Yoozuuwee Takayaɣ 24

Izirɛɛlɩ ñɩma kaɖʋʋ kpayɩ se KƖPAƔLƲ tɛɛ poluŋuu yɔ

¹ Pɩlabɩ ḿbʋ lɛ, Yoozuuwee kpeɣli Izirɛɛlɩ cejewe tɩŋa taa ñɩma Siicem tɛtʋ ^a taa nɛ ɛ́yaa sɔsaa nɛ awiya nɛ nɔɔɖɛyaa nɛ ñʋndɩnaa nɛ pa-tɩŋa powolo Ɛsɔ ɛsɩndaa. ² Peeye eheyi pa-tɩŋa se, KƖPAƔLƲ Izirɛɛlɩ Ɛsɔ heyi ɛnʋ se, ɖooo lɛ, Efiraatɩ pɔɔ wayɩ pɔ-cɔzɔnaa Abɩraham nɛ Nahɔɔrɩ nɛ paba caa Teeraa paawɛɛ nɛ poluŋuu agɔlɩma tɛɛ. ³ Se, ɛnʋʋ KƖPAƔLƲ, ɛlɩzɩ pɔ-cɔzɔ Abɩraham ɛjaɖɛ nɖɩ ɖɩwɛ pɔɔ nɛ wayɩ yɔ ɖɩ-taa nɛ ɛyɛlɩnɩ-ɩ Kanaanɩ ñɩnɖɛ tɩŋa taa payɩ nɛ eyele nɛ e-liɖe taa ñɩma huúu. Se, ɛnʋ ha-ɩ Izaakɩ ⁴ nɛ piyele ɛha Izaakɩ, Yaakɔɔbʋ nɛ Ezaawʋ nɛ ɛha Ezaawʋ Seyiiri pʋʋ egeetiye se ɛcaɣ nɛ Yaakɔɔbʋ nɛ ɛ́lɛ piya, paba ñowolo pacaɣ Ejipiti ɛjaɖɛ taa. ⁵ Se, pɩkɔm pileɖi pazɩ lɛ, ɛnʋ tiyi Mooyiizi nɛ Aarɔɔnɩ Ejipiti ɛjaɖɛ taa nɛ ɛnʋ ɖʋ ɖɩ-taa ñɩma kʋñɔmɩŋ ndɩ ndɩ nɛ pɩcɔ ɛnʋ lɩzɩ pɔ-cɔzɔnaa ɖɩ-taa ^b. ⁶ Se, paba kʋyɩ Ejipiti lɛ, pɔkɔɔ patalɩ Kɩñɩŋgbala teŋgu. Ɛlɛ, Ejipiti ñɩma kpaɣ youlɔɔɖa nɛ kpaŋnaŋ nɛ paɖʋ pa-wayɩ nɛ pɔkɔɔ patalɩ peeye ɖɔɖɔ. ⁷ Se, ɖɩnɛɛ pɔ-cɔzɔnaa ḿba paya ɛnʋ se ɛsɩnɩ-wɛ. Peeye ɛnʋ yeba nɛ ɛsɔmɩnʋʋ nakʋyʋ wɛɛ ^c pa nɛ Ejipiti ñɩma pɛ-hɛkʋ taa kpemm, nɛ ɛnʋ yele nɛ teŋgu lɩm walɩ pɔ-yɔɔ. Se, pa-maɣmaɣ pananɩ pɛ-ɛza mbʋ ɛnʋ labɩ Ejipiti ñɩma yɔ. Se, pʋwayɩ lɛ, pɔ-cɔzɔnaa caɣ lakʋ taa nɛ pileɖe siŋŋ. ⁸ Se, pʋwayɩ lɛ, ɛnʋ keti-wɛ nɛ ewonini Amoorii ñɩma ɛjaɖɛ taa nɛ pɛwɛɛ Yɔɔrɩdaŋ pɔɔ wɩsɩ ɖɩlɩyɛ kiŋ. Se, paba kʋyɩ pɔ-yɔɔ nɛ pɔkɔɔ pɔñɔtɩnɩ-wɛ lɛ, ɛnʋ yele nɛ pawa paba nɛ pɔtɔyɩtɩ-wɛ nɛ pamʋ pɛ-tɛtʋ. ⁹ Se, pʋbʋ wayɩ lɛ, Mowaabɩ wiyaʋ Sipoori pɩyalʋ Balaakɩ kʋyɩ ɖɔɖɔ pɔ-yɔɔ. Halɩ ɛyaa Beyɔɔrɩ pɩyalʋ Baalaam se ɛ́lɛ ewolo nɛ ɛwɩlɩ-wɛ kpalʋʋ. ¹⁰ Ɛlɛ, ɛnʋ tanɩnɩ Baalaam nɛ ɛ́lɛ ñekiti ɛwazɩ pɔ-yɔɔ kɩwazʋ. Se, mbʋʋ ɛnʋ lɩzɩ-wɛ Baalaakɩ nesi taa ^d. ¹¹ Se, pʋwayɩ lɛ, pɛɖɛzɩ Yɔɔrɩdaŋ pɔɔ nɛ powolo Yeeriikoo tɛtʋ taa. Ɖɩnɛɛ peeye tɛtʋ taa ñɩma nɛ Amoorii liɖe taa ñɩma nɛ Periizii ñɩnɖɛ taa ñɩma nɛ Kanaanɩ ñɩma nɛ Hɛɛtɩ liɖe taa ñɩma nɛ Girigaasii ñɩnɖɛ taa ñɩma nɛ Hiwii ñɩnɖɛ taa ñɩma nɛ Yebuusii ñɩma pakʋyɩ pɔ-yɔɔ. Se, ɛnʋ kpa pa-tɩŋa nɛ ɛɖʋzɩ pe-nesi taa ^e. ¹² Se, ɛnʋ tiyini tɛɛgbagbaŋ nɛ ɛɖɔɔnɩ Amoorii awiya ana a-naalɛ ^f nɛ pʋcɔ patalɩ. Se, pɩtɛkɛ pɛ-sɩsɩ nɛ pɔ-tɔŋ pɔɖɔɔnɩnɩ-wɛ. ¹³ Se, mbʋʋ ɛnʋ ha-wɛ ɛjaɖɛ nɖɩ patala ɖɩ-yɔɔ kʋñɔŋ yɔ nɛ tɛtʋ ndʋ patama-tʋ pa-maɣmaɣ, ɛlɛ, pɛwɛɛ tɩ-taa yɔ. Se, ɛnʋ ha-wɛ tɩŋ weyi payaɣ se Viiñi yɔ, nɛ weyi payaɣ se Ooliiviyee yɔ. Pɔtɔsɔ-ɩ, ɛlɛ, pɔtɔkɩ e-pe!

