16
Samɩsɔɔ kpɛzʋʋ Gaazaa tɛtʋ nɔnɔsɩ yɔ
1 Nakʋyʋ wiye Samɩsɔɔ wobi Gaazaa tɛtʋ a taa. Ewobi peeye lɛ, ɛna halʋ acɛyɛ tʋ nɔɔyʋ, nɛ ɛ nɛ ɩ pasʋʋ. 2 Pɩlabɩ ḿbʋ lɛ, Gaazaa tɛtʋ taa ñɩma nɩɩ se Samɩsɔɔ wɛ pɛ-tɛ nɛ pɛwɛɛ powoki tɛtʋ nɔnɔɔ taa nɛ pefeŋiɣ tɛʋ nɛ kifem. Ɛlɛ, patalabɩ-ɩ nabʋyʋ ɖoó ana a-taa. Paaɖʋ pa-taa se paɖaŋ nɛ kifeŋ lɛ, pakʋ-ɩ. 3 Ɛlɛ, Samɩsɔɔ hɛnɩ nɛ piwolo pɩsɩnɩ ɖoó hɛkʋ ɖeke. Ɖoó tayɩ hɛkʋ lɛ, ɛkʋyɩ nɛ ɛkpɛzɩ tɛtʋ nɔnɔɔ pɔɔyɩŋ nɛ ɛ-ɖasɩ naalɛ nɛ ɛ-kɩkaɖʋʋ nɛ ɛhɔɔlɩ pɩ-tɩŋa payɩ ɛ-hazasɩ yɔɔ nɛ ɛkpanɩ ɛsɩɩ pʋʋ ŋgʋ kɩpam Hɛbɩrɔɔnɩ tɛtʋ b nɛ ɛza yɔ, kʋ-ñʋʋ taa.
Daliila pɛdʋʋ Samɩsɔɔ yɔ
4 Pʋwayɩ lɛ, Samɩsɔɔ sɔɔlɩ halʋ nɔɔyʋ, payaɣ-ɩ se Daliila. Ɛɛwɛ kajalaŋa ŋ́ga payaɣ se Sorɛɛkɩ yɔ, ka-taa. 5 Pɩlabɩ ḿbʋ lɛ, Filisitii ñɩma awiya kagbaanzɩ (5) wolo ana Daliila nɛ aheyi-i se, ɛla Samɩsɔɔ hɛɛɛ nɛ ɛna se, le ɛlɩɣ e-ɖoŋ sɔsɔŋ ɛnʋ ɛ-yɔɔ, nɛ ɛzɩma palakɩ nɛ pehiɣ-i nɛ pakpa-ɩ. Se, pʋbʋ, ḿba pɩzɩɣ pɔhɔkɩ-ɩ nɛ ɛtaatasɩ wɛʋ ɖoŋ. Se, paa anɩ, ɛhaɣ-ɩ liidiye ñɩɣtʋ kutoku nɛ mɩnʋʋ (1.100). 6 Peheyi Daliila ḿbʋ lɛ, ewolo heyi Samɩsɔɔ se, ɛnʋ tendi-i se, eheyi ɛnʋ nɛ ɛnʋ na se, le ɛlɩɣ e-ɖoŋ sɔsɔŋ ɛnʋ ɛ-yɔɔ? Se, ɛzɩma papɩzɩɣ pɔhɔkɩ-ɩ nɛ ɛtaatasɩ wɛʋ ɖoŋ? 7 Samɩsɔɔ cosi-i se, ye pɔhɔkɩ ɛnʋʋ tɔʋ nimasɩ kɩfasɩ nzɩ sɩtawɩlɩda yɔ, lʋbɛ (7) yɔ, pʋbʋ, ɛnʋ pɩsɩɣ ɛjam nɛ ɛwɛɛ ɛzɩ ɛyaa lɛlaa yɔ. 8 Filisitii ñɩma awiya kagbaanzɩ nɩ ḿbʋ lɛ, awoni tɔʋ nimasɩ kɩfasɩ nzɩ sɩtawɩlɩda yɔ, lʋbɛ (7) nɛ acɛlɩ Daliila nɛ ɛ́lɛ kpaɣ-sɩ nɛ ɛhɔkɩnɩ Samɩsɔɔ. 9 Daliila kɛmɛsɩ ɛyaa nabɛyɛ ɖɩɣa taa. Pɩtɩkɛdaa lɛ, ɛpazɩ mabʋ kubusi nɛ ɛyaɣ Samɩsɔɔ se, Filisitii ñɩma woki naɣ yɔ ɛ-wayɩ. Peeye, Samɩsɔɔ cɛbɩ nimasɩ ńzɩ ɛzɩ pɛcɛkʋʋ nimiye nɖɩ ɖɩñaɣ miŋ yɔ. Ɛlɛ, patapɩzɩ pana ɖenɖe ɛlɩɣ e-ɖoŋ yɔɔ yɔ.
