NƆƆƉƐYAA TƆM
TAKAYAƔ
1
Izirɛɛlɩ ñɩma wobu pacaɣ Kanaanɩ ɛjaɖɛ taa yɔ
1 Yoozuwee sɩba lɛ, Izirɛɛlɩ ñɩma pɔzɩ KƖPAƔLƲ se, ḿba cejewe taa lɛ, nɖɩ ɖɩ-taa ñɩma pɩ́wɛɛ se pacalɩ wobu nɛ pakʋyɩ Kanaanɩ ɛjaɖɛ taa ñɩma yɔɔ? 2 Ɛ́lɛ cosi-wɛ se, Yuuda cejewiye taa ñɩma, pʋpɔzʋʋ. Se, ɛnʋ ɖʋzʋʋ ɛjaɖɛ nɖɩɩ, pe-nesi taa. 3 Peeye, Yuuda ñɩma heyi ɛ-ɖalʋ Siimeyɔɔ cejewiye taa ñɩma se, powolo nɛ ḿba nɛ wɛ pakʋyɩ Kanaanɩ ñɩma yɔɔ nɛ pamʋ tɛtʋ ndʋ patayaa nɛ tɩkɛ ḿba ñɩndʋ yɔ. Pʋwayɩ lɛ, ḿba kowolo nɛ pasɩnɩ-wɛ nɛ pamʋ paba ñɩndʋ. Pʋ-yɔɔ, Siimeyɔɔ cejewiye taa ñɩma woba nɛ pɛkpɛndɩ Yuuda ñɩma yɔɔ 4 nɛ powolo nɛ pakʋyɩ Kanaanɩ ñɩma yɔɔ. Peeye, KƖPAƔLƲ kpaɣ Kanaanɩ liɖe taa ñɩma nɛ Peeriizi ñɩnɖɛ taa ñɩma, nɛ ɛɖʋzɩ pe-nesi taa, nɛ pakʋ ɛyaa kutokiŋ hiu (10.000) tɛtʋ ndʋ payaɣ se Bɛzɛɛkɩ yɔ, tɩ-taa. 5 Toovenim lɛ, patalɩ tɛtʋ ńdʋ tɩ-taa lɛ, pamaɣnɩ ti-wiyaʋ Adonibɛzɛɛkɩ. Pakʋyɩ ɛ-yɔɔ nɛ pawa Kanaanɩ nɛ Periizii pe-lila taa ñɩma. 6 Pakʋyɩ Adonibɛzɛɛkɩ yɔɔ ḿbʋ lɛ, ɛ́lɛ ñese nɛ paɖʋ ɛ-wayɩ nɛ pakpa-ɩ nɛ pɛsɛtɩ e-nimbe nɛ ɛ-naabe abalɩñɩna. 7 Peeye, Adonibɛzɛɛkɩ tɔm se, ɛnʋ tɔkaɣ tɔɔnaɣ nɛ awiya nɩɩnʋwa nɛ nɩɩlɛ (70) tɔzʋʋ abuyibuya wena atɔlaɣ ɛnʋ taabɩlɩ tɛɛ yɔ. Se, awiya ana, ɛnʋ keyeba nɛ pɛsɛtɩ a-nimbe nɛ a-naabe abalɩñɩna. Se, Ɛsɔ hɛyɩ ɛnʋʋ mbʋ ɛnʋ laba yɔ. Pʋwayɩ lɛ, pakpaɣ-ɩ powoni Yeruusalɛm tɛtʋ taa nɛ ɛsɩ peeye.
