6
Izirɛɛlɩ ñɩma mʋʋ Yeeriikoo tɛtʋ yɔ
1 Paɖɩkaɣ Yeeriikoo tɛtʋ nɔnɔsɩ kpam se Izirɛɛlɩ ñɩma ɛtaapɩzɩ pasʋʋ. Nɔɔyʋ taapɩzɩɣ se ɛsʋʋ yaa ɛlɩɩ. Nɔnɔsɩ ńzɩ sɩɩwɛ koloŋa ŋga pamawa nɛ kɔcɔ-tʋ nɛ kata yɔ, kɔ-yɔɔ. 2 Palakaɣ ḿbʋ lɛ, nakʋyʋ wiye KƖPAƔLƲ heyi Yoozuuwee se, ɛcɔnɩ ɛna! Se, ɛnʋ kpaɣ Yeeriikoo tɛtʋ nɛ ti-wiyaʋ nɛ tɩ-yɔɔ kandɩyaa nɛ ɛɖuzɩ e-nesi taa. 3 Se, piyele ɛnʋʋ Yoozuuwee nɛ e-youlaɖaa tɩŋa lɛ, pɔ́ɖɔŋ nɛ pɔ́cɔʋ tɛtʋ. Se, pɔcɔɔ-tʋ kɩyakɩŋ loɖo (6), tɔm kʋɖʋm kɩyakʋ taa. 4 Se, pɔkɔm se pɔcɔʋ lɛ, ɛlɩzɩ cɔjɔnaa lʋbɛ (7) nɛ pɛɖɛɛ Nɔɔ Haʋ Aɖakaɣ nɔɔ. Se, paa pa-taa anɩ ɛɖɔkɩ ɛyaʋ nɔndɔʋ . Se, kɩyakʋ lʋbɛ (7) ñɩŋgʋ wiye lɛ, cɔjɔnaa ɛhʋlʋʋ nɔndɔŋ nɛ pa nɛ samaɣ pɔcɔɔ tɛtʋ, pɔ́cɔɔ-tʋ tɔm lʋbɛ (7). 5 Se, páya nɔndɔʋ lɛ, samaɣ tɩŋa ma you kubusi wababa nɛ tɛtʋ koloŋa sɔsɔɔ tii kaɖa. Pɩlabɩ ḿbʋ lɛ, paa weyi ɛwɛ ɖenɖe yɔ, ɛ́kpanɩ peeye kpaagbaa nɛ ɛsʋʋ tɛtʋ taa.
6 KƖPAƔLƲ heyi Nuuni pɩyalʋ Yoozuuwee ḿbʋ lɛ, ɛ́lɛ yaa cɔjɔnaa nɛ eheyi-wɛ se, pakpaɣ KƖPAƔLƲ Nɔɔ Haʋ Aɖakaɣ nɛ pɔhɔɔlɩ nɛ pa-taa ɛyaa lʋbɛ (7) ɖɔkɩ ɛyaʋ nɔndɔŋ lʋbɛ (7) nɛ pɛɖɛɛ KƖPAƔLƲ Nɔɔ Haʋ Aɖakaɣ nɔɔ. 7 Piyele eheyi samaɣ se, kakʋyɩ kakpaɣ nʋmɔʋ! Se, kowolo kɔɖɔ nɛ kɔcɔɔ tɛtʋ. Ɛlɛ, pʋwɛɛ se, youlaɖaa ɛɖɛɛ KƖPAƔLƲ Nɔɔ Haʋ Aɖakaɣ nɔɔ. 8 Pɩtɩŋa pɩla ɛzɩ Yoozuuwee yɔɔdʋʋ yɔ. Cɔjɔnaa nɔndɔŋ tɩnaa lʋbɛ (7) ɖɛɛ KƖPAƔLƲNɔɔ Haʋ Aɖakaɣ nɔɔ nɛ pahʋlʋʋ pɔ-nɔndɔŋ ɛ-ɛsɩndaa. 9 Piyele youlaɖaa lɛlaa ɖɛɛ ɖooo nɔndɔŋ hʋlʋyaa ɛsɩndaa nɛ lɛlaa ñɛwɛɛ patɩŋɩɣ Aɖakaɣ wayɩ. Mbʋʋ pɛwɛɛ pahʋlʋʋ nɔndɔŋ nɛ pɔɖɔŋ. 10 Ɛlɛ, Yoozuuwee kɛtɛm samaɣ heyuu se, nɔɔyʋ ɛtaama you kubuka, nɔɔyʋ etaakuli ɛ-nɔɔ nɛ pɩkɔɔ pɩsɩnɩ alɩwaatʋ ndʋ ɛnʋ heyi-wɛ se pama kubusi yɔ. 11 Mbʋʋ Yoozuuwee yeba nɛ pɔhɔɔlɩ Ɛsɔ Nɔɔ Haʋ Aɖakaɣ nɛ pɔcɔɔ tɛtʋ, tɔm kʋɖʋm. Pʋwayɩ lɛ, papɩsɩ pa-ɖikpeɣliye taa nɛ poɖoo peeye.
12 Tɛʋ fema lɛ, Yoozuuwee kʋyɩ tanaŋ cu nɛ cɔjɔnaa ñaɖaɣnɩ kpaɣʋ KƖPAƔLƲ Nɔɔ Haʋ Aɖakaɣ nɛ pɔhɔɔlɩ. 13 Peeye cɔjɔnaa nɔndɔŋ tɩnaa lʋbɛ (7) ḿba pɛɖɛ KƖPAƔLƲ Aɖakaɣ ɛsɩndaa nɛ papazɩ ɖɔm nɛ pahʋlʋʋ pɔ-nɔndɔŋ . Piyele youlaɖaa lɛlaa ñowolo paba ɛsɩndaa nɛ lɛlaa ñatɩŋɩɣ Aɖakaɣ ŋga ka-wayɩ. Mbʋʋ pahʋlaɣ nɔndɔŋ nɛ pɔɖɔŋ. 14 Kɩyakʋ naalɛ ñɩŋgʋ ŋgʋ kiwiye lɛ, paɖaɣnɩ cɔʋ tɛtʋ, tɔm kʋɖʋm nɛ papɩsɩ pa-ɖikpeɣliye taa. Mbʋʋ palaba kɩyakɩŋ loɖo (6).
15 Kɩyakʋ lʋbɛ (7) ñɩŋgʋ wiye lɛ, pakʋyɩ tɛbɩyɛ yɔ, nɛ pɔɖɔ pɔcɔɔ tɛtʋ ɛzɩ patɩɩlakɩɣ yɔ, tɔm lʋbɛ. Kɩyakʋ ŋgʋ kiɖeke koŋ pɔcɔ tɛtʋ, tɔm lʋbɛ. 16 Pɔcɔwaɣ tɔm lʋbɛ ɖeɖe lɛ, cɔjɔnaa nɔndɔŋ hʋlɩyaa hʋlɩ nɔndɔʋ . Pahʋlɩ ḿbʋ lɛ, Yoozuuwee heyi samaɣ se, kakpalɩ you kubuka leɣleɣ, mbʋ pʋyɔɔ yɔ, KƖPAƔLƲ ɖʋzɩ tɛtʋ ńdʋʋ pe-nesi taa. 17 Se, tɛtʋ ndʋ nɛ mbʋ pɩtɩŋa payɩ pɩwɛ tɩ-taa yɔ, papɩsɩ KƖPAƔLƲ ñɩm. Se, pɔyɔkɩ-tʋ nɛ pakʋ pɩtɩŋa payɩ. Ɛlɛ, peyele halʋ acɛyɛ tʋ, Rahaabɩ nɛ ḿba patɩŋa payɩ pɛwɛ ɛ-tɛ yɔ. Mbʋ pʋyɔɔ yɔ, ɛnʋ kohuuzini ḿba cɔŋɩyaa yɔɔ. 18 Se, piyele ḿba lɛ, pɩtaacɩbɩ-wɛ se pakpakɩɣ mbʋ pʋwɛɛ se pɔyɔkɩ yɔ, pɩ-taa nabʋyʋ. Pɩtɛkɛ mbʋʋ yɔ, pa-ɖikpeɣliye taa ñɩma sʋʋ kigiluu nakʋyʋ nɛ asɛyʋʋ nakʋyʋ pa-taa a. 19 Se, pʋwɛɛ se tɩ-taa liidiye ñɩɣtʋ tɩŋa nɛ ñɩɣlɩm tɩŋa nɛ wondu ndʋ palapɩnɩ bɩrɔɔnzɩ ñɩɣtʋ nɛ fɛɛrɩ ñɩndʋ yɔ, pɛkɛ KƖPAƔLƲ ñɩm nɛ paɖʋ-wɛ e-koozaɣ taa.
20 Peeye pahʋlɩ nɔndɔʋ . Samaɣ tɩnɩ kɩ-taŋ lɛ, kama you kubusi wababa nɛ koloŋga sɔsɔɔ ŋga ketii kaɖa. Peeye Izirɛɛlɩ ñɩma tɩcaŋaa pasʋʋ tɛtʋ taa se pamʋ-tʋ. Paa weyi ɛsʋnɩ ɖenɖe ɛɛwɛɛ yɔ kpaagbaa. 21 Pasʋwa lɛ, pakʋ ḿba patɩŋa payɩ pɛwɛ tɩ-taa yɔ, halaa nɛ abalaa nɛ evebiya nɛ akpadɩyaa. Halɩ pɛkpɛndɩnɩ naŋ nɛ heŋ nɛ kpaŋazɩ.
Yoozuuwee yebu Rahaabɩ nɛ ɛ-ñɩma nɛ pɛwɛɛ wezuu yɔ
22 Pɩlakaɣ ḿbʋ lɛ, Yoozuuwee heyi ɛyaa naalɛ mba paawoba pɔcɔŋ Yeeriikoo tɛtʋ yɔ se, powolo halʋ acɛyɛ tʋ Rahaabɩ tɛ nɛ palɩzɩ ɛ nɛ ɛ-hɔʋ taa ñɩma tɩŋa ɛzɩ paaɖuúu se palakɩ-ɩ yɔ. 23 Eheyi-wɛ ḿbʋ lɛ, powolo pasʋʋ nɛ pakpaɣ Rahaabɩ nɛ ɛ-caa nɛ e-ɖoo nɛ ɛ-ɖalaa nɛ ɛ-gɔɔnaa nɛ e-newaa nɛ ɛ-hɔʋ taa ñɩma lɛlaa tɩŋa nɛ palɩna. Palɩnɩ-wɛ lɛ, powoni-wɛ nɛ pasɩɩ-wɛ ɖɩpanɖɛ taa Izirɛɛlɩ ɖikpeɣliye wayɩ. 24 Pʋwayɩ lɛ, pɔsɔ tɛtʋ miŋ nɛ pɩñaɣ mbʋ pɩtɩŋa payɩ pɩwɛɛ tɩ-taa yɔ. Ɛlɛ, patañaɣzɩ liidiye nɛ sika nɛ wondu ndʋ palabɩnɩ bɩrɔɔnzɩ ñɩɣyʋʋ yaa fɛɛrɩ ñɩŋgʋ yɔ. Powoni paba nɛ paɖʋ KƖPAƔLƲ ɖɩɣa koozaɣ taa. 25 Mbʋʋ Yoozuuwee yebi Rahaabɩ nɛ ɛ-hɔʋ taa ñɩma tɩŋa payɩ nɛ pɛwɛɛ wezuu. Toovenim lɛ, Rahaabɩ kɛmɛsɩ cɔŋɩyaa mba Yoozuuwee ketiyaa se pɔcɔŋ Yeeriikoo tɛtʋ nɛ pana yɔ. Pɩkpaɣnɩ puwiye yɔ, Rahaabɩ wɛ Izirɛɛlɩ ñɩma taa. Halɩ nɛ sɔnɔ ɛ-sɛyɩnaa kpɛndɩ pɛwɛ pa-taa ḿbʋ.
26 Alɩwaatʋ ndʋʋ Yoozuuwee wɩlɩ Yeeriikoo tɛtʋ kpalʋʋ. Ɛtɔm se,
weyi ɛñɩnɩɣ se ɛma tɛtʋ ndʋ yɔ,
KƖPAƔLƲ ɛwɩlɩ pʋdʋ kpalʋʋ!
Ɛɛsɩɣ ti-tikiɖe lɛ
ɛ-pɩyalʋ sɔsɔ sɩkɩ.
Ɛɛɖʋʋ tɩ-pɔɔyɩŋ lɛ,
ɛ-pɩyalʋ tɩnʋʋ ñasɩ b.
27 KƖPAƔLƲ kɛwɛ Yoozuuwee cɔlɔ alɩwaatʋ ńdʋ tɩtɩŋa payɩ nɛ ɛ́lɛ hɩɖɛ tɛzɩɣ sɛʋ ɛjaɖɛ tɩŋa.