¹⁴ Yoozuuwee tasɩ-wɛ heyuu se, lɛɛlɛɛyɔ, paña KƖPAƔLƲ nɛ poluŋ ɛ-tɛɛ ɛzɩ ɛɖʋʋ yɔ nɛ pa-laŋɩyɛ tɩŋa pilim. Se, peyele agɔlɩma wena pɔ-cɔzɔnaa luŋaɣ a-tɛɛ alɩwaatʋ ndʋ paawɛ Efiraatɩ pɔɔ wayɩ yɔ yaa Ejipiti tɛtʋ taa yɔ a-tɛɛ luŋuu nɛ poluŋ KƖPAƔLƲ tɛɛ. ¹⁵ Se, ye pɩtamaɣ-wɛ yɔ, ɖɩnɛ palɩzɩ puwiye nɖɩɩ weyi ɛ-tɛɛ pacaɣ luŋuu yɔ. Se, ye pɔsɔɔlaa palɩzɩ agɔlɩma wena pɔ-cɔzɔnaa luŋaɣ a-tɛɛ Efiraatɩ pɔɔ wayɩ yɔ yaa Amoorii liɖe taa ñɩma ñɩna, mbʋ pʋyɔɔ yɔ, pɛwɛ paba ɛjaɖɛ taa. Piyele ɛnʋ nɛ ɛ-hɔʋ taa ñɩma lɛ, KƖPAƔLƲ tɛɛ ḿba luŋuu.