10 Pɩlabɩ ḿbʋ lɛ, Daliila heyi Samɩsɔɔ se, ewoŋ-i, ɛcɛtɩ-ɩ. Se, lɛɛlɛɛyɔ, ɛnʋ tendi-i se, eheyi ɛnʋʋ ɛzɩma mbʋ pɩɩwɛɛ se pɔhɔkɩ-ɩ yɔ. 11 Eheyi-i se, ye paahɔkɩ ɛnʋ nɛ nime kɩfana wena patatɩɩlabɩda nɛ tʋmɩyɛ kaʋ yɔ yɔ, pʋbʋ, ɛnʋ kelesi e-ɖoŋ nɛ ɛwɛɛ ɛzɩ ɛyaa lɛlaa yɔ. 12 Peeye, Daliila kpaɣ nime kɩfana wena patatɩɩlabɩda nɛ tʋmɩyɛ yɔ, nɛ ɛhɔkɩ-ɩ. Ɛtɛm-ɩ hɔkʋʋ lɛ, ɛpazɩ mabʋ kubusi nɛ ɛyaɣ Samɩsɔɔ se, Filisitii ñɩma woki naɣ yɔ ɛ-wayɩ! Ɛlɛ, Samɩsɔɔ kʋyɩ ɛcɛ nime wena pɔhɔkɩ-ɩ yɔ, ɛzɩ pɛcɛkʋʋ pɩsatʋ yem yɔ. 13 Pɩlabɩ ḿbʋ lɛ, Daliila heyi Samɩsɔɔ se, ɛtasɩ ɛnʋʋ woŋuu, ɛtasɩ ɛnʋʋ cɛtʋʋ. Se, lɛɛlɛɛyɔ, eheyi ɛnʋʋ ɛzɩma mbʋ pɩɩwɛɛ se pɔhɔkɩ-ɩ yɔ toovenim. Peeye, Samɩsɔɔ heyi-i se, ye ɛkpa ɛnʋ ñʋʋ taa ñɔsɩ ńzɩ sɩ-lʋbɛ nɛ ɛhɔkɩnɩ weyi palʋʋnɩ saɣtanaa yɔ nɛ ɛkamɩnɩ saɣtaɣ yɔ, pʋbʋ, ɛnʋ kelesi e-ɖoŋ nɛ ɛwɛɛ ɛzɩ ɛyaa lɛlaa yɔ. 14 Peeye, Daliila laba nɛ Samɩsɔɔ ɖoó. Ɛ́lɛ ɖowaɣ lɛ, ɛkpa ɛ́lɛ ñɔsɩ ńzɩ sɩ-lʋbɛ (7) nɛ ɛhɔkɩnɩ weyi palʋʋnɩ saɣtanaa yɔ nɛ ɛkamɩnɩ saɣtaɣ. Ɛtɛma lɛ, ɛpazɩ mabʋ kubusi nɛ ɛyaɣ Samɩsɔɔ se, Filisitii ñɩma woki naɣ yɔ ɛ-wayɩ! Samɩsɔɔ fema lɛ, ɛkpɛzɩ saɣtaɣ nɛ weyi ɛ-yɔɔ palʋʋ saɣtanaa yɔ nɛ weyi palʋʋnɩ saɣtanaa yɔ. 15 Ɖɩnɛɛ, Daliila pɔzɩ-ɩ se, ɛzɩma ɛpɩzɩɣ ɛtɔ se, ɛsɔɔlɩ ɛnʋ nɛ ɛ-lɩmaɣza fɛyɩ ɛnʋ yɔɔ? Se, pɩlabɩ tɔm naadozo yɔ, ewoŋuu ɛnʋ nɛ eteheyi ɛnʋʋ ɖenɖe e-ɖoŋ sɔsɔŋ lɩɣna yɔ. 16 Daliila wɛɛ nɛ ɛcɛyɩɣ-ɩ nɛ tɔm ndʋʋ kɩyakɩŋ tɩŋa ḿbʋ lɛ, pɩɖɛɛ Samɩsɔɔ sɩm yɔɔ sɩm yɔɔ nɛ ɛtapɩzɩ ɛɖɔkɩ ɛ-tɩ. 17 