Yoozuuwee Takayaɣ 19

Simeyɔɔ cejewiye taa ñɩma tɛtʋ tɔm

¹ Paɖʋ miika lɛ, Simeyɔɔ liɖe taa cejewe taa ñɩma kpaɣnɩ hɔɔlʋʋ naalɛ ñɩŋgʋ. Yuuda cejewiye taa ñɩma tɛtʋ kɔcɔ pa-ñɩndʋ kondiko. ² Tɛtʋ ndʋ tɩɩwɛ pɔ-hɔɔlʋʋ taa yɔ, ndʋʋ yɔ: Bɛɛrɩseva tɛtʋ nɛ Sema ñɩndʋ nɛ Molada ñɩndʋ ³ nɛ Hacaarɩsuwalɩ ñɩndʋ nɛ Bala ñɩndʋ nɛ Ecem ñɩndʋ ⁴ nɛ Ɛlɩtolaadɩ ñɩndʋ nɛ Betuuli ñɩndʋ nɛ Harɩmaa ñɩndʋ ⁵ nɛ Cikilaagɩ ñɩndʋ nɛ Beyitimarɩkavooti ñɩndʋ nɛ Hacaarɩsusaa ñɩndʋ ⁶ nɛ Beyitilevawɔtɩ ñɩndʋ nɛ Saruhɛɛnɩ ñɩndʋ. Tɩkpɛndɩ tɛtʋ sɔsɔtʋ hiu nɛ naadozo (13) nɛ tɩ-tɛtʋ cikpetu cikpetu. ⁷ Tɛtʋ lɛɛtʋ wɛ ɖɔɖɔ peeye, ndʋʋ yɔ: Eyinirimooni tɛtʋ nɛ Etɛɛrɩ ñɩndʋ nɛ Asaanɩ ñɩndʋ. Tɩkpɛndɩ tɛtʋ sɔsɔtʋ naanza nɛ tɩ-tɛtʋ cikpetu cikpetu ⁸ nɛ kpaɣ tɛtʋ cikpetu ndʋ tɩcɔ-tʋ nɛ tɩta yɔ tɩ-tɩŋa nɛ piwolo pɩsɩnɩ Baalaatɩbeeri tɛtʋ nɛ ɖooo hadɛ kiŋ payaɣ-tʋ ɖɔɖɔ se Ramaatɩ. Simeyɔɔ liɖe taa cejewe taa ñɩma tɛtʋ lɛ. ⁹ Yuuda cejewiye taa ñɩma tɛtʋ natʋyʋ pakpaɣ nɛ paha Simeyɔɔ ñɩnɖɛ taa ñɩma. Mbʋ pʋyɔɔ yɔ, Yuuda liɖe taa ñɩma tɛtʋ kakɩlɩ ɖɔʋ. Mbʋʋ pɩlaba nɛ Yuuda cejewiye taa ñɩma tɛtʋ cɔɔ Simeyɔɔ ñɩnɖɛ taa ñɩma ñɩndʋ kondiko.

