Yoozuuwee Takayaɣ 23

Yoozuuwee kɛtɛzaɣ tɔm

¹ KƖPAƔLƲ lɩzɩ Izirɛɛlɩ ñɩma po-koyindinaa mba pɔcɔ-wɛ nɛ pata yɔ pe-nesi taa nɛ eyele nɛ pɛwɛɛ laŋhɛzɩyɛ taa alɩwaatʋ camm. Yoozuuwee kɔm ɛkpadɩyɩ kongonoo lɛ, ² ekpeɣli Izirɛɛlɩ ñɩma tɩŋa nɛ pɔ-sɔsaa nɛ pa-awiya nɛ pɔ-nɔɔɖɛyaa nɛ pa-ñʋndɩnaa taa mayaa nɛ eheyi-wɛ se, ɛnʋ kpadɩyɩ kongonoo. ³ Se, pa-maɣmaɣ pana ɛzɩma mbʋ pa-KƖPAƔLƲ Ɛsɔ labɩ ageeta ána a-taa samaɣ, pɔ-yɔɔ yɔ. Se, KƖPAƔLƲ ɛnʋ ɛmaɣmaɣ ɛlʋbɩ pɔ-yɔɔ. ⁴ Se, pɔcɔnɩ pána, ɛnʋ ɖʋ miika nɛ ɛtayɩ pe-cejewe taa ñɩma, samaɣ ŋga ɛnʋ waba yɔ, kɛ-tɛtʋ. Se, ɛnʋ tayɩ-wɛ ɖɔɖɔ ŋga pɩkazaa se pamʋ kɛ-tɛtʋ yɔ, ka-ageeta. Kaka wɛ kpaɣ Yɔɔrɩdaŋ pɔɔ, wɩsɩ ɖɩlɩyɛ hɔɔlʋʋ taa nɛ piwolo pɩsɩnɩ Mediteraanee teŋgu, wɩsɩ ɖɩɖʋyɛ ñɩŋgʋ taa. ⁵ Se, pa-KƖPAƔLƲ Ɛsɔ maɣmaɣ kaɣnɩ pabaa posinaʋ nɛ wɛ. Se, pɔkɔŋ se pɔñɔtɩɣnɩ paba lɛ, ɛɖɔɔnɩ paba nɛ pʋcɔ patalɩ nɛ pamʋ paba tɛtʋ ɛzɩ ɛnʋʋ pa-KƖPAƔLƲ Ɛsɔ kaaɖʋʋ yɔ. ⁶ Paa mbʋʋ yɔ, pʋwɛɛ se pakpa ɖoŋ siŋŋ nɛ pañaɣ pana nɛ pala ɛzɩ pamaʋ Mooyiizi paɣtʋ takayaɣ taa yɔ, pataayele tɩ-yɔɔ ɖɔm kaʋ. ⁷ Se, pa samaɣ ŋga kakazɩ pɛ-hɛkʋ taa yɔ, patakaa pʋyʋ. Se, pataayaa ka-agɔlɩma nɛ pataaɖuuni-yɛ nɛ pataaluŋ a-tɛɛ nɛ pɛsɛɛ-yɛ. ⁸ Se, pɔñɔnɩ pa-KƖPAƔLƲ Ɛsɔ ɖeke ɛzɩ palabʋ halɩ nɛ sɔnɔ yɔ. ⁹ Se, KƖPAƔLƲ ɖɔɔnɩ samaɣ ndɩ ndɩ nɛ pɩcɔ patalɩ. Sɩɖɔwa nɛ sɩwɛɛ ɖoŋ. Nɔɔyʋ tapɩzɩ ɛkaɖɩnɩ-wɛ halɩ nɛ sɔnɔ. ¹⁰ Se, pa-taa kʋɖʋm pɩzɩɣ ɛɖɔɔnɩ koyindinaa kutoku (1000). Mbʋ pʋyɔɔ yɔ, pa-KƖPAƔLƲ Ɛsɔ wɛɣ pɔ-cɔlɔ nɛ eyouni pɔ-nɔɔ ɛzɩ eeheyuu-wɛ yɔ. ¹¹ Se, pʋ-yɔɔ lɛ, pɔɖɔkɩ pa-tɩ ɖeu nɛ pɔsɔɔlɩ pa-KƖPAƔLƲ Ɛsɔ. ¹² Ɛlɛ, ye paha-ɩ siɣye nɛ pɔñɔnɩ samaɣ ŋga pɩkazɩ pɛ-hɛkʋ taa yɔ, nɛ pakpaɣ ka-taa pɛlaa nɛ pa nɛ wɛ powoki ɖama tɛ yɔ, ¹³ patɩlɩ ɖeu se pa-KƖPAƔLƲ Ɛsɔ ɛɛwɛɣ nɛ ɛɖɔɔnʋʋ paba mbʋ nɛ pʋcɔ patalɩɣ. Ɖɩnɛɛ lɛ, paba kɛɣnɩ-wɛ piyuu yaa kpaca nɛ paba yele nɛ pɔtɔɔ kʋñɔŋ ɛzɩ poluu agbazɛ ɛyʋ siɣye wayɩ yɔ yaa sɔɔ sɔkʋʋ ɛ-ɛza taa yɔ nɛ pɔkɔɔ pɛtɛmnɩ mʋʋ́ʋ ɛjaɖɛ kɩpanɖɛ nɖɩ pa-KƖPAƔLƲ Ɛsɔ ha-wɛ yɔ, ɖɩ-taa. ¹⁴ Se, ɛnʋ lɛ, pɩkazɩ pazɩ ɛnʋ kʋyʋʋ kedeŋa kanɛ kɔ-yɔɔ. Se, lɛɛlɛɛyɔ patɩlɩ nɛ pa-laŋɩyɛ tɩŋa nɛ pe-liu tɩŋa se mbʋ KƖPAƔLƲ ɖʋwa se ɛlakɩ-wɛ yɔ, ɛlabɩ pɩtɩŋa payɩ, pɩtakazɩ nabʋyʋ se ɛtalabɩ-pʋ. ¹⁵ Yoozuuwee tasɩ-wɛ heyuu se, too, ɛzɩma mbʋ KƖPAƔLƲ labɩ mbʋ ɛɖʋwa se ɛlakɩ yɔ pɩ-tɩŋa payɩ yɔ, mbʋ ɖɔɖɔ eyeki nɛ ɛzaɣtʋ ndʋ ɛtɔm se tɩtaliɣ-wɛ yɔ, tɩtalɩ-wɛ nɛ pɔkɔɔ pɛtɛmnɩ mʋʋʋ ɛjaɖɛ kɩpanɖɛ nɖɩ pa-KƖPAƔLƲ Ɛsɔ ha-wɛ yɔ, ɖɩ-taa. ¹⁶ Se, ye pɔtɔɖɔ nɔɔ ŋga pa-KƖPAƔLƲ Ɛsɔ haʋ yɔ, kɔ-yɔɔ nɛ powolo poluŋ agɔlɩma tɛɛ nɛ pɛsɛɛ-yɛ yɔ, ɛ-pana kpaɣnɩ-wɛ nɛ eyele pamʋʋ kɛlɛʋ ɛjaɖɛ kɩbanɖɛ nɖɩ ɛha-wɛ ɖɩ-taa.