Nɔɔɖɛyaa Tɔm Takayaɣ 15

Samɩsɔɔ kpaʋ kɩmɩyɛ Filisitii ñɩma yɔ

¹ Alɩwaatʋ pazɩ wayɩ, pɩkɔm pɩtalɩ ɛzɩ pakʋŋʋʋ tɔɔnaɣ ŋga payaɣ se bilee yɔ lɛ, Samɩsɔɔ kpaɣ pimbiɣa nakayɛ nɛ ewolo se ɛnaɣ ɛ-halʋ. Ɛtalaa lɛ, ɛtɔ se, ɛnʋ sʋʋ ɛ-halʋ kuduyuu tɛɛ. Ɛlɛ, ɛ-yɩtɩ kízini-i ² nɛ eheyi-i se, ɛnʋ maɣzaa se ɛtatasɩ ɛnʋ pɛlɛ sɔɔlʋʋ. Pʋ-yɔɔ, ɛnʋ kpaɣ-ɩ nɛ ɛha weyi ɛcɔŋaɣnɩ ɛ-halɩkpaɣyɛ kazandʋ yɔɔ yɔ. Se, ɛlɛ, e-neu ɖewa nɛ pɩkɩlɩ-ɩ. Se, ɛpɩzɩɣ ɛkpaɣ ɛlɛɛ e-lone taa. ³ Samɩsɔɔ yɩtɩ yɔɔdɩ mbʋʋ lɛ, Samɩsɔɔ kaɖɩ kpayɩ se, lɛɛlɛɛyɔ, ye ɛnʋ ɛlabɩ Filisitii ñɩma ɛzaɣtʋ yɔ, nɔɔyʋ ɛɛpɩzɩɣ ɛtɔ se pʋ-yɔɔ.

⁴ Pʋwayɩ lɛ, Samɩsɔɔ wolo ɛkpa putanaa nasidozo (300) nɛ ɛkpa-wɛ naalɛ naalɛ, nɛ ɛta po-susi nɛ ɖama, nɛ ɛhɔkɩnɩ kooloŋa. ⁵ Ɛtɛm hɔkʋʋ ḿbʋ lɛ, ɛsɔ koolonzi nzɩɩ miŋ, nɛ eyele putanaa se pasʋʋ Filisitii ñɩma bilee hayɩm taa nɛ pɩñaɣ kʋ-hɔɔ wena pakʋma yɔ nɛ ŋgʋ patakʋmda yɔ nɛ pɩkpɛndɩnɩ tɩŋ weyi payaɣ se viiñi yɔ nɛ weyi payaɣ se Ooliiviyee yɔ. ⁶ Peeye Filisitii ñɩma pɔsaa se, alabɩ ḿbʋ yɔ? Pocosi-wɛ se, Samɩsɔɔ labɩna, mbʋ pʋyɔɔ yɔ, ɛ-yɩtɩ Timinaa tɛtʋ taa tʋ kpaɣ Samɩsɔɔ ɛnʋ ɛ-halʋ nɛ ɛha weyi ɛɛcɔŋaɣnɩ ɛ-halikpaɣyɛ kazandʋ yɔɔ yɔ. Ɖɩnɛɛ, Filisitii ñɩma woba pakpa halʋ ɛnʋ nɛ ɛ-caa nɛ pɔsɔbɩ-wɛ miŋ. ⁷ Palabɩ ḿbʋ lɛ, Samɩsɔɔ heyi-wɛ se, ɖenɖe palabɩ ḿbʋ yɔ, ye ɛnʋ ɛtakpa-wɛ pɩ-kɩmɩyɛ yɔ, ɛnʋ taa ɛɛhɛɣ. ⁸ Pʋ-yɔɔ ɛkʋyɩ pɔ-yɔɔ nɛ ɛwabɩ-wɛ kpaagbaa kpem. Pʋwayɩ lɛ, ewolo ɛmɛlɩ ɛwaɣ ŋga kɛwɛ Eyitam tɛtʋ taa yɔ, kɔ-pɔʋ nakʋyʋ taa.