Zabulooni cejewiye taa ñɩma tɛtʋ tɔm

¹⁰ Paɖʋ miika lɛ, Zabulooni liɖe taa cejewe taa ñɩma kpaɣnɩ hɔɔlʋʋ naadozo ñɩŋgʋ ^a. Pɛ-tɛtʋ kámaɣ kowobi kasɩnɩ Sariidi tɛtʋ. ¹¹ Kpaɣnɩ peeye lɛ, kakpanɩ wɩsɩ ɖɩɖʋyɛ kiŋ nɛ katalɩ Mareyalaa tɛtʋ nɛ kowolo Dabɛɛsɛɛtɩ ñɩndʋ taa nɛ katalɩ pɔɔ ŋga kekpeŋ Yokineyam tɛtʋ wɩsɩ ɖɩlɩyɛ yɔ. ¹² Sariidi hɔɔlʋʋ lɛɛkʋ lɛ, kámaɣ ŋ́ga kɛɖɛnɩ wɩsɩ ɖɩlɩyɛ kiŋ nɛ kowolo Kisilootitabɔɔrɩ tɛtʋ kámaɣ yɔɔ nɛ kɛɖɛnɩ Daveraatɩ kiŋ nɛ kakpa Yaafiya tɛtʋ taa. ¹³ Kpaɣnɩ ɖɩnɛ lɛ, kɛɖɛnɩ mbʋ ɖooo wɩsɩ ɖɩlɩyɛ hɔɔlʋʋ taa nɛ kowolo Gaatɩhefɛɛrɩ nɛ Itakasiini pɛ-tɛtʋ taa nɛ katalɩ Riimoona tɛtʋ taa nɛ kɔcɔɔnɩ Neyaa kiŋ. ¹⁴ Hayo kiŋ lɛ, kɔcɔnɩ Hanaatooni tɛtʋ wayɩ nɛ kowolo Yifitaayɛɛlɩ kajalaŋa taa. ¹⁵ Kataatɩ nɛ Nahalaalɩ nɛ Simirooni nɛ Yideyala nɛ Bɛtɩlɛhɛm ^b pɛ-tɛtʋ kɛwɛ ɖɔɖɔ hɔɔlʋʋ ŋ́gʋ kɩ-taa. Kɩ-taa tɛtʋ sɔsɔtʋ kɛkpɛndɩ hiu nɛ naalɛ (12) nɛ tɩ-tɛtʋ cikpetu cikpetu. ¹⁶ Lona ana, a-tɩŋa aawɛ hɔɔlʋʋ ŋgʋ paha Zabulooni liɖe taa cejewe taa ñɩma yɔ kɩ-taa.

Isaakaarɩ cejewiye taa ñɩma tɛtʋ tɔm

¹⁷ Paɖʋ miika lɛ, Isaakaarɩ liɖe taa cejewe taa ñɩma kpaɣnɩ hɔɔlʋʋ naanza ñɩŋgʋ ^c. ¹⁸ Tɛtʋ ndʋ ndʋ tɩwɛ peeye yɔ ndʋʋ yɔ: Yizireyɛɛlɩ tɛtʋ ^d nɛ Kesulɔɔtɩ ñɩndʋ nɛ Sunɛm ñɩndʋ ¹⁹ nɛ Hafarayim ñɩndʋ nɛ Siyooni ñɩndʋ nɛ Anaharaatɩ ñɩndʋ ²⁰ nɛ Rabiiti ñɩndʋ nɛ Kisiyooni ñɩndʋ nɛ Ɛvɛɛcɩ ñɩndʋ ²¹ nɛ Rɛmɛɛtɩ ñɩndʋ nɛ Eyiniganim ñɩndʋ nɛ Eyinihadaa ñɩndʋ nɛ Beyitipaseeci ñɩndʋ. ²² Pɛ-tɛtʋ kámaɣ talɩ Tabɔɔrɩ ^e nɛ Sahasima nɛ Beyitisɛmɛɛsɩ ^f pɛ-tɛtʋ nɛ katalɩ Yɔɔrɩdaŋ pɔɔ. Tɩkpɛndɩ tɛtʋ sɔsɔtʋ hiu nɛ loɖo (16) nɛ tɩ-tɛtʋ cikpetu cikpetu. ²³ Lona ana, a-tɩŋa aawɛ hɔɔlʋʋ ŋgʋ paha Isaakaarɩ liɖe taa cejewe taa ñɩma yɔ kɩ-taa.