8 Pɩlabɩ ḿbʋ lɛ, Yuuda ñɩma kʋyɩ Yeruusalɛm tɛtʋ taa ñɩma yɔɔ nɛ pamʋ-tʋ. Pɔtɔyɩtɩ tɩ-taa ñɩma nɛ pɔsɔbɩ-tʋ miŋ. 9 Pʋwayɩ lɛ, Yuuda ñɩma wolo nɛ pakʋyɩ Kanaanɩ ñɩma mba paawɛ pʋŋ egeetiye nɛ hadɛ kiŋ ñɩnɖɛ nɛ Kɛdɛɛŋa taa ɛjaɖɛ pa-taa yɔ, pɔ-yɔɔ. 10 Yuuda ñɩma kowoba nɛ pakʋyɩ Kanaanɩ ñɩma mba pɛwɛ Hɛbɩrɔɔnɩ hɔɔlʋʋ taa yɔ, pɔ-yɔɔ nɛ pakʋ Sesayɩ nɛ Ahiimanɩ nɛ Talɩmayɩ, pe-lila taa ñɩma. Ɖooo lɛ, payaɣaɣ Hɛbɩrɔɔnɩ se, Kiriyaatɩ Arɩbaa. 11 Pakʋyɩnɩ peeye lɛ, powolo pakʋyɩ Deviiri tɛtʋ taa ñɩma yɔɔ. Alɩwaatʋ ńdʋ lɛ, payaɣaɣ tʋtʋ se, Kiriyaatɩsefɛɛrɩ. 12 Peeye, abalʋ weyi payaɣ se Kaalɛɛbɩ yɔ, ɛtɔm se, weyi ewoki nɛ ɛkʋyɩ Kiriyaatɩsefɛɛrɩ ñɩma yɔɔ nɛ ɛmʋ pɛ-tɛtʋ yɔ, ɛnʋ haɣ-ɩ ɛnʋ pɛlɛ Akɩsa. 13 Ɛyɔɔdɩ ḿbʋ lɛ, Kaalɛɛbɩ neu weyi payaɣ se Kenaazɩ yɔ, ɛ-pɩyalʋ Ɔtɩnɩyɛɛlɩ wolo nɛ ɛkʋyɩ tɛtʋ ndʋ tɩ-taa ñɩma yɔɔ nɛ ɛmʋ-tʋ nɛ Kaalɛɛbɩ cɛlɩ-ɩ ɛ-pɛlɛ. 14 Akɩsa kɔm ewolo Ɔtɩnɩyɛɛlɩ cɔlɔ lɛ, eheyi ɛ́lɛ se, ɛ́lɛ ɛsʋlɩmɩ ɛnʋ caa Kaalɛɛbɩ hayɩm nabʋyʋ. Pʋ-wayɩ lɛ, ɛpɩsɩ ɛ-caa cɔlɔ. Ɛtalaa nɛ etibini ɛ-kpaŋaɣ yɔɔ lɛ, ɛ́lɛ pɔzɩ-ɩ se, alaafɩya lɛ? 15 Ecosi-i se, ɛ́la ɛnʋʋ ɖeu. Se, ɛ́ha ɛnʋʋ lɩm hila. Mbʋ pʋyɔɔ yɔ, tɛtʋ ndʋ ɛha ɛnʋʋ hadɛ kiŋ, egeetiye taa yɔ, lɩm fɛyɩ tɩ-taa. Peeye, Kaalɛɛbɩ ha-ɩ hila wena awɛ piyisi yɔɔ yɔ, nɛ wena awɛ kɛdɛɛŋasɩ taa yɔ.
16 Mooyiizi yɩtɩ Kenii sɛyɩnaa nɛ Yuuda ñɩma pakʋyɩ paŋ tɛtʋ a taa, nɛ powolo Yuuda lakʋ ŋgʋ kɩwɛnɩ Araadɩ tɛtʋ b hadɛ hɔɔlʋʋ taa yɔ kɩ-taa nɛ pa nɛ pacaɣ peeye ñɩma taa c.
