Yoozuuwee Takayaɣ 7

Akaanɩ labʋ kɩwɛɛkɩm nɛ pɔhɔ ɛ-nɩŋgbaŋ yɔ

¹ Izirɛɛlɩ ñɩma mʋwaɣ Yeeriikoo tɛtʋ lɛ, pala mbʋ pɩtatʋʋzɩ yɔ. Pa-taa nɔɔyʋ kpaɣ mbʋ KƖPAƔLƲ tɔm se pataakpaɣ yɔ, pɩ-taa nabʋyʋ ^a. Pʋ-yɔɔ KƖPAƔLƲ pana kpanɩ Izirɛɛlɩ ñɩma siŋŋ. Pa-taa weyi ɛkpaɣaɣ yɔ, payaɣ-ɩ se Akaanɩ, ɛkɛ Yuuda cejewiye taa tʋ Kaarɩmii pɩyalʋ. Kaarɩmii ñɛkɛ Zabidii pɩyalʋ nɛ Zeeraa sɛyɩ.

² Tɔɔ! Izirɛɛlɩ ñɩma kɛwɛʋ Yeeriikoo yɔɔ, Yoozuuwee tiyi ɛyaa nabɛyɛ se, powolo pɔcɔŋ Ayɩ tɛtʋ nɛ pana. Ayɩ kɛ tɛtʋ ndʋ tɩwɛ Beetɛɛlɩ wɩsɩ ɖɩlɩyɛ kiŋ yɔ, Beyiti Awɛɛnɩ tɛtʋ cɔlɔ. Ɛyaa mba petiyaa yɔ, paba woba lɛ, ³ papɩsɩ nɛ peheyi-i se, ɛtaacaɣ ɛɖʋʋ samaɣ tɩŋa kʋñɔŋ se kowolo kakʋyɩ Ayɩ ñɩma yɔɔ. Se, ye ɛyaa kutokiŋ naalɛ yaa naadozo ewobina yɔ, pɩmaɣaɣ. Mbʋ pʋyɔɔ yɔ, Ayɩ ñɩma ḿba patatalɩ pʋyʋ. ⁴ Peeye pakpaɣ ɛyaa ɛzɩ kutokiŋ naadozo (3000) yɔ, se pakpa Ayɩ ñɩma wayɩ. Paba woba lɛ, patapɩzɩ pala pʋyʋ, ɛlɛ, papɩsaa pese kiseu. ⁵ Ɖɩnɛɛ Ayɩ ñɩma kʋ pa-taa ɛyaa ɛzɩ niidozo nɛ loɖo (36) yɔ. Halɩ ɖooo tɛtʋ ńdʋ tɩ-nɔnɔɔ taa papazɩ-wɛ taŋkasʋʋ nɛ pɔkɔɔ patalɩ ɖenɖe payaɣ se Sebaarim yɔ. Peeye piyaɣ ɖitiɖe taa panaŋ-wɛ taɣ taɣ. Pɩlabɩ ḿbʋ lɛ, pitii Samaɣ tome taa nɛ kɔlɔ liu.

⁶ Peeye Yoozuuwee nɛ Izirɛɛlɩ ñɩma taa sɔsaa pacɩyɩ po-tokonaa nɛ paɖʋ pa-ñʋŋ taa tɛtʋ se pɩwɩlɩ se pɛwɛ laŋpɩsɩyɛ taa. Piyele powolo poluŋ nɛ papa pɛ-ɛza nɛ tɛtʋ KƖPAƔLƲ Aɖakaɣ ɛsɩndaa nɛ pɛwɛɛ mbʋʋ ɖanaɣ nɛ kaɖanʋʋ. ⁷ Pʋwayɩ lɛ, Yoozuuwee yáa KƖPAƔLƲ Ɛsɔ nɛ ɛtɔ se, hayɩ, ɛbɛ yɔɔ eyeba nɛ ḿba tɛzɩ Yɔɔrɩdaŋ pɔɔ yɔ? Se, ɛñɩnaɣ se ɛɖʋzɩ mbaa Amoorii ñɩma nesi taa nɛ ḿba sɩ yɔɔ ɛɖɛzɩnɩ mbaa pɔɔ naa we? Se, ye ḿba ɛɛcaɣ Yɔɔrɩdaŋ pɔɔ wayɩ, pɩtaasɛɛ ḿba yaa we? ⁸ Ɖɩnɛɛ ɛpɔzɩ KƖPAƔLƲ se, lɛɛlɛɛyɔ, Izirɛɛlɩ piya tapɩzɩ pasɩŋ po-koyindinaa ɛsɩndaa yɔ, sewe ɛnʋ yɔɔdʋʋ yɔ? ⁹ Se, Kanaanɩ ñɩma nɛ ɛjaɖɛ nɖɩ ɖɩ-taa ñɩma lɛlaa panɩɣ tɔm ndʋ nɛ panɩnɩ ɖama nɛ pakʋyɩ ḿba yɔɔ nɛ paɖɩzɩ ḿba. Se, pʋbʋ ɛzɩmaa ɛlakɩ nɛ pana se ɛ-hɩɖɛ sɛwa yɔ?

¹⁰ Peeye KƖPAƔLƲ heyi-i se ɛkʋyɩ! Se, pɩlabɩ ɛzɩma nɛ eluŋ nɛ ɛpa ɛ-ɛza nɛ tɛtʋ mbʋ? ¹¹ Se, Izirɛɛlɩ ñɩma labɩ kɩwɛɛkɩm. Se, toovenim lɛ, pɔtɔɖɔ ɛnʋ Nɔɔ Haʋ paɣtʋ ndʋ ɛnʋ ɖʋ-wɛ yɔ, tɩ-yɔɔ. Se, pakpaɣ ñɩm mbʋ ɛnʋ heyi-wɛ se pataatukuna yɔ. Se, halɩ pamɩlɩ-pʋ nɛ powoni pɛmɛsɩ po-wondu taa. ¹² Se, pʋ-yɔɔ Izirɛɛlɩ ñɩma ɛɛpɩzɩɣ pasɩŋ po-koyindinaa ɛsɩndaa. Se, peseɣ nɛ paapɩzɩɣ pakaɖɩnɩ-wɛ. Se, toovenim lɛ, pɩwɛɛ se paɖɩzɩ-wɛ. Se, ye patɩɖɩzɩ ñɩm mbʋ ɛnʋ keheyi-wɛ se pataatukuna yɔ, nɛ weyi ɛmɩlɩ-pʋ yɔ́ɔ yɔ, ɛnʋ ɛɛtasɩɣ wɛʋ pɔ-cɔlɔ. ¹³ Mbʋʋ KƖPAƔLƲ heyi Yoozuuwee se, lɛɛlɛɛyɔ, ɛkʋyɩ nɛ ewolo ɛñɔɔzɩ samaɣ nɛ kakatɩ ɛnʋ. Se, eheyi-kɛ se kifema lɛ, kala cɩɖɩ cɩɖɩ wɛtʋ sɔnzɩ , mbʋ pʋyɔɔ yɔ, ɛnʋʋ KƖPAƔLƲ, Izirɛɛlɩ ñɩma Ɛsɔ, ɛkaɖɩɣ-wɛ se, ñɩm mbʋ ɛnʋ keheyi-wɛ se pataatukuna yɔ, pɩwɛ pɛ-hɛkʋ taa peeye. Se, ye patɩɖɩzɩ ñɩm ḿbʋ nɛ weyi ɛmɩlɩ-pʋ yɔ́ɔ yɔ, paapɩzɩɣ pasɩŋ po-koyindinaa ɛsɩndaa nɛ palabɩ-wɛ nabʋyʋ . ¹⁴ Se, kifem tanaŋ tɛɛ lɛ, powolo pɔɖɔ ɛnʋʋ KƖPAƔLƲ ɛ-ɛsɩndaa cejewiye cejewiye nɛ cejewiye nɖɩ ɛnʋ lɩzɩɣ yɔ, ɖɩ-taa ñɩma ɖɔ ɖɩɣa ɖɩɣa. Piyele ɖɩɣa ŋga ɛnʋ lɩzɩɣ-kɛ yɔ, kaka taa ñɩma ñɔɖɔ hɔʋ hɔʋ nɛ hɔʋ ŋgʋ ɛnʋ lɩzɩɣ-kʋ yɔ, kɩ-taa abalaa ɖɔ ɛnʋ ɛsɩndaa kʋɖʋm kʋɖʋm ^b. ¹⁵ Se, pa-taa ɛnʋ lɩzɩɣ weyi ɛmɩlɩ ñɩm mbʋ yɔ. Se, pɩwɛɛ se paɖʋ ɛ nɛ mbʋ pɩtɩŋa payɩ ɛwɛna yɔ miŋ taa. Mbʋ pʋyɔɔ yɔ ɛtaña ɛnʋ Nɔɔ Haʋ paɣtʋ nɛ ɛla mbʋ pɩtamʋna kpem se pala Isirɛɛlɩ ɛjaɖɛ taa yɔ.

¹⁶ Kifema ḿbʋ lɛ, Yoozuuwee kʋyɩ lɔŋ tanaŋ tɛɛ nɛ ɛyaa Izirɛɛlɩ ñɩma se powolo cejewiye cejewiye. Powobi ḿbʋ lɛ, palɩzɩ Yuuda cejewiye. ¹⁷ Peeye ɖɩɖɩ taa ñɩma wobi ɖɩɣa ɖɩɣa nɛ palɩzɩ Zeeraa ñɩŋga. Ɖɩnɛɛ ka-taa ñɩma ñɔɖɔm hɔʋ hɔʋ nɛ palɩzɩ Zabidii ñɩŋgʋ. ¹⁸ Pʋwayɩ lɛ, Zabidii hɔʋ taa abalaa tɩŋa wolo kʋɖʋm kʋɖʋm nɛ palɩzɩ weyi payaɣ se Akaanɩ yɔ. Ɛkɛ Yuuda cejewiye taa tʋ Kaarɩmii pɩyalʋ. Ɛkɛ Zabidii sɛyɩ nɛ Zeeraa sɛyɩ sɛyɩ. ¹⁹ Peeye Yoozuuwee ya-ɩ se, ɛ-pɩyalʋ! Nɛ eheyi-i se, ɛtɩlɩ ɛzɩma mbʋ KƖPAƔLƲ, Izirɛɛlɩ ñɩma Ɛsɔ hɩɖɛ sɛwa yɔ, nɛ ɛyɔɔdɩ toovenim. Se, eheyi ɛnʋʋ mbʋ ɛlaba yɔ, ɛtaamɛsɩ ɛnʋʋ natʋyʋ. ²⁰ Ɛyɔɔdɩ ḿbʋ lɛ, Akaanɩ heyi-i se, toovenim ɛnʋ wɛɛkɩnɩnɩ KƖPAƔLƲ, Izirɛɛlɩ Ɛsɔ. Se, ɛna mbʋ ɛnʋ laba yɔ: ²¹ se, ɛnʋ na koyindu ñɩm taa, Meezoopotamii toko sɔsɔʋ kɩpaŋgʋ nakʋyʋ nɛ liidiye ñɩɣyʋʋ ɛzɩ kiiloonaa naalɛ yɔ nɛ sɩka ñɩɣyʋʋ ɛzɩ kiiloo hɔɔlʋʋ yɔ. Se, ɛnʋ na-wɛ ḿbʋ lɛ, pɩla ɛnʋʋ liu nɛ ɛnʋ kpaɣ-wɛ. Se, ɛnʋ pim-wɛ ɛnʋ kɩɖanɖʋʋ hɛkʋ taa nɛ liidiye pɩ-tɛɛ.

²² Pɩlabɩ ḿbʋ lɛ, Yoozuuwee tiyi nabɛyɛ Akaanɩ kɩɖanɖʋʋ tɛɛ. Paba tiwoba lɛ, pamaɣnɩ wondu ńdʋʋ toovenim, pepim-tʋ kɩɖanɖʋʋ tɛɛ, liidiye pɩ-tɛɛ. ²³ Peeye palɩzɩ-tʋ nɛ powoni Yoozuuwee nɛ Izirɛɛlɩ ñɩma pɔ-cɔlɔ. Ɖɩnɛɛ paba kpaɣ-tʋ nɛ pasɩɩ KƖPAƔLƲ ɛsɩndaa ^c. ²⁴ Pʋwayɩ lɛ, Yoozuuwee nɛ Izirɛɛlɩ ñɩma pakpa Zeeraa sɛyɩ Akaanɩ nɛ powoni Akɔɔrɩ kajalaŋa ^d taa. Pɛkpɛndɩnɩ liidiye nɛ toko sɔsɔʋ nɛ sika kiiloo hɔɔlʋʋ nɛ ɛ-pɩyalaa nɛ ɛ-pɛlaa nɛ ɛ-naŋ nɛ ɛ-kpaŋasɩ nɛ e-heŋ nɛ ɛ-pʋŋ nɛ ɛ-kɩɖanɖʋʋ nɛ mbʋ pɩtɩŋa payɩ ɛwɛna yɔ nɛ powona. ²⁵ Patalɩ peeye lɛ, Yoozuuwee pɔzɩ Akaanɩ ɛnʋ se, pɩlabɩ ɛzɩma nɛ ɛsʋzɩ mbaa kigiluu taa? Se, KƖPAƔLƲ sʋzʋʋ-ɩ ɖɔɖɔ kigiluu taa puwiye nɖɩ. Peeye Izirɛɛlɩ ñɩma yaɣ ɛ nɛ ɛ-ñɩma pɛ nɛ pasɩ nɛ pɛwɛɛkɩ mbʋ ɛwɛna yɔ pɩtɩŋa payɩ. Pɛtɛma lɛ, pɔsɔ pa nɛ e-wondu ńdʋʋ miŋ. ²⁶ Pʋwayɩ lɛ, pakaa ɛ-yɔɔ kamaʋ sɔsɔʋ nakʋyʋ. Kɩwɛ peeye halɩ nɛ sɔnɔ. Mbʋ yebina nɛ payaɣ lone ńɖɩɩ halɩ nɛ sɔnɔ se, Akɔɔrɩ kajalaŋa.

Pɩlabɩ ḿbʋ lɛ, KƖPAƔLƲ pana hɛɛ.