se, Mahane Daanɩ, pʋ-tɔbʋʋ se, Daanɩ ñɩma ɖikpeɣliye . Halɩ nɛ sɔnɔ, pɔɖɔŋnɩ lone nɖɩɩ yaʋ mbʋ. 13 Pakʋyɩ peeye lɛ, pakpa Efirayim pʋŋ egeetiye taa nɛ powolo Miikaa tɛ. 14 Peeye, ɛyaa kagbaanzɩ mba paawobi pɔcɔɔ Layiisi ɛjaɖɛ taa yɔ, pɔpɔzɩ pa-taabalaa se, panawa se sɩʋkpeleɣ nakɛyɛ nɛ kɔdaɣ sɩʋkpelisi cikpesi nɛ sɩʋkpeleɣ ŋga pohuuzi kɔ-yɔɔ ñɩɣyʋʋ ŋgʋ poyolisaa yɔ h, pɛwɛ ɖɩsɩ ńzɩ sɩ-taa nakɛyɛ taa, yaa we? Se, lɛɛlɛɛyɔ, mbaa pʋwɛɛ se, pana mbʋ pʋwɛɛ se pala yɔ. 15 Pʋwayɩ lɛ, ɛyaa kagbaanzɩ ḿba, powolo Miikaa ɖɩɣa taa nɛ pasʋʋ ɖenɖe Leevii liɖe taa evebu ɛnʋ ɛwɛɛ yɔ nɛ pɛsɛɛ-ɩ. 16 Alɩwaatʋ ńdʋ lɛ, Daanɩ liɖe taa ɛyaa taŋga nɛ mɩnʋʋ (600) ḿba, paasɩŋ ɖɩɣa nɔnɔɔ taa pa nɛ po-you wondu. 17 Ɛyaa kagbaanzɩ ḿba, pasʋ ɖɩɣa taa lɛ, pakpaɣ sɩʋkpelisi ndɩ ndɩ nɛ kɔdaɣ sɩʋkpelisi cikpesi nɛ pɛkpɛndɩnɩ sɩʋkpeleɣ ŋga pohuuzi kɔ-yɔɔ ñɩɣyʋʋ ŋgʋ poyolisaa yɔ. Alɩwaatʋ ńdʋ tɩ-taa lɛ, cɔjɔ nɛ ɛyaa taŋga nɛ mɩnʋʋ (600) ḿba, paasɩŋ ɖɩɣa nɔnɔɔ taa, pa nɛ po-you wondu. 18 Cɔjɔ ɛnʋ, ɛna lɛlaa sʋ Miikaa tɛ nɛ pakpaɣkɩɣ sɩʋkpelisi nɛ kɔtaɣ taa wondu lɛ, ɛpɔzɩ-wɛ se, ɛbɛ palakɩ peeye? 19 Paba wɛɛtɩ-ɩ se, esu, natʋyʋ ɛtaalɩɩ ɛ-nɔɔ taa. Se, ɛ́tɩŋ ḿba nɛ ɛkɛ pe-liɖe taa ñɩma cɔjɔ. Se, ɛbɛ ɛkɩlɩ sɔɔlʋʋ? Ɛkɩlɩ sɔɔlʋʋ se ɛkɛ ɛyʋ kʋɖʋm hɔʋ taa ñɩma cɔjɔ yaa, Izirɛɛlɩ ñɩma cejewiye naɖɩyɛ taa ñɩma tɩŋa cɔjɔ? 20 Pɔpɔzɩ-ɩ ḿbʋ lɛ, pɩkɛdɩnɩ-ɩ pɩtɩɩfɛyɩ nɛ ewolo ɛmʋ sɩʋkpelisi nzɩɩ pɔ-cɔlɔ nɛ pa nɛ ɩ pɛɖɛɛ.