17 Mbʋʋ Yuuda ñɩma nɛ Siimeyɔɔ liɖe taa ñɩma powoba nɛ pakʋyɩ Kanaanɩ ñɩma mba pɛwɛ Sefaatɩ tɛtʋ taa yɔ, pɔ-yɔɔ, nɛ pawabɩ-wɛ nɛ pakʋ mbʋ pɩwɛ tɩ-taa yɔ pɩ-tɩŋa payɩ. Ɛlɛ, patakpaɣ pʋyʋ. Pʋ-yɔɔ, payaɣ tɛtʋ ndʋ se, Harɩmaa. Pʋ-tɔbʋʋ se, ŋjɛyɛ. 18 Pʋwayɩ lɛ, Yuuda ñɩma wolo pamʋ Gaazaa nɛ Asikilooni nɛ Ɛkɩrɔɔnɩ pɛ-tɛtʋ, nɛ ndʋ tɩwɛ pɔ-cɔlɔ kpɛɛɛ yɔ. 19 KƖPAƔLƲ maɣmaɣ kɛwɛ pɔ-cɔlɔ nɛ papɩzɩ pamʋ pʋŋ egeetiye taa tɛtʋ. Ɛlɛ, patapɩzɩ pɔɖɔɔnɩ kɛdɛɛŋa taa ñɩma, mbʋ pʋyɔɔ yɔ, paba ñaawɛnɩ ñɩɣtʋ youlɔɔɖaa. 20 Paakpaɣ Hɛbɩrɔɔnɩ tɛtʋ nɛ pɛcɛlɩ Kaalɛɛbɩ, ɛzɩ Mooyiizi kɔyɔɔdʋʋ yɔ, nɛ Kaalɛɛbɩ ɖɔɔnɩ Anaakɩ liɖe taa cejewe naadozo taa ñɩma mba paawɛ peeye yɔ. 21 Pɩkazɩ Bineyaamiini sɛyɩnaa lɛ, patapɩzɩ pɔɖɔɔnɩ Yeebuusii liɖe taa ñɩma mba pɛwɛ Yeruusalɛm tɛtʋ taa yɔ. Pʋ-yɔɔ halɩ nɛ sɔnɔ, paba nɛ Bineyaamiini liɖe taa ñɩma, pɛwɛ tɛtʋ ndʋ tɩ-taa.
22 Yoosɛɛfʋ pɩyalaa Efirayim nɛ Manaasee, pɛ-sɛyɩnaa ñowolo pakʋyɩ Beetɛɛlɩ tɛtʋ taa ñɩma yɔɔ, KƖPAƔLƲ kɛwɛ pɔ-cɔlɔ. 23 Pʋcɔ nɛ powolo nɛ pakʋyɩ tɛtʋ ńdʋ tɩ-taa ñɩma yɔɔ lɛ, pacalɩnɩ tiyuu ɛyaa nɛ powolo pefeŋ Beetɛɛlɩ tɛtʋ. Ɖooo lɛ, payaɣaɣ tɛtʋ ndʋ se, Luuzi. 24 Ɛyaa mba petiyi-wɛ yɔ, pɔkɔm patalɩ lɛ, posulini abalʋ nɔɔyʋ, ɛlɩnɩ tɛtʋ ńdʋ tɩ-taa. Peeye, peheyi-i se, ɛwɩlɩ-wɛ ɛzɩma mbʋ pasʋʋ tɛtʋ taa yɔ, nɛ ḿba labɩ-ɩ ɖeu. 25 Abalʋ ɛnʋ, ɛwɩlɩ-wɛ ɖenɖe patɩŋna nɛ pasʋʋ tɛtʋ taa yɔ. Mbʋʋ Efirayim nɛ Manaasee pɛ-sɛyɩnaa pasʋ tɛtʋ taa nɛ pakʋ tɩ-taa ñɩma. Ɛlɛ, peyele abalʋ ɛnʋ nɛ e-liɖe taa ñɩma nɛ pɛɖɛɛ, patakʋ-wɛ. 26 Pɩlabɩ ḿbʋ lɛ, abalʋ ɛnʋ ewolo Hɛɛtɩ liɖe taa ñɩma ɛjaɖɛ taa. Ewobi peeye lɛ, ɛma ɖɩsɩ tɛtʋ natʋyʋ taa, nɛ ɛ́yaa-tʋ ndʋ se, Luuzi. Hɩɖɛ nɖɩɩ, pɔɖɔŋ-tʋ yaʋ halɩ nɛ sɔnɔ.
