Nɔɔɖɛyaa Tɔm Takayaɣ 14

Mbʋ mbʋ Samɩsɔɔ calɩ labʋ yɔ

¹ Nakʋyʋ wiye Samɩsɔɔ wobi tɛtʋ ndʋ payaɣ se Timinaa ^a yɔ, tɩ-taa. Ɛtalɩ peeye lɛ, e-liu sʋʋ Filisitii ñɩma pɛlɛ nɔɔyʋ. ² Ɛkɔm ɛpɩsɩ ɛ-tɛ lɛ, ɛkɛdɩ ɛ-caa nɛ e-ɖoo pɛlɛ ɛnʋ ɛ-tɔm. Eheyi-wɛ se, ɛnʋ liu sʋ Filisitii ñɩma pɛlɛ nɔɔyʋ. Se, powolo pɔpɔzɩ ɛ-yɔɔ nɛ ɛnʋ kpaɣ-ɩ. ³ Ɛ-caa nɛ e-ɖoo pɔpɔzɩ-ɩ se, ɛzɩ ɛtana pɛlɛ nɔɔyʋ e-cejewiye taa, yaa pa-samaɣ taa nɛ pʋwɛɛ se ewolo Filisitii ñɩma, kɩtɛpɛlɩŋ ɩnʋ yɔ ɩ-tɛ nɛ ɛkpaɣ halʋ na? Ɛlɛ, Samɩsɔɔ cosi ɛ-caa se, pɛlɛ ɛnʋ ɛwɛnɩ ɛnʋʋ ɖeu, se, ɛpɔzɩ ɛ-yɔɔ nɛ ɛnʋ kpaɣ-ɩ. ⁴ Ɛ-caa nɛ e-ɖoo pataatɩlɩ se, KƖPAƔLƲ yebina nɛ e-liu sʋʋ pɛlɛ ɛnʋ. Ɛ́lɛ ñɩnaɣ se, ehiɣ mbʋ paawana nɛ pakʋyɩ Filisitii ñɩma yɔɔ yɔ. Mbʋ pʋyɔɔ yɔ, Izirɛɛlɩ ñɩma kɛwɛ pe-nesi taa, alɩwaatʋ ńdʋ tɩ-taa.

⁵ Pʋwayɩ lɛ, Samɩsɔɔ nɛ ɛ-caa nɛ e-ɖoo pakʋyɩ se powoki Timinaa tɛtʋ taa, pɛlɛ ɛnʋ ɛ-tɛ. Pɔkɔm patalɩ viiñi hayɩm mbʋ pʋwɛ tɛtʋ ńdʋ tɩ-taa yɔ, pʋ-cɔlɔ lɛ, tɔɔyʋʋ nakʋyʋ ñɩzɩɣ nɛ Samisɔɔ hɛyɩ se ɛna. Kpaagbaa mbʋʋ lɛ, kʋɖʋ ɛ-wayɩ. ⁶ Peeye KƖPAƔLƲ Kalɩzaɣ tibi Samɩsɔɔ yɔɔ nɛ ɛkpa tɔɔyʋʋ ŋ́gʋ nɛ e-nesi nɛ ɛcɩyɩ-kʋ nanʋʋ nanʋʋ yem ɛzɩ pacɩyʋʋ pimbiɣa yɔ. Ɛlɛ, ɛtɛkɛdɩ ɛ-caa yaa e-ɖoo mbʋ ɛlaba yɔ. ⁷ Pʋwayɩ lɛ, ɛɖɛɛ ɛ-nʋmɔʋ nɛ ewolo ɛyɔɔdɩnɩ Filisitii ñɩma pɛlɛ ɛnʋ. Ɛ́lɛ tɔm kɛkɛdɩnɩ-ɩ siŋŋ. ⁸ Kɩyakɩŋ cabɩ wayɩ lɛ, Samɩsɔɔ nɛ ɛ-ñɩma pakʋyɩ se papɩsɩɣ Timinaa tɛtʋ taa nɛ ɛkpaɣ pɛlɛ ɛnʋ. Palɩ nʋmɔʋ taa lɛ, ɛhɛyɩ se ɛna tɔɔyʋʋ ŋgʋ ɛɛkʋwa yɔ. Ɛhɛyaa lɛ, ɛmaɣnɩ tɩŋ cajakʋ nakʋyʋ nɛ tɩŋ nim kɩ-taa. ⁹ Peeye ɛlɔ tɩŋ ɛnʋ nɛ ɛtɔkɩ nɛ ɛɖɛɣ. Ɛtalɩ ɛ-caa nɛ e-ɖoo pɔ-cɔlɔ lɛ, ɛha-wɛ nɛ pɔtɔɔ ɖɔɖɔ. Ɛlɛ, eteheyi-wɛ se, tɔɔyʋʋ ŋgʋ ɛɛkʋwa yɔ, kɩ-taa ɛlɔ tɩŋ ɛnʋ.

