8
Yoozuuwee wabʋ Ayɩ ñɩma nɛ ɛmʋ pɛ-tɛtʋ yɔ
1 Pʋwayɩ lɛ, KƖPAƔLƲ heyi Yoozuuwee se, sɔɔndʋ ɛtaakpa-ɩ, pɩtaatii e-tome taa. Se, ɛkpaɣ e-youlaɖaa tɩŋa nɛ ɛ nɛ wɛ powolo Ayɩ ñɩma wayɩ. Se, ɛcɔnɩ ɛna, ɛnʋ kpaɣ Ayɩ wiyaʋ nɛ ɛ́lɛ samaɣ nɛ ɛ-tɛtʋ nɛ ɛ-ɛjaɖɛ nɛ ɛɖʋzɩ ɛnʋʋ Yoozuuwee e-nesi taa. 2 Se, pɩwɛɛ se ɛla tɛtʋ ńdʋ nɛ ti-wiyaʋ ɛzɩ ɛɛlabʋ Yeeriikoo ñɩndʋ nɛ ti-wiyaʋ yɔ. Ɛlɛ, ɛ nɛ ɛ-samaɣ papɩzɩɣ pakpaɣ pa-ñɩm nɛ pa-kpɩna. Se, ɛñɔɔzɩ ɛ-ɛyaa nɛ pasʋʋ tɛtʋ taa nɛ tɩ-wayɩ kiŋ nɛ potudi tɩ-taa ñɩma nɛ pakʋyɩ pɔ-yɔɔ.
3 Peeye Yoozuuwee ñɔɔzɩ ɛ-tɩ se ɛ nɛ e-youlaɖaa powolo Ayɩ ñɩma wayɩ. Powokaɣ lɛ, ɛlɩzɩ sɔdɩŋ kutokiŋ niidozo (30000) nɛ etiyi-wɛ nɛ ɖoó 4 se, powolo tɛtʋ nɛ wayɩ nɛ pɛmɛlɩ nɛ paɖaŋ kpam, pataakɩlɩ-tʋ posinaʋ. 5 Se, piyele ɛnʋ nɛ samaɣ lɛ, ḿba ɖɔŋ nɛ pɔñɔtɩnɩ Ayɩ tɛtʋ nɛ hɔɔlʋʋ lɛɛkʋ. Se, alɩwaatʋ ndʋ tɩ-taa ñɩma lɩɣ se pakatɩ ḿba ɛzɩ kajalaɣ yɔ lɛ, ḿba se ɖɔɖɔ nɛ papɩsɩ . 6 Se, palɩɣ nɛ paɖʋ ḿba wayɩ lɛ, ḿba seɣ nɛ paba tɩŋɩɣ-wɛ nɛ pɔkɔɔ poposini pɛ-tɛtʋ. Pʋbʋ pɩlakɩ-wɛ ɛzɩ ḿba seɣ-wɛ ɛzɩ kajalaɣ yɔ. 7 Se, pɔkɔŋ poposini tɛtʋ siŋŋ lɛ, ḿba ñalɩɩ pa-ɖɩmɛlɩyɛ taa nɛ pamʋ-tʋ. Toovenim lɛ, pa-KƖPAƔLƲ Ɛsɔ ɖʋzɩ-tʋ pe-nesi taa. 8 Se, pamʋ-tʋ lɛ, paɖʋ-tʋ miŋ kpaagbaa ɛzɩ KƖPAƔLƲ heyuu-wɛ yɔ. Se, pɔɖɔ ndʋ ɛnʋ heyi-wɛ yɔ tɩ-yɔɔ ɖeu. 9 Peeye Yoozuuwee tiyi-wɛ nɛ powolo lone nɖɩ ɖɩ-taa se potudi-wɛ nɛ pakʋ-wɛ. Powoba lɛ, pacaɣnɩ Ayɩ tɛtʋ wɩsɩ ɖɩɖʋyɛ hɔɔlʋʋ taa. Lone nɖɩ ɖɩwɛ Ayɩ tɛtʋ nɛ Beetɛɛlɩ ñɩndʋ pɛ-hɛkʋ taa. Piyele Yoozuuwee nɛ youlaɖaa mba pɩkazaa yɔ, pacaɣ ɖoó ana.
10 Kifem tanaŋ cu lɛ, Yoozuuwee cɔɔ e-youlaɖaa yɔɔ kpɛɛɛ. Pʋwayɩ lɛ, ɛ nɛ Izirɛɛlɩ ñɩma taa sɔsaa pɛɖɛɛ-wɛ nɔɔ nɛ powolo pakʋyɩ Ayɩ ñɩma yɔɔ. 11 Ɛ nɛ youlaɖaa mba paawɛɛ yɔ patɩŋa payɩ powolo nɛ patalɩ tɛtʋ ńdʋ tɩ-ɛsɩndaa. Peeye po-youlaɖaa kpeɣli ɖama hayo kiŋ. Kajalaŋa nakɛyɛ tayɩ pa nɛ Ayɩ tɛtʋ pɛ-hɛkʋ taa. 12 Pʋwayɩ lɛ, Yoozuuwee lɩzɩ ɛyaa ɛzɩ kutokiŋ kagbaanzɩ (5000) yɔ nɛ eheyi-wɛ se pɛmɛlɩ tɛtʋ ńdʋ tɩ-wɩsɩ ɖɩɖʋyɛ hɔɔlʋʋ taa, Beetɛɛlɩ nɛ Ayɩ pɛ-hɛkʋ taa. 13 Alɩwaatʋ ndʋ e-youlaɖaa sakɩyɛ kpeɣli ɖama tɛtʋ nɛ tɩ-hayo kiŋ lɛ, mba pɩkazaa yɔ, paba ñacaɣnɩ tɩ-wɩsɩ ɖɩɖʋyɛ. Ɖoó ana a-taa lɛ, Yoozuuwee tɩŋnɩ kajalaŋa taa nɛ ɛñɔtɩnɩ tɛtʋ. 14 Kifem tanaŋ tɛɛ nɛ Ayɩ wiyaʋ na Isirɛɛlɩ ñɩma ḿbʋ lɛ, ɛ nɛ e-youlaɖaa patɩkʋyɩ tɛtʋ taa nɛ palɩɩ se powokini Yɔɔrɩdaŋ kajalaŋ hɔɔlʋʋ a taa, nɛ pakʋyɩ Izirɛɛlɩ ñɩma yɔɔ ɛzɩ paatɛm paba yɔɔ kʋyʋʋ yɔ. Ɛlɛ, ɛtatɩlɩ se lɛlaa ñaamɛlɩ pa-wayɩ se potudi-wɛ nɛ pakʋyɩ pɔ-yɔɔ. 15 Pɩlabɩ ḿbʋ lɛ, Yoozuuwee nɛ Izirɛɛlɩ ñɩma pala ɛzɩ pawabɩ-wɛ yɔ, nɛ pese pɛɖɛnɩ lakʋ taa kiŋ. 16 Ɖɩnɛɛ peseɣti Ayɩ tɛtʋ taa ñɩma tɩŋa se paɖʋ pa-wayɩ nɛ paba ɖʋ pa-wayɩ ɖɔɖɔ. Mbʋʋ pɩlaba nɛ Ayɩ ñɩma ḿba poposini tɛtʋ. 17 Pɩtakazɩ nɔɔyʋ Ayɩ nɛ Beetɛɛlɩ b pɛ-tɛtʋ taa se ɛtaɖʋ Izirɛɛlɩ ñɩma wayɩ. Pɩtatɩɩkazɩ paa abalʋ kʋɖʋm nɔɔyʋ se ɛ́lɛ ɛcɔnɩ tɩ-yɔɔ. 18 Peeye KƖPAƔLƲ heyi Yoozuuwee se, ɛkɛzɩ ɛ-kɩgbɛzɛŋ ŋgʋ ɛɖɔkaa yɔ nɛ Ayɩ tɛtʋ yɔɔ. Mbʋ pʋyɔɔ yɔ, ɛnʋ ɖʋzʋʋ-tʋ e-nesi taa. Nɛ Yoozuuwee la mbʋ ɖɔɖɔ. 19 Ɛ́lɛ tiposi e-nesi nɛ Izirɛɛlɩ ñɩma na lɛ, mba paamɛlaa yɔ, patɩlɩʋnɩ pa-ɖɩmɛlɩyɛ taa nɛ pese patalɩ tɛtʋ taa. Patalaa lɛ, pamʋ-tʋ nɛ patɩsɔbʋ-tʋ miŋ.
20 Ayɩ ñɩma kɔm pekisi pa-wayɩ lɛ, panaɣ ñɔsɩ kpaɣ pɛ-tɛtʋ taa. Nɔɔyʋ taanaɣ nʋmɔʋ se ese. Mbʋ pʋyɔɔ yɔ, Izirɛɛlɩ ñɩma mba peseɣaɣ nɛ pɛɖɛɣnɩ lakʋ taa yɔ, pekitaa papamnɩ Ayɩ ñɩma mba paba ɖʋwaɣ pa-wayɩ yɔ nɛ ɛza. 21 Toovenim lɛ, Yoozuuwee nɛ ɛ-ɛyaa pɔkɔm pana se mba paamɛlɩ tɛtʋ nɛ wayɩ yɔ, pamʋ-tʋ nɛ pɔsɔbɩ-tʋ miŋ lɛ, pekiti nɛ pakʋ tɩ-taa ñɩma. 22 Pɩlabɩ ḿbʋ lɛ, Izirɛɛlɩ ñɩma lɛlaa kʋyɩnɩ tɛtʋ taa se powoki pakʋyɩ pɔ-yɔɔ ɖɔɖɔ. Ɖɩnɛɛ pɔcɔ Ayɩ ñɩma kondiko nɛ pakʋ patɩŋa, pɩtakazɩ paa kʋɖʋm. 23 Piyele Ayɩ wiyaʋ yɔ, pakpa ɛ́lɛ nɛ ɛ-ɛza nɛ powoni-i Yoozuuwee cɔlɔ.
24 Mbʋʋ Izirɛɛlɩ ñɩma tɔyɩtɩ po-koyindinaa Ayɩ tɛyɛ yɔɔ, ɖenɖe paba kɔɖɔɔnɩ-wɛ yɔ. Pɛtɛm po-koyindinaa tɩŋa kʋʋ lɛ, pekiti tɛtʋ taa nɛ pɛtɛzɩ tɔyɩtʋʋ mba pɩkazaa yɔ. 25 Ayɩ ñɩma mba pakʋ-wɛ kɩyakʋ ŋgʋ ki-wiye yɔ, halaa nɛ abalaa pɛkpɛndɩ ɛyaa kutokiŋ hiu nɛ naalɛ (12000). 26 Yoozuuwee kɔɖɔkɩ ɛ-kɩgbɛzɛŋ nɛ ɛwɩlɩɣ Ayɩ tɛtʋ nɛ pɩkɔɔ pɩsɩnɩ alɩwaatʋ ndʋ pakʋ samaɣ tɩŋa yɔ. 27 Ɛlɛ, pakpaɣ tɛtʋ ndʋ tɩ-taa kpɩna nɛ ñɩm ɛzɩ KƖPAƔLƲ keheyuu Yoozuuwee yɔ. 28 Mbʋʋ Yoozuuwee sɔbɩ Ayɩ c tɛtʋ miŋ nɛ eyele tɩpɩsɩ ŋcɛyɛ, nɔɔyʋ fɛyɩ tɩ-taa halɩ nɛ sɔnɔ. 29 Powoni Ayɩ wiyaʋ Yoozuuwee cɔlɔ, ḿbʋ lɛ, eyele nɛ paɖɩ ɛ́lɛ liu tɛɛ nimiye nɛ popuzini tɩʋ ɖanaɣ nɛ kaɖanʋʋ. Wɩsɩ kɔm sɩɖʋ lɛ, Yoozuuwee tɔ se, petisi-i d. Petisi-i lɛ, powoni pɔlɔ tɛtʋ nɔnɔɔ taa nɛ pakaa ɛ-yɔɔ kamaʋ. Kamaʋ ŋ́gʋ kɩwɛ peeye halɩ nɛ sɔnɔ.
Pakalʋʋ paɣtʋ Ebaalɩ pʋʋ yɔɔ yɔ
30 Pʋwayɩ lɛ, Yoozuuwee ma KƖPAƔLƲ, Izirɛɛlɩ Ɛsɔ, kɩlaŋ ɖɩlayɛ Ebaalɩ pʋʋ e yɔɔ. 31 Ɛma-ɖɩ ɛzɩ KƖPAƔLƲ tʋmlaɖʋ Mooyiizi keheyuu Izirɛɛlɩ ñɩma yɔ. Pama ɖɩ-tɔm Mooyiizi paɣtʋ takayaɣ taa se, kɩlaŋ ɖɩlayɛ nɖɩ pamanɩ pɛ wena awɛ a-wɛtʋ, pototukuni-yɛ nɛ ñɩɣyʋʋ wonuu nakʋyʋ yɔ f. Ɛtɛm maʋ lɛ, palaa KƖPAƔLƲ kɩlaŋ weyi pɔhɔkɩ nɛ pɩñaɣ yɔ nɛ laŋhɛzɩyɛ g ñɩŋ . 32 Lone ńɖɩ ɖɩ-taa Yoozuuwee ma paɣtʋ ndʋ Mooyiizi kama Izirɛɛlɩ ñɩma yɔ́ɔ pɛh yɔɔ. 33 Palakaɣ ḿbʋ lɛ, Izirɛɛlɩ ñɩma nɛ pɔ-sɔsaa nɛ pa-ñʋndɩnaa nɛ pɔ-nɔɔ ɖɛyaa nɛ pɩkpɛdɩnɩ agɔma ḿba pɛwɛ pɛ-tɛ yɔ, paawɛ peeye. Paasɩŋa nɛ paɖʋ KƖPAƔLƲ Nɔɔ Haʋ Aɖakaɣ hɛkʋ, Leevii liɖe taa cɔjɔnaa mba pɔhɔɔlɩ Aɖakaɣ ŋga yɔ pɛ-ɛsɩndaa. Pɔ-hɔɔlʋʋ lɛɛkʋ kasɩŋ Garizim pʋʋ hɔɔlʋʋ taa inɛ lɛɛkʋ ñasɩŋ Ebaalɩ ñɩŋgʋ hɔɔlʋʋ taa. Mbʋʋ Mooyiizi kaɖʋwa se pala j nɛ pawazɩ Izirɛɛlɩ ñɩma yɔɔ. 34 Pʋwayɩ lɛ, Yoozuuwee kalɩ ndʋ pama paɣtʋ takayaɣ taa yɔ tɩ-tɩŋga. Wazʋʋ tɔm nɛ kpalʋʋ wɩlʋʋ ñɩndʋ. 35 Ɛkalɩ paɣtʋ ndʋ Mooyiizi mawa yɔ tɩ-tɩŋa payɩ ɛtɔsɔɔ natʋyʋ yɔɔ. Ɛkalɩ-tʋ Izirɛɛlɩ samaɣ tɩŋa, abalaa nɛ halaa nɛ pɩya nɛ agɔma mba pɛwɛ pɛ-tɛ yɔ, pɛ-ɛsɩnda.