Yoozuuwee Takayaɣ 22

Yɔɔrɩdaŋ pɔɔ wayɩ wɩsɩ ɖɩlɩyɛ hɔɔlʋʋ taa cejewe taa ñɩma pɩsʋʋ pɛ-tɛ yɔ

¹ Pʋwayɩ lɛ, Yoozuuwee kpeɣli Ruubɛɛnɩ nɛ Gaadɩ pe-cejewe nɛ Manaasee ñɩnɖɛ hɔɔlʋʋ ŋgʋ kɩwɛ Yɔɔrɩdaŋ pɔɔ wɩsɩ ɖɩlɩyɛ kiŋ yɔ, pa-taa ñɩma. ² Ekpeɣli-wɛ lɛ, eheyi-wɛ se, pɔɖɔm ndʋ KƖPAƔLƲ tʋmlaɖʋ Mooyiizi kapaɣ-wɛ yɔ tɩ-tɩŋa tɩ-yɔɔ nɛ panɩnɩ ɛnʋ nɛ pala ndʋ ɛnʋ heyi-wɛ yɔ tɩ-tɩŋa payɩ. ³ Se, pɩlabɩ pɩnzɩ sakɩyɛ yɔ, halɩ nɛ sɔnɔ, pɔtɔlɔ pa-ñɩma Izirɛɛlɩ ñɩma lɛlaa kaʋ. Mbʋʋ pɔɖɔm pa-KƖPAƔLƲ Ɛsɔ paɣtʋ yɔɔ. ⁴ Se, lɛɛlɛɛyɔ KƖPAƔLƲ Ɛsɔ yeba nɛ Izirɛɛlɩ ñɩma lɛlaa ḿba pacaɣnɩ laŋhɛzɩyɛ pɛ-tɛtʋ taa ɛzɩ ɛɛɖʋʋ se ɛlakɩ-wɛ yɔ. Se, ye mbʋ, papɩzɩɣ pekiti pɛ-tɛ Yɔɔrɩdaŋ pɔɔ wayɩ, wɩsɩ ɖɩlɩyɛ kiŋ. Se, egeetiye nɖɩɩ KƖPAƔLƲ tʋmlaɖʋ Mooyiizi ha-wɛ. ⁵ Se, ɛlɛ, pɩwɛɛ se pɔɖɔ paɣtʋ ndʋ KƖPAƔLƲ tʋmlaɖʋ Mooyiizi kaɖʋ-wɛ yɔ, tɩ-yɔɔ ɖeyiɖeyi. Se, pɔsɔɔlɩ pa-KƖPAƔLƲ Ɛsɔ nɛ pala mbʋ ɛ́lɛ liu wɛɛ yɔ. Se, pɔɖɔ ɛ-paɣtʋ yɔɔ nɛ pɔñɔnɩ-ɩ kpam nɛ poluŋ ɛ-tɛɛ nɛ pa-laŋɩyɛ tɩŋa nɛ po-ɖoŋ tɩŋa pilim.

