19
Ɛzaɣtʋ ndʋ Bineyaamiini liɖe taa ñɩma labɩ Giveyaa tɛtʋ taa yɔ
1 Leevii liɖe taa tʋ nɔɔyʋ kɛwɛ lone naɖɩyɛ taa, Efirayim pʋŋ egeetiye taa, ɖooo poliŋ. Nakʋyʋ wiye lɛ, ɛtasɩ halʋ kpaɣʋ. Ɛ́lɛ kɛ Yuuda hɔɔlʋʋ taa, Bɛtɩlɛhɛm tɛtʋ taa tʋ. Alɩwaatʋ ndʋ tɩ-taa lɛ, wiyaʋ nɔɔyʋ taawɛɛ Izirɛɛlɩ ɛjaɖɛ taa. 2 Nakʋyʋ wiye ɛ-halʋ ɛnʋ, ɛ-pana kpanɩ-ɩ siŋŋ nɛ ɛkʋyɩ ɛpɩsɩ Bɛtɩlɛhɛm tɛtʋ taa ɛ-caa tɛ nɛ ɛcaɣ peeye fenasɩ naanza (4). 3 Pɩlabɩ ḿbʋ lɛ, ɛ-walʋ kʋyɩ ewolo ɛ-cɔlɔ se ɛyɔɔdʋʋnɩ-ɩ nɛ ɛpɩsɩ ɛ-cɔlɔ. Ewokaɣ lɛ, ɛkpɛndɩnɩ ɛ-tʋmlaɖʋ nɛ kpaŋasɩ naalɛ. Ɛtalɩ ɛ-halʋ caa tɛ lɛ, ɛ-halʋ mʋ-ɩ nɛ ɛsʋnɩ-ɩ ɖɩɣa. Ɛ-caa na-ɩ lɛ, ɛmʋ-ɩ nɛ laŋhʋlʋmɩyɛ. 4 Ɛmʋ-ɩ ḿbʋ lɛ, ɛsɩɩ-ɩ ɛ-cɔlɔ nɛ ɛ́lɛ caɣ peeye kɩyakɩŋ naadozo. Ɛ nɛ ɛ-tʋmlaɖʋ, pɔtɔɔ nɛ pɔñɔɔ nɛ poɖoo. 5 Kɩyakʋ naanza ñɩŋgʋ wiye lɛ, pakʋyɩ tanaŋ cu. Leevii liɖe taa tʋ ɛnʋ, ɛñɔɔzɩ ɛ-tɩ se ɛɖɛɣ lɛ, ɛ-yɩtɩ heyi-i se, ɛtɔɔ nabʋyʋ nɛ ɛkpa ɖoŋ nɛ pʋcɔ ɛɖɛɛ. 6 Eheyi-i ḿbʋ lɛ, pa-naalɛ pacaɣ nɛ pɔtɔɔ nɛ pɔñɔɔ. Ɖɩnɛɛ, Leevii liɖe taa tʋ ɛnʋ ɛ-yɩtɩ heyi-i se etisi nɛ ɛtasɩ peeye sʋʋ nɛ pɩlabɩ-ɩ leleŋ. 7 Leevii liɖe taa tʋ liu kɛwɛɛ se ɛɖɛɛ. Ɛlɛ, ɛ-yɩtɩ cɛyɩ-ɩ nɛ etisi nɛ ɛtasɩ sʋʋ peeye. 8 Kifem kɩyakʋ kagbaanzɩ ñɩŋgʋ wiye lɛ, ɛkʋyɩ tanaŋ cu nɛ ɛñɔɔzɩ ɛ-tɩ se ekpeŋ. Ɛlɛ, ɛ-yɩtɩ taasɩ-ɩ heyuu se, ɛnʋ tendi-i se eyele nɛ ɛkpa ɖoŋ nɛ pʋcɔ. Se, ɖanaɣ lɛ, eekpe. Eheyi-i ḿbʋ lɛ, pa-tɩŋa pɛkpɛndɩ pɔtɔɔ. 9 Leevii liɖe taa tʋ ɛnʋ nɛ ɛ-halʋ nɛ ɛ-tʋmlaɖʋ pɔkɔm pakʋyɩ se pekpeŋ lɛ, ɛ-yɩtɩ heyi-i se, wɩsɩ kpema, hadɛ lɛdaa. Se, pasʋʋ peeye. Se, etisi nɛ ɛtasɩ peeye sʋʋ nɛ pɩlabɩ-ɩ leleŋ. Kifeŋ lɛ, pakʋyɩ lɔŋ nɛ papɩsɩ pɛ-tɛ.