Asɛɛrɩ cejewiye taa ñɩma tɛtʋ tɔm

²⁴ Paɖʋ miika lɛ, Asɛɛrɩ liɖe taa cejewe taa ñɩma kpaɣnɩ hɔɔlʋʋ kagbaanzɩ ñɩŋgʋ ^g. ²⁵ Tɛtʋ ndʋ ndʋ tɩwɛ peeye yɔ, ndʋʋ yɔ: Hɛlɩkaatɩ tɛtʋ nɛ Halii ñɩndʋ nɛ Bɛtɛɛnɩ ñɩndʋ nɛ Akesaafɩ ñɩndʋ ²⁶ nɛ Alamelɛɛkɩ ñɩndʋ nɛ Ameyaadɩ ñɩndʋ nɛ Miseyaalɩ ñɩndʋ. Wɩsɩ ɖɩɖʋyɛ kiŋ lɛ, kámaɣ ŋga kɔcɔlɩ Sihoorilivinaatɩ pɔɔ nɛ katalɩ Karɩmɛɛlɩ pʋʋ. ²⁷ Wɩsɩ ɖɩlɩyɛ hɔɔlʋʋ taa lɛ, kɛɖɛwa kakpanɩ Beyitidagɔɔnɩ nɛ katalɩ Zabulooni cejewiye taa ñɩma tɛtʋ nɛ kowolo Yifitaayɛɛlɩ kajalaŋa taa, nɛ kekitini hayo kiŋ nɛ katalɩ Beyitemɛɛkɩ nɛ Neyiyɛɛlɩ pɛ-tɛtʋ. Pʋwayɩ lɛ, kɛɖɛɛ mbʋ nɛ kowolo Kavuuli tɛtʋ taa ²⁸ nɛ Avidooni nɛ Rehoovi nɛ Hamooni nɛ Kana pa-ñɩndʋ taa nɛ kɔkɔɔ katalɩ Sidɔɔ tɛtʋ sɔsɔtʋ taa. ²⁹ Kpaɣnɩ peeye lɛ, kámaɣ ŋ́ga kɔcɔnɩ Raamaa tɛtʋ nɛ Tiiri ñɩndʋ ɖenɖe paacɔzɩ kolonzi yɔ pɔ-hɔɔlʋʋ taa nɛ katɩŋnɩ Hosaa tɛtʋ hɔɔlʋʋ taa nɛ katalɩ Mediteraanee teŋgu. Kaatɩŋnɩ Mahalɛɛbɩ tɛtʋ nɛ Akiziivi ñɩndʋ ³⁰ nɛ Akoo ñɩndʋ nɛ Afɛɛkɩ ñɩndʋ nɛ Rehoovi ñɩndʋ pa-taa. Tɩkpɛndɩ tɛtʋ sɔsɔtʋ nɩɩlɛ nɛ naalɛ (22) nɛ tɩ-tɛtʋ cikpetu cikpetu. ³¹ Lona ana, a-tɩŋa aawɛ hɔɔlʋʋ ŋgʋ paha Asɛɛrɩ liɖe taa cejewe taa ñɩma yɔ kɩ-taa.

Nɛfɩtalii cejewiye taa ñɩma tɛtʋ tɔm

³² Paɖʋ miika lɛ, Nɛfɩtalii liɖe taa cejewe taa ñɩma kpaɣnɩ hɔɔlʋʋ loɖo ñɩŋgʋ ^h. ³³ Hadɛ kiŋ lɛ, pɛ-tɛtʋ kámaɣ kpaɣnɩ Helɛɛfɩ tɛtʋ nɛ Caananiim kɔdɔɔ taa tɩʋ sɔsɔʋ nɛ katɩŋnɩ Adaminɛkɛɛvɩ nɛ Yavineyɛɛlɩ pa-ñɩndʋ taa nɛ kowolo Lakum nɛ katalɩ Yɔɔrɩdaŋ pɔɔ. ³⁴ Wɩsɩ ɖɩɖʋyɛ kiŋ lɛ, kɔcɔwa nɛ kowobini Azɩnɔɔtɩtabɔɔrɩ kiŋ nɛ katalɩ Hukokaa tɛtʋ. Kpaɣnɩ peeye lɛ, kɔcɔlɩ Zabulooni cejewiye taa ñɩma tɛtʋ nɛ hadɛ kiŋ nɛ Asɛɛrɩ ñɩnɖɛ taa ñɩma ñɩndʋ nɛ wɩsɩ ɖɩɖʋyɛ kiŋ. Wɩsɩ ɖɩlɩyɛ hɔɔlʋʋ taa lɛ, Yɔɔrɩdaŋ pɔɔ lɛ, kámaɣ. ³⁵ Tɛtʋ ndʋ paacɔzɩ-tʋ kolonzi yɔ, ndʋʋ yɔ: Sidim tɛtʋ nɛ Cɛɛrɩ ñɩndʋ nɛ Hamaatɩ ñɩnɖʋ ³⁶ nɛ Adama ñɩndʋ nɛ Raamaa ñɩndʋ nɛ Hacɔɔrɩ ñɩndʋ ³⁷ nɛ Kɛdɛɛsɩ ñɩndʋ nɛ Edirɛyɩ ñɩndʋ nɛ Eyinihacɔɔrɩ ñɩndʋ ³⁸ nɛ Yireyooni ñɩndʋ nɛ Migidaalɩyɛɛlɩ ñɩndʋ nɛ Horɛm ñɩndʋ nɛ Beyitiyanaatɩ ñɩndʋ nɛ Beyitisɛmɛɛsɩ ñɩndʋ. Tɩkpɛndɩ tɛtʋ sɔsɔtʋ hiu nɛ nakʋ (19) nɛ tɩ-tɛtʋ cikpetu cikpetu. ³⁹ Lona ana, a-tɩŋa aawɛ hɔɔlʋʋ ŋgʋ paha Nɛfɩtalii liɖe taa cejewe taa ñɩma yɔ kɩ-taa.

Daanɩ cejewiye taa ñɩma tɛtʋ tɔm

⁴⁰ Paɖʋ miika lɛ, Daanɩ liɖe taa cejewe taa ñɩma kpaɣnɩ hɔɔlʋʋ lʋbɛ (7) ñɩŋgʋ ⁱ. ⁴¹ Tɛtʋ ndʋ ndʋ tɩwɛ peeye yɔ ndʋʋ yɔ: Coraa tɛtʋ nɛ Ɛsɩtaawooli ñɩndʋ nɛ Iirisɛmɛɛsɩ ñɩndʋ ⁴² nɛ Saalabiim ñɩndʋ nɛ Ayalooni ñɩndʋ nɛ Yitilaa ñɩndʋ ⁴³ nɛ Elooni ñɩndʋ nɛ Timinataa ñɩndʋ nɛ Ɛkɩrɔɔnɩ ñɩndʋ ⁴⁴ nɛ Ɛlɩtɩkee ñɩndʋ nɛ Gibetooni ñɩndʋ nɛ Baalaatɩ ñɩndʋ ⁴⁵ nɛ Yehuudi ñɩndʋ nɛ Beneeberaakɩ ñɩndʋ nɛ Gaatɩrimooni ñɩndʋ ⁴⁶ nɛ Yarɩkɔɔnɩ pɔɔ nɛ Rakooni ñɩndʋ nɛ tɛtʋ ndʋ tɩcɔ Yaafaa tɛtʋ yɔ. ⁴⁷ Ɛlɛ, Daanɩ cejewiye taa ñɩma kɔm pelesi pɛ-tɛtʋ. Alɩwaatʋ ndʋʋ powoba pakʋyɩ Lɛsɛm tɛtʋ taa ñɩma yɔɔ nɛ pakʋ paba nɛ pamʋ pɛ-tɛtʋ. Ɖɩnɛɛ pacaɣ peeye nɛ payaa-tʋ pɔ-cɔzɔ Daanɩ ^j hɩɖɛ. ⁴⁸ Lona ana, a-tɩŋa aawɛ hɔɔlʋʋ ŋgʋ paha Daanɩ liɖe taa cejewe taa ñɩma yɔ kɩ-taa.

⁴⁹ Izirɛɛlɩ ñɩma tɛm ɖamaa ɛjaɖɛ nɖɩ ɖɩ-tɛtʋ tayʋʋ lɛ, paha Nuuni pɩyalʋ Yoozuuwee hɔɔlʋʋ nakʋyʋ. ⁵⁰ Paha-ɩ tɛtʋ ndʋ ɛ́lɛ pɔzaa yɔ ɛzɩ KƖPAƔLƲ kɔyɔɔdʋʋ yɔ. Tɛtʋ ndʋ payaɣ-tʋ se Timinaatɩsɛraa, tɩwɛ Efiraayim pʋʋ egeetiye taa. Peeye Yoozuuwee ɖaɣnɩ tɛtʋ ndʋ maʋ nɛ ɛwɛɛ tɩ-taa.

⁵¹ Lona anaa cɔjɔ Eliyazaarɩ nɛ Nuuni pɩyalʋ Yoozuuwee nɛ Izirɛɛlɩ cejewe taa ɖɛsɩ ñʋndɩnaa paɖʋ miika nɛ patayɩ Izirɛɛlɩ ñɩma. Siiloo tɛtʋ taa paɖʋ-kɛ KƖPAƔLƲ ɛsɩndaa ɛ-kɩɖanɖʋʋ nɔnɔɔ taa. Mbʋʋ pɛtɛzɩ tayʋʋ Kanaanɩ ɛjaɖɛ.