Yoozuuwee Takayaɣ 17

¹ Yoosɛɛfʋ pɩyalʋ sɔsɔ Manaasee liɖe taa ñɩma mʋ ɖɔɖɔ tɛtʋ ndʋ patayɩnɩ-wɛ yɔ. Piyele Manaasee pɩyalʋ sɔsɔ Maakiiri lɛ, ɛkɛ sɔdʋʋ, ɛnʋ lɛ, Galaadɩ caa. E-liɖe taa ñɩma ñɛtɛm mʋʋ pa-ñɩndʋ. Ndʋʋ lɛ, Galaadɩ egeetiye nɛ Basaanɩ ñɩnɖɛ, Yɔɔrɩdaŋ pɔɔ wɩsɩ ɖɩlɩyɛ hɔɔlʋʋ taa. ² Manaasee liɖe taa cejewe lɛɛna taa ñɩma mʋ ɖɔɖɔ pa-ñɩndʋ. Cejewe anaa yɔ: Aviyezɛɛrɩ cejewiye nɛ Hɛlɛɛkɩ nɛ Asiriyɛɛlɩ nɛ Sɛkɛm nɛ Hɛfɛɛrɩ nɛ Semidaa pa-ñɩna. Pa-tɩŋa pɛkɛ Yoosɛɛfʋ pɩyalʋ Manaasee pɩyalaa.

³ Hɛfɛɛrɩ pɩyalʋ Selofaadɩ kɛ Galaadɩ sɛyɩ, ɛ́lɛ ñɛkɛ Maakiiri pɩyalʋ nɛ Manaasee sɛyɩ. Selofaadɩ ɛnʋ ɛtaawɛnɩ abalɩbɩɣa, halɩbiya ɖeke ɛɛlʋlaa. Ńzɩɩ yɔ: Mahɩlaa nɛ Nowaa nɛ Hogilaa nɛ Milikaa nɛ Tiricaa. ⁴ Nakʋyʋ wiye pɛlaa ḿba powolo pana cɔjɔ Eleyaazaarɩ nɛ Nuuni pɩyalʋ Yoozuuwee nɛ samaɣ ñʋndɩnaa se, KƖPAƔLƲ keheyi Mooyiizi se, patayɩnɩ-wɛ tɛtʋ ɛzɩ patayɩnaʋ pe-cejewiye taa abalaa yɔ. Peeye patayɩnɩ-wɛ-tʋ ɛzɩ patayɩnaʋ pe-cejewiye taa abalaa ɛzɩ KƖPAƔLƲ ɖʋʋ yɔ. ⁵ Manaasee cejewiye taa ñɩma mʋ hɔɔlɩŋ hiu (10) nɛ pɩtasɩnɩ Galaadɩ nɛ Basaanɩ pa-egeeta wena awɛ Yɔɔrɩdaŋ pɔɔ nɛ wɩsɩ ɖɩlɩyɛ kiŋ yɔ. ⁶ Toovenim lɛ, pɩtɛkɛ Manaasee cejewiye taa abalaa ɖeke patayɩnɩ tɛtʋ, ɛlɛ, patayɩnɩ ɖɔɖɔ halaa. Manaasee liɖe taa ñɩma lɛlaa tɩnɩ Galaadɩ egeetiye.

⁷ Manaasee liɖe taa ñɩma tɛtʋ kpaɣnɩ Asɛɛrɩ cejewiye taa ñɩma tɛtʋ nɛ piwolo Mikimetaatɩ tɛtʋ, Siicem wɩsɩ ɖɩlɩyɛ hɔɔlʋʋ taa. Pɩkpaɣnɩ peeye nɛ pitikini hadɛ kiŋ lɛ, tɩ-kámaɣ talɩ Eyinitapuwa ñɩma tɛ. ⁸ Egeetiye nɖɩ ɖɩkɛ Manaasee cejewiye taa ñɩma ñɩnɖɛ, ɛlɛ, pakpaɣ Tapuwa tɛtʋ ndʋ tɩwɛ kámaɣ yɔɔ yɔ nɛ paha Efiraayim cejewiye taa ñɩma. ⁹ Pʋwayɩ lɛ, kámaɣ ŋ́ga kowolo kakatɩ Kana pɔɔ nɛ ka-hadɛ kiŋ. Ɛlɛ, tɛtʋ ndʋ tɩwɛ peeye yɔ, Efiraayim ñɩma tɩnɩ-tʋ. Ŋgʋ tɩwɛ Manaasee ñɩma hɔɔlʋʋ taa. Kámaɣ ŋ́ga kakʋyɩnɩ peeye nɛ kakpanɩ hayo kiŋ nɛ pʋcɔ kowolo koyoni Mediteraanee teŋgu. ¹⁰ Mbʋʋ Efiraayim cejewiye wɛnɩ hadɛ kiŋ nɛ Manaasee ñɩnɖɛ nɛ hayo kiŋ. Wɩsɩ dɩɖʋyɛ hɔɔlʋʋ taa lɛ, Mediteraanee teŋgu kɛnɩ a-kámaɣ. Asɛɛrɩ cejewiye ñɛwɛ Manaasee ñɩnɖɛ nɛ hayo kiŋ wɩsɩ ɖɩɖʋyɛ hɔɔlʋʋ taa nɛ Isakaarɩ ñɩnɖɛ ñɛwɛnɩ ɖɩ-hayo kiŋ wɩsɩ ɖɩlɩyɛ hɔɔlʋʋ taa. ¹¹ Isakaarɩ nɛ Asɛɛrɩ ñɩma pɔ-hɔɔlɩŋ taa lɛ, Manaasee cejewiye taa ñɩma tɩnɩ Beyitiseyaanɩ nɛ Yivileyam pɛ-tɛtʋ nɛ lona wena acɔ-tʋ kpɛɛɛ yɔ. Mba tɩnɩ ɖɔɖɔ Dɔɔrɩ tɛtʋ nɛ Eyinidɔɔrɩ ñɩndʋ nɛ Taanaakɩ ñɩndʋ nɛ Megidoo ñɩndʋ nɛ a-taa ñɩma nɛ lona wena acɔ-tʋ kpɛɛɛ yɔ. Pʋ-tɔbʋʋ se, Dɔɔrɩ egeetiye ^a. ¹² Paa mbʋʋ yɔ, Manaasee ñɩma tapɩzɩ pɔɖɔɔnɩ tɛtʋ ndʋ tɩ-taa ñɩma. Pʋ-yɔɔ Kanaanɩ ñɩma kpɛndɩ pɛwɛ peeye. ¹³ Halɩ Izirɛɛlɩ ñɩma kɔm pɛtɛsɩ kpaʋ ɖoŋ siŋŋ lɛ, patapɩzɩ pɔɖɔɔnɩ-wɛ, ɛlɛ, tʋma naayɛ, pakpaɣaɣ-wɛ nɛ ɖoŋ nɛ palakɩ.

¹⁴ Nakʋyʋ wiye Yoosɛɛfʋ liɖe taa ñɩma wobi pɔpɔzɩ Yoozuuwee se, pɩlabɩ ɛzɩma nɛ ɛha mbaa tɛtʋ hɔɔlʋʋ kʋɖʋmʋʋ ɖeke? Ŋgʋ KƖPAƔLƲ wazɩ mba nɛ eyele nɛ pohuú kámaɣ fɛyɩ. ¹⁵ Peeye ɛ́lɛ cosi-wɛ se, ye pakɩlɩ ɖɔʋ nɛ Efiraayim pʋʋ egeetiye kɔzɩ-wɛ yɔ, powolo Periizii nɛ Refayim pa-ñɩma lakʋ taa nɛ pɔñɔɔzɩ pa-tɩ ɖɩcaɣyɛ. ¹⁶ Ɖɩnɛɛ paba kitini-i se, pɩkɛ toovenim mbʋ se, pʋʋ egeetiye ɛɛtalɩɣ mba, ɛlɛ, Kanaanɩ ñɩma mba pɛwɛ kɛdɛɛŋa taa yɔ, nɛ mba pɛwɛ Beyitiseyaanɩ tɛtʋ nɛ lona wena acɔ-tʋ kpɛɛɛ yɔ pa-taa yɔ nɛ mba pɛwɛ Yizireyɛɛlɩ ^b kajalaŋ taa yɔ, pɛwɛnɩ you lɔɔɖa ñɩɣtʋ ñɩna ^c. ¹⁷ Yoozuuwee kaɖɩ Yoosɛɛfʋ liɖe taa ñɩma pɩtʋbʋʋ se Efiraayim nɛ Manaasee pe-cejewe taa ñɩma se, toovenim pɔɖɔwa nɛ pɛwɛ ɖoŋ kámaɣ fɛyɩ. Pʋ-yɔɔ lɛ, pɩtɛkɛ hɔɔlʋʋ kʋɖʋmʋʋ ɖeke pahaɣ-wɛ ɛjaɖɛ taa. ¹⁸ Ɛlɛ, pahaɣ-wɛ ɖɔɖɔ pʋʋ egeetiye tɩŋa ɖenɖe laʋ wɛɛ yɔ. Se, powolo potu nɛ pakpaɣ ɖɩ-tɩŋa. Se, paa kanaanɩ ñɩma ɛwɛnɩ ñɩɣtʋ youlɔɔɖa nɛ pɛwɛɛ ɖoŋ yɔ, papɩzɩɣ pɔɖɔɔnɩ-wɛ.