21
Bineyaamiini cejewiye ɖaɣnʋʋ wɛʋ yɔ
1 Izirɛɛlɩ ñɩma kekpeɣli Micipaa tɛtʋ a taa lɛ, poɖuú pa-tɩŋa se, pa-taa nɔɔyʋ ɛtaaha Bineyaamiini cejewiye taa tʋ nɔɔyʋ, ɛ-pɛlɛ kaʋ. 2 Nakʋyʋ wiye, Izirɛɛlɩ samaɣ tasɩ wobu Beetɛɛlɩ tɛtʋ b taa nɛ kacaɣ tataa Ɛsɔ ɛsɩndaa nɛ kama kubusi nɛ kewili ɖanaɣ nɛ kaɖanʋʋ wooo. 3 Payaɣaɣ pa-KƖPAƔLƲ Izirɛɛlɩ Ɛsɔ nɛ papɔzʋʋ-ɩ se, pɩlabɩ ɛzɩma nɛ kigiluu ŋgʋ kɩtalɩ-wɛ? Se, pɩlabɩ ɛzɩma nɛ pʋwɛɛ se, lɛɛlɛɛyɔ, Izirɛɛlɩ cejewe taa, cejewiye lɛɛɖɛ eɖi? 4 Kifema lɛ, samaɣ kʋyɩ tanaŋ cu nɛ kama lone ńɖɩ ɖɩ-taa, kɩlaŋ ɖɩlayɛ nɛ kálaa kɩlaŋ weyi pɔhɔkɩ nɛ pɩñaɣ yɔ nɛ laŋhɛzɩyɛ ñɩŋ. 5 Pʋwayɩ lɛ, Izirɛɛlɩ ñɩma pɔzɩ ɖama se, pe-cejewe taa lɛ, pɩtakazɩ naɖɩyɛ taa ñɩma se pataawolo ḿba ɖikpeɣliye taa KƖPAƔLƲ ɛsɩndaa, Micipaa tɛtʋ taa yaa we? Toovenim lɛ, paaɖuú tɩ-taa KƖPAƔLƲ ɛsɩndaa kaɣlaa se, pákʋ weyi etowolo yɔ. 6 Ŋgʋ, pɩlabɩ Izirɛɛlɩ ñɩma pɩtɔdɩyɛ nɛ po-koobiya Bineyaamiini cejewiye taa ñɩma. Peeye pɔtɔm se, Izirɛɛlɩ cejewiye naɖɩyɛ ɖɔŋnɩ ɖem alɩwaatʋ ndʋ tɩ-taa. 7 Se, ɛbɛ papɩzɩɣ pala nɛ pacaa Bineyaamiini cejewiye taa abalaa mba pakazaa yɔ, halaa? Se, ŋgʋ, ḿba ɖuú KƖPAƔLƲ ɛsɩndaa se, ḿba ɛɛhaɣ-wɛ pɛ-pɛlaa.
8 Peeye pɔpɔzaa se pana se Izirɛɛlɩ cejewe taa lɛ, naɖɩyɛ wɛɛ nɛ ɖɩ-taa ñɩma taawolo KƖPAƔLƲ ɛsɩndaa, Micipaa tɛtʋ taa yaa we? Pɔpɔzɩ ḿbʋ lɛ, pana se Yaavɛɛsɩ tɛtʋ c ndʋ tɩwɛ Gaalaadɩ egeetiye taa yɔ, tɩ-taa nɔɔyʋ taawolo KƖPAƔLƲ ɛsɩndaa pa-ɖikpeɣliye taa. 9 Toovenim lɛ, alɩwaatʋ ndʋ pakalaɣ mba powobi peeye yɔ se pana pa-ñʋʋ lɛ, Yaavɛɛsɩ tɛtʋ taa tʋ nɔɔyʋ taawɛɛ peeye. 10 Ɖɩnɛɛ, mba paakpeɣlaa yɔ, palɩzɩ pa-taa sɔdɩŋ kutokiŋ hiu nɛ naalɛ (12.000) nɛ petiyi-wɛ Yaavɛɛsɩ tɛtʋ taa. Papaɣ-wɛ se, powolo Gaalaadɩ egeetiye taa nɛ pakʋ Yaavɛɛsɩ tɛtʋ taa ñɩma, pɛkpɛndɩnɩ halaa nɛ piya. 11 Se, pákʋ abalaa tɩŋa payɩ nɛ halaa mba pa-tɩŋa pasɩm abalaa yɔ. 12 Pakʋ Yaavɛɛsɩ tɛtʋ taa ñɩma ḿbʋ lɛ, piyele pɛlaa mba patasɩmdɩ abalaa yɔ, pɛkpɛndɩ nasɩnaza (400). Peeye, powoni-wɛ Siiloo ɖikpeɣliye taa, Kanaanɩ ɛjaɖɛ taa.
13 Pʋwayɩ lɛ, samaɣ ŋ́ga, ka-taa ñɩma tɩŋa tiyi ɛyaa nabɛyɛ se, powolo peheyi Bineyaamiini cejewiye taa ñɩma mba paawɛ Riimooni ɛwaɣ yɔɔ yɔ se, pa nɛ wɛ peceɣaa. 14 Peheyi Bineyaamiini cejewiye taa ñɩma ḿbʋ lɛ, paba pɩsɩ pɛ-tɛ kpaagbaa. Papɩsaa lɛ, paha-wɛ Yaavɛɛsɩ tɛtʋ taa pɛlaa mba pataakʋ-wɛ yɔ. Ɛlɛ, pɩtatalɩ pa-ñʋʋ taa.