Samɩsɔɔ kpaɣʋ kpaŋaɣ támaɣ nɛ ɛkʋnɩ ɛyaa kutoku (1.000) yɔ

⁹ Pɩlabɩ ḿbʋ lɛ, Filisitii ñɩma wolo pacaɣ Yuuda egeetiye taa nɛ palʋ nɛ pɔkɔɔ patalɩ ɖenɖe payaɣ se Lehii ^a yɔ. ¹⁰ Peeye, Yuuda ñɩma pɔzɩ-wɛ se, ɛbɛ yɔɔ powoba se pakʋyɩ ḿba yɔɔ? Pocosi-wɛ se, pacaɣ se pakpa Samɩsɔɔ nɛ palabɩ-ɩ ɛzɩ ɛlabʋ-wɛ yɔ. ¹¹ Ɖɩnɛɛ Yuuda ñɩma kutokiŋ naadozo (3.000) kʋyaa nɛ powolo Eyitam ɛwaɣ pɔʋ taa. Powoba lɛ, pɔpɔzɩ Samɩsɔɔ se, ɛnawa se ḿba kɛ Filisitii ñɩma yomaa naa we? Se, ɛlabɩ mbaa mbʋ se we? Samɩsɔɔ cosi-wɛ se, ɛnʋ labɩ Filisitii ñɩma ḿba ɛzɩ palabʋ ɛnʋ yɔ. ¹² Ɛyɔɔdɩ ḿbʋ lɛ, peheyi-i se, powoba se pɔhɔkɩ-ɩ nɛ paɖʋzɩ Filisitii ñɩma nesi taa. Peeye, eheyi-wɛ se, póɖuu se paakʋʋ-ɩ pa-maɣmaɣ. ¹³ Peheyi-i se, paacaɣ se pakʋ-ɩ. Ɛlɛ, pacaɣ se pɔhɔkɩ-ɩ nɛ paɖʋzɩ-ɩ paba nesi taa. Peeye, pakpaɣ nime kɩfana naalɛ nɛ pɔhɔkɩ-ɩ nɛ palɩzɩ-ɩ nɛ ɛwaɣ pɔʋ taa. ¹⁴ Ɛkɔm ɛtalɩ Lehii tɛtʋ taa lɛ, Filisitii ñɩma katɩ-ɩ nɛ pamakɩ kubusi se pawaba. Peeye, KƖPAƔLƲ Kalɩzaɣ tibi Samɩsɔɔ yɔɔ, nɛ nime wena paahɔkɩ e-nesi yɔ, acɛ ɛzɩ ndɔnʋʋ ŋgʋ kɩñaɣ miŋ yɔ. ¹⁵ Pɩlabɩ ḿbʋ lɛ, Samɩsɔɔ na kpaŋaɣ ŋga pakʋ fam nɛ fam yɔ, ka-támaɣ nɛ ɛkpaɣ-kɛ nɛ ɛkʋnɩ ɛyaa kutoku (1.000). ¹⁶ Pʋwayɩ lɛ, ɛma keɣa se,

Kpaŋaɣ támaɣ,

mankʋnɩ ɛyaa kutoku (1.000).

Kpaŋaɣ támaɣ,

mankanɩ sɩɖaa ^b.

¹⁷ Ɛtɛma lɛ, ɛlɔ támaɣ ŋgaa poliŋ. Pʋ-yɔɔ payaɣ lone nɖɩ se, Ramaatɩ Lehii. Pʋ-tɔbʋʋ se, Támaɣ piyaɣ. ¹⁸ Kpaagbaa ḿbʋ lɛ, lɔkɔtʋ ɖɛɛ Samɩsɔɔ. Peeye, ɛmabɩnɩ KƖPAƔLƲ kubuka se, ɛnʋʋ Ɛsɔ, ɛnʋ yebina nɛ ɛwa mbʋ. Se, lɛɛlɛɛyɔ, eyeki ɛnʋ se ɛnʋ ɛsɩ lɔkɔtʋ nɛ ɛnʋ sʋʋ kɩtɛpɛlɩŋ ɛnʋ e-nesi taa yaa we? ¹⁹ Peeye, Ɛsɔ faɣ ɛwaɣ ŋga kɛwɛ Lehii tɛtʋ taa yɔ, nɛ lɩm lɩnɩ ka-taa nɛ Samɩsɔɔ ñɔɔ nɛ ɛkpa ɖoŋ. Pʋ-yɔɔ payaɣ hiɖe nɖɩ se, Eyini Hakoreyi hiɖe. Pʋ-tɔbʋʋ se, weyi ɛyaɣ ɛyaa yɔ, e-hiɖe. Hiɖe ńɖɩ, ɖɩwɛ Lehii tɛtʋ taa peeye halɩ nɛ sɔnɔ.

²⁰ Samɩsɔɔ kɛ Izirɛɛlɩ ñɩma nɔɔɖɛyʋ Filisitii ñɩma alɩwaatʋ taa, pɩnzɩ nɩɩlɛ (20).