16
Efiraayim nɛ Manaasee pe-cejewe taa ñɩma tɛtʋ tɔm
1 Paɖʋ miika nɛ palɩzɩ Yoosɛɛfʋ liɖe taa ñɩma tɛtʋ ndʋ yɔ, ndʋʋ yɔ: hadɛ kiŋ hɔɔlʋʋ taa lɛ, tɩ-kámaɣ kpaɣnɩ Yɔɔrɩdaŋ pɔɔ, Yeeriikoo tɛtʋ cɔlɔ nɛ piwolo hiɖe nɖɩ ɖɩ-taa tɛtʋ taa ñɩma luu lɩm yɔ, ka-wɩsɩ ɖɩlɩyɛ hɔɔlʋʋ taa. Kamaɣ ŋga kakpaɣnɩ Yeeriikoo nɛ kowolo lakʋ taa nɛ kakpa Beetɛɛlɩ pʋŋ egeetiye taa. 2 Kpaɣnɩ peeye Luuzi hɔɔlʋʋ taa lɛ, katɩŋnɩ Arikii ñɩma tɛtʋ Atarɔɔtɩ taa 3 nɛ ketibini wɩsɩ ɖɩɖʋyɛ kiŋ, Yafileetii ñɩma hɔɔlʋʋ taa. Katɩŋnɩ Bɛtɩhɔrɔɔnɩ tɛtʋ kɛdɛɛŋa taa nɛ Gɛzɛɛrɩ ñɩndʋ taa nɛ kowolo kasɩnɩ Mediteraanee teŋgu. 4 Tɛtʋ ndʋʋ pɛcɛlɩ Yoosɛɛfʋ pɩyalaa Manaasee nɛ Efiraayim pe-cejewe taa ñɩma nɛ patayɩ ɖama.
5 Tɛtʋ ndʋ patayɩnɩ Efiraayim liɖe taa cejewe taa ñɩma yɔ, tɩ-kámaɣ yɔ: wɩsɩ ɖɩlɩyɛ hɔɔlʋʋ taa lɛ, kakpaɣnɩ Atɩrɔɔtadaarɩ tɛtʋ nɛ kowolo kasɩnɩ Bɛtɩhɔrɔɔnɩ pʋʋ taa. 6 Kowolo kasɩnɩ Mediteraanee pɔɔ. Hayo kiŋ lɛ, katɩŋɩnɩ Mikimetaatɩ cɔlɔ. Mikimetaatɩ wɩsɩ ɖɩlɩyɛ taa lɛ, katɩŋnɩ Taanaatɩsiiloo nɛ kowokini Yanowaa yɔɔ, 7 nɛ kakpaɣnɩ peeye nɛ ketii Atarooti tɛtʋ taa nɛ Naaraataa ñɩndʋ taa nɛ kowolo kakatɩ Yeeriikoo tɛtʋ nɛ kɛɖɛɛ kowolo Yɔɔrɩdaŋ pɔɔ nɔɔ. 8 Mikimetaatɩ wɩsɩ ɖɩɖʋyɛ kiŋ lɛ, kakpaɣnɩ Tapuwa nɛ kowolo Kana pɔɔ nɔɔ nɛ kakatɩ Mediteraanee teŋgu. Tɛtʋ ndʋʋ patayɩnɩ Efiraayim liɖe taa ñɩma cejewiye cejewiye. 9 Pɩtɛkpɛndɩnɩ tɛtʋ sɔsɔtʋ nɛ tɩ-tɛtʋ cikpetu cikpetu ndʋ tɩwɛ Manaasee cejewiye taa yɔ. 10 Efiraayim ñɩma tɔɖɔɔnɩ Kanaanɩ ñɩma mba paawɛ Gɛzɛɛrɩ yɔ. Paba wɛ halɩ nɛ sɔnɔ, pa-taa nɛ papɩsɩ pabaa po-yomaa.