21
Leevii liɖe taa ñɩma tɛtʋ tɔm
(Ɩcɔnɩ 1 Awiya tɔm cɔlɩɩ takayaɣ 6.39-66)
1-2 Pɩlabɩ mbʋ lɛ, Izirɛɛlɩ ñɩma kpeɣli ɖama Siiloo tɛtʋ taa Kanaanɩ ɛjaɖɛ taa. Pɛwɛ peeye mbʋ lɛ, nakʋyʋ wiye Leevii liɖe taa cejewe taa ɖɛsɩ taa sɔsaa wolo pana cɔjɔ Eleyaazaarɩ nɛ Nuuni pɩyalʋ Yoozuuwee nɛ Izirɛɛlɩ ñɩma cejewe lɛɛna taa ɖɛsɩ taa sɔsaa nɛ peheyi-wɛ se, KƖPAƔLƲ katɩŋnɩ Mooyiizi yɔɔ nɛ ɛɖʋ se paha mbaa tɛtʋ ndʋ ndʋ tɩ-taa mba kacaɣ yɔ, nɛ nanjaɣzɩsɩ nzɩ sɩñɔtɩnɩ-wɛ yɔ, nɛ mba wondu kacaɣ. 3 Peeye Izirɛɛlɩ ñɩma lɩzɩ pɔ-hɔɔlɩŋ taa tɛtʋ natʋyʋ natʋyʋ nɛ tɩ-nanjaɣzɩsɩ nɛ paha Leevii liɖe taa ñɩma ɛzɩ KƖPAƔLƲ ɖʋʋ yɔ.
4 Paɖʋ miika Leevii liɖe taa cejewe taa ñɩma lɛ, Kehaatɩ cejewe taa ñɩma pacalɩnɩ haʋ tɛtʋ. Mbʋʋ pɩtɩŋnɩ miika ɖʋʋ yɔɔ nɛ paha cɔjɔ Aarɔɔnɩ pɩyalaa tɛtʋ hiu nɛ naadozo (13), Yuuda ñɩma nɛ Simeyɔɔnɩ ñɩma nɛ Bineyamiini ñɩma pɔ-hɔɔlɩŋ taa. 5 Paɖʋ miika lɛ, paha Kehaatɩ liɖe taa ñɩma lɛlaa tɛtʋ hiu (10), Efirayim nɛ Daanɩ pe-lila taa cejewe taa ñɩma hɔɔlɩŋ taa nɛ Maanaasee ñɩnɖɛ hɔɔlʋʋ ŋgʋ kɩwɛ Yɔɔrɩdaŋ pɔɔ wɩsɩ dɩɖʋyɛ kiŋ yɔ kɩ-taa. 6 Paɖʋ miika lɛ, paha Gɛɛrɩsɔɔnɩ liɖe taa cejewe taa ñɩma tɛtʋ hiu nɛ naadozo (13), Isakaarɩ nɛ Asɛɛrɩ nɛ Nɛfɩtaali pe-cejewe taa nɛ Maanaasee ñɩnɖɛ hɔɔlʋʋ lɛɛkʋ ŋgʋ kɩwɛ Basaanɩ egeetiye taa yɔ, pa-taa ñɩma. 7 Paha Meraari liɖe taa cejewe taa ñɩma tɛtʋ hiu nɛ naalɛ (12). Tɩwɛ Ruubɛɛnɩ nɛ Gaadɩ nɛ Zabulooni pe-cejewe taa ñɩma hɔɔlʋʋ taa. 8 Miika Izirɛɛlɩ ñɩma ɖʋwa nɛ paha Leevii liɖe taa ñɩma tɛtʋ ndʋ tɩ-tɩŋa nɛ sɩ-nanjaɣzasɩ ɛzɩ KƖPAƔLƲ katɩŋnaʋ Mooyiizi yɔɔ nɛ ɛɖʋ yɔ.