⁶ Yoozuuwee tɛm yɔɔdʋʋ ḿbʋ lɛ, ɛwazɩ pɔ-yɔɔ nɛ eheyi-wɛ se pekpe pɛ-tɛ. ⁷ Se, Mooyiizi kaha Manaasee cejewiye hɔɔlʋʋ lɛɛkʋ taa ñɩma tɛtʋ, Basaanɩ egeetiye taa Yɔɔrɩdaŋ pɔɔ nɛ wɩsɩ ɖɩlɩyɩ kiŋ. Piyele hɔɔlʋʋ lɛɛkʋ taa ñɩma lɛ, Yoozuuwee hanɩ paba tɛtʋ Yɔɔrɩdaŋ pɔɔ wayɩ wɩsɩ dɩɖʋyɛ kiŋ ɛzɩ ɛhaʋ cejewe lɛɛna taa ñɩma yɔ. Peeye eheyi Manaasee cejewiye taa ñɩma mba pɛwɛnɩ Yɔɔrɩdaŋ pɔɔ wɩsɩ ɖɩlɩyɛ kiŋ yɔ se, papɩsɩ pɛ-tɛ. Ɖɩnɛɛ ɛwazɩ pɔ-yɔɔ ⁸ nɛ eheyi-wɛ se, pɛkpɛndɩnɩ ñɩm sakɩyɛ mbʋ pehiɣaa yɔ. Mbʋʋ yɔ: kpɩna sakɩyɛ nɛ liidiye nɛ sika nɛ ñɩɣyʋʋ ŋgʋ payaɣ se Bɩrɔɔzɩ yɔ nɛ ŋgʋ payaɣ se Fɛɛrɩ yɔ nɛ tokonaa sakɩyɛ. Se, pa nɛ pe-cejewe taa ñɩma lɛlaa patayɩ ñɩm mbʋ pamʋ po-koyidinaa cɔlɔ yɔ.

Cejewe wena awɛnɩ Yɔɔrɩdaŋ pɔɔ wɩsɩ dɩlɩyɛ kiŋ yɔ amaʋ kɩlaŋ ɖɩlayɛ yɔ

⁹ Yoozuuwee yɔɔdɩ ḿbʋ lɛ, Ruubɛɛnɩ nɛ Gaadɩ pe-cejewe nɛ Manaasee ñɩɖɛ hɔɔlʋʋ lɛɛkʋ pa-taa ñɩma kiti pɛ-tɛ. Pakʋyɩ Izirɛɛlɩ ñɩma lɛlaa cɔlɔ, Siiloo tɛtʋ taa Kanaanɩ ɛjaɖɛ taa nɛ powolo pɔ-hɔɔlʋʋ taa, Galaadɩ ɛjaɖɛ taa. KƖPAƔLƲ keheyini Mooyiizi se paha-wɛ-kʋ. ¹⁰ Pɔkɔm patalɩ Yɔɔrɩdaŋ pɔɔ nɔɔ nɛ Kanaanɩ kiŋ lɛ, pama kɩlaŋ ɖɩlayɛ sɔsɔɖɛ naɖɩyɛ peeye. ¹¹ Ɖɩnɛɛ powobi peheyi Izirɛɛlɩ ñɩma lɛlaa se, Ruubɛɛnɩ nɛ Gaadɩ pe-cejewe nɛ Manaasee ñɩnɖɛ hɔɔlʋʋ ŋgʋ kɩwɛ Yɔɔrɩdaŋ pɔɔ wɩsɩ ɖɩlɩyɛ taa yɔ, a-taa ñɩma ma kɩlaŋ ɖɩlayɛ Kanaanɩ ɛjaɖɛ taa paba hɔɔlʋʋ taa Yɔɔrɩdaŋ pɔɔ nɔɔ.