Samɩsɔɔ ɖʋʋ Filisitii ñɩma ɖimɖim yɔ

¹⁰ Pʋwayɩ lɛ, Samɩsɔɔ caa wolo pɛlɛ ɛnʋ ɛ-tɛ nɛ Samɩsɔɔ ɛtɔɔ-wɛ halɩkpaɣyɛ kazandʋ peeye, ɛzɩ evebiya lɛlaa lakʋʋ yɔ. ¹¹ Filisitii ñɩma na-ɩ lɛ, palɩzɩ pɛ-tɛ evebiya niidozo (30) se pasɩnɩ-ɩ caɣʋ. ¹² Peeye Samɩsɔɔ kaɖɩ-wɛ se, ɛnʋ ɖʋʋ-wɛ ɖimɖim nakʋyʋ. Se, ye kɩyakɩŋ lʋbɛ weyi ɩ-taa pɔtɔkɩ halɩkpaɣyɛ kazandʋ yɔ, papɩzaa pekpeɣ-kʋ yɔ, ɛnʋ cɛlɩɣ-wɛ kazandʋ tokonaa niidozo (30) nɛ mba paalɛɣzɩ yɔ niidozo (30). ¹³ Se, pɩtɛkɛ mbʋʋ yɔ, ḿba cɛlɩɣnɩ-ɩ kazandʋ tokonaa niidozo (30) nɛ mba paalɛɣzɩ yɔ niidozo (30). Peeye pocosi-i se, tɔ́ɔ! Ɛ́ɖʋ e-ɖimɖim nɛ panɩɩ. ¹⁴ Pɔyɔɔdɩ ḿbʋ lɛ, Samɩsɔɔ heyi-wɛ se,

Mbʋ pɔtɔkɩ yɔ,

pɩlɩnɩ weyi ɛtɔkɩ yɔ ɛ-taa.

Mbʋ pɩwɛ leleŋ yɔ,

pɩlɩnɩ weyi ɛwɛ ɖoŋ yɔ ɛ-taa.

Pekpeɣ se ɛbɛ?

Ɛpɔzɩ-wɛ ḿbʋ lɛ, kɩyakɩŋ naadozo (3) ɖɛɛ, pa-taa nɔɔyʋ tekpeɣ. ¹⁵ Kɩyakʋ lʋbɛ ñɩŋgʋ wiye ^b lɛ, peheyi Samɩsɔɔ halʋ se, ewolo ɛla ɛ-walʋ hɛɛ nɛ ɛlɩzɩ-wɛ ɖimɖim ŋgʋ kʋ-tɔbʋʋ, pɩtɛkɛ mbʋ, pɔsɔkɩ ɛnʋʋ halʋ nɛ ɛ-caa ɖɩɣa taa ñɩma miŋ. Se, ye mbʋ, paya mba se pekpizi ḿba nesi taa yaa we? ¹⁶ Ɖɩnɛɛ, Samɩsɔɔ halʋ wobini wiluu nɛ eheyi ɛ-walʋ se, ɛɛnaɣ ɛnʋ nɛ ɛzɩyɛ, ɛtatɩɩsɔɔlʋʋ ɛnʋ. Se, ɛɖʋ ɛnʋ ñɩma ɖimɖim nɛ ɛtalɩzɩ ɛnʋʋ pʋ-tɔbʋʋ. Ɛyɔɔdɩ ḿbʋ lɛ, Samɩsɔɔ heyi-i se, halɩ ɛnʋ talɩzɩ ɛnʋ caa nɛ ɛnʋ ɖoo pa-maɣmaɣ pʋ-tɔbʋʋ nɛ pɩcandɩnɩ ɛnʋ? ¹⁷ Pɩlabɩ ḿbʋ lɛ, Samɩsɔɔ halʋ wɛɛ ɛcɛyɩɣ-ɩ nɛ wiluu halɩkpaɣyɛ kazandʋ kɩyakɩŋ lʋbɛ ɛnʋ ɛ-tɩŋa. Kɩyakʋ lʋbɛ ñɩŋgʋ wiye lɛ, pɩdɛ Samɩsɔɔ nɛ e-wiluu. Peeye, ɛlɩzɩ-ɩ ɖimɖim ŋgʋ kʋ-tɔbʋʋ. Kpaagbaa ḿbʋ lɛ, ewolo ɛkɛdɩ ɛ-ñɩma ndʋ pɩwɛɛ se pekpeɣ yɔ. ¹⁸ Kɩyakʋ lʋbɛ ñɩŋgʋ ŋgʋ kiwiye, pɩcɔ nɛ wɩsɩ ɖʋ lɛ, tɛtʋ taa ñɩma wolo Samɩsɔɔ cɔlɔ nɛ pɔpɔzɩ-ɩ se,

ɛbɛ kɩlɩ tɩŋ nim leleŋ?

Ɛbɛ kɩlɩ tɔɔyʋʋ ɖoŋ?

Peeye eheyi-wɛ se, ye pa nɛ ɛ-halʋ pataata nɔɔ yɔ, pataapɩzɩ patɩlɩ ɖimɖim ŋ́gʋ kʋ-tɔbʋʋ.

¹⁹ Ɖɩnɛɛ, KƖPAƔLƲ Kalɩzaɣ tibi Samɩsɔɔ yɔɔ nɛ ewolo Asikilooni tɛtʋ taa nɛ ɛkʋ tɩ-taa abalaa niidozo (30) nɛ ɛkpaɣ po-tokonaa nɛ ewoni ɛtayɩ mba pekpeɣ ɖimɖim ŋgʋ yɔ. Pɩ-tɩŋa pɩlabɩ ḿbʋ lɛ, ɛ-pana kpa nɛ halɩ ɛpɩsɩ ɛ-caa tɛ. ²⁰ Samɩsɔɔ dɛwa lɛ, pakpaɣ ɛ-halʋ nɛ pɛcɛlɩ Filisitii tʋ weyi ɛcɔŋaɣnɩ Samɩsɔɔ ɛnʋ ɛ-halɩkpaɣyɛ kazandʋ yɔɔ yɔ.