9 Ɩna tɛtʋ ndʋ ndʋ pakpaɣ Yuuda nɛ Simeyɔɔ pe-cejewe taa nɛ paha 10 Aarɔɔ liɖe taa tʋ Leevii pɩyalʋ Kehaatɩ cejewiye taa ñɩma yɔ. Toovenim lɛ, paɖʋ miika lɛ, mba pɛlɛyɩnɩ haʋ tɛtʋ. 11 Ndʋʋ yɔ: Kiriyatɩyarɩba yaa Arɩbaa tɛtʋ nɛ tɩ-nanjaɣzɩsɩ. Tɛtʋ ndʋ payaɣ-tʋ lɛɛlɛɛyɔ se Hɛbɩrɔɔnɩ, tɩwɛ Yuuda pʋʋ egeetiye taa. Arɩba kɛnɩ Anaakɩ liɖe taa ñɩma cɔzɔ a. 12 Ɛlɛ, hayɩm nɛ tɛtʋ cikpetu mba pɔcɔ tɛtʋ ndʋ yɔ, pɛtɛm-wɛ haʋ Yefunee pɩyalʋ Kaalɛɛbɩ. 13 Paha cɔjɔ Aarɔɔnɩ pɩyalaa Hɛbɩrɔɔnɩ tɛtʋ nɛ tɩ-nanjaɣzɩsɩ. Ɛha-wɛ-tʋ se tɩkɛ ndʋ pɛmɛlɩɣ tɩ-taa yɔ. Paha-wɛ ɖɔɖɔ Livinaa tɛtʋ nɛ tɩ-nanjaɣzɩsɩ 14 nɛ Yatiiri tɛtʋ nɛ tɩ-nanjaɣzɩsɩ nɛ Ɛsɩtemowaa tɛtʋ nɛ tɩ-nanjaɣzɩsɩ 15 nɛ Holooni tɛtʋ nɛ tɩ-nanjaɣzɩsɩ nɛ Deviiri tɛtʋ nɛ tɩ-nanjaɣzɩsɩ 16 nɛ Asaanɩ tɛtʋ b nɛ tɩ-nanjaɣzɩsɩ nɛ Yuta tɛtʋ nɛ tɩ-nanjaɣzɩsɩ nɛ Beyitisɛmɛɛsɩ tɛtʋ nɛ tɩ-nanjaɣzɩsɩ. Tɩkpɛndɩ tɛtʋ nakʋ (9). Tɛwɛ Yuuda nɛ Simeyɔɔ pe-cejewe taa ñɩma hɔɔlʋʋ taa. 17 Bineyaamiini ñɩma hɔɔlʋʋ taa lɛ, paha-wɛ Gabawɔɔ tɛtʋ nɛ tɩ-nanjaɣzɩsɩ nɛ Gɛvaa ñɩndʋ nɛ tɩ-nanjaɣzɩsɩ 18 nɛ Anatooti ñɩndʋ nɛ tɩ-nanjaɣzɩsɩ nɛ Alemooni ñɩndʋ nɛ tɩ-nanjaɣzɩsɩ. Tɩkpɛndɩ tɛtʋ naanza. 19 Tɛtʋ ndʋ paha cɔjɔnaa yɔ, tɩkpɛndɩ hiu nɛ naadozo (13) nɛ tɩ-nanjaɣzɩsɩ. Pɛkɛ Aarɔɔnɩ pɩyalaa.