¹² Paba nɩ ḿbʋ lɛ, pekpeɣli ɖama Siiloo tɛtʋ taa se powolo pakʋyɩ cejewe wena awɛ Yɔɔrɩdaŋ pɔɔ wɩsɩ ɖɩlɩyɛ hɔɔlʋʋ taa yɔ, a-taa ñɩma yɔɔ ^a. ¹³ Peeye petiyi cɔjɔ Eleyazaarɩ pɩyalʋ Pinaasɩ Galaadɩ ɛjaɖɛ taa se ewolo ɛyɔɔdɩnɩ Ruubɛɛnɩ nɛ Gaadɩ pe-cejewe nɛ Manaasee ñɩnɖɛ hɔɔlʋʋ ŋgʋ kɩwɛ wɩsɩ ɖɩlɩyɛ taa yɔ, a-taa ñɩma. ¹⁴ Ewokaɣ lɛ, samaɣ ñʋndɩnaa hiu (10) sɩɩ-ɩ. Palɩzɩ paa cejewiye nɖɩ ɖɩ-taa ɛyʋ kʋɖʋm. Pɛkɛ Izirɛɛlɩ cejewe taa ɖɩsɩ ñʋndɩnaa. ¹⁵ Powobi Gaadɩ ɛjaɖɛ taa cejewe wena awɛ wɩsɩ ɖɩlɩyɛ hɔɔlʋʋ taa yɔ, a-taa ñɩma cɔlɔ ḿbʋ lɛ, peheyi-wɛ se, ¹⁶ ḿba pɔzʋʋ-wɛ nɛ KƖPAƔLƲ samaɣ tɩŋa hɩɖɛ taa se, pɩlabɩ ɛzɩma nɛ papazɩ payʋsɩnɩ Izirɛɛlɩ Ɛsɔ mbʋ? Pɩlabɩ ɛzɩma nɛ lɛɛlɛɛyɔ peyele KƖPAƔLƲ ñam? Se, pamaʋ pa-maɣmaɣ pa-kɩlaŋ ɖɩlayɛ yɔ, KƖPAƔLƲ yɔɔ pakʋyaa. Palabɩ mbʋ se we? ¹⁷ Se, mbaa Izirɛɛlɩ ñɩma pɛtɛm labʋ kɩwɛɛkɩm Peyɔɔrɩ tɛtʋ taa nɛ KƖPAƔLƲ yele nɛ ɛ-ñɩma sʋʋ kʋñɔŋ sɔsɔʋ nakʋyʋ taa nɛ pɩ-kazʋwa wɛɛ mba yɔɔ halɩ nɛ sɔnɔ. Pɩ-tɩŋa payɩ mbʋ yɔ, pɩtɔɖɔɔ-wɛ yaa we? ¹⁸ Se, ŋgʋ mbaa Ruubɛɛnɩ nɛ Gaadɩ pe-cejewe nɛ Manaasee ñɩnɖɛ hɔɔlʋʋ ŋgʋ kɩwɛ Yɔɔrɩdaŋ pɔɔ wɩsɩ ɖɩlɩyɛ taa yɔ, a-taa ñɩma lɛ, poposuuni KƖPAƔLƲ sɔnɔ. Se, ye pakʋyɩ KƖPAƔLƲ yɔɔ sɔnɔ, cee lɛ, Izirɛɛlɩ samaɣ tɩŋa ɛ́lɛ pana kpáɣna! ¹⁹ Se, ye panaɣ se pɛ-tɛtʋ fɛyɩ cɩɖɩ cɩɖɩ yɔ, pʋbʋ powolo KƖPAƔLƲ ɛjaɖɛ taa ɖenɖe ɛ-ɖɩɣa wɛɛ yɔ nɛ pehiɣ tɛtʋ ḿba ñɩndʋ taa nɛ pɛwɛɛ peeye. Se, ɛlɛ, pɩtaacɩbɩ-wɛ nɛ pama kɩlaŋ ɖɩlayɛ naɖɩyɛ nɛ pɩtasɩnɩ ḿba KƖPAƔLƲ Ɛsɔ ñɩnɖɛ nɛ pakʋyɩnɩ ḿba nɛ ɛ́lɛ pɔ-yɔɔ. ²⁰ Se, pasɩm mbʋ se alɩwaatʋ ndʋ Zeeraa liɖe taa tʋ Akaanɩ kayʋsaa ^b nɛ ɛkpaɣ ñɩm mbʋ paɖaŋgaa se pataakpaɣ yɔ lɛ, pɩtɛkɛ Izirɛɛlɩ samaɣ tɩŋa KƖPAƔLƲ pana kpanaa yaa we? Ŋgʋ pɩtɛkɛ Akaanɩ ɛnʋ eɖeke ɛɛsɩbɩnɩ ɛ-kɩwɛɛkɩm ḿbʋ pʋ-yɔɔ.