¹⁶ Peeye samaɣ taa ñɩma cosaa se, pɩlɩ! Ḿba eeyeki KƖPAƔLƲ nɛ poluŋ agɔlɩma tɛɛ! ¹⁷ Mbʋ pʋyɔɔ yɔ, ḿba KƖPAƔLƲ Ɛsɔ lɩzɩnɩ ḿba nɛ ḿba caanaa yomiye taa Ejipiti ɛjaɖɛ taa. Se, ḿba na hama lakasɩ sɔsɔsɩ nzɩ ɛlaba yɔ. Nzɩɩ yɔ: ɛhuuzi ḿba yɔɔ nʋmɔʋ ŋgʋ pɔɖɔm kɩ-taa yɔ kɩ-tɩŋa payɩ, nɛ samaɣ ndɩ ndɩ nzɩ ḿba tɩŋnɩ sɩ-tɛtʋ yɔɔ yɔ pa-taa. ¹⁸ Se, KƖPAƔLƲ ɖɔɔnɩ samaɣ ndɩ ndɩ tɩŋa ɛjaɖɛ taa nɛ pʋcɔ ḿba talɩ, kɔzɩ kɔzɩ, Amoorii ñɩma. Peeye pɔtɔm se, ḿba ɖɔɖɔ, KƖPAƔLƲ tɛɛ mba luŋuu. Mbʋ pʋyɔɔ yɔ, ɛnʋʋ lɛ ḿba Ɛsɔ.

¹⁹ Peeye Yoozuuwee heyi-wɛ se, paapɩzɩɣ poluŋ KƖPAƔLƲ tɛɛ. Mbʋ pʋyɔɔ yɔ, ɛkɛ Ɛsɔ cɩɖɩ cɩɖɩ tʋ, ɛwɛ sʋsɩ ^g. Se, ye pakʋyʋʋ ɛ-yɔɔ yaa palakɩ kɩwɛɛkɩm yɔ, pɩɩtɩɩkɛtɩɣnɩ-ɩ. ²⁰ Se, ye paha-ɩ siɣye nɛ poluŋuu agɔlɩma agɔma tɛɛ yɔ, paa ɛtɛm-wɛ labʋ ɖeu yɔ, ɛpaŋ-wɛ nɛ ɛza nɛ ɛlabɩ-wɛ mbʋ pɩfɛyɩ ɖeu yɔ nɛ ɛtɔyɩtɩ-wɛ. ²¹ Ɛyɔɔdɩ ḿbʋ lɛ, samaɣ taa ñɩma cosi-i se, pɩɩlakɩ mbʋ! KƖPAƔLƲ maɣmaɣ tɛɛ ḿba luŋuu. ²² Ɖɩnɛɛ Yoozuuwee kitini-wɛ se, pa-maɣmaɣ pɛkɛ pa-aseɣɖe tɩnaa se pɔtɔm se KƖPAƔLƲ tɛɛ poluŋuu. Petisi se, ɛɛɛ! Ḿba kɛ pɩ-aseɣɖe tɩnaa. ²³ Peeye Yoozuuwe tɔm se, ye mbʋ, palɩzɩ agɔlɩma agɔma wena awɛ pɛ-tɛ yɔ nɛ pɔlɔ nɛ pɔñɔnɩ KƖPAƔLƲ, Izirɛɛlɩ Ɛsɔ nɛ pa-laŋa tɩŋa. ²⁴ Ɛ́lɛ yɔɔdɩ ḿbʋ lɛ, pɔtɔ se, ɛɛɛ! Ḿba sɔɔlaa se poluŋ ḿba KƖPAƔLƲ Ɛsɔ tɛɛ nɛ pañamɩ-ɩ.