20 Paɖʋ miika lɛ, paha Kehaatɩ liɖe taa cejewe lɛɛna taa ñɩma tɛtʋ, Efiraayim cejewiye taa ñɩma hɔɔlʋʋ taa. 21 Paha-wɛ Siicem tɛtʋ Efiraayim pʋʋ egeetiye taa se tɩkɛ ndʋ pɛmɛlɩɣ tɩ-taa yɔ. Paha-wɛ ɖɔɖɔ Gɛzɛɛrɩ tɛtʋ nɛ tɩ-nanjaɣzɩsɩ 22 nɛ Kivicayim ñɩndʋ nɛ tɩ-nanjaɣzɩsɩ nɛ Beyitihorooni ñɩndʋ nɛ tɩ-nanjaɣzɩsɩ. Tɩkpɛndɩ tɛtʋ naanza. 23 Daanɩ cejewiye taa ñɩma hɔɔlʋʋ taa lɛ, paha-wɛ tɛtʋ naanza nɛ tɩ-nanjaɣzɩsɩ. Ndʋʋ yɔ: Ɛlɩtɩkee tɛtʋ nɛ Gibetooni ñɩndʋ 24 nɛ Ayalooni ñɩndʋ nɛ Gaatɩrimooni ñɩndʋ. 25 Manaasee cejewiye hɔɔlʋʋ lɛɛkʋ taa ñɩma hɔɔlʋʋ taa, Yɔɔrɩdaŋ pɔɔ wɩsɩ ɖɩɖʋyɛ kiŋ lɛ, paha-wɛ tɛtʋ naalɛ nɛ tɩ-nanjaɣzɩsɩ. Ndʋʋ yɔ: Taanaakɩ tɛtʋ nɛ Yivileyam c ñɩndʋ. 26 Paba tɛtʋ tɩŋa ñɛkpɛndɩ hiu (10) nɛ tɩ-nanjaɣzɩsɩ. 27 Paha Leevi liɖe taa cejewe lɛɛna taa ñɩma, Gɛɛrɩsɔɔnɩ pɩyalaa tɛtʋ naalɛ nɛ tɩ-nanjaɣzɩsɩ. Tɩwɛ Yɔɔrɩdaŋ pɔɔ wɩsɩ dɩlɩyɛ hɔɔlʋʋ taa, Manaasee cejewiye hɔɔlʋʋ lɛɛkʋ taa ñɩma hɔɔlʋʋ taa. Tɛtʋ ndʋʋ yɔ: Goolaanɩ ñɩndʋ Basaanɩ egeetiye taa se tɩkɛ tɛtʋ ndʋ pɛmɛlɩɣ tɩ-taa yɔ, nɛ Bɛɛsɩtara ñɩndʋ. 28 Piyele Isakaarɩ ñɩma hɔɔlʋʋ taa lɛ, paha-wɛ tɛtʋ naanza nɛ tɩ-nanjaɣzɩsɩ. Ndʋʋ yɔ: Kisiyooni tɛtʋ nɛ Daveraatɩ ñɩndʋ 29 nɛ Yaarimuuti ñɩndʋ nɛ Eyiniganiim ñɩndʋ. 30 Asɛɛrɩ ñɩma hɔɔlʋʋ taa lɛ, paha-wɛ ɖɔɖɔ tɛtʋ naanza nɛ tɩ-nanjaɣzɩsɩ. Ndʋʋ yɔ: Miseyaalɩ tɛtʋ nɛ Avidooni ñɩndʋ 31 nɛ Hɛlɩkaatɩ ñɩndʋ nɛ Rehoovi ñɩndʋ. 32 Nɛfɩtaali cejewiye taa lɛ, paha-wɛ tɛtʋ naadozo nɛ tɩ-nanjaɣzɩsɩ. Ndʋʋ yɔ: Kɛdɛɛsɩ tɛtʋ, Galilee egeetiye taa se tɩkɛ tɛtʋ ndʋ pɛmɛlɩɣ tɩ-taa yɔ nɛ Hamootidɔɔrɩ ñɩndʋ nɛ Karɩtaanɩ ñɩndʋ. 33 Tɛtʋ ndʋ paha Gɛɛrɩsɔɔnɩ liɖe taa ñɩma yɔ, tɩkpɛndɩ hiu nɛ naadozo (13) nɛ tɩ-nanjaɣzɩsɩ.