15 Pɩlabɩ ḿbʋ lɛ, Bineyaamiini cejewiye taa ñɩma la Izirɛɛlɩ ñɩma pʋtɔdɩyɛ. Toovenim lɛ, KƖPAƔLƲ keyeba puhuyi pɔʋ Izirɛɛlɩ cejewe taa ñɩma hɛkʋ taa. 16 Ɖɩnɛɛ, samaɣ ñʋndɩnaa pɔzɩ pa-tɩ se, ɛzɩma ḿba lakɩ nɛ pehiɣ halaa nɛ paha Bineyaamiini cejewiye taa ñɩma mba pɩkazaa yɔ? Mbʋ pʋyɔɔ yɔ, halaa kaatɛm cejewiye nɖɩ ɖɩ-taa. 17 Pɔyɔɔdaa ɖɔɖɔ se, pʋwɛɛ se Bineyaamiini cejewiye taa ñɩma mba pɩkazaa yɔ, palʋlɩ piya nɛ Izirɛɛlɩ cejewiye naɖɩyɛ etaaɖe. 18 Se, ɛlɛ, ḿba ɛɛpɩzɩɣ paha-wɛ waɖɛ se, pakpaɣ ḿba pɛlaa. Mbʋ pʋyɔɔ yɔ, ḿba tɛm ɖuúu se, ye pɩcɩbɩ Izirɛɛlɩ tʋ nɔɔyʋ nɛ ɛha Bineyaamiini cejewiye taa tʋ nɔɔyʋ ɛ-pɛlɛ yɔ, pawɩlɩ pʋdʋ kpalʋʋ.
19 Peeye, pɔtɔzaa se, KƖPAƔLƲ kasandʋ d ndʋ pɔtɔkɩ Siiloo tɛtʋ taa paa pɩnaɣ ŋga yɔ, tɩñɔtaa. Siiloo tɛtʋ ńdʋ, tɩwɛ Beetɛɛlɩ tɛtʋ nɛ hayo kiŋ nɛ Leboonaa tɛtʋ nɛ hadɛ kiŋ nɛ habɩyɛ nɖɩ ɖɩlɩɣnɩ Beetɛɛlɩ nɛ ɖiwoki Siicem tɛtʋ taa yɔ, ɖɩ-wɩsɩ ɖɩlɩyɛ hɔɔlʋʋ taa. 20 Pɩlabɩ ḿbʋ lɛ, peheyi Bineyaamiini cejewiye taa ñɩma se, powolo Siiloo tɛtʋ taa nɛ pɛmɛlɩ tɩŋ weyi payaɣ se viiñi yɔ, ɛ-tɛɛ. 21 Pʋbʋ, alɩwaatʋ ndʋ tɩ-taa pɛlaa lɩɣ se papaɣ lɛ, paa weyi ɛlɩnɩ viiñi tɩŋ ɛnʋ ɛ-tɛɛ nɛ ɛkpa pa-taa kʋɖʋm nɛ ewoni-i Bineyaamiini cejewiye taa ñɩma tɛtʋ taa nɛ ɛ́lɛ kɛ ɛ-halʋ. 22 Se, ye pɛlaa ḿba pa-caanaa yaa pa-ɖalaa ewobi ḿba cɔlɔ nɛ pacaɣ mbaa tɔm yɔ, ḿba heyiɣ-wɛ se, pala Bineyaamiini cejewiye taa ñɩma ɖeu. Mbʋ pʋyɔɔ yɔ, ḿba taapɩzɩ pehiɣ paa pa-taa weyi halʋ you ŋgʋ kɩɩlabɩ Yaavɛɛsɩ tɛtʋ taa yɔ, kɩ-taa e. Se, ɖenɖe pɩtɛkɛ pa-maɣmaɣ pakpaɣnɩ pɛ-pɛlaa nɛ paha-wɛ yɔ, nɔɔyʋ ɛɛpɩzɩɣ ɛkʋ pɔ-tɔm se, pɔtɔɖɔ ndʋ paaɖuwaa yɔ tɩ-yɔɔ.
23 Mbʋʋ Bineyaamiini cejewiye taa ñɩma woba nɛ pala. Pakpa Siiloo tɛtʋ taa pɛlaa mba palɩwa se papaɣ yɔ nɛ pɩmaɣnɩ pa-ñʋʋ taa ɛzɩ pɩpɔzʋʋ yɔ nɛ pɛɖɛna. Papɩsɩ pɛ-ɛjaɖɛ taa nɛ pama pɛ-tɛtʋ nɛ pacaɣ tɩ-taa. 24 Pɩlabɩ ḿbʋ lɛ, Izirɛɛlɩ ñɩma ḿba paakpeɣlaa yɔ, pamɩzɩ ɖama nɛ paa weyi ɛpɩsɩ e-cejewiye taa e-liɖe taa, tɛtʋ ndʋ patayɩnɩ-ɩ yɔ, tɩ-taa.
25 Wiyaʋ nɔɔyʋ taawɛɛ Izirɛɛlɩ ɛjaɖɛ taa alɩwaatʋ ńdʋ tɩ-taa, paa weyi ɛlakaɣ mbʋ e-liu wɛɛ yɔ.