27 Ɛlɛ, Manaasee ñɩma tapɩzɩ pamʋ Beyitiseyaanɩ nɛ Taanaakɩ nɛ Dɔɔrɩ nɛ Ibileyam nɛ Megiidoo, pɛ-tɛtʋ nɛ pɔ-cɔlɔ ñɩndʋ. Ḿbʋ yebina nɛ Kanaanɩ liɖe taa ñɩma wɛɛ hɔɔlʋʋ ŋ́gʋ kɩ-taa ḿbʋ. 28 Halɩ pɩkɔm Izirɛɛlɩ ñɩma kpa ɖoŋ, ɛlɛ, patapɩzɩ pɔɖɔɔnɩ-wɛ. Paa mbʋʋ yɔ, tʋma naayɛ, pakpaɣaɣ-wɛ nɛ ɖoŋ nɛ palakɩ.
29 Efirayim liɖe taa ñɩma ñatapɩzɩ ɖɔɖɔ nɛ pɔɖɔɔnɩ Kanaanɩ liɖe taa ñɩma mba pɛwɛ Gɛzɛɛrɩ tɛtʋ taa yɔ. Pʋ-yɔɔ paba wɛ Efirayim liɖe taa ñɩma taa ḿbʋ.
30 Zabulɔɔnɩ liɖe taa ñɩma tapɩzɩ pɔɖɔɔnɩ Kanaanɩ ñɩma mba pɛwɛ Kitirooni nɛ Nahalooli pɛ-tɛtʋ taa yɔ. Pʋ-yɔɔ pɛwɛ Zabulɔɔnɩ ñɩma taa. Ɛlɛ, tʋma naayɛ, paba kpaɣaɣ-wɛ nɛ ɖoŋ nɛ palakɩ.
31 Asɛɛrɩ liɖe taa ñɩma ñatapɩzɩ ɖɔɖɔ pɔɖɔɔnɩ Akoo nɛ Sidɔɔ nɛ Ahelaavɩ nɛ Akiziivi nɛ Hɛlɩbaa nɛ Afɛɛkɩ nɛ Rehoovi, pɛ-tɛtʋ taa ñɩma. 32 Pʋ-yɔɔ pɛwɛ Kanaanɩ ñɩma mba pɛwɛ ɛjaɖɛ nɖɩ ɖɩ-taa yɔ, pa-taa.
33 Nɛfɩtaalii liɖe taa ñɩma ñatapɩzɩ ɖɔɖɔ pɔɖɔɔnɩ Kanaanɩ ñɩma mba pɛwɛ Beyitisɛmɛɛsɩ nɛ Beyiti Anaatɩ pɛ-tɛtʋ taa yɔ. Ɛlɛ, pacaɣ paba hɛkʋ taa nɛ pakpaɣ-wɛ nɛ ɖoŋ nɛ palakɩ tʋma naayɛ.
34 Piyele Daanɩ sɛyɩnaa lɛ, Amoorii ñɩma ñaɖɩɣ pabaa nʋmɔʋ pʋŋ egeetiye taa. Pataha-wɛ waɖɛ se, petii kɛdɛɛŋa taa. 35 Pɩlabɩ ḿbʋ lɛ, Amoorii ñɩma wɛɛ Harɩhɛrɛɛsɩ nɛ Ayalooni nɛ Saalivim pɛ-tɛtʋ taa peeye tam. Ɛlɛ, pɩkɔm nɛ pɩɖɛnɩ ɛsɩndaa lɛ, Efiraayim nɛ Manaasee pɛ-sɛyɩnaa kɩlɩ Amoorii ñɩma ɖoŋ nɛ pakpaɣ-wɛ nɛ ɖoŋ nɛ palakɩ tʋma naayɛ. 36 Hadɛ kiŋ lɛ, Amoorii ñɩma tɛtʋ kamaɣ kɛwɛ, kpaɣ Akirabiyim piyaɣ wɩsɩ ɖɩlɩyɛ hɔɔlʋʋ taa nɛ pɩcɔlʋʋ Edom ñɩma tɛtʋ d.