Peeye, ɛtɛzɩ lɩzʋʋ ɛ-taa tɔm nɛ eheyi-i. Ndʋʋ lɛ se, ɖooo ɛzɩ palʋlʋʋ ɛnʋ yɔ, hʋnʋʋ tapka ɛ-ñʋʋ taa kaʋ. Se, mbʋ pʋyɔɔ yɔ, ɛnʋ kɛ Ɛsɔ pʋyʋ ɖooo ɛnʋ ɖoo lotu taa c. Se, ye pahʋm ɛnʋ ñɔsɩ yɔ, pʋbʋ, ɛnʋ lesiɣ e-ɖoŋ nɛ ɛpɩsɩ ɛcam nɛ ɛwɛɛ ɛzɩ ɛyaa lɛlaa yɔ. 18 Peeye, Daliila nawa se Samɩsɔɔ lɩzɩ ɛ-taa tɔm tɩŋa nɛ eheyi-i, nɛ etiyi Filisitii ñɩma awiya wayɩ. Ɛtɔm se, peheyi-wɛ se, lɛɛlɛɛyɔ lɛ, papɩzɩɣ powolo, mbʋ pʋyɔɔ yɔ, Samɩsɔɔ lɩzɩ ɛ-taa tɔm tɩŋa nɛ eheyi ɛnʋ. Peheyi paba ḿbʋ lɛ, pɛkpɛndɩnɩ liidiye nɖɩ paaɖʋwa se pɛhɛyɩɣ-ɩ yɔ, nɛ powona. 19 Pɩlabɩ ḿbʋ lɛ, Daliila la nɛ Samɩsɔɔ ɖoó ɛ-nʋmbɔla yɔɔ, nɛ ɛyaa abalʋ nɔɔyʋ nɛ ɛ́lɛ ñowolo ɛsɛtɩ ɛ-ñɔsɩ nzɩ sɩ-lʋbɛ (7). Pɛsɛtɩ-sɩ ḿbʋ lɛ, e-ɖoŋ pasɩ nɛ ɛpɩsɩ ɛjam. 20 Peeye, Daliila pazɩ mabʋ kubusi nɛ ɛyaɣ Samɩsɔɔ se, Filisitii ñɩma woki naɣ yɔ ɛ-wayɩ! Samɩsɔɔ fema lɛ, ɛmaɣzɩ se ɛkaɣ lɩʋ pɩ-taa ɛzɩ pɩtɩɩ yɔ. Ɛlɛ, ɛtaana se, KƖPAƔLƲ tatasɩ wɛʋ ɛ-cɔlɔ. 21 Pɩlabɩ ḿbʋ lɛ, Filisitii ñɩma kpa-ɩ nɛ pɔyɔkɩ ɛ-ɛza. Pakpaɣ-ɩ nɛ powoni Gaazaa tɛtʋ taa nɛ paɖɩ-ɩ bɩrɔɔnzɩ ñɩɣyʋ yomkpasɩ nɛ ɛwɛɛ saɖɩka taa nɛ pakpa-ɩ nɛ ɖoŋ se ɛcɔzʋʋ namɩyɛ nɖɩ ɖɩnaŋɩɣ tɔɔnaɣ ŋga payaɣ se bilee yɔ. 22 Alɩwaatʋ ńdʋ lɛ, ɛ-ñɔsɩ nzɩ paasɛtaa yɔ, sɩɩtɛm pazʋʋ ñɔʋ.
Mbʋ mbʋ Samɩsɔɔ tɔyɩnɩ labʋ yɔ, nɛ ɛ-sɩm pɔ-tɔm
23 Nakʋyʋ wiye Filisitii ñɩma awiya kpeɣlaa se pɔtɔkɩ pa-wabɩtʋ kazandʋ nɛ pɛkpɛyɩ pɛ-ɛgɔlɩmɩyɛ Daagɔɔnɩ. Pɔtɔkaɣ lɛ, pɛwɛɛ poyou yondu se,
Ḿba ɛgɔlɩmɩyɛ ɖʋzɩ pe-nesi taa,
Filisitii ñɩma koyindu Samɩsɔɔ.