²¹ Peeye Ruubɛɛnɩ cejewiye taa ñɩma nɛ Gaadɩ ñɩnɖɛ taa ñɩma nɛ Manaasee ñɩnɖɛ hɔɔlʋʋ ŋgʋ kɩwɛ wɩsɩ ɖɩlɩyɛ kiŋ yɔ, kɩ-taa ñɩma pocosi cejewe lɛɛna taa ɖɩsɩ ñʋndɩnaa se, ²² KƖPAƔLƲ lɛ Ɛsɔ Kɩlɩm, toovenim lɛ, ɛnʋʋ lɛ Ɛsɔ Kɩlɩm. Se, ɛsɩm mbʋ pɩlaba nɛ ḿba la ḿbʋ yɔ. Izirɛɛlɩ ñɩma tɩŋa sɩŋ-tʋ ɖɔɖɔ! Se, ye kaañamtʋ ḿba ɛlaba nɛ pakʋyɩ KƖPAƔLƲ yɔɔ yɔ, ɛtaayele ḿba nɛ pacaɣ wezuu pileɖi! ²³ Se, ye ḿba ɛma pa-maɣmaɣ pa-kɩlaŋ ɖɩlayɛ se palaa kɩlaŋ weyi pɔhɔkɩ nɛ pɩñaɣ yɔ yaa laŋhɛzɩyɛ kɩlaŋ ^c yaa paha tɔɔnaɣ ŋga pahayaa yɔ se pahanɩ KƖPAƔLƲ siɣye yɔ, KƖPAƔLƲ maɣmaɣ ɛhɔ mba nɩŋgbaaŋ! ²⁴ Se, ɛlɛ, pɩtɛkɛ mbʋ, sɔɔndʋ kpaɣaɣ ḿba se cee pa-sayɩnaa ɛtaakɔɔ pɔpɔzɩ ḿba ñɩma se pa nɛ KƖPAƔLƲ, Izirɛɛlɩ ñɩma Ɛsɔ, payaɣ ɖama we? Pʋ-yɔɔ ḿba labɩ ḿbʋ. ²⁵ Peeye peheyi-wɛ se ḿba nɛ pabaa Ruubɛɛnɩ nɛ Gaadɩ pe-cejewe taa ñɩma lɛ, KƖPAƔLƲ ɖʋ kámaɣ, ŋgaa lɛ Yɔɔrɩdaŋ pɔɔ. Se, pa KƖPAƔLƲ patakaa pʋyʋ! Pɩtɛkɛ mbʋ, pe-piya seɣtiɣ ḿba ñɩnzɩ se pataatasɩ KƖPAƔLƲ ñam! ²⁶ Se, pʋ-yɔɔ ḿba ɖʋ pa-taa se pamaɣ kɩlaŋ ɖɩlayɛ ńɖɩ. Se ḿba ɛɛmaɣ-ɖɩ se palaa kɩlaŋ weyi pɔhɔkɩ nɛ pɩñaɣ yɔ yaa kɩlaŋ lɛɛŋ. ²⁷ Ɛlɛ, pama-ɖɩ se pɩkɛnɩ aseɣɖe pa nɛ wɛ pɛ-hɛkʋ taa nɛ pa-sayɩnaa nɛ ḿba ñɩma pɛ-hɛkʋ taa se ḿba laʋ kɩlaŋ weyi pɔhɔkɩ nɛ pɩñaɣ yɔ nɛ lahɛzɩyɛ ñɩŋ yɔ, KƖPAƔLƲ tʋmɩyɛ palakɩ ɛ-ɛsɩndaa mbʋ. Ɖɩnɛ lɛ, pe-piya ɛɛkaɣ heyuu ḿba ñɩnzɩ se pa nɛ KƖPAƔLƲ patakaa pʋyʋ. ²⁸ Se, ḿba ɖʋ pa-taa se ye wiɖiyi peheyi ḿba yaa mba sɛyɩnaa tʋ yɔ, ḿba tɔŋ se, pɔcɔna nɛ pana kɩlaŋ ɖɩlayɛ nɖɩ ḿba mawa yɔ, ɖɩwɛ ɖeyiɖeyi ɛzɩ KƖPAƔLƲ ñɩnɖɛ yɔ. Paa mbʋʋ yɔ, patama-ɖɩ se palaa ɖɩ-yɔɔ kɩlaŋ weyi pɔhɔkɩ nɛ pɩñaɣ yɔ yaa kɩlaŋ lɛɛŋ . Ɛlɛ, pama-ɖɩ se pɩkɛnɩ aseɣɖe pa nɛ wɛ pɛ-hɛkʋ taa. ²⁹ Se, ḿba taɖʋ se pakʋyʋʋ KƖPAƔLƲ yɔɔ nɛ ḿba ha-ɩ siɣye kaʋ. Se, ḿba tama kɩlaŋ ɖɩlayɛ se palaa ɖɩ-yɔɔ kɩlaŋ weyi pɔhɔkɩ nɛ pɩñaɣ yɔ yaa kɩlaŋ lɛɛŋ yaa paha tɔɔnaɣ ŋga pahayaa yɔ. Se, ḿba ɛkaɣ-ɩ laʋ ɖoli nɛ pɩtasɩnɩ ḿba KƖPAƔLƲ Ɛsɔ kɩlaŋ ɖɩlayɛ nɖɩ ɖɩwɛ ɛ-kɩɖanɖʋʋ ɛsɩndaa yɔ, ɖɩ-yɔɔ.