²⁵ Kɩyakʋ ŋgʋ kiwiye Yoozuuwee nɛ samaɣ panɩnɩ ɖama Siicem tɛtʋ taa nɛ pɛpɛlɩ ñɩyʋʋ. Pʋwayɩ lɛ, ɛɖʋ-wɛ paɣtʋ nɛ sɔnzɩ ndɩ ndɩ. ²⁶ Ɖɩnɛɛ Yoozuuwee ma tɔm ndʋʋ Ɛsɔ paɣtʋ takayaɣ taa. Ɛtɛma lɛ, ɛkpaɣ pɩyɛ sɔsɔɖɛ naɖɩyɛ nɛ esiɣ-ɖɩ tɩʋ sɔsɔʋ tɛɛ KƖPAƔLƲ ɖɩɣa taa. ²⁷ Pʋwayɩ lɛ, eheyi samaɣ ŋga ka-tɩŋa se, kɔcɔnɩ pɩyɛ nɖɩɩ ɖeu, nɖɩ kɛɣnɩ mbaa aseɣɖe. Mbʋ pʋyɔɔ yɔ, ɖɩnɩ ndʋ KƖPAƔLƲ heyi ɛ nɛ wɛ yɔ. Toovenim lɛ, nɖɩ kɛɣnɩ-wɛ aseɣɖe nɛ pataapɩzɩ paha Ɛsɔ siɣye. ²⁸ Ɖɩnɛɛ Yoozuuwee yebi-wɛ nɛ paa weyi ekiti ɛ-hɔɔlʋʋ taa.

Yoozuuwee sɩm tɔm

²⁹ Pɩtɩŋa payɩ pʋwayɩ lɛ, KƖPAƔLƲ tʋmlaɖʋ, Nuuni pɩyalʋ Yoozuuwee woni sɔsaa mʋlʋm. Ɛɛwɛnɩ pɩnzɩ mɩnʋʋ nɛ hiu (110) nɛ pʋcɔ. ³⁰ Peeye pepim-i tɛtʋ ndʋ paaha-ɩ yɔ tɩ-taa, Timinaatɩseraa, tɩwɛ Efiraayim pʋʋ egeetiye taa, Gaasɩ pʋʋ nɛ hayo kiŋ. ³¹ Izirɛɛlɩ ñɩma luŋ KƖPAƔLƲ tɛɛ Yoozuuwee wezuu caɣʋ tɩŋa. Ɛ́lɛ sɩm wayɩ lɛ, pala mbʋ ɖɔɖɔ sɔsaa mba paana mbʋ KƖPAƔLƲ labɩ Izirɛɛlɩ ñɩma yɔ, nɛ pasɩbʋ.

³² Piyele Yoozɛɛfʋ mɔɔ wena Izirɛɛlɩ ñɩma kakpaɣ Ejipiti yɔ, powoni-yɛ nɛ pepi Siicem tɛtʋ taa. Pepim-yɛ hayɩm mbʋ Yaakɔɔbʋ kayabɩ-pʋ liidiye pɔɔyɩsɩ mɩnʋʋ ^h Hamɔɔrɩ pɩyalaa cɔlɔ yɔ, nɛ pɩpɩsɩ Yoosɛɛfʋ liɖe taa ñɩma ñɩmbʋ. Hamɔɔrɩ ɛnʋ ɛcalɩnɩ Siicem tɛtʋ taa wɛʋ.

³³ Aarɔɔnɩ pɩyalʋ Eliyaazaarɩ ñasɩbɩ ɖɔɖɔ nɛ pepim-i piyaɣ ŋga paha ɛ-pɩyalʋ Pinaasɩ, Efirayɩm pʋʋ egeetiye taa yɔ, kɔ-yɔɔ.