24 Samaɣ kɔm kana-ɩ lɛ, koyou yondu nɛ kasaŋ kɛ-ɛgɔlɩmɩyɛ Daagɔɔnɩ se,
Kɛ-ɛgɔlɩmɩyɛ ɖʋzɩ ke-nesi taa,
ko-koyindu Samɩsɔɔ.
Ɛnʋ yɔkaɣnɩ kɛ-ɛjaɖɛ,
Ɛkʋwaɣ-kɛ tam yɔ.
25 Ka-taa kɔm pɩhʋlʋmɩ lɛ, kɔtɔ se, powoni Samɩsɔɔ nɛ ɛkʋ-kɛ tanaʋ. Peeye, powoba palɩzɩ Samɩsɔɔ saɖɩka taa nɛ powona nɛ ɛkʋʋ ɛyaa tanaʋ. Powoni-i nɛ pasɩɩ-ɩ ɛgɔlɩmɩyɛ ɖɩɣa tilima hɛkʋ taa. 26 Peeye, eheyi abalɩbɩɣa ŋga kaaɖɔkɩ e-nesi taa nɛ kɔhɔŋɩ-ɩ yɔ se, kowoni ɛnʋ nɛ etukuni tilima wena aɖɔkɩ ɛgɔlɩmɩyɛ ɖɩɣa yɔ nɛ ɛnʋ tɩlɩnɩ-yɛ.
27 Ŋgʋ, halaa nɛ abalaa paasu ɛgɔlɩmɩyɛ ɖɩɣa taa ɖo. Filisitii ñɩma awiya tɩŋa kɛwɛ peeye, nɛ ɛyaa kutokiŋ naadozo (3.000) ñɛwɛɛ kuduyuu ñʋʋdaa nɛ pɔcɔŋnɩ Samɩsɔɔ nɛ ɛkʋʋ-wɛ tanaʋ. 28 Peeye, Samɩsɔɔ sɛ KƖPAƔLƲ. Ɛya-ɩ se, KƖPAƔLƲ Ɛsɔ! Nɛ eheyi-i se, ɛtɔzɩ ɛnʋ yɔɔ! Se, ɛnʋ tendi-i se, ɛ́pɩsɩnɩ ɛnʋʋ ɖoŋ weyi ɛnʋ kɛwɛna yɔ, paa lɛɛlɛɛyɔ maɣmaɣ nɛ ɛnʋ kpanɩ Filisitii ñɩma kɩmɩyɛ, ɛnʋ ɛza ana a-naalɛ a-yɔkʋʋ yɔɔ. 29 Samɩsɔɔ yɔɔdɩ ḿbʋ lɛ, ɛtakɩ hɛkʋ taa tilima naalɛ wena aɖɔkʋʋ kuduyuu yɔ a-yɔɔ nɛ ɛñɩɣ e-nesi kɩbanzɩ a-taa lɛɛɖɛ yɔɔ, nɛ ɛ-nɩmɩyɛ lɛɛdɛ yɔɔ. 30 Peeye, ɛtɔm se, ɛ nɛ Filisitii ñɩma pásɩ nɔɔ kʋɖʋmaɣ. Ɛyɔɔdɩ ḿbʋ lɛ, ɛñɩɣ-yɛ nɛ e-ɖoŋ tɩŋa nɛ ɛgɔlɩmɩyɛ dɩɣa yɔkɩ nɛ kaɖa awiya nɛ ɛyaa mba paawɛ peeye yɔ, pa-tɩŋa pɔ-yɔɔ. Samɩsɔɔ sɩkaɣ nɛ ɛkpɛndɩnɩ mba yɔ, pakɩlɩ mba ɛɛkʋ alɩwaatʋ ndʋ ɛɛwɛnɩ ɛ-ɛza yɔ.
31 Pʋwayɩ lɛ, ɛ-ɖalaa nɛ e-neyaa nɛ ɛ-hɔʋ taa ñɩma, powolo pakpaɣ-ɩ nɛ powoni pepi pɩlaʋ ŋgʋ kɩ-taa paapim ɛ-caa Manoowaa yɔ, kɩ-taa. Pɩlaʋ ŋ́gʋ, kɩwɛ Coraa nɛ Ɛsɩtaawooli pɛ-tɛtʋ hɛkʋ taa.
Samɩsɔɔ kɛkɛ Izirɛɛlɩ ñɩma nɔɔɖɛyʋ pɩnzɩ nɩɩlɛ (20).