21 Ɖɩnɛɛ, Daanɩ liɖe taa ñɩma ḿba, paɖaɣnɩ kpaɣʋ nʋmɔʋ se pɛɖɛɣ. Pɛɖɛɣaɣ lɛ, pɛɖɛzɩ piya nɛ kpɩna nɛ wondu nɔɔ. 22 Pɔkɔm poposini Miikaa ɖɩɣa lɛ, ɛ́lɛ nɛ ɛ-cɔlɔ ñɩma pekpeɣli ɖama nɛ paɖʋ pa-wayɩ. 23 Paɖʋwaɣ Daanɩ liɖe taa ñɩma wayɩ ḿbʋ lɛ, pɛwɛɛ pamakɩ kubusi. Peeye, paba sɩŋaa nɛ pɔpɔzɩ Miikaa se, ɛbɛ lakɩ-ɩ? Pɩlabɩ ɛzɩma nɛ pekpeɣli ɖama ḿbʋ? 24 Miikaa cosi-wɛ se, pakpaɣ sɩʋkpelisi nzɩ ɛnʋ yeba nɛ palabɩ-ɩ yɔ, nɛ pɛkpɛndɩnɩ ɛnʋ cɔjɔ nɛ pɛɖɛɣna. Se, pɩtakazɩ ɛnʋʋ pʋyʋ nɛ pacazɩɣ ɛnʋʋ pɔzʋʋ se, ɛbɛ lakɩ ɛnʋ? 25 Peeye, pekitini-i se, ɛɖɛ ḿba nɛ ɛ-nɔsɩ lebu ḿbʋ. Pɩ́tɛkɛ ḿbʋ, pɩkɛdɩɣ pɩlɩɩ ḿba taa nabɛyɛ sɔŋ nɛ pakʋyɩ ɛ-yɔɔ nɛ pakʋ-ɩ nɛ pɛkpɛndɩnɩ ɛ-hɔʋ taa ñɩma. 26 Pʋwayɩ lɛ, Daanɩ liɖe taa ñɩma ḿba pɛɖɛɛ pa-nʋmɔʋ. Miikaa kɔm ɛna se pakɩlɩ-ɩ ɖoŋ lɛ, ɛha limaɣ nɛ ɛpɩsɩ ɛ-tɛ.
Daanɩ liɖe taa ñɩma caɣʋ Layiisi tɛtʋ taa yɔ
27 Mbʋʋ Daanɩ liɖe taa ñɩma kpaɣ sɩʋkpelisi nzɩ palabɩ Miikaa yɔ sɩ-tɩŋa nɛ pɛkpɛndɩnɩ ɛ-cɔjɔ nɛ pɛɖɛɛ. Pɔkɔm patalɩ Layiisi tɛtʋ taa lɛ, pamaɣnɩ tɩ-taa ñɩma, pɛwɛ niikaɣ nɛ laŋhɛzɩyɛ pa-taa kaalɛyɩtʋ. Ɛlɛ, pakʋyɩ pɔ-yɔɔ nɛ pakʋ-wɛ nɛ pɔsɔ pɛ-tɛtʋ miŋ. 28 Layiisi tɛtʋ kɛwɛ Beyiti Rehoovi hɔɔlʋʋ taa kajalaŋa taa. Ɛyaa ḿba, paaposini Sidɔɔ ñɩma, patáawɛɛ nɔɔyʋ nesi taa. Pʋ-yɔɔ, nɔɔyʋ towolo se ɛsɩnɩ-wɛ. Mbʋ yebina nɛ Daanɩ liɖe taa ñɩma pɩzɩ paɖaɣnɩ tɛtʋ ndʋʋ maʋ nɛ pacaɣ tɩ-taa. 29 Pɛlɛɣzɩ-tʋ hɩɖɛ nɖɩ ɖooo payaɣaɣ-tʋ se Layiisi yɔ, nɛ piyele payaɣ-tʋ pɔ-cɔzɔ Yaakɔɔbʋ pɩyalʋ Daanɩ hɩɖɛ. 30 Daanɩ liɖe taa ñɩma kpaɣ Miikaa sɩʋkpeleɣ nɛ pasɩɩ nɛ poluŋuu kɛ-tɛɛ. Gɛɛrɩsɔɔnɩ pɩyalʋ Yonaataanɩ i kɛ Daanɩ liɖe taa ñɩma cɔjɔ. Ɛkɛ Mooyiizi sɛyɩ. Pʋwayɩ lɛ, Yonaataanɩ pɩyalaa nɛ ɛ-sɛyɩnaa pɛwɛɛ palakɩ tʋmɩyɛ ndɩ nɛ pɩkɔɔ pɩsɩnɩ alɩwaatʋ ndʋ pɛkɛzɩ Izirɛɛlɩ ñɩma tɛtʋ yɔ. 31 Paasɩ Miikaa sɩʋkpeleɣ nɛ poluŋuu kɛ-tɛɛ mbʋ, nɛ pɩkɔɔ pɩsɩnɩ alɩwaatʋ ndʋ Ɛsɔ kɩɖanɖʋʋ tatasɩ wɛʋ Siiloo tɛtʋ j taa yɔ.