³⁰ Cɔjɔ Pinaasɩ nɛ samaɣ ñʋndinaa nɛ Izirɛɛlɩ cejewe taa ñɩma ñʋndɩnaa nɩ tɔm ndʋ Ruubɛɛnɩ nɛ Gaadɩ nɛ Manaasee pe-cejewe taa ñɩma yɔɔdaa yɔ lɛ, pɩkɛdɩnɩ-wɛ. ³¹ Peeye cɔjɔ Eleyazaarɩ pɩyalʋ Pinaasɩ heyi Ruubɛɛnɩ nɛ Gaadɩ nɛ Manaasee pe-cejewe taa ñɩma ḿba se, lɛɛlɛɛyɔ ḿba nawa se KƖPAƔLƲ wɛ ḿba cɔlɔ. Mbʋ pʋ-yɔɔ yɔ paba tayʋsɩnɩ KƖPAƔLƲ ɛnʋ. Mbʋʋ palaba nɛ KƖPAƔLƲ tɔhɔ Izirɛɛlɩ ñɩma nɩŋgbaaŋ.

³² Pʋwayɩ lɛ, Eleyazaarɩ pɩyalʋ ɛnʋ nɛ samaɣ ñʋndɩnaa pakʋyɩ Ruubɛɛnɩ nɛ Gaadɩ pe-cejewe taa ñɩma cɔlɔ, Galaadɩ ɛjaɖɛ taa nɛ pekiti Kanaanɩ ñɩnɖɛ taa nɛ pɛkɛdɩ lɛlaa mbʋ pɩlaba yɔ. ³³ Pɛkɛdɩ-wɛ ḿbʋ lɛ, pɩhɛnɩ-wɛ niɣ niɣ nɛ pasa Ɛsɔ. Peeye peyebi lɩmaɣza wena paalaba se powoki pakʋyɩ Ruubɛɛnɩ nɛ Gaadɩ pe-cejewe taa ñɩma yɔɔ nɛ pɔyɔkɩ pɛ-tɛtʋ yɔ. ³⁴ Pɩlabɩ ḿbʋ lɛ, Ruubɛɛnɩ ñɩma nɛ Gaadɩ ñɩma pɔtɔ se, kɩlaŋ ɖɩlayɛ ńɖɩ ɖɩkɛnɩ pa-tɩŋa aseɣɖe se KƖPAƔLƲ lɛ Ɛsɔ.

Peeye paya-ɖɩ se, mbʋ pɩlɩzɩɣ aseɣɖe yɔ.