20
Tɛtʋ ndʋ pɛmɛlɩɣ tɩ-taa yɔ
1 Nakʋyʋ wiye KƖPAƔLƲ heyi Yoozuuwee 2 se éheyi Izirɛɛlɩ ñɩma se palɩzɩ tɛtʋ ndʋ ndʋ paamɛlɩ tɩ-taa yɔ ɛzɩ ɛnʋ katɩŋnaʋ Mooyiizi yɔɔ nɛ eheyi-wɛ yɔ. a. 3 Se ye pʋyʋtɩnɩ nɔɔyʋ nɛ ɛkʋ ɛyʋ yɔ, ɛpɩzɩɣ ese nɛ ewolo ɛmɛlɩ tɛtʋ ńdʋ tɩ-taa natʋyʋ taa. Pʋbʋ ɛlɩ weyi pʋwɛɛ se ɛkpa weyi pakʋ-ɩ yɔ, ɛ-kɩmɩyɛ yɔ b, e-nesi taa. 4 Se, weyi pʋyʋtɩnɩ-ɩ yɔ, ɛkɔm ɛtalɩ tɛtʋ ndʋ pɛmɛlɩɣ tɩ-taa yɔ tɩ-nɔnɔɔ taa ɖenɖe pɔyɔɔdʋʋ samaɣ tɔm yɔ lɛ, ɛsɩŋ peeye. Se, ɛsɩŋaa lɛ, éheyi tɩ-taa sɔsaa mbʋ pɩlaba yɔ. Pʋbʋ paba yeki-i nɛ ɛsʋʋ pɛ-tɛtʋ taa nɛ pawɩlɩ-ɩ ɖenɖe ɛɛwɛɛ yɔ. 5 Se, ye weyi pʋwɛɛ se ɛkpa weyi pakʋ-ɩ yɔ, ɛ-kɩmɩyɛ yɔ ɛɖʋ ɛ-wayɩ nɛ ɛtalɩ peeye yɔ, pɩfɛyɩ se tɛtʋ ndʋ tɩ-taa ñɩma ekuli ɛ-yɔɔ. Mbʋ pʋyɔɔ yɔ, pʋyʋtɩnɩ-ɩ kʋyʋtɩnaʋ nɛ ɛkʋ-ɩ, ɛ-taa taawʋʋnɩ-ɩ. 6 Weyi ɛkʋ ɛyʋ yɔ, ɛwɛɣ tɛtʋ ndʋ tɩ-taa mbʋ nɛ pɩkɔɔ pɩsɩnɩ puwiye nɖɩ pahʋnɩ-ɩ tɔm samaɣ taa yɔ. Ɛwɛɣ peeye mbʋʋ cɔjɔ sɔsɔ weyi ɛwɛ alɩwaatʋ ńdʋ tɩ-taa yɔ nɛ ɛsɩm. Pʋwayɩ lɛ, ɛpɩzɩɣ ɛpɩsɩ ɛ-tɛtʋ taa ɛ-tɛ.
7 Tɛtʋ ndʋ Izirɛɛlɩ ñɩma lɩzaa yɔ, ndʋʋ yɔ: Galilee egeetiye taa Nɛfɩtaalii pʋʋ hɔɔlʋʋ taa lɛ, palɩzɩ Kɛdɛɛsɩ tɛtʋ nɛ Efiraayim pʋʋ hɔɔlʋʋ taa, Siicem ñɩndʋ nɛ Yuuda pʋʋ egeetiye taa, Kiriyaatɩyarɩba ñɩndʋ. Payaɣ peeye ɖɔɖɔ se Hɛbɩrɔɔnɩ.c 8 Yɔɔrɩdaŋ pɔɔ wayɩ, Yeeriikoo wɩsɩ ɖɩlɩyɛ kiŋ lɛ, pacalɩnɩ lɩzʋʋ Bɛcɛɛrɩ tɛtʋ. Tɩwɛ lakʋ taa, Ruubɛɛnɩ cejewiye taa piyaɣ lalayɛ taa. Palɩzɩ ɖɔɖɔ Raamɔɔtɩ tɛtʋ, Gaadɩ cejewiye taa, Galaadɩ egeetiye taa. Piyele palɩzɩ Goolaanɩ tɛtʋ Manaasee ñɩnɖɛ taa, Basaanɩ egeetiye taa. 9 Tɛtʋ ndʋʋ Izirɛɛlɩ ñɩma lɩzaa se pa nɛ agɔma mba pɛwɛ pɛ-tɛ yɔ, powoki pɛmɛlɩɣ. Mbʋ yebina nɛ ye pʋyʋtɩnɩ nɔɔyʋ nɛ ɛkʋ ɛyʋ yɔ, ɛpɩzɩ ese nɛ ɛlɩɩ weyi pʋwɛɛ se ɛkpa weyi pakʋwa yɔ ɛ-kɩmɩyɛ yɔ, e-nesi taa nɛ ɛ́lɛ ɛtaakʋ-ɩ nɛ pʋcɔ pahʋnɩ-ɩ samaɣ taa.