18
Paɖʋʋʋ miika se palɩzɩ cejewe wena akazaa yɔ a-tɛtʋ yɔ
1 Izirɛɛlɩ ñɩma tɛm mʋʋ ɛjaɖɛ lɛ, pekpeɣli pa-tɩŋa Siiloo tɛtʋ taa. Peeye pesiɣ Ɛsɔ kɩɖanɖʋʋ. 2 Ɛlɛ, pɩɩkazɩ cejewe lʋbɛ (7) taa ñɩma, patatɩɩmʋdɩ pɛ-tɛtʋ. 3 Peeye Yoozuuwee pɔzɩ-wɛ se, pacakɩ se pɩsɩnɩ ɖooye nɛ pɩcɔ pamʋ ɛjaɖɛ nɖɩ pɔ-cɔzɔnaa KƖPAƔLƲ Ɛsɔ ha-wɛ yɔ? 4 Eheyi-wɛ se, palɩzɩ paa cejewiye nɖɩ ɖɩ-taa, abalaa naadozo (3) nɛ ɛnʋ tiyi-wɛ ɛjaɖɛ ńɖɩ ɖɩ-taa. Se, powolo pɔcɔɔ ɖɩ-taa nɛ pana pe-cejewe taa ñɩma hɔɔlɩŋ nɛ papɩsɩ pɛkɛdɩ ɛnʋ. 5 Se, pʋwayɩ lɛ, patayɩ ɛjaɖɛ nɖɩ tɔm lʋbɛ (7). Se, Yuuda liɖe taa ñɩma ɛwɛɛ pɛ-tɛtʋ yɔɔ hadɛ kiŋ. Yoosɛɛfʋ ñɩma ñɛwɛɛ paba ñɩndʋ yɔɔ hayo kiŋ. 6 Se, mba yɔ, pɔcɔnɩ ɛzɩma mbʋ hɔɔlɩŋ ɛnʋ ɛ-lʋbɛ ɛwɛɛ yɔ nɛ powolo pɛkɛdɩ ɛnʋ. Se, pʋbʋ, ɛnʋ ɖʋʋ miika mba KƖPAƔLƲ Ɛsɔ ɛsɩndaa nɛ ɛlɩzɩ paa pe-cejewiye nɖɩ ɖɩ-taa ñɩma hɔɔlʋʋ. 7 Pɩkazɩ Leevii liɖe taa ñɩma lɛ, pataatayɩnɩ-wɛ, mbʋ pʋyɔɔ yɔ, paba tʋmɩyɛ lɛ se, pɛkɛ cɔjɔnaa nɛ pala KƖPAƔLƲ tʋmɩyɛ. Se, Gaadɩ nɛ Ruubɛɛnɩ pe-cejewe nɛ Manaasee ñɩnɖɛ hɔɔlʋʋ lɛɛkʋ pa-taa ñɩma tɛm pɛ-tɛtʋ mʋʋ Yɔɔrɩdaŋ pɔɔ wayɩ wɩsɩ ɖɩlɩyɛ hɔɔlʋʋ taa. KƖPAƔLƲ tʋmlaɖʋ Mooyiizi maɣmaɣ hanɩ-wɛ-tʋ.
8 Peeye mba palɩzɩ-wɛ se powolo pana ɛjaɖɛ yɔ, pɔñɔɔzɩ pa-tɩ se pɛɖɛɣ. Pɛɖɛɣaɣ lɛ, Yoozuuwee heyi-wɛ se, powolo pɔcɔɔ ɛjaɖɛ nɖɩ ɖɩ-tɩŋa ɖeu nɛ pana nɛ papɩsɩ pɛkɛdɩ ɛnʋ. Pʋbʋ Siiloo peeye ɛnʋ ɖʋʋ miika KƖPAƔLƲ ɛsɩndaa nɛ palɩzɩ paa cejewiye nɖɩ ɖɩ-taa ñɩma hɔɔlʋʋ. 9 Ɖɩnɛɛ ɛyaa mba powoba nɛ pɔcɔɔ ɛjaɖɛ tɩŋa nɛ pana. Peeye pama takayaɣ nakɛyɛ taa ɛzɩmaa mbʋ hɔɔlɩŋ ɛnʋ ɛ-lʋbɛ (7) ɛ-taa paa ŋgʋ kʋwɛɛ yɔ nɛ kɩ-kamasɩ nɛ kɩ-tɛtʋ ndɩ ndɩ. Pʋwayɩ lɛ, pekiti Yoozuuwee cɔlɔ ɖikpeɣliye taa Siiloo tɛtʋ taa. 10 Peeye ɛlɛ ɖʋ Miika KƖPAƔLƲ ɛsɩndaa Siiloo tɛtʋ taa peeye nɛ ɛtayɩ Izirɛɛlɩ ñɩma tɛtʋ ɛjaɖɛ nɖɩ ɖɩ-taa. Ɛcɛlɩ paa cejewiye nɖɩɩ, ɖɩ-hɔɔlʋʋ.