10 Ɛyɔɔdɩ ḿbʋ lɛ, Leevii liɖe taa tʋ ɛnʋ ekizi nɛ ɛkʋyɩ ɛɖɛɛ nɛ ɛkɔɔ ɛñɔtɩnɩ Yeebuusi tɛtʋ. Pʋ-tɔbʋʋ se, Yeruusalɛm tɛtʋ. Ɛɖɛɣaɣ lɛ, ɛkpɛndɩnɩ ɛ-halʋ nɛ ɛ-kpaŋasɩ naalɛ sɩ nɛ sɩ-yɔɔ kpelisi. 11 Pɔkɔm patalɩ Yeebuusii tɛtʋ lɛ, wɩsɩ cawaɣ ɖʋ. Peeye ɛ-tʋmlaɖʋ heyi-i se, powolo Yeebuusi ñɩma tɛtʋ taa nɛ pasʋʋ peeye. 12 Ɛyɔɔdɩ ḿbʋ lɛ, ɛ́lɛ heyi-i se, ḿba ɛɛpɩzɩɣ pasʋʋ agɔma tɛtʋ a ndʋ tɩ-taa, Izirɛɛlɩ tʋ nɔɔyʋ fɛyɩ yɔ, tɩ-taa. Se, pañaɣ pana nɛ patalɩ Giveyaa tɛtʋ b taa. 13 Peeye, eheyi ɛ-tʋmlaɖʋ se, pɛcɛyɩ pa-tɩ nɛ patalɩ Giveyaa yaa Raamaa tɛtʋc taa, nɛ pasʋʋ peeye. 14 Pɔyɔɔdɩ ḿbʋ lɛ, pakpaɣ nʋmɔʋ nɛ pɛɖɛɛ. Pɔkɔm patalɩ Giveyaa tɛtʋ, Bineyaamiini ɛjaɖɛ taa lɛ, wɩsɩ ɖʋwa. 15 Ɖɩnɛɛ, powobi Giveyaa tɛtʋ taa se pasʋʋ peeye. Powoba lɛ, powolo pacaɣ samaɣ ɖikpeɣliye taa d. Ɛlɛ, nɔɔyʋ tayaa-wɛ e se powolo pasʋʋ ɛ-tɛ.
16 Pɩkɛdaa lɛ, abalʋ akpadɩyʋ nɔɔyʋ lɩnɩ ɛ-hayɩm taa ɖanaɣ ŋ́ga kɔ-yɔɔ nɛ ekpeŋ. Abalʋ ɛnʋ, ɛkɛ Efirayim pʋŋ egeetiye taa tʋ nɛ ɛwɛɛ Giveyaa tɛtʋ taa. Ŋgʋ, Bineyaamiini liɖe taa ñɩma wɛnɩ tɛtʋ ndʋ tɩ-taa. 17 Akpadɩyʋ ɛnʋ, ɛkʋsɩ ɛ-ɛza lɛ, ɛna Leevii liɖe taa tʋ nʋmɔɖɔnʋ ɛnʋʋ samaɣ ɖikpeɣliye taa nɛ ɛpɔzɩ-ɩ se, ɛlɩnɩ le nɛ ewoki le? 18 Peeye, ɛ́lɛ cosi-i se, palɩnɩ Bɛtɩlɛhɛm tɛtʋ taa, Yuuda egeetiye taa nɛ pacaɣ se powolo lone naɖɩyɛ taa, Efirayim pʋŋ egeetiye taa, ɖooo poliŋ. Se, ɛnʋ tɛ lɛ, peeye. Se, ɛnʋ kowobi Bɛtɩlɛhɛm nɛ ɛnʋ pɩsɩɣ ɛ-tɛ f. Se, ɛnʋ talʋʋ samaɣ ɖikpeɣliye taa peeye yɔ, nɔɔyʋ tayaa-ɩ se ewolo ɛ-tɛ. 19 Ŋgʋ, ḿba wɛnɩ ñɩtʋ nɛ hatʋ se pa-kpaŋasɩ kɔtɔɔ nɛ tɔɔnaɣ nɛ sʋlʋm se ɛnʋ nɛ ɛ-halʋ nɛ ɛ-tʋmlaɖʋ paatɔɔ nɛ pɔñɔɔ. Se, ḿba ɛɛtɛɖɩɣ pʋyʋ. 20 Ɛyɔɔdɩ ḿbʋ lɛ, abalʋ akpadɩyʋ ɛnʋ ɛsɛɛ-ɩ se ɛtalɩ ɖeu nɛ eheyi-i se, ɛnʋ cɛlɩɣ-ɩ mbʋ pɩpɩzaɣ se pɩtɛɖɩ-ɩ yɔ, pɩ-tɩŋa. Ɛlɛ, ɛtaasʋʋ samaɣ ɖi-kpeɣliye taa peeye. 21 Ɖɩnɛɛ, ewoni-wɛ ɛ-tɛ nɛ ɛɖʋ kpaŋasɩ ñɩtʋ. Piyele ɛha nʋmɔɖɔnɖaa mbaa lɩm nɛ pɔkɔ pa-nɩŋgbanzɩ, pʋwayɩ lɛ, pɔtɔɔ nɛ pɔñɔɔ.
22 Pɔtɔkaɣ nɛ laŋhʋlʋmɩyɛ lɛ, lone nɖɩ ɖɩ-taa ɛyaa nabɛyɛ, mba paawazɩɣ pʋyʋ yɔ, powolo pɔcɔɔ ɖɩɣa nɛ pata. Pɔkɔtɩ nɔnɔɔ ɖoŋ nɛ peheyi abalʋ akpadɩyʋ, ɖɩɣa tʋ se, ɛlɩzɩ abalʋ weyi ɛmʋ ɛ-tɛ yɔ nɛ ḿba caa-ɩ g. 23 Peeye, akpadɩyʋ ɛnʋ ɛlɩ pɔ-cɔlɔ nɛ ɛyaa-wɛ se ɛ-taabalaa nɛ eheyi-wɛ se, ɛnʋ tendi-wɛ se pataala ɛzaɣtʋ ńdʋ. Se, pátaalabɩ-ɩ tɛtɛlakasɩ, mbʋ pʋyɔɔ, ɛnʋ tɛ ewoba. 24 Se, ɛnʋ heyiɣ-wɛ se ɛnʋ wɛnɩ pɛlɛ nɔɔyʋ, ɛtasɩmdɩ abalʋ. Ɖɔɖɔ lɛ, abalʋ ɛnʋ nɛ ɛ-halʋ naalɛ ñɩnʋ pɛwɛnɩ ɛnʋ tɛ. Se, ɛnʋ lɩsɩɣ pɛlɛ ɛnʋ nɛ halʋ ɛnʋ pɔ-cɔlɔ nɛ palabɩ-wɛ mbʋ pe-liu wɛɛ yɔ. Piyele abalʋ ɛnʋ, pataalabɩ-ɩ tɛtɛlakasɩ nasɩyɩ. 25 Paa mbʋʋ yɔ, ɛyaa ḿba, petetisi ɛ-tɔm. Ɖɩnɛɛ, Leevii liɖe taa tʋ kpaɣ ɛ-halʋ nɛ ɛlɩnɩ-wɛ awayɩ. Pa-tɩŋa pakpa-ɩ nɛ ɖoŋ nɛ pasʋnɩ-ɩ pɩ nɛ pɩñandʋʋ.
26 Pɩwɩzɩ ñandʋʋ lɛ, halʋ wolo ɛtɔlɩ akpadɩyʋ ɛnʋ ɛ-ɖɩɣa nɔnɔɔ taa kpʋʋʋ nɛ ɛwɛɛ peeye mbʋ pɩ nɛ pɩñandʋʋ. Ɖɩɣa ŋ́ga, ka-taa ɛ-walʋ kɛwɛɛ. 27 Pɩkɔm pɩñandɩ lɛ, ɛ-walʋ kʋyɩ lɔŋ nɛ ewolo ɛtʋlɩ nɔnɔɔ nɛ ɛlɩɩ se ɛtɛzɩɣ ɛ-nʋmɔʋ ɖɔm. Ɛtʋlaa lɛ, ɛmaɣnɩ ɛ-halʋ hɩnɩ nɔnɔɔ taa cɔmm nɛ e-nesi tɩnɩ nɔnɔɔ yɔɔ. 28 Ɛna-ɩ ḿbʋ lɛ, ɛyaa-ɩ se, ɛkʋyɩ nɛ pɛɖɛɛ. Ɛlɛ, pusum ɖiɣdiɣ, ɛsɩba. Peeye, ɛkpaɣ halʋ tamɩyɛ ɛ-kpaŋaɣ yɔɔ nɛ ɛkpaɣ nʋmɔʋ nɛ ekpe ɛ-tɛ. 29 Ɛtalɩ ɛ-tɛ lɛ, ɛkpaɣ sɩɣa nɛ ɛtayɩ ɛ-halʋ tɔm hiu nɛ naalɛ (12) nɛ etiyini paa Izirɛɛlɩ cejewiye nɖɩɩ hɔɔlʋʋ kʋɖʋmʋʋ. 30 Mba etiyi-wɛ yɔ, pɛɖɛɣaɣ lɛ, eheyi-wɛ se, powoba lɛ, pɔpɔzɩ se, ɖooo ɛzɩ Izirɛɛlɩ ñɩma lɩʋ Ejipiti ɛjaɖɛ taa yɔ, wiɖiyi panawa se nɔɔyʋ labɩ pɩ-tɛ lakasɩ nzɩ yaa we h? Se, pɔcɔnɩ tɔm ndʋ tɩ-taa ɖeu nɛ pɔyɔɔdɩnɩ ɖama nɛ paɖʋ mbʋ pɩwɛɛ se pala yɔ. Mba patɩŋa pana ḿbʋ yɔ, pɔyɔɔdaɣ se, wiɖiyi ḿba tanada mbʋ yaa nɔɔyʋ talabɩdɩ nabʋ yʋ mbʋ kaʋ.