34 Leevi liɖe taa cejewe lɛɛna taa ñɩma mba pɛkɛ Meraari liɖe taa ñɩma yɔ, paha-wɛ tɛtʋ naanza nɛ tɩ-nanjaɣzɩsɩ Zabuulooni cejewiye taa ñɩma hɔɔlʋʋ taa. Tɛtʋ ndʋ, ndʋʋ yɔ: Yokineyam tɛtʋ nɛ Karɩtaa ñɩndʋ 35 nɛ Rumooni ñɩndʋ nɛ Nahalaalɩ ñɩndʋ. 36 Ruubɛɛnɩ cejewiye taa ñɩma hɔɔlʋʋ taa d Yɔɔrɩdaŋ pɔɔ wɩsɩ ɖɩlɩyɛ hɔɔlʋʋ taa, Yeeriikoo cɔlɔ lɛ, paha-wɛ ɖɔɖɔ tɛtʋ naanza nɛ tɩ-nanjaɣzɩsɩ. Tɛtʋ ndʋ ndʋʋ yɔ: Bɛcɛɛrɩ tɛtʋ, tɩkɛ tɛtʋ ndʋ pɛmɛlɩɣ tɩ-taa yɔ. Tɩwɛ lakʋ taa, piyaɣ lalayɛ taa nɛ Yahɩcaa ñɩndʋ 37 nɛ Kedemooti ñɩndʋ nɛ Mefaatɩ ñɩndʋ. 38 Piyele Gaadɩ cejewiye taa ñɩma hɔɔlʋʋ taa lɛ, paha-wɛ ɖɔɖɔ tɛtʋ naanza nɛ tɩ-nanjaɣzɩsɩ. Tɛtʋ ndʋ, ndʋʋ yɔ: Ramɔɔtɩ tɛtʋ, tɩkɛ tɛtʋ ndʋ pɛmɛlɩɣ tɩ-taa yɔ, tɩwɛ Galaadɩ egeetiye taa nɛ Mahanayim ñɩndʋ 39 nɛ Hɛsɩbɔɔnɩ ñɩndʋ nɛ Yazeeri ñɩndʋ. 40 Paɖʋ miika lɛ, tɛtʋ hiu nɛ naalɛ (12) paha Leevii liɖe taa cejewe taa ñɩma mba pɛkɛ Meraari liɖe taa ñɩma yɔ.
41 Tɛtʋ ndʋ paha Leevii liɖe taa ñɩma tɩŋa yɔ, tɩkpɛndɩ tɛtʋ nɩɩnaza nɛ litoozo (48) nɛ tɩ-nanjaɣzɩsɩ. Izirɛɛlɩ ñɩma lɛlaa hɔɔlɩŋ taa palɩzɩ-tʋ. 42 Paa tɛtʋ ńdʋ lɛ, paha-wɛ-tʋ nɛ tɩ-nanjaɣzɩsɩ.
43 Mbʋʋ KƖPAƔLƲ ha Izirɛɛlɩ ñɩma ɛjaɖɛ ndɩ ɛɛɖʋwa se ɛhaɣ pɔ-cɔzɔnaa yɔ ɖɩ-tɩŋa nɛ paba mʋ-ɖɩ nɛ pacaɣ peeye. 44 Pʋwayɩ lɛ, eyele nɛ pa nɛ nɔɔyʋ pɛfɛyɩ tɔm pa-kamasɩ tɩŋa yɔɔ ɛzɩ ɛɛɖʋʋ se ɛlakɩ pɔ-cɔzɔnaa yɔ. Eyeba ɖɔɖɔ nɛ pawa po-koyindinaa nɛ paba taa nɔɔyʋ tapɩzɩ ɛkaɖɩnɩ-wɛ. 45 Mbʋʋ mbʋ KƖPAƔLƲ kaɖʋwa se ɛlakɩ Izirɛɛlɩ ñɩma yɔ, pɩlaba pɩ-tɩŋa payɩ, pɩtakazɩ nabʋyʋ.