Bineyaamiini cejewiye taa ñɩma tɛtʋ tɔm
11 Paɖʋ miika lɛ, Bineyaamiini liɖe taa cejewe taa ñɩma kpaɣnɩ kajalaɣ hɔɔlʋʋ a. Pɛ-tɛtʋ wɛ Yuuda ñɩma tɛtʋ nɛ Yoosɛɛfʋ liɖe taa ñɩma ñɩndʋ pɛ-hɛkʋ taa. 12 Hayo kiŋ lɛ, pɛ-tɛtʋ kámaɣ pasɩnɩ Yɔɔrɩdaŋ pɔɔ nɛ kakpanɩ Yeeriikoo tɛtʋ hayo kiŋ nɛ katɩŋnɩ pʋʋ egeetiye taa nɛ kowolo wɩsɩ dɩɖʋyɛ hɔɔlʋʋ taa nɛ kowolo kasɩnɩ Beyitawɛɛnɩ lakʋ. 13 Kakʋyɩnɩ peeye nɛ kowobini Luuzi hɔɔlʋʋ taa nɛ ketibini hɔɔlʋʋ ŋ́gʋ kɩ-hadɛ kiŋ ɖenɖe payaɣ se Beetɛɛlɩ yɔ. Pʋwayɩ lɛ, ketii Atɩrɔɔtadaarɩ nɛ katɩŋnɩ pʋʋ ŋgʋ kʋwɛ Bɛtɩhɔrɔɔnɩ tɛtʋ kɛdɛɛŋa nɛ haɖɛ kiŋ yɔ kʋ-yɔɔ. 14 Pʋʋ ŋgʋ kɩ-wɩsɩ ɖɩɖʋyɛ kiŋ lɛ, kámaɣ ŋ́ga kɔcɔwa nɛ kapɩsɩ nɛ hadɛ kiŋ nɛ kowolo Kiriyaatɩbaalɩ. Payaɣ peeye ɖɔɖɔ se, Kiriyaatɩyeyaarim tɛtʋ. Tɩkɛ Yuuda cejewiye taa ñɩma tɛtʋ. Wɩsɩ ɖɩɖʋyɛ kiŋ kámaɣ lɛ.
15 Hadɛ kiŋ lɛ, pɛ-tɛtʋ kámaɣ kpaɣnɩ Kiriyaatɩyeyaarim peeye nɛ kowolo Iyavaarim tɛtʋ hɔɔlʋʋ taa nɛ kowolo katalɩ Nɛfɩtowaa hiɖe cɔlɔ. 16 Kpaɣnɩ peeye lɛ, kɛɖɛwa nɛ ketii pʋʋ ŋgʋ kɩha ɛza nɛ Bɛɛnɩhinoom kajalaŋa yɔ, ki-liu tɛɛ. Kajalaŋa ŋga kɛwɛ Refayii ñɩma kɛdɛɛŋa nɛ hayo kiŋ. Katɩŋ Yebuusii ñɩma piyaɣ hɔɔlʋʋ ŋgʋ kɩwɛnɩ hadɛ kiŋ yɔ, kʋ-yɔɔ nɛ kɔcɔlɩ Hinoom kajalaŋa nɛ kɛɖɛɛ ketii ɖenɖe payaɣ se Eyiniroogɛɛlɩ yɔ. 17 Kakʋyɩ peeye lɛ, kɔcɔɔnɩ hayo kiŋ nɛ kɛɖɛɛnɩ Eyinisɛmɛɛsɩ hɔɔlʋʋ taa nɛ Gelilooti tɛtʋ ndʋ tɩha ɛzaa nɛ Aduulam piyaɣ yɔ, kɩ-ñɩŋgʋ taa. Pʋwayɩ lɛ, kɛɖɛɛ ketiini pɩyɛ ńɖɩ payaɣ se Bohaanɩ pɩyɛ yɔ, ɖɩ-cɔlɔ kiŋ. Bohaanɩ kɛ Ruubɛɛnɩ pɩyalʋ. 18 Kpaɣnɩ peeye lɛ, katɩŋnɩ piyaɣ hɔɔlʋʋ ŋgʋ kɩwɛnɩ hayo yɔ kʋ-yɔɔ nɛ ketii Yɔɔrɩdaŋ pɔɔ kajalaŋa taa. 19 Kɛɖɛɛ mbʋ nɛ kowolo katɩŋnɩ Beyitihogilaa piyaɣ hɔɔlʋʋ ŋgʋ kɩwɛnɩ hayo kiŋ yɔ kʋ-yɔɔ nɛ kowolo Ɖɔm teŋgu tɩnaɣ yɔɔ nɛ hayo kiŋ ɖenɖe kɩ nɛ Yɔɔrɩdaŋ pɔɔ pakatɩɣ ɖama yɔ. Hadɛ kiŋ kámaɣ lɛ. 20 Wɩsɩ ɖɩlɩyɛ hɔɔlʋʋ taa lɛ, Yɔɔrɩdaŋ pɔɔ kɛnɩ kámaɣ.
Tɛtʋ ndʋ patayɩnɩ Bineyaamiini liɖe taa ñɩma cejewiye cejewiye yɔ, tɩ-kámaɣ lɛ.
21 Bineyaamiini liɖe taa cejewe taa ñɩma tɛtʋ yɔ: Yeeriikoo tɛtʋ nɛ Beyitihogilaa ñɩndʋ nɛ Emɛɛkɩkeciici ñɩndʋ 22 nɛ Beyitaraba ñɩndʋ nɛ Semarayim ñɩndʋ nɛ Beetɛɛlɩ ñɩndʋ 23 nɛ Awiim ñɩndʋ nɛ Paraa ñɩndʋ nɛ Ofiraa ñɩndʋ 24 nɛ Kefaaramoona ñɩndʋ nɛ Ofinii ñɩndʋ nɛ Gɛvaa ñɩndʋ. Pɩkpɛndɩ tɛtʋ hiu nɛ naalɛ (12) nɛ tɩ-tɛtʋ cikpetu cikpetu. 25 Tɛtʋ lɛɛtʋ wɛ ɖɔɖɔ peeye, ndʋʋ yɔ: Gabawɔɔ tɛtʋ nɛ Raamaa ñɩndʋ nɛ Beerooti ñɩndʋ 26 nɛ Micipee ñɩndʋ nɛ Kefiiraa ñɩndʋ nɛ Mocaa ñɩndʋ 27 nɛ Rɛkɛm ñɩndʋ nɛ Yiripeyɛɛlɩ ñɩndʋ nɛ Tareyala ñɩndʋ 28 nɛ Sela ñɩndɩ nɛ Ɛlɛɛfɩ ñɩndʋ nɛ Yebuusii ñɩma tɛtʋ, pʋtɔbʋʋ se Yeruusalɛm tɛtʋ nɛ Giveyaa ñɩndʋ nɛ Kiriyatɩyeyaarim ñɩndʋ. Pɩkpɛndɩ tɛtʋ hiu nɛ naanza (14) nɛ tɩ-tɛtʋ cikpetu cikpetu.
Ndʋʋ lɛ, tɛtʋ ndʋ patayɩnɩ Bineyaamiini liɖe taa ñɩma cejewiye cejewiye yɔ.