20
Izirɛɛlɩ ñɩma cejewe lɛɛna taa ñɩma kʋyʋʋ Bineyaamiini cejewiye taa ñɩma yɔɔ yɔ
1 Pɩlabɩ ḿbʋ lɛ, Izirɛɛlɩ ñɩma tɩŋa nɩnɩ ɖama nɛ pekpeɣli KƖPAƔLƲ ɛsɩndaa Micipaa tɛtʋ a taa. Paalɩnɩ hɔɔlɩŋ tɩŋa taa, kpaɣ Daanɩ tɛtʋ nɛ hayo kiŋ hɔɔlʋʋ taa, nɛ piwolo pɩsɩnɩ Bɛɛrɩseva ñɩndʋ taa, hadɛ kiŋ ñɩŋgʋ taa, b nɛ pɩkpɛndɩnɩ kpaɣ Gaalaadɩ ɛjaɖɛ c wɩsɩ ɖɩlɩyɛ hɔɔlʋʋ taa. 2 Izirɛɛlɩ ñɩma cejewe tɩŋa taa ɛyaa nɛ pa-awiya paawɛ Ɛsɔ samaɣ ɖikpeɣliye ńdɩ ɖɩ-taa. Youlaɖaa kutokiŋ nasɩnaza (400.000) ḿba pasɩm you nɛ sɩɣa yɔ, paawɛ pa-taa. 3 Pekpeɣli ḿbʋ lɛ, Bineyaamiini cejewiye taa ñɩma nɩɩ se, Izirɛɛlɩ cejewe lɛɛna taa ñɩma wobi Micipaa tɛtʋ taa.
Pekpeɣlaa lɛ, Izirɛɛlɩ ñɩma pɔzɩ se, pɛkɛdɩ-wɛ ɛzɩma mbʋ palabɩ ɛzaɣtʋ ńdʋ yɔ. 4 Ɖɩnɛɛ, Leevii liɖe taa tʋ weyi pakʋ ɛ-halʋ yɔ, eheyi-wɛ se, ɛ nɛ ɛ-halʋ naalɛ ñɩnʋ powobi Giveyaa tɛtʋ d taa, Bineyaamiini ñɩma ɛjaɖɛ taa se pasʋʋ peeye. 5 Se, pɛwɛ peeye ḿbʋ lɛ, Giveyaa tɛtʋ taa ñɩma lɩnɩ ɖoó nɛ powolo pɔcɔɔ ɖɩɣa ŋ́ga ka-taa ɛnʋ kɛwɛɛ yɔ nɛ pata nɛ pañɩnɩɣ se pakʋ ɛnʋ, ɛlɛ, pakpa ɛnʋ halʋ nɛ ɖoŋ nɛ pacaa-ɩ nɛ ɛkɔɔ ɛsɩ. 6 Peeye, ɛnʋ kpaɣ ɛnʋ halʋ ɛnʋ nɛ ɛtayɩ-ɩ nanɔʋ nanʋʋ nɛ etiyini Izirɛɛlɩ cejewiye tɩŋa taa. Se, toovenim lɛ, Giveyaa ñɩma labɩ ɛzaɣtʋ sɔsɔtʋ siŋŋ Izirɛɛlɩ ɛjaɖɛ taa. 7 Se, tɔ́ɔ! Lɛɛlɛɛyɔ, mbaa Izirɛɛlɩ ñɩma pekpeɣlaa yɔ, pɔyɔɔdɩnɩ ɖama nɛ paɖʋ mbʋ pɩwɛɛ se pala yɔ. 8 Ɖɩnɛɛ, panɩnɩ ɖama nɛ pakaɖɩ kpayɩ se, pa-taa nɔɔyʋ eekitiɣ ɛ-tɛ, eekitiɣ ɛ-kɩɖanɖʋʋ tɛɛ yaa ɛ-ɖɩɣa taa. 9 Se, pɔcɔnɩ pana ɛzɩma mbʋ palakɩ nɛ pakʋyɩ Giveyaa ñɩma yɔɔ yɔ. Se, ḿba ɖʋʋ miika 10 nɛ palɩzɩ paa Izirɛɛlɩ ñɩma cejewe ńɖɩ ɖɩ-taa, ɛyaa hiu mɩnʋʋ yɔɔ (10/100), yaa mɩnʋʋ kutoku yɔɔ (100/1.000), yaa kutoku kutokiŋ hiu yɔɔ (1.000/10.000), nɛ powolo pañɩnɩ tɔɔnaɣ nɛ powoni mba powoki se pakʋyɩ Giveyaa e ñɩma yɔ́ɔ, ɛzaɣtʋ ndʋ palabɩ Izirɛɛlɩ ɛjaɖɛ taa yɔ tɩ-yɔɔ yɔ.
11 Mbʋʋ Izirɛɛlɩ ñɩma tɩŋa nɩnɩ ɖama se pakʋyʋʋ Giveyaa tɛtʋ taa ñɩma yɔɔ. 12 Pʋ-yɔɔ Izirɛɛlɩ cejewe ndɩ ndɩ taa ñɩma tiyi ɛyaa se, powolo pɔpɔzɩ Bineyaamiini cejewiye kpeekpe taa ñɩma se, ɛzɩma pɩlabɩ nɛ ɛzaɣtʋ sɔsɔtʋ ńdʋ, tɩpɩzɩ tɩla pɛ-tɛ mbʋ? 13 Se, paɖʋzɩ ḿba nesi taa Giveyaa tɛtʋ taa ñɩma mba palabɩ ɛzaɣtʋ ńdʋ yɔ, mba paawazɩɣ pʋyʋ yɔ, nɛ ḿba kʋ-wɛ. Pʋbʋ, ḿba hɛzɩɣ ɛzaɣtʋ ndʋ tɩlabɩ mbaa Izirɛɛlɩ ñɩma pɛ-hɛkʋ taa yɔ.
Ɛlɛ, Bineyaamiini cejewiye taa ñɩma tanɩnɩ po-koobiyaa Izirɛɛlɩ ñɩma lɛlaa. 14 Pʋ-yɔɔ Bineyaamiini cejewiye taa ñɩma lɩnɩ pɛ-tɛtʋ ndɩ ndɩ taa nɛ powolo pekpeɣli Giveyaa ñɩndʋ taa se, pakʋyʋʋ Izirɛɛlɩ ñɩma lɛlaa yɔɔ. 15 Po-youlaɖaa mba palɩnɩ tɛtʋ ndɩ ndɩ taa nɛ pekpeɣli kɩyakʋ ŋ́gʋ ki-wiye yɔ, paakpɛndɩ kutokiŋ nɩɩlɛ nɛ loɖo (26.000), patakalɩnɩ Giveyaa tɛtʋ taa sɔdɩŋ weyi ɛ́lɛ ñaawɛ taŋga nɛ nasɩlɛ (700) yɔ. 16 Youlaɖaa ḿba pa-taa lɛ, sɔdɩŋ taŋga nɛ nasɩlɛ (700) kɛkɛ nɩmɛ tɩnaa. Pe-nesi nzɩ, sɩwɛ lɔŋ. Paa pa-taa anɩ, ɛpɩzaɣ se ɛtʋʋzɩnɩ ñɔyaɣ nakɛyɛ nɛ ɛtɔ pɩyɛ nɛ ɛ-pɩtɔɖɛ nɛ ɛyaɣ-kɛ, eecoɖuu. 17 Piyele Izirɛɛlɩ cejewe lɛɛna taa ñɩma ñekpeɣli ɛyaa kutokiŋ nasɩnaza (400.000), pa-tɩŋa pɛkɛ youlaɖaa.
18 Izirɛɛlɩ cejewe lɛɛna taa ñɩma ḿba, pakʋyɩ powolo Beetɛɛlɩ tɛtʋf taa nɛ pɔpɔzɩ Ɛsɔ se, pe-cejewe taa lɛ, nɖɩɩ pʋpɔzʋʋ se ɖɩcalɩ wobu nɛ ɖɩkʋyɩ Bineyaamiini cejewiye taa ñɩma yɔɔ? Ɖɩnɛɛ, KƖPAƔLƲ cosi-wɛ se, Yuuda cejewiye taa ñɩma pʋpɔzʋʋ se pacalɩ wobu. 19 Kifem tanaŋ lɛ, Izirɛɛlɩ youlaɖaa kpaɣ nʋmɔʋ nɛ powolo pekpeɣli ɖama nɛ pɛwɛɛ Giveyaa tɛtʋ cɔlɔ. 20 Pʋwayɩ lɛ, palɩɩ nɛ papɩlɩ Giveyaa tɛtʋ ɛsɩndaa se pakʋyʋʋ Bineyaamiini cejewiye taa ñɩma yɔɔ. 21 Papɩlɩ ḿbʋ lɛ, Bineyaamiini cejewiye taa ñɩma ḿba palɩnɩ Giveyaa tɛtʋ taa nɛ pakʋ Izirɛɛlɩ ñɩma lɛlaa kutokiŋ nɩɩlɛ nɛ naalɛ (22.000). 22-23 Pʋ-yɔɔ Izirɛɛlɩ ñɩma wobi KƖPAƔLƲ ɛsɩndaa nɛ pewii ɖanaɣ nɛ kaɖanʋʋ. Pɔpɔzɩ-ɩ se pana se, pʋwɛɛ se ḿba ɛtasɩ wobu nɛ pakʋyɩ po-koobiya Bineyaamiini cejewiye taa ñɩma yɔɔ yaa we? KƖPAƔLƲ cosi-wɛ se, powolo. Ɖɩnɛɛ, Izirɛɛlɩ youlaɖaa kpa ɖoŋ nɛ powolo papɩlɩ lone nɖɩ ɖɩ-taa paapɩlɩ kacalaɣ wiye yɔ, se pakʋyɩ pɔ-yɔɔ. 24 Izirɛɛlɩ ñɩma pɩlɩ ḿbʋ lɛ, patasɩ kʋyʋʋ Bineyaamiini cejewiye taa ñɩma yɔɔ. 25 Kɩyakʋ naalɛ ñɩŋgʋ ŋgʋ kiwiye lɛ, paba lɩnɩ Giveyaa tɛtʋ taa nɛ pakʋ Izirɛɛlɩ youlaɖaa taa sɔdɩŋ kutokiŋ hiu nɛ lutozo (18.000). 26 Peeye Izirɛɛlɩ samaɣ tɩŋa kpɛzaa nɛ katasɩ wobu Beetɛɛlɩ tɛtʋ taa. Kowoba lɛ, ɛyaa caɣ tataa KƖPAƔLƲ ɛsɩndaa nɛ pewiɣ. Paahɔkɩ nɔɔ kɩyakʋ ŋgʋ ki-wiye, ɖanaɣ nɛ kaɖanʋʋ. Paala KƖPAƔLƲ kɩlaŋ weyi pɔhɔkɩ nɛ pɩñaɣ yɔ nɛ laŋhɛzɩyɛ ñɩŋ. 27-28 Beetɛɛlɩ peeye Ɛsɔ Aɖakaɣ kɛwɛ alɩwaatʋ ńdʋ tɩ-taa. Eliyaazaarɩ pɩyalʋ Pinaazɩ cɔŋaɣnɩ Aɖakaɣ ŋ́ga kɔ-yɔɔ. Ɛkɛ ɖɔɖɔ Aarɔɔnɩnɩnɩ sɛyɩ. Pɩlabɩ ḿbʋ lɛ, Izirɛɛlɩ ñɩma pɔzɩ KƖPAƔLƲ se pana se pʋwɛɛ se patasɩ wobu nɛ pakʋyɩ po-koobiya, Bineyaamiini cejewiye taa ñɩma yɔɔ yaa pataawolo? KƖPAƔLƲ cosi-wɛ se, powolo. Se, kifeŋ yɔ, ɛnʋ ɖʋzʋʋ pabaa pe-nesi taa.
29-30 Kifem kɩyakʋ tozo ñɩŋgʋ wiye lɛ, Izirɛɛlɩ ñɩma tasɩ wobu se pakʋyʋʋ po-koobiya Bineyaamiini cejewiye taa ñɩma yɔɔ. Peeye, pa-taa lɛlaa pabaa nɛ pɔcɔɔ Giveyaa tɛtʋ nɛ pata. Pɩkazɩ lɛlaa ñowolo papɩlɩ tɛtʋ ńdʋ tɩ-ɛsɩndaa se pakʋyɩ tɩ-taa ñɩma yɔɔ ɛzɩ patɩɩlakʋʋ yɔ. 31 Bineyaamiini cejewiye taa ñɩma lɩwa se pakʋyʋʋ Izirɛɛlɩ ñɩma yɔɔ lɛ, Izirɛɛlɩ ñɩma ḿba, pɛcɛtɩ nɛ peseɣ nɛ poposini-wɛ nɛ tɛtʋ. Ɖɩnɛɛ, papazɩ Izirɛɛlɩ youlaɖaa kʋʋ ɛzɩ paakʋʋ-wɛ yɔ. Pakʋ Izirɛɛlɩ ñɩma ɛzɩ ɛyaa niidozo (30) yɔ́ɔ, lakʋ hɛkʋ taa, Beetɛɛlɩ nɛ Giveyaa pa-nɩmaŋ taa. 32 Bineyaamiini cejewiye taa ñɩma maɣzaɣ se, pawabɩ Izirɛɛlɩ ñɩma ɛzɩ paawabʋ-wɛ yɔ. Ɛlɛ, Izirɛɛlɩ ñɩma ñaɖʋ pa-taa se, pese nɛ pɛcɛzɩ Bineyaamiini cejewiye taa ñɩma nɛ palɩnɩ-wɛ lakʋ taa nɩmaŋ taa, nɛ poposini-wɛ nɛ Giveyaa tɛtʋ. 33 Ɖɩnɛɛ, Izirɛɛlɩ youlaɖaa lɩnɩ po-lona ndɩ ndɩ taa nɛ powolo pekpeɣli Baalɩtaamaarɩ tɛtʋ taa. Alɩwaatʋ ńdʋ tɩ-taa lɛ, mba paapabaa nɛ pɔcɔɔ Giveyaa tɛtʋ nɛ pata yɔ, palɩnɩ pa-ɖɩmɛlɩyɛ taa, Gɛbaa kɛdɛɛŋa hɔɔlʋʋ taa tuda. 34 Pɩlabɩ ḿbʋ lɛ, Izirɛɛlɩ sɔdɩŋ kutokiŋ hiu (10.000), talɩ Giveyaa tɛtʋ ɛsɩndaa. You kasa miŋ siŋŋ, ɛlɛ, Bineyaamiini cejewiye taa ñɩma taamaɣzɩ se asɛyʋʋ nakʋyʋ sʋʋ-wɛ. 35 Kɩyakʋ ngʋʋ KƖPAƔLƲ yeba nɛ Izirɛɛlɩ ñɩma wa Bineyaamiini cejewiye taa ñɩma. Izirɛɛlɩ ñɩma kʋ po-youlaɖaa kutokiŋ nɩɩlɛ nɛ kagbaanzɩ nɛ mɩnʋʋ (25.100). 36 Ɖɩnɛɛ, Bineyaamiini cejewiye taa ñɩma nawa se, pɔ-tɔm tɛma.
Izirɛɛlɩ ñɩma kaha Bineyaamiini cejewiye taa ñɩma waɖɛ, mbʋ pʋyɔɔ yɔ, pataɣaɣ youlaɖaa mba paamɛlaa nɛ pɔcɔɔ Giveyaa tɛtʋ nɛ pata yɔ. 37 Ɖɩnɛɛ, paba sewa nɛ patɩsʋʋ tɛtʋ taa nɛ pamʋ-tʋ nɛ pakʋ tɩ-taa ñɩma tɩŋa. 38 Izirɛɛlɩ ñɩma nɛ mba paamɛlaa yɔ, panɩnɩ ɖama se, paba ɛsɔ tɛtʋ miŋ nɛ ñɔsɩ kpa nɛ sɩñɛyɩ tiɣ tiɣ. 39 Pɩkɛdaa lɛ, Izirɛɛlɩ ñɩma mba pɛwɛ you taa yɔ, pasɩŋ nɛ papa Bineyaamiini cewiye taa ñɩma nɛ ɛza. Papam-wɛ nɛ ɛza ḿbʋ lɛ, Bineyaamiini cejewiye taa ñɩma kʋ pa-taa ɛyaa ɛzɩ niidozo (30) yɔ, nɛ pɛwɛɛ pamaɣzɩɣ se, mba wabɩ-wɛ ɛzɩ paawabʋ-wɛ kajalaɣ yɔ. 40 Ɛlɛ, alɩwaatʋ ńdʋ lɛ, ñɔsɩ nzɩ paanɩnɩ ɖama sɩ-tɔm yɔ, sɩpazɩ kpaʋ nɛ sɩñɛyɩ Giveyaa tɛtʋ taa tiɣ tiɣ. Bineyaamiini cejewiye taa ñɩma kɔm pekisi lɛ, panaɣ pɛ-tɛtʋ tɩŋa mʋʋ miŋ nɛ ñɔsɩ kpaɣ. 41 Peeye, Izirɛɛlɩ ñɩma pamnɩ Bineyaamiini cejewiye taa ñɩma nɛ ɛza nɛ sɔɔndʋ pazɩ pabaa kpaʋ. Mbʋ pʋyɔɔ yɔ, panawa se, asɛyʋʋ sʋ-wɛ. 42 Ɖɩnɛɛ, papazɩ seu Izirɛɛlɩ ñɩma nɛ pɛɖɛɣnɩ lakʋ taa kiŋ. Ɛlɛ, patapɩzɩ patʋlɩ, pasʋʋ youlaɖaa mba palɩnɩ Giveyaa tɛtʋ taa yɔ, pe-nesi taa nɛ paba tɔyɩtɩ-wɛ. 43 Pɩlakaɣ ḿbʋ lɛ, Izirɛɛlɩ ñɩma cɔɔ Bineyaamiini cejewiye taa ñɩma nɛ pata, nɛ paɖʋ pa-wayɩ nɛ pɔtɔyɩtɩ-wɛ nɛ pɔkɔɔ patalɩ Giveyaa tɛtʋ ɛsɩndaa, wɩsɩ ɖɩlɩyɛ hɔɔlʋʋ taa. 44 Mbʋʋ pɩlaba nɛ Bineyaamiini cejewiye taa youlaɖaa kutokiŋ hiu nɛ lutozo (18.000) sɩ. Pa-tɩŋa pɛkɛ sɔdɩŋ. 45 Pɩkazɩ Bineyaamiini cejewiye taa ñɩma ḿba yɔ, pese nɛ pɛɖɛnɩ lakʋ taa kiŋ, Riimooni ɛwaɣ g hɔɔlʋʋ taa. Izirɛɛlɩ ñɩma ɖʋ pa-wayɩ nɛ pakʋ pa-taa ɛyaa kutokiŋ kagbaanzɩ (5.000) nɩmaŋ taa. Pɩkazɩ mba yɔ, paɖʋ paba wayɩ nɛ pɔkɔɔ patalɩ Gidom tɛtʋ taa, nɛ pakʋ ɛyaa kutokiŋ naalɛ (2.000) ɖɔɖɔ. 46 Ye ḿbʋ, Bineyaamiini cejewiye taa ñɩma mba pakʋ-wɛ kɩyakʋ ŋgʋ ki-wiye yɔ, pɛkpɛndɩ ɛyaa kutokiŋ nɩɩlɛ nɛ kagbaanzɩ (25000). Pa-tɩŋa pɛkɛ sɔdɩŋ. 47 Paa ḿbʋ yɔ, mba peseɣaɣ nɛ pɛɖɛɣnɩ lakʋ taa kiŋ yɔ, pa-taa ɛyaa taŋga nɛ mɩnʋʋ (600) ɖeke pɩzɩnɩ patalɩ Riimooni ɛwaɣ nɛ pɛmɛlɩ peeye fenasɩ naanza. 48 Piyele Izirɛɛlɩ ñɩma lɛ, pekiti nɛ pakʋyɩ Bineyaamiini cejewiye taa ñɩma lɛlaa mba pɩkazaa yɔ, pɔ-yɔɔ. Pɛwɛɛ pɔcɔʋ paba tɛtʋ ndɩ ndɩ taa nɛ pakʋʋ tɩ-taa ñɩma nɛ pɛkpɛndɩnɩ kpɩna nɛ mbʋ pɩ-tɩŋa payɩ panawaɣ yɔ. Ɖɔɖɔ lɛ, pɔsɔbɩ tɛtʋ ndʋ tɩ-tɩŋa payɩ tɩɩwɛ pa-nʋmɔʋ taa